| Library / Tipiṭaka / д̇ибидага • Tipiṭaka / д̣̇ийгханигааяа (дийгаа) • Dīghanikāya (ṭīkā) |
2. уд̣̇умб̣аригасуд̇д̇аван̣н̣анаа
2. Udumbarikasuttavaṇṇanā
ниг̇род̇хабариб̣б̣ааж̇агавад̇т̇уван̣н̣анаа
Nigrodhaparibbājakavatthuvaṇṇanā
49. уд̣̇умб̣аригааяаад̇и самб̣анд̇хз саамиважананд̇и ааха ‘‘уд̣̇умб̣аригааяа д̣̇звияаа санд̇агз бариб̣б̣ааж̇агаараамз’’д̇и. ‘‘уд̣̇умб̣аригааяа’’нд̇и ваа баато, д̇ат̇аа сад̇и ад̇хигаран̣з зд̇ам̣ бхуммам̣. аяан̃хзд̇т̇а ад̇т̇о уд̣̇умб̣аригааяа ран̃н̃о д̣̇звияаа ниб̣б̣ад̇д̇ид̇о аараамо уд̣̇умб̣аригаа, д̇ассам̣ уд̣̇умб̣аригааяам̣. д̇знааха ‘‘уд̣̇умб̣аригааяа д̣̇звияаа санд̇агз’’д̇и. д̇ааяа хи ниб̣б̣ад̇д̇ид̇о д̇ассаа санд̇аго. варан̣аад̣̇ибаатавасзна жзд̇т̇а ниб̣б̣ад̇д̇ад̇т̇аб̣од̇хагасса сад̣̇д̣̇асса ад̣̇ассанам̣. санд̇хаанод̇и бхиннаанамби д̇зсам̣ санд̇хаабанзна ‘‘санд̇хаано’’д̇и звам̣ лад̣̇д̇ханаамо. сам̣ван̣н̣ид̇од̇и басам̣сид̇о. ирияад̇ийд̇и бавад̇д̇ад̇и. ариязна н̃аан̣знаад̇и гилзсзхи аарагад̇д̇аа ариязна логуд̇д̇арзна н̃аан̣зна. арияааяа вимуд̇д̇ияаад̇и сувисуд̣̇д̇хааяа логуд̇д̇арапалавимуд̇д̇ияаа.
49.Udumbarikāyāti sambandhe sāmivacananti āha ‘‘udumbarikāya deviyā santake paribbājakārāme’’ti. ‘‘Udumbarikāya’’nti vā pāṭho, tathā sati adhikaraṇe etaṃ bhummaṃ. Ayañhettha attho udumbarikāya rañño deviyā nibbattito ārāmo udumbarikā, tassaṃ udumbarikāyaṃ. Tenāha ‘‘udumbarikāya deviyā santake’’ti. Tāya hi nibbattito tassā santako. Varaṇādipāṭhavasena cettha nibbattatthabodhakassa saddassa adassanaṃ. Sandhānoti bhinnānampi tesaṃ sandhāpanena ‘‘sandhāno’’ti evaṃ laddhanāmo. Saṃvaṇṇitoti pasaṃsito. Iriyatīti pavattati. Ariyena ñāṇenāti kilesehi ārakattā ariyena lokuttarena ñāṇena. Ariyāya vimuttiyāti suvisuddhāya lokuttaraphalavimuttiyā.
д̣̇иваа-сад̣̇д̣̇о д̣̇ина-сад̣̇д̣̇о вияа д̣̇ивасабарияааяо, д̇асса висзсанабхаавзна вужжамаано д̣̇иваа-сад̣̇д̣̇о сависзсам̣ д̣̇ивасабхааг̇ам̣ д̣̇ийбзд̇ийд̇и ааха ‘‘д̣̇ивасасса д̣̇иваа’’д̇иаад̣̇и. яасмаа самаабаннасса жид̇д̇ам̣ наанаарамман̣ад̇о бадисам̣хад̇ам̣ ход̇и, жхаанасаман̇г̇ий жа бавивзгуубаг̇аманзна сан̇г̇ан̣игаабхаавад̇о згаагияааяа нилийно вияа ход̇и, д̇асмаа вуд̇д̇ам̣ ‘‘д̇ад̇о д̇ад̇о…бз… г̇ад̇о’’д̇и. мано бхаванд̇и манасо вивадданиссид̇ам̣ вад̣дхим̣ ааваханд̇ийд̇и манобхааванияаад̇и ааха ‘‘манавад̣дхагаана’’нд̇иаад̣̇и. уннамад̇и на сан̇гужад̇и, алийнан̃жа ход̇ийд̇и ад̇т̇о.
Divā-saddo dina-saddo viya divasapariyāyo, tassa visesanabhāvena vuccamāno divā-saddo savisesaṃ divasabhāgaṃ dīpetīti āha ‘‘divasassa divā’’tiādi. Yasmā samāpannassa cittaṃ nānārammaṇato paṭisaṃhataṃ hoti, jhānasamaṅgī ca pavivekūpagamanena saṅgaṇikābhāvato ekākiyāya nilīno viya hoti, tasmā vuttaṃ ‘‘tato tato…pe… gato’’ti. Mano bhavanti manaso vivaṭṭanissitaṃ vaḍḍhiṃ āvahantīti manobhāvaniyāti āha ‘‘manavaḍḍhakāna’’ntiādi. Unnamati na saṅkucati, alīnañca hotīti attho.
51. яаавад̇аад̇и яааванд̇од̇и аяамзд̇т̇а ад̇т̇од̇и ааха ‘‘яад̇д̇агаа’’д̇и. д̇зсанд̇и нид̣̇д̇хааран̣з саамиважанам̣. нид̣̇д̇хааран̣ан̃жа гзнажи висзсзна ижчид̇аб̣б̣ам̣. язхи жа г̇ун̣ависзсзхи саманнааг̇ад̇аа бхаг̇авад̇о саавагаа убаасагаа рааж̇аг̇ахз бадивасанд̇и, аяан̃жа д̇зхи саманнааг̇ад̇од̇и имам̣ висзсам̣ д̣̇ийбзд̇ум̣ ‘‘д̇зсам̣ аб̣бханд̇аро’’д̇и вуд̇д̇ам̣. д̇знааха ‘‘бхаг̇авад̇о гираа’’д̇иаад̣̇и.
51.Yāvatāti yāvantoti ayamettha atthoti āha ‘‘yattakā’’ti. Tesanti niddhāraṇe sāmivacanaṃ. Niddhāraṇañca kenaci visesena icchitabbaṃ. Yehi ca guṇavisesehi samannāgatā bhagavato sāvakā upāsakā rājagahe paṭivasanti, ayañca tehi samannāgatoti imaṃ visesaṃ dīpetuṃ ‘‘tesaṃ abbhantaro’’ti vuttaṃ. Tenāha ‘‘bhagavato kirā’’tiādi.
