| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[298] 8. уд̣̇умб̣араж̇аад̇агаван̣н̣анаа
[298] 8. Udumbarajātakavaṇṇanā
уд̣̇умб̣араа жимз баггаад̇и ид̣̇ам̣ сад̇т̇аа ж̇зд̇аванз вихаранд̇о ан̃н̃ад̇арам̣ бхигкум̣ аараб̣бха гат̇зси. со гира ан̃н̃ад̇арасмим̣ бажжанд̇аг̇аамагз вихаарам̣ гаарзд̇ваа васад̇и. раман̣ийяо вихааро бидтибаасаан̣з нивидто, манд̣̇ам̣ саммаж̇ж̇анадтаанам̣ уд̣̇агапаасугам̣, г̇ожараг̇аамо наад̇ид̣̇уурз наажжаасаннз, самбияааяамаанаа мануссаа бхигкам̣ д̣̇знд̇и. ат̇зго бхигку жааригам̣ жарамаано д̇ам̣ вихаарам̣ баабун̣и. нзваасиго д̇асса ааг̇анд̇угавад̇д̇ам̣ гад̇ваа бунад̣̇ивасз д̇ам̣ аад̣̇ааяа г̇аамам̣ бин̣д̣ааяа баависи. мануссаа бан̣ийд̇ам̣ бхигкам̣ д̣̇ад̇ваа сваад̇анааяа ниманд̇аяим̣су. ааг̇анд̇уго гад̇ибаахам̣ бхун̃ж̇ид̇ваа жинд̇зси – ‘‘згзнубааязна имам̣ бхигкум̣ ван̃жзд̇ваа ниггад̣дхид̇ваа имам̣ вихаарам̣ г̇ан̣хиссаамий’’д̇и. ат̇а нам̣ т̇зруубадтаанам̣ ааг̇ад̇ам̣ бужчи – ‘‘гим̣, аавусо, б̣уд̣̇д̇хуубадтаанам̣ наагаасий’’д̇и? ‘‘бханд̇з, имам̣ вихаарам̣ бадиж̇аг̇г̇анд̇о над̇т̇и, д̇знамхи на г̇ад̇абуб̣б̣о’’д̇и. ‘‘яаава д̇вам̣ б̣уд̣̇д̇хуубадтаанам̣ г̇анд̇ваа ааг̇ажчаси, д̇ааваахам̣ бадиж̇аг̇г̇иссаамий’’д̇и. ‘‘саад̇ху, бханд̇з’’д̇и нзваасиго ‘‘яаава мамааг̇аманаа т̇зрз маа бамаж̇ж̇ид̇т̇аа’’д̇и мануссаанам̣ вад̇ваа баггаами.
Udumbarācime pakkāti idaṃ satthā jetavane viharanto aññataraṃ bhikkhuṃ ārabbha kathesi. So kira aññatarasmiṃ paccantagāmake vihāraṃ kāretvā vasati. Ramaṇīyo vihāro piṭṭhipāsāṇe niviṭṭho, mandaṃ sammajjanaṭṭhānaṃ udakaphāsukaṃ, gocaragāmo nātidūre nāccāsanne, sampiyāyamānā manussā bhikkhaṃ denti. Atheko bhikkhu cārikaṃ caramāno taṃ vihāraṃ pāpuṇi. Nevāsiko tassa āgantukavattaṃ katvā punadivase taṃ ādāya gāmaṃ piṇḍāya pāvisi. Manussā paṇītaṃ bhikkhaṃ datvā svātanāya nimantayiṃsu. Āgantuko katipāhaṃ bhuñjitvā cintesi – ‘‘ekenupāyena imaṃ bhikkhuṃ vañcetvā nikkaḍḍhitvā imaṃ vihāraṃ gaṇhissāmī’’ti. Atha naṃ therūpaṭṭhānaṃ āgataṃ pucchi – ‘‘kiṃ, āvuso, buddhūpaṭṭhānaṃ nākāsī’’ti? ‘‘Bhante, imaṃ vihāraṃ paṭijagganto natthi, tenamhi na gatapubbo’’ti. ‘‘Yāva tvaṃ buddhūpaṭṭhānaṃ gantvā āgacchasi, tāvāhaṃ paṭijaggissāmī’’ti. ‘‘Sādhu, bhante’’ti nevāsiko ‘‘yāva mamāgamanā there mā pamajjitthā’’ti manussānaṃ vatvā pakkāmi.