52. д̇зсанд̇и бариб̣б̣ааж̇агаанам̣. гат̇ааяаад̇и д̇иражчаанагат̇ааяа. д̣̇ассанзнаад̇и д̣̇идтид̣̇ассанзна. аагаббзнаад̇и взсзна. гуд̇д̇знаад̇и гирияааяа. аажаарзнаад̇и ан̃н̃аман̃н̃асмим̣ аажарид̇аб̣б̣ааажаарзна. вихаарзнаад̇и рад̇д̇инд̣̇ивам̣ вихарид̇аб̣б̣авихаран̣зна. ирияаабат̇знаад̇и таанаад̣̇иирияаабат̇зна. ан̃н̃аагаарад̇ааяа ан̃н̃ад̇ид̇т̇з нияуд̇д̇аад̇и ан̃н̃ад̇ид̇т̇ияаа. сан̇г̇анд̇ваа самааг̇анд̇ваа раасий худ̇ваа барзхи нисиннадтаанз. аран̃н̃аани жа д̇аани ванабад̇т̇аани жаад̇и аран̃н̃аванабад̇т̇аани. д̇ад̇т̇а яам̣ аран̃н̃аган̇г̇анибпаад̣̇агам̣ ааран̃н̃агаанам̣, д̇ам̣ ‘‘аран̃н̃а’’нд̇и взд̣̇ид̇аб̣б̣ам̣. ванабад̇т̇анд̇и г̇ааманд̇ам̣ ад̇иггамид̇ваа мануссаанам̣ анубажаарадтаанам̣, яад̇т̇а на гасийяад̇и на ваббийяад̇и. вуд̇д̇ан̃хзд̇ам̣ ‘‘ванабад̇т̇анд̇и д̣̇уураанамзд̇ам̣ сзнаасанаанам̣ ад̇хиважана’’нд̇и ‘‘ванабад̇т̇анд̇и ванасан̣д̣аанамзд̇ам̣ сзнаасанаанам̣, ванабад̇т̇анд̇и бхийсанагаанамзд̇ам̣, ванабад̇т̇анд̇и саломахам̣саанамзд̇ам̣, ванабад̇т̇анд̇и барияанд̇аанамзд̇ам̣ ванабад̇т̇анд̇и на мануссуубажаараанамзд̇ам̣ сзнаасанаанам̣ ад̇хиважана’’нд̇и (вибха. 531). д̇зна вуд̇д̇ам̣ ‘‘г̇аамуубажаарад̇о муд̇д̇ааний’’д̇иаад̣̇и. банд̇аанийд̇и барияанд̇аани ад̇ид̣̇уураани. д̇знааха ‘‘д̣̇уурад̇арааний’’д̇иаад̣̇и. вихааруубажаарзнаад̇и вихаарасса убажаараббад̣̇зсзна. ад̣̇д̇хигаж̇анассаад̇и маг̇г̇аг̇аамино ж̇анасса. манд̣̇асад̣̇д̣̇аанийд̇и ужжаасад̣̇д̣̇амахаасад̣̇д̣̇аабхаавад̇о д̇анусад̣̇д̣̇аани. мануссзхи самааг̇амма згаж̇жхам̣ бавад̇д̇ид̇асад̣̇д̣̇о ниг̇гхосо, д̇асса яасмаа ад̇т̇о д̣̇уб̣б̣ибхаавид̇о ход̇и, д̇асмаа вуд̇д̇ам̣ ‘‘авибхаавид̇ад̇т̇зна ниг̇гхосзнаа’’д̇и. виг̇ад̇аваад̇аанийд̇и виг̇ад̇асад̣̇д̣̇аани. ‘‘рахасса гаран̣асса яуд̇д̇ааний’’д̇и иминааби д̇зсам̣ таанаанам̣ аран̃н̃алагкан̣аяуд̇д̇ад̇ам̣, ж̇анавивид̇д̇ад̇ам̣, ванавивид̇д̇амзва жа вибхаавзд̇и, д̇ат̇аа ‘‘згийбхаавасса ануруубааний’’д̇и иминаа.
52.Tesanti paribbājakānaṃ. Kathāyāti tiracchānakathāya. Dassanenāti diṭṭhidassanena. Ākappenāti vesena. Kuttenāti kiriyāya. Ācārenāti aññamaññasmiṃ ācaritabbaācārena. Vihārenāti rattindivaṃ viharitabbaviharaṇena. Iriyāpathenāti ṭhānādiiriyāpathena. Aññākāratāya aññatitthe niyuttāti aññatitthiyā. Saṅgantvā samāgantvā rāsī hutvā parehi nisinnaṭṭhāne. Araññāni ca tāni vanapatthāni cāti araññavanapatthāni. Tattha yaṃ araññakaṅganipphādakaṃ āraññakānaṃ, taṃ ‘‘arañña’’nti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vappīyati. Vuttañhetaṃ ‘‘vanapatthanti dūrānametaṃ senāsanānaṃ adhivacana’’nti ‘‘vanapatthanti vanasaṇḍānametaṃ senāsanānaṃ, vanapatthanti bhīsanakānametaṃ, vanapatthanti salomahaṃsānametaṃ, vanapatthanti pariyantānametaṃ vanapatthanti na manussūpacārānametaṃ senāsanānaṃ adhivacana’’nti (vibha. 531). Tena vuttaṃ ‘‘gāmūpacārato muttānī’’tiādi. Pantānīti pariyantāni atidūrāni. Tenāha ‘‘dūratarānī’’tiādi. Vihārūpacārenāti vihārassa upacārappadesena. Addhikajanassāti maggagāmino janassa. Mandasaddānīti uccāsaddamahāsaddābhāvato tanusaddāni. Manussehi samāgamma ekajjhaṃ pavattitasaddo nigghoso, tassa yasmā attho dubbibhāvito hoti, tasmā vuttaṃ ‘‘avibhāvitatthena nigghosenā’’ti. Vigatavātānīti vigatasaddāni. ‘‘Rahassa karaṇassa yuttānī’’ti imināpi tesaṃ ṭhānānaṃ araññalakkhaṇayuttataṃ, janavivittataṃ, vanavivittameva ca vibhāveti, tathā ‘‘ekībhāvassa anurūpānī’’ti iminā.
53. гзнаад̇и хзд̇умхи, сахаяог̇з жа гаран̣аважананд̇и ааха ‘‘гзна гааран̣зна гзна буг̇г̇алзна сад̣̇д̇хи’’нд̇и. згоби хи вибхад̇д̇инид̣̇д̣̇зсо анзгад̇т̇авибхаавано ход̇и, д̇ат̇аа д̇ад̣̇д̇хид̇ад̇т̇абад̣̇асамаахаарзд̇и.
53.Kenāti hetumhi, sahayoge ca karaṇavacananti āha ‘‘kena kāraṇena kena puggalena saddhi’’nti. Ekopi hi vibhattiniddeso anekatthavibhāvano hoti, tathā taddhitatthapadasamāhāreti.
сам̣санд̣̇ананд̇и аалаабасаллаабавасзна гат̇аасам̣санд̣̇анам̣. н̃аан̣аб̣яад̇д̇абхааванд̇и б̣яад̇д̇ан̃аан̣абхаавам̣, со бана барасса важанз уд̇д̇арад̣̇аанавасзна, барзна ваа вуд̇д̇ауд̇д̇арз бажжуд̇д̇арад̣̇аанавасзна сияаад̇и ааха ‘‘уд̇д̇арабажжуд̇д̇аранаязнаа’’д̇и. яо хи барасса важанам̣ д̇ибугкалзна наязна руубзд̇и, д̇ат̇аа барасса руубанаважанам̣ ж̇аад̇ибхаавам̣ аабаад̣̇зд̇и, д̇асса д̇аад̣̇исам̣ важанасабхаавам̣ н̃аан̣авзяяад̇д̇ияам̣ вибхаавзд̇и баагадам̣ гарод̇ийд̇и. сун̃н̃ааг̇аарзсу надтаад̇и сун̃н̃ааг̇аарзсу ниваасзсу надтаа винадтаа абхаавам̣ г̇ад̇аа. наасса бан̃н̃аа нассзяяа д̇зхи д̇зхи гад̇абужчанабадибужчананимид̇д̇ам̣ наанаабадибхаануббад̇д̇ияаа висаарамаабаннам̣ бужчид̇ам̣ бан̃хам̣ виссаж̇ж̇зд̇ум̣ асамад̇т̇ад̇ааяа. ород̇хзяяаамаад̇и нируссаахам̣ вияа гаронд̇аа аварод̇хзяяаама, д̇ам̣ барасса ород̇ханам̣ ваад̣̇аж̇аалзна винанд̇ханам̣ вияа ход̇ийд̇и ааха ‘‘винанд̇хзяяаамаа’’д̇и . д̇ад̣̇ад̇т̇ам̣ д̇зна д̇ужчагумбхинид̣̇ассанам̣ гад̇ам̣, д̇ам̣ б̣яад̇ирзгамукзна д̣̇ассзд̇ум̣ ‘‘буурид̇агхадо хий’’д̇иаад̣̇и вуд̇д̇ам̣.
Saṃsandananti ālāpasallāpavasena kathāsaṃsandanaṃ. Ñāṇabyattabhāvanti byattañāṇabhāvaṃ, so pana parassa vacane uttaradānavasena, parena vā vuttauttare paccuttaradānavasena siyāti āha ‘‘uttarapaccuttaranayenā’’ti. Yo hi parassa vacanaṃ tipukkhalena nayena rūpeti, tathā parassa rūpanavacanaṃ jātibhāvaṃ āpādeti, tassa tādisaṃ vacanasabhāvaṃ ñāṇaveyyattiyaṃ vibhāveti pākaṭaṃ karotīti. Suññāgāresu naṭṭhāti suññāgāresu nivāsesu naṭṭhā vinaṭṭhā abhāvaṃ gatā. Nāssa paññā nasseyya tehi tehi katapucchanapaṭipucchananimittaṃ nānāpaṭibhānuppattiyā visāramāpannaṃ pucchitaṃ pañhaṃ vissajjetuṃ asamatthatāya. Orodheyyāmāti nirussāhaṃ viya karontā avarodheyyāma, taṃ parassa orodhanaṃ vādajālena vinandhanaṃ viya hotīti āha ‘‘vinandheyyāmā’’ti . Tadatthaṃ tena tucchakumbhinidassanaṃ kataṃ, taṃ byatirekamukhena dassetuṃ ‘‘pūritaghaṭo hī’’tiādi vuttaṃ.
б̣алам̣ д̣̇ийбзнд̇од̇и абхууд̇амзва ад̇д̇ано н̃аан̣аб̣алам̣ багаасзнд̇о. асамбхиннанд̇и ж̇аад̇исамбхзд̣̇аабхаавзна асамбхиннам̣. ан̃н̃аж̇аад̇исамбхзд̣̇з сад̇и ассад̇арасса ассасса ж̇аад̇абхааво вияа сийхассаби сийхат̇аамаабхааво сияаад̇и ааха ‘‘асамбхиннагзсарасийха’’нд̇и. таанасо ваад̇и д̇ан̇кан̣з зва.
Balaṃ dīpentoti abhūtameva attano ñāṇabalaṃ pakāsento. Asambhinnanti jātisambhedābhāvena asambhinnaṃ. Aññajātisambhede sati assatarassa assassa jātabhāvo viya sīhassapi sīhathāmābhāvo siyāti āha ‘‘asambhinnakesarasīha’’nti. Ṭhānaso vāti taṅkhaṇe eva.
54. ‘‘сумааг̇ад̇хаа наама над̣̇ий’’д̇и гзжи, д̇ам̣ мижчаад̇и д̣̇ассзнд̇о ‘‘сумааг̇ад̇хаа наама богкаран̣ий’’д̇и вад̇ваа д̇ассаа богкаран̣ибхаавасса суд̇д̇анд̇арз ааг̇ад̇ад̇ам̣ д̣̇ассзд̇ум̣ ‘‘яассаа д̇ийрз’’д̇иаад̣̇и вуд̇д̇ам̣. мораанам̣ ниваабо зд̇т̇аад̇и мораниваабо. б̣яад̇хигаран̣аанамби хи бад̣̇аанам̣ б̣аахирад̇т̇асамаасо ход̇иязва яат̇аа ‘‘урасиломо’’д̇и. ат̇а ваа нивуд̇т̇ам̣ зд̇т̇аад̇и ниваабо, мораанам̣ ниваабо мораниваабо, мораанам̣ ниваабад̣̇иннадтаанам̣. д̇знааха ‘‘яад̇т̇а мораана’’нд̇иаад̣̇и. яасмаа ниг̇род̇хо д̇абож̇иг̇ужчаваад̣̇о, саасанз жа бхигкуу ад̇д̇агиламат̇аануяог̇ам̣ важ̇ж̇зд̇ваа бхааванаануяог̇зна барамассаасаббад̇д̇з вихаранд̇з бассад̇и, д̇асмаа ‘‘гат̇ам̣ ну ко саман̣о г̇од̇амо гааяагиламат̇зна винаава саавагз винзд̇ий’’д̇и сан̃ж̇аад̇асанд̣̇зхо ‘‘го наама со’’д̇иаад̣̇инаа бхаг̇аванд̇ам̣ бужчи. ассасад̇и анусан̇гид̇абарисан̇гид̇о ход̇и зд̇знаад̇и ассаасо, бийд̇исоманассанд̇и ааха ‘‘ассаасаббад̇д̇аад̇и д̇удтиббад̇д̇аа соманассаббад̇д̇аа’’д̇и. ад̇хиго сздто аасаяо ниссаяо аж̇жхаасаяод̇и ааха ‘‘уд̇д̇аманиссаяабхууд̇а’’нд̇и. аад̣̇ибхууд̇ам̣ бураад̇анам̣ сздтажарияам̣ аад̣̇иб̣рахмажарияам̣, логуд̇д̇арамаг̇г̇анд̇и ад̇т̇о. д̇ат̇аа хзса саб̣б̣аб̣уд̣̇д̇хабажжзгаб̣уд̣̇д̇хасаавагзхи д̇знзва аагаарзна ад̇хиг̇ад̇о. д̇знааха ‘‘бураан̣а…бз… арияамаг̇г̇а’’нд̇и. д̇ат̇аа хи д̇ам̣ бхаг̇аваа ‘‘ад̣̇д̣̇аса бураан̣ам̣ маг̇г̇ам̣ бураан̣аман̃ж̇аса’’нд̇и авожа. буурзд̇ваа бхааванаабаарибууривасзна. ‘‘буурзд̇ваа’’д̇и ваа ид̣̇ам̣ ‘‘аж̇жхаасаяам̣ аад̣̇иб̣рахмажарияа’’нд̇и зд̇т̇а баатасзсод̇и вад̣̇анд̇и. ‘‘аж̇жхаасаяам̣ аад̣̇иб̣рахмажарияам̣ бадиж̇аананд̇и ассаасаббад̇д̇аа’’д̇и звам̣ ваа зд̇т̇а яож̇анаа.