д̇ад̇о бадтааяа ааг̇анд̇уго ‘‘д̇асса нзваасигасса аяан̃жа аяан̃жа д̣̇осо’’д̇и д̇з мануссз барибхинд̣̇и. ид̇ароби сад̇т̇аарам̣ ванд̣̇ид̇ваа бунааг̇ад̇о, ат̇асса со сзнаасанам̣ на ад̣̇ааси. со згасмим̣ таанз васид̇ваа бунад̣̇ивасз бин̣д̣ааяа г̇аамам̣ баависи, мануссаа саамийжимад̇д̇амби на гарим̣су. со виббадисаарий худ̇ваа буна ж̇зд̇аванам̣ г̇анд̇ваа д̇ам̣ гааран̣ам̣ бхигкуунам̣ аарожзси. д̇з бхигкуу д̇хаммасабхааяам̣ гат̇ам̣ самудтаабзсум̣ – ‘‘аавусо, асуго гира бхигку асугам̣ бхигкум̣ вихаараа ниггад̣дхид̇ваа саяам̣ д̇ад̇т̇а васий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва, буб̣б̣зби со имам̣ васанадтаанаа ниггад̣дхиязваа’’д̇и вад̇ваа ад̇ийд̇ам̣ аахари.
Tato paṭṭhāya āgantuko ‘‘tassa nevāsikassa ayañca ayañca doso’’ti te manusse paribhindi. Itaropi satthāraṃ vanditvā punāgato, athassa so senāsanaṃ na adāsi. So ekasmiṃ ṭhāne vasitvā punadivase piṇḍāya gāmaṃ pāvisi, manussā sāmīcimattampi na kariṃsu. So vippaṭisārī hutvā puna jetavanaṃ gantvā taṃ kāraṇaṃ bhikkhūnaṃ ārocesi. Te bhikkhū dhammasabhāyaṃ kathaṃ samuṭṭhāpesuṃ – ‘‘āvuso, asuko kira bhikkhu asukaṃ bhikkhuṃ vihārā nikkaḍḍhitvā sayaṃ tattha vasī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepi so imaṃ vasanaṭṭhānā nikkaḍḍhiyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о аран̃н̃з ругкад̣̇звад̇аа худ̇ваа ниб̣б̣ад̇д̇и. д̇ад̇т̇а вассаанз сад̇д̇асад̇д̇аахам̣ д̣̇зво васси. ат̇зго рад̇д̇амукакуд̣̇д̣̇агамаггадо згиссаа ановассигааяа баасаан̣ад̣̇арияаа васамаано згад̣̇ивасам̣ д̣̇арид̣̇ваарз ад̇зманадтаанз сукзна нисийд̣̇и. д̇ад̇т̇а зго гаал̣амукамахаамаггадо д̇инд̇о сийд̇зна бийл̣ияамаано вижаранд̇о д̇ам̣ д̇ат̇аанисиннам̣ д̣̇исваа ‘‘убааязна нам̣ нийхарид̇ваа зд̇т̇а васиссаамий’’д̇и жинд̇зд̇ваа гужчим̣ оламб̣зд̇ваа сухид̇аагаарам̣ д̣̇ассзд̇ваа д̇асса бурад̇о тад̇ваа батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto araññe rukkhadevatā hutvā nibbatti. Tattha vassāne sattasattāhaṃ devo vassi. Atheko rattamukhakhuddakamakkaṭo ekissā anovassikāya pāsāṇadariyā vasamāno ekadivasaṃ daridvāre atemanaṭṭhāne sukhena nisīdi. Tattha eko kāḷamukhamahāmakkaṭo tinto sītena pīḷiyamāno vicaranto taṃ tathānisinnaṃ disvā ‘‘upāyena naṃ nīharitvā ettha vasissāmī’’ti cintetvā kucchiṃ olambetvā suhitākāraṃ dassetvā tassa purato ṭhatvā paṭhamaṃ gāthamāha –
142.
142.
‘‘уд̣̇умб̣араа жимз баггаа, ниг̇род̇хаа жа габид̇т̇анаа;
‘‘Udumbarā cime pakkā, nigrodhā ca kapitthanā;
зхи нигкама бхун̃ж̇ассу, гим̣ ж̇игхажчааяа мияяасий’’д̇и.
Ehi nikkhama bhuñjassu, kiṃ jighacchāya miyyasī’’ti.
д̇ад̇т̇а габид̇т̇анаад̇и билагкаа. зхи нигкамаад̇и зд̇з уд̣̇умб̣араад̣̇аяо палабхааранамид̇аа, ахамби каад̣̇ид̇ваа сухид̇о ааг̇ад̇осми, д̇вамби г̇ажча бхун̃ж̇ассууд̇и.