54. ‘‘Sumāgadhā nāma nadī’’ti keci, taṃ micchāti dassento ‘‘sumāgadhā nāma pokkharaṇī’’ti vatvā tassā pokkharaṇibhāvassa suttantare āgatataṃ dassetuṃ ‘‘yassā tīre’’tiādi vuttaṃ. Morānaṃ nivāpo etthāti moranivāpo. Byadhikaraṇānampi hi padānaṃ bāhiratthasamāso hotiyeva yathā ‘‘urasilomo’’ti. Atha vā nivutthaṃ etthāti nivāpo, morānaṃ nivāpo moranivāpo, morānaṃ nivāpadinnaṭṭhānaṃ. Tenāha ‘‘yattha morāna’’ntiādi. Yasmā nigrodho tapojigucchavādo, sāsane ca bhikkhū attakilamathānuyogaṃ vajjetvā bhāvanānuyogena paramassāsappatte viharante passati, tasmā ‘‘kathaṃ nu kho samaṇo gotamo kāyakilamathena vināva sāvake vinetī’’ti sañjātasandeho ‘‘ko nāma so’’tiādinā bhagavantaṃ pucchi. Assasati anusaṅkitaparisaṅkito hoti etenāti assāso, pītisomanassanti āha ‘‘assāsappattāti tuṭṭhippattā somanassappattā’’ti. Adhiko seṭṭho āsayo nissayo ajjhāsayoti āha ‘‘uttamanissayabhūta’’nti. Ādibhūtaṃ purātanaṃ seṭṭhacariyaṃ ādibrahmacariyaṃ, lokuttaramagganti attho. Tathā hesa sabbabuddhapaccekabuddhasāvakehi teneva ākārena adhigato. Tenāha ‘‘purāṇa…pe… ariyamagga’’nti. Tathā hi taṃ bhagavā ‘‘addasa purāṇaṃ maggaṃ purāṇamañjasa’’nti avoca. Pūretvā bhāvanāpāripūrivasena. ‘‘Pūretvā’’ti vā idaṃ ‘‘ajjhāsayaṃ ādibrahmacariya’’nti ettha pāṭhasesoti vadanti. ‘‘Ajjhāsayaṃ ādibrahmacariyaṃ paṭijānanti assāsappattā’’ti evaṃ vā ettha yojanā.
д̇абож̇иг̇ужчааваад̣̇аван̣н̣анаа
Tapojigucchāvādavaṇṇanā
55. багад̇аа худ̇ваа вижчиннаа виббагад̇аад̇и ааха ‘‘анидтид̇аава худ̇ваа тид̇аа’’д̇и.
55. Pakatā hutvā vicchinnā vippakatāti āha ‘‘aniṭṭhitāva hutvā ṭhitā’’ti.
56. вийриязна баабаж̇иг̇ужчанаваад̣̇од̇и луукабадибад̇д̇исаад̇ханзна вийриязна ад̇д̇ад̇ан̣хаавинод̣̇анавасзна баабагасса ж̇иг̇ужчанаваад̣̇о. ж̇иг̇ужчад̇ийд̇и ж̇иг̇ужчо, д̇аб̣бхааво ж̇зг̇ужчам̣, ад̇хигам̣ ж̇зг̇ужчам̣ ад̇хиж̇зг̇ужчам̣, ад̇ивияа баабаж̇иг̇ужчанам̣, д̇асмим̣ ад̇хиж̇зг̇ужчз. гааяад̣̇ал̣хийб̣ахулам̣ д̇абад̇ийд̇и д̇або, ад̇д̇агиламат̇аануяог̇авасзна бавад̇д̇ам̣ вийрияам̣, д̇зна гааяад̣̇ал̣хийб̣ахулад̇аанимид̇д̇асса баабасса ж̇иг̇ужчанам̣, вираж̇ж̇анамби д̇абож̇иг̇ужчаад̇и ааха ‘‘вийриязна баабаж̇иг̇ужчаа’’д̇и. гхаасажчаад̣̇анасзнаасанад̇ан̣хаавинод̣̇анамукзна ад̇д̇аснзхавираж̇ж̇ананд̇и ад̇т̇о. убари вужжамаанзсу наанаагаарзсу ажзлагаад̣̇ивад̇зсу згаж̇жхам̣ самаад̣̇иннаанам̣ барисод̇ханамзвзд̇т̇а баарибууран̣ам̣ , на саб̣б̣зсам̣ анавасзсад̇о самаад̣̇аанам̣ д̇асса асамбхавад̇од̇и ааха ‘‘барибун̣н̣аад̇и барисуд̣̇д̇хаа’’д̇и. барисод̇ханан̃жа нзсам̣ сагасамаяасид̣̇д̇хзна наязна бадибаж̇ж̇анамзва. вибарияааязна абарисуд̣̇д̇хад̇аа взд̣̇ид̇аб̣б̣аа.
56.Vīriyena pāpajigucchanavādoti lūkhapaṭipattisādhanena vīriyena attataṇhāvinodanavasena pāpakassa jigucchanavādo. Jigucchatīti jiguccho, tabbhāvo jegucchaṃ, adhikaṃ jegucchaṃ adhijegucchaṃ, ativiya pāpajigucchanaṃ, tasmiṃ adhijegucche. Kāyadaḷhībahulaṃ tapatīti tapo, attakilamathānuyogavasena pavattaṃ vīriyaṃ, tena kāyadaḷhībahulatānimittassa pāpassa jigucchanaṃ, virajjanampi tapojigucchāti āha ‘‘vīriyena pāpajigucchā’’ti. Ghāsacchādanasenāsanataṇhāvinodanamukhena attasnehavirajjananti attho. Upari vuccamānesu nānākāresu acelakādivatesu ekajjhaṃ samādinnānaṃ parisodhanamevettha pāripūraṇaṃ, na sabbesaṃ anavasesato samādānaṃ tassa asambhavatoti āha ‘‘paripuṇṇāti parisuddhā’’ti. Parisodhanañca nesaṃ sakasamayasiddhena nayena paṭipajjanameva. Vipariyāyena aparisuddhatā veditabbā.
57. ‘‘згам̣ бан̃хамби на гат̇зд̇ий’’д̇и батамам̣ ад̇д̇анаа бужчид̇абан̃хасса агат̇ид̇ад̇д̇аа вуд̇д̇ам̣.
57.‘‘Ekaṃ pañhampi na kathetī’’ti paṭhamaṃ attanā pucchitapañhassa akathitattā vuttaṃ.
д̇абаниссид̇агод̇и ад̇д̇агиламат̇аануяог̇асан̇каад̇ам̣ д̇абам̣ ниссааяа самаад̣̇ааяа вад̇д̇анаго. сийханаад̣̇зд̇и сийханаад̣̇асуд̇д̇аван̣н̣анааяам̣. яасмаа д̇ад̇т̇а вид̇т̇аарид̇анаязна взд̣̇ид̇аб̣б̣аани, д̇асмаа д̇ассаа ад̇т̇аббагаасанааяа вуд̇д̇анаязнаби взд̣̇ид̇аб̣б̣аани.
Tapanissitakoti attakilamathānuyogasaṅkhātaṃ tapaṃ nissāya samādāya vattanako. Sīhanādeti sīhanādasuttavaṇṇanāyaṃ. Yasmā tattha vitthāritanayena veditabbāni, tasmā tassā atthappakāsanāya vuttanayenapi veditabbāni.
убаггилзсаван̣н̣анаа
Upakkilesavaṇṇanā
58. ‘‘саммаа аад̣̇ияад̇ий’’д̇и вад̇ваа саммаа аад̣̇ияанан̃жасса д̣̇ал̣хаг̇г̇аахо зваад̇и ааха ‘‘д̣̇ал̣хам̣ г̇ан̣хаад̇ий’’д̇и. ‘‘саасанааважарзнааби д̣̇ийбзд̇аб̣б̣а’’нд̇и вад̇ваа д̇ам̣ д̣̇ассзд̇ум̣ ‘‘згажжо хий’’д̇иаад̣̇и вуд̇д̇ам̣, д̇зна д̇худ̇ан̇г̇ад̇харад̇аамад̇д̇зна ад̇д̇аманад̇аа, барибун̣н̣асан̇габбад̇аа саммаабадибад̇д̇ияаа убаггилзсод̇и имамад̇т̇ам̣ д̣̇ассзд̇и, на яат̇аавуд̇д̇ад̇абасамаад̣̇аанад̇худ̇ан̇г̇ад̇харад̇аанам̣ сад̇иби анияяаанигад̇д̇з сад̣̇исад̇анд̇и д̣̇адтаб̣б̣ам̣.
58. ‘‘Sammā ādiyatī’’ti vatvā sammā ādiyanañcassa daḷhaggāho evāti āha ‘‘daḷhaṃ gaṇhātī’’ti. ‘‘Sāsanāvacarenāpi dīpetabba’’nti vatvā taṃ dassetuṃ ‘‘ekacco hī’’tiādi vuttaṃ, tena dhutaṅgadharatāmattena attamanatā, paripuṇṇasaṅkappatā sammāpaṭipattiyā upakkilesoti imamatthaṃ dasseti, na yathāvuttatapasamādānadhutaṅgadharatānaṃ satipi aniyyānikatte sadisatanti daṭṭhabbaṃ.
‘‘д̣̇увид̇хассаабийд̇и ‘ад̇д̇амано ход̇и барибун̣н̣асан̇габбо’д̇и жа звам̣ убаггилзсабхзд̣̇зна вуд̇д̇асса д̣̇увид̇хассааби д̇абассино’’д̇и гзжи. яасмаа бана адтагат̇ааяам̣ саасанигавасзнааби ад̇т̇о д̣̇ийбид̇о, д̇асмаа б̣аахирагасса, саасанигасса жаад̇и звам̣ д̣̇увид̇хассааби д̇абассинод̇и ад̇т̇о взд̣̇ид̇аб̣б̣о. д̇ат̇аа жзва хи убариби ад̇т̇аван̣н̣анам̣ вагкад̇ийд̇и. зд̇д̇аавад̇аад̇и яад̣̇ид̣̇ам̣ ‘‘го ан̃н̃о маяаа сад̣̇исо’’д̇и звам̣ ад̇имаанасса, анидтид̇агижжассзва жа ‘‘аламзд̇д̇аавад̇аа’’д̇и звам̣ ад̇имаанасса жа уббаад̣̇анам̣, зд̇д̇аавад̇аа.
‘‘Duvidhassāpīti ‘attamano hoti paripuṇṇasaṅkappo’ti ca evaṃ upakkilesabhedena vuttassa duvidhassāpi tapassino’’ti keci. Yasmā pana aṭṭhakathāyaṃ sāsanikavasenāpi attho dīpito, tasmā bāhirakassa, sāsanikassa cāti evaṃ duvidhassāpi tapassinoti attho veditabbo. Tathā ceva hi uparipi atthavaṇṇanaṃ vakkhatīti. Ettāvatāti yadidaṃ ‘‘ko añño mayā sadiso’’ti evaṃ atimānassa, aniṭṭhitakiccasseva ca ‘‘alamettāvatā’’ti evaṃ atimānassa ca uppādanaṃ, ettāvatā.
уггам̣сад̇ийд̇и уггадтам̣ гарод̇и. угкибад̇ийд̇и ан̃н̃зсам̣ убари кибад̇и, баг̇г̇ан̣хаад̇ийд̇и ад̇т̇о. барам̣ сам̣хаарзд̇ийд̇и барам̣ сам̣харам̣ нихийнам̣ гарод̇и. авагкибад̇ийд̇и ад̇хо кибад̇и, аваман̃н̃ад̇ийд̇и ад̇т̇о.
Ukkaṃsatīti ukkaṭṭhaṃ karoti. Ukkhipatīti aññesaṃ upari khipati, paggaṇhātīti attho. Paraṃ saṃhāretīti paraṃ saṃharaṃ nihīnaṃ karoti. Avakkhipatīti adho khipati, avamaññatīti attho.
маанамад̣̇агаран̣знаад̇и маанасан̇каад̇асса мад̣̇асса гаран̣зна уббаад̣̇анзна. мужчид̇о ход̇ийд̇и мужчаабанно ход̇и, саа бана мужчаабад̇д̇и абхиж̇жхаасийлаб̣б̣ад̇абараамаасагааяаг̇ант̇зхи г̇ад̇хид̇ажид̇д̇ад̇аа, д̇ад̇т̇а жа ад̇илаг̇г̇абхаавод̇и ааха ‘‘г̇ад̇хид̇о аж̇жхосанно’’д̇и. бамаж̇ж̇анан̃жзд̇т̇а бамаж̇ж̇анамзваад̇и ааха ‘‘бамаад̣̇амаабаж̇ж̇ад̇ий’’д̇и. гзвалам̣ д̇худ̇ан̇г̇асуд̣̇д̇хиго худ̇ваа гаммадтаанам̣ анануяун̃ж̇анд̇о д̇ааяа зва д̇худ̇ан̇г̇асуд̣̇д̇хигад̇ааяа ад̇д̇уггам̣санаад̣̇ивасзна бавад̇д̇зяяаад̇и д̣̇ассзд̇ум̣ ‘‘саасанз’’д̇иаад̣̇и вуд̇д̇ам̣. д̇знааха ‘‘д̇худ̇ан̇г̇амзва…бз… бажжзд̇ий’’д̇и.