Tattha kapitthanāti pilakkhā. Ehi nikkhamāti ete udumbarādayo phalabhāranamitā, ahampi khāditvā suhito āgatosmi, tvampi gaccha bhuñjassūti.
соби д̇асса важанам̣ суд̇ваа сад̣̇д̣̇ахид̇ваа палаани каад̣̇ид̇угаамо нигкамид̇ваа д̇ад̇т̇а д̇ад̇т̇а вижарид̇ваа гин̃жи алабханд̇о бунааг̇анд̇ваа д̇ам̣ анд̇обаасаан̣ад̣̇арияам̣ бависид̇ваа нисиннам̣ д̣̇исваа ‘‘ван̃жзссаами на’’нд̇и д̇асса бурад̇о тад̇ваа д̣̇уд̇ияам̣ г̇аат̇амааха –
Sopi tassa vacanaṃ sutvā saddahitvā phalāni khāditukāmo nikkhamitvā tattha tattha vicaritvā kiñci alabhanto punāgantvā taṃ antopāsāṇadariyaṃ pavisitvā nisinnaṃ disvā ‘‘vañcessāmi na’’nti tassa purato ṭhatvā dutiyaṃ gāthamāha –
143.
143.
‘‘звам̣ со сухид̇о ход̇и, яо вуд̣дхамабажааяад̇и;
‘‘Evaṃ so suhito hoti, yo vuḍḍhamapacāyati;
яат̇аахамаж̇ж̇а сухид̇о, д̣̇умабаггаани маасид̇о’’д̇и.
Yathāhamajja suhito, dumapakkāni māsito’’ti.
д̇ад̇т̇а д̣̇умабаггаани маасид̇од̇и уд̣̇умб̣араад̣̇ийни ругкапалаани каад̣̇ид̇ваа асид̇о д̇хаад̇о сухид̇о.
Tattha dumapakkāni māsitoti udumbarādīni rukkhaphalāni khāditvā asito dhāto suhito.
д̇ам̣ суд̇ваа махаамаггадо д̇ад̇ияам̣ г̇аат̇амааха –
Taṃ sutvā mahāmakkaṭo tatiyaṃ gāthamāha –
144.
144.
‘‘яам̣ ванзж̇о ванзж̇асса, ван̃жзяяа габино габи;
‘‘Yaṃ vanejo vanejassa, vañceyya kapino kapi;
д̣̇ахаро габи сад̣̇д̇хзяяа, на хи ж̇ин̣н̣о ж̇араагабий’’д̇и.
Daharo kapi saddheyya, na hi jiṇṇo jarākapī’’ti.
д̇ассад̇т̇о – яам̣ ванз ж̇аад̇о габи ванз ж̇аад̇асса габино ван̃жанам̣ гарзяяа, д̇ам̣ д̇аяаа сад̣̇исо д̣̇ахаро ваанаро сад̣̇д̣̇ахзяяа, маад̣̇исо бана ж̇ин̣н̣о ж̇араагаби махаллагамаггадо на хи сад̣̇д̣̇ахзяяа, сад̇агкад̇д̇умби бхан̣анд̇асса д̇умхаад̣̇исасса на сад̣̇д̣̇ахад̇и. имасмин̃хи химаванд̇абад̣̇зсз саб̣б̣ам̣ палаапалам̣ вассзна гилиннам̣ бад̇ид̇ам̣, буна д̇ава ид̣̇ам̣ таанам̣ над̇т̇и, г̇ажчаад̇и. со д̇ад̇ова баггаами.
Tassattho – yaṃ vane jāto kapi vane jātassa kapino vañcanaṃ kareyya, taṃ tayā sadiso daharo vānaro saddaheyya, mādiso pana jiṇṇo jarākapi mahallakamakkaṭo na hi saddaheyya, satakkhattumpi bhaṇantassa tumhādisassa na saddahati. Imasmiñhi himavantapadese sabbaṃ phalāphalaṃ vassena kilinnaṃ patitaṃ, puna tava idaṃ ṭhānaṃ natthi, gacchāti. So tatova pakkāmi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа куд̣̇д̣̇агамаггадо нзваасиго ахоси, гаал̣амахаамаггадо ааг̇анд̇уго, ругкад̣̇звад̇аа бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā khuddakamakkaṭo nevāsiko ahosi, kāḷamahāmakkaṭo āgantuko, rukkhadevatā pana ahameva ahosi’’nti.
уд̣̇умб̣араж̇аад̇агаван̣н̣анаа адтамаа.
Udumbarajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 298. уд̣̇умб̣араж̇аад̇агам̣ • 298. Udumbarajātakaṃ