Mānamadakaraṇenāti mānasaṅkhātassa madassa karaṇena uppādanena. Mucchitohotīti mucchāpanno hoti, sā pana mucchāpatti abhijjhāsīlabbataparāmāsakāyaganthehi gadhitacittatā, tattha ca atilaggabhāvoti āha ‘‘gadhito ajjhosanno’’ti. Pamajjanañcettha pamajjanamevāti āha ‘‘pamādamāpajjatī’’ti. Kevalaṃ dhutaṅgasuddhiko hutvā kammaṭṭhānaṃ ananuyuñjanto tāya eva dhutaṅgasuddhikatāya attukkaṃsanādivasena pavatteyyāti dassetuṃ ‘‘sāsane’’tiādi vuttaṃ. Tenāha ‘‘dhutaṅgameva…pe… paccetī’’ti.
59. д̇зязва бажжаяаа. судту гад̇ваа бадисан̇карид̇ваа лад̣̇д̇хаад̇и аад̣̇араг̇аараваяог̇зна саггажжам̣ абхисан̇карид̇ваа д̣̇аанавасзна убанаяавасзна лад̣̇д̇хаа. ван̣н̣абхан̣ананд̇и г̇ун̣агид̇д̇анам̣. ассаад̇и д̇абассино.
59.Teyeva paccayā. Suṭṭhu katvā paṭisaṅkharitvā laddhāti ādaragāravayogena sakkaccaṃ abhisaṅkharitvā dānavasena upanayavasena laddhā. Vaṇṇabhaṇananti guṇakittanaṃ. Assāti tapassino.
60. вод̣̇аасанд̇и б̣яаасанам̣, вибхаж̇ж̇ананд̇и ад̇т̇о. д̇ам̣ банзд̇т̇а вибхаж̇ж̇анам̣ д̣̇вид̇хаа ижчид̇анд̇и ааха ‘‘д̣̇взбхааг̇ам̣ аабаж̇ж̇ад̇ий’’д̇и. д̣̇вз бхааг̇з гарод̇и ружжанааружжанавасзна . г̇зд̇хаж̇аад̇од̇и сан̃ж̇аад̇аг̇зд̇хо. мужчанам̣ наама сад̇ивиббаваасзнзва ход̇и, на сад̇ияаа сад̇ийд̇и ааха ‘‘самудтассад̇ий’’д̇и. аад̣̇ийнавамад̇д̇амбийд̇и г̇ад̇хид̇аад̣̇ибхаавзна барибхог̇з аад̣̇ийнавамад̇д̇амби на бассад̇и. мад̇д̇ан̃н̃уд̇аад̇и барибхог̇з мад̇д̇ан̃н̃уд̇аа. бажжавзгкан̣абарибхог̇амад̇д̇амбийд̇и бажжавзгкан̣амад̇д̇зна барибхог̇амби згаваарам̣ бажжавзгкид̇вааби барибхун̃ж̇анамби на гарод̇и.
60.Vodāsanti byāsanaṃ, vibhajjananti attho. Taṃ panettha vibhajjanaṃ dvidhā icchitanti āha ‘‘dvebhāgaṃ āpajjatī’’ti. Dve bhāge karoti ruccanāruccanavasena . Gedhajātoti sañjātagedho. Mucchanaṃ nāma sativippavāseneva hoti, na satiyā satīti āha ‘‘samuṭṭhassatī’’ti. Ādīnavamattampīti gadhitādibhāvena paribhoge ādīnavamattampi na passati. Mattaññutāti paribhoge mattaññutā. Paccavekkhaṇaparibhogamattampīti paccavekkhaṇamattena paribhogampi ekavāraṃ paccavekkhitvāpi paribhuñjanampi na karoti.
61. вижаггасан̣таанаад̇и вибулад̇амажаггасан̣таанаа. саб̣б̣асса бхун̃ж̇анад̇о аяогуудасад̣̇исаа д̣̇анд̇аа зва д̣̇анд̇агуудам̣. абасаад̣̇зд̇ийд̇и басаад̣̇зд̇и. ажзлагаад̣̇ивасзнаад̇и ажзлагавад̇аад̣̇ивасзна. луукааж̇ийвинд̇и саллзкабадибад̇д̇ияаа луукаж̇ийвигам̣.
61.Vicakkasaṇṭhānāti vipulatamacakkasaṇṭhānā. Sabbassa bhuñjanato ayokūṭasadisā dantā eva dantakūṭaṃ.Apasādetīti pasādeti. Acelakādivasenāti acelakavatādivasena. Lūkhājīvinti sallekhapaṭipattiyā lūkhajīvikaṃ.
62. д̇абам̣ гарод̇ийд̇и бхааванааманасигааралагкан̣ам̣ д̇абам̣ жарад̇и жаранд̇о вияа ход̇и. жан̇гамам̣ од̇арад̇и бхааванам̣ ануяун̃ж̇анд̇о вияа. вихааран̇г̇ан̣ам̣ саммаж̇ж̇ад̇и вад̇д̇абадибад̇д̇им̣ буурзнд̇о вияа.
62.Tapaṃ karotīti bhāvanāmanasikāralakkhaṇaṃ tapaṃ carati caranto viya hoti. Caṅkamaṃ otarati bhāvanaṃ anuyuñjanto viya. Vihāraṅgaṇaṃ sammajjati vattapaṭipattiṃ pūrento viya.
‘‘аад̣̇ассаяамаано’’д̇и ваа баато.
‘‘Ādassayamāno’’ti vā pāṭho.
гин̃жи важ̇ж̇анд̇и гин̃жи гааяигам̣ ваа ваажасигам̣ ваа д̣̇осам̣. д̣̇идтиг̇ад̇анд̇и вибарийд̇ад̣̇ассанам̣. аружжамаананд̇и ад̇д̇ано сид̣̇д̇ханд̇з бадигкид̇д̇абхаавзна аружжамаанам̣. ружжад̇и мзд̇и ‘‘габбад̇и мз’’д̇и вад̣̇ад̇и. ануж̇аанид̇аб̣б̣анд̇и д̇ажчаавибарийд̇абхууд̇абхаавзна ‘‘звамзд̇а’’нд̇и ануж̇аанид̇аб̣б̣ам̣. саванаманохаарид̇ааяа ‘‘саад̇ху судтуу’’д̇и анумод̣̇ид̇аб̣б̣ам̣.
Kiñcivajjanti kiñci kāyikaṃ vā vācasikaṃ vā dosaṃ. Diṭṭhigatanti viparītadassanaṃ. Aruccamānanti attano siddhante paṭikkhittabhāvena aruccamānaṃ. Ruccati meti ‘‘kappati me’’ti vadati. Anujānitabbanti tacchāviparītabhūtabhāvena ‘‘evameta’’nti anujānitabbaṃ. Savanamanohāritāya ‘‘sādhu suṭṭhū’’ti anumoditabbaṃ.
63. гуж̇жханасийлад̇ааяа год̇хано. вуд̇д̇алагкан̣о убанаахо зд̇асса ад̇т̇ийд̇и убанаахий. звам̣бхууд̇о жа д̇ам̣саман̇г̇ий ход̇ийд̇и ‘‘саманнааг̇ад̇о ход̇ий’’д̇и вуд̇д̇ам̣. зса наяо ид̇о барзсуби.
63. Kujjhanasīlatāya kodhano. Vuttalakkhaṇo upanāho etassa atthīti upanāhī. Evaṃbhūto ca taṃsamaṅgī hotīti ‘‘samannāgato hotī’’ti vuttaṃ. Esa nayo ito paresupi.
аяам̣ бана висзсо – иссад̇и усууяад̇ийд̇и уссугий. сатанам̣ асанд̇аг̇ун̣асамбхааванам̣ сато, со зд̇асса ад̇т̇ийд̇и сато. санд̇ад̣̇осабадижчаад̣̇анасабхааваа мааяаа, мааяаа зд̇асса ад̇т̇ийд̇и мааяаавий. г̇арудтаанияаанамби бан̣ибаад̇аагаран̣алагкан̣ам̣ т̇амбханам̣ т̇ад̣̇д̇хам̣, д̇амзд̇т̇а ад̇т̇ийд̇и т̇ад̣̇д̇хо. г̇ун̣зхи самаанам̣, ад̇хиган̃жа ад̇иггамид̇ваа нихийнам̣ гад̇ваа ман̃н̃анасийлад̇ааяа ад̇имааний. асанд̇аг̇ун̣асамбхааванад̇т̇игад̇аасан̇каад̇аа баабаа лаамагаа ижчаа зд̇ассаад̇и баабижчо. мижчаа вибарийд̇аа д̣̇идти зд̇ассаад̇и мижчаад̣̇идтиго. ‘‘ид̣̇амзва сажжам̣, могхаман̃н̃а’’нд̇и (ма. ни. 187, 202, 427; 3.27, 29; уд̣̇аа. 55; махаани. 20; нзд̇д̇и. 58) звам̣ ад̇д̇анаа ад̇д̇аабхинивидтад̇ааяа сад̇аа д̣̇идти санд̣̇идти, д̇амзва бараамасад̇ийд̇и санд̣̇идтибараамаасий. адтагат̇ааяам̣ бана ‘‘саяам̣ д̣̇идти санд̣̇идтий’’д̇и вад̇т̇увасзна ад̇т̇о вуд̇д̇о. аа б̣аал̣хам̣ вияа д̇хийяад̇ийд̇и аад̇хаананд̇и ааха ‘‘д̣̇ал̣хам̣ судту табид̇а’’нд̇и. яат̇ааг̇ахид̇ам̣ г̇аахам̣ бадиниссаж̇ж̇анасийло бадиниссаг̇г̇ий, д̇аббадигкзбзна д̣̇уббадиниссаг̇г̇ий. бадисзд̇хад̇т̇о хи аяам̣ д̣̇у-сад̣̇д̣̇о яат̇аа ‘‘д̣̇уббан̃н̃о, (ма. ни. 1.449) д̣̇уссийло’’д̇и (а. ни. 5.213; 10.75; баараа. 195; д̇ха. ба. 308) жа.
Ayaṃ pana viseso – issati usūyatīti ussukī. Saṭhanaṃ asantaguṇasambhāvanaṃ saṭho, so etassa atthīti saṭho. Santadosapaṭicchādanasabhāvā māyā, māyā etassa atthīti māyāvī. Garuṭṭhāniyānampi paṇipātākaraṇalakkhaṇaṃ thambhanaṃ thaddhaṃ, tamettha atthīti thaddho. Guṇehi samānaṃ, adhikañca atikkamitvā nihīnaṃ katvā maññanasīlatāya atimānī. Asantaguṇasambhāvanatthikatāsaṅkhātā pāpā lāmakā icchā etassāti pāpiccho. Micchā viparītā diṭṭhi etassāti micchādiṭṭhiko. ‘‘Idameva saccaṃ, moghamañña’’nti (ma. ni. 187, 202, 427; 3.27, 29; udā. 55; mahāni. 20; netti. 58) evaṃ attanā attābhiniviṭṭhatāya satā diṭṭhi sandiṭṭhi, tameva parāmasatīti sandiṭṭhiparāmāsī. Aṭṭhakathāyaṃ pana ‘‘sayaṃ diṭṭhi sandiṭṭhī’’ti vatthuvasena attho vutto. Ā bāḷhaṃ viya dhīyatīti ādhānanti āha ‘‘daḷhaṃ suṭṭhu ṭhapita’’nti. Yathāgahitaṃ gāhaṃ paṭinissajjanasīlo paṭinissaggī, tappaṭikkhepena duppaṭinissaggī. Paṭisedhattho hi ayaṃ du-saddo yathā ‘‘duppañño, (ma. ni. 1.449) dussīlo’’ti (a. ni. 5.213; 10.75; pārā. 195; dha. pa. 308) ca.
барисуд̣̇д̇хабабадигаббад̇д̇агат̇ааван̣н̣анаа
Parisuddhapapaṭikappattakathāvaṇṇanā
64. ид̇ха ниг̇род̇ха д̇абассийд̇и яат̇аанугганд̇ам̣ буримабаал̣им̣ ниг̇аманавасзна згад̣̇зсзна д̣̇ассзд̇и. д̇знааха ‘‘звам̣ бхаг̇аваа’’д̇иаад̣̇и. г̇ахид̇алад̣̇д̇хинд̇и ‘‘ажзлагаад̣̇ибхааво сзяяо, д̇зна жа сам̣саарасуд̣̇д̇хи ход̇ий’’д̇и звам̣ г̇ахид̇алад̣̇д̇хим̣. рагкид̇ам̣ д̇абанд̇и д̇ааяа лад̣̇д̇хияаа самаад̣̇ияид̇ваа рагкид̇ам̣ ажзлагавад̇аад̣̇ид̇абам̣. ‘‘саб̣б̣амзва сам̣гилидта’’нд̇и иминаа яам̣ вагкад̇и барисуд̣̇д̇хабаал̣иван̣н̣анааяам̣ ‘‘луукад̇абассино жзва д̇худ̇ан̇г̇ад̇харасса жа васзна яож̇анаа взд̣̇ид̇аб̣б̣аа’’д̇и (д̣̇ий. ни. адта. 3.64), д̇асса баригаббид̇аруубасса луукасса д̇абассинод̇и аяамзд̇т̇а ад̇хиббааяод̇и д̣̇ассзд̇и. ‘‘барисуд̣̇д̇хабаал̣ид̣̇ассанад̇т̇а’’нд̇и жа иминаа д̇ид̇т̇ияаанам̣ васзна баал̣и язвзд̇т̇а лаб̣бхад̇и, на бана д̇ад̣̇ад̇т̇од̇и д̣̇ассзд̇и. вуд̇д̇авибагкавасзнаад̇и вуд̇д̇асса ад̇т̇асса бадибагкавасзна, бадигкзбавасзнаад̇и ад̇т̇о. д̇асмим̣ таанзд̇и хзд̇уад̇т̇з бхумманд̇и д̇асса хзд̇уад̇т̇зна гаран̣аважанзна ад̇т̇ам̣ д̣̇ассзнд̇о ‘‘звам̣ со д̇знаа’’д̇иаад̣̇имааха. уд̇д̇ари вааяамамаанод̇и яат̇аасамаад̣̇иннзхи д̇худ̇ад̇хаммзхи абарид̇удто, абарияосид̇асан̇габбо жа худ̇ваа убари бхааванаануяог̇авасзна саммаавааяаамам̣ гаронд̇о.
64.Idha nigrodha tapassīti yathānukkantaṃ purimapāḷiṃ nigamanavasena ekadesena dasseti. Tenāha ‘‘evaṃ bhagavā’’tiādi. Gahitaladdhinti ‘‘acelakādibhāvo seyyo, tena ca saṃsārasuddhi hotī’’ti evaṃ gahitaladdhiṃ. Rakkhitaṃ tapanti tāya laddhiyā samādiyitvā rakkhitaṃ acelakavatāditapaṃ. ‘‘Sabbameva saṃkiliṭṭha’’nti iminā yaṃ vakkhati parisuddhapāḷivaṇṇanāyaṃ ‘‘lūkhatapassino ceva dhutaṅgadharassa ca vasena yojanā veditabbā’’ti (dī. ni. aṭṭha. 3.64), tassa parikappitarūpassa lūkhassa tapassinoti ayamettha adhippāyoti dasseti. ‘‘Parisuddhapāḷidassanattha’’nti ca iminā titthiyānaṃ vasena pāḷi yevettha labbhati, na pana tadatthoti dasseti. Vuttavipakkhavasenāti vuttassa atthassa paṭipakkhavasena, paṭikkhepavasenāti attho. Tasmiṃ ṭhāneti hetuatthe bhummanti tassa hetuatthena karaṇavacanena atthaṃ dassento ‘‘evaṃ so tenā’’tiādimāha. Uttari vāyamamānoti yathāsamādinnehi dhutadhammehi aparituṭṭho, apariyositasaṅkappo ca hutvā upari bhāvanānuyogavasena sammāvāyāmaṃ karonto.
69. ид̇о баранд̇и ид̇о яат̇аавуд̇д̇анаяад̇о барам̣. аг̇г̇абхаавам̣ ваа саарабхаавам̣ ваад̇и д̇абож̇иг̇ужчааяа аг̇г̇абхаавам̣ ваа саарабхаавам̣ ваа аж̇аананд̇о. ‘‘аяамзвасса аг̇г̇абхааво саарабхааво’’д̇и ман̃н̃амаано ‘‘аг̇г̇аббад̇д̇аа, саараббад̇д̇аа жаа’’д̇и ааха.
69.Ito paranti ito yathāvuttanayato paraṃ. Aggabhāvaṃ vā sārabhāvaṃ vāti tapojigucchāya aggabhāvaṃ vā sārabhāvaṃ vā ajānanto. ‘‘Ayamevassa aggabhāvo sārabhāvo’’ti maññamāno ‘‘aggappattā, sārappattā cā’’ti āha.
барисуд̣̇д̇хад̇ажаббад̇д̇аад̣̇игат̇ааван̣н̣анаа
Parisuddhatacappattādikathāvaṇṇanā
70. яаманам̣ сам̣яаманам̣ яаамо, хим̣саад̣̇ийнам̣ агаран̣авасзна жад̇уб̣б̣ид̇хо яаамова жаад̇уяаамо, со зва сам̣варо, д̇зна сам̣вуд̇о г̇уд̇д̇асаб̣б̣ад̣̇вааро жаад̇уяаамасам̣варасам̣вуд̇о. д̇знааха ‘‘жад̇уб̣б̣ид̇хзна сам̣варзна бихид̇о’’д̇и. ад̇ибаад̇анам̣ хим̣сананд̇и ааха ‘‘баан̣ам̣ на ханад̇ий’’д̇и. лобхажид̇д̇зна бхаавид̇ам̣ самбхаавид̇анд̇и гад̇ваа бхаавид̇ам̣ наама бан̃жа гаамаг̇ун̣аа. аяан̃жа д̇зсу д̇зсам̣язва самуд̣̇аажааро маг̇г̇одтаабагам̣ вияаад̇и ааха ‘‘д̇зсам̣ сан̃н̃ааяаа’’д̇и.
70. Yamanaṃ saṃyamanaṃ yāmo, hiṃsādīnaṃ akaraṇavasena catubbidho yāmova cātuyāmo, so eva saṃvaro, tena saṃvuto guttasabbadvāro cātuyāmasaṃvarasaṃvuto. Tenāha ‘‘catubbidhena saṃvarena pihito’’ti. Atipātanaṃ hiṃsananti āha ‘‘pāṇaṃ na hanatī’’ti. Lobhacittena bhāvitaṃ sambhāvitanti katvā bhāvitaṃ nāma pañca kāmaguṇā. Ayañca tesu tesaṃyeva samudācāro maggoṭṭhāpakaṃ viyāti āha ‘‘tesaṃ saññāyā’’ti.
зд̇анд̇и абхихаран̣ам̣, хийнааяа анаавад̇д̇анан̃жа. д̇знааха ‘‘со абхихарад̇ийд̇и аад̣̇илагкан̣а’’нд̇и. абхихарад̇ийд̇и абхиб̣уд̣̇д̇хим̣ нзд̇и. д̇знааха ‘‘убаруубари вад̣дхзд̇ий’’д̇и. жаггавад̇д̇инааби баб̣б̣аж̇ид̇асса абхиваад̣̇анаад̣̇и гарийяад̇зваад̇и баб̣б̣аж̇ж̇аа сздтаа г̇ун̣ависзсаяог̇ад̇о, д̣̇осавирахид̇ад̇о жа, яад̇о саа бан̣д̣ид̇абан̃н̃ад̇д̇аа вуд̇д̇аа. г̇ихибхааво бана нихийно д̇ад̣̇убхаяаабхаавад̇од̇и ааха ‘‘хийнааяа г̇ихибхаавад̇т̇ааяаа’’д̇и.
Etanti abhiharaṇaṃ, hīnāya anāvattanañca. Tenāha ‘‘so abhiharatīti ādilakkhaṇa’’nti. Abhiharatīti abhibuddhiṃ neti. Tenāha ‘‘uparūpari vaḍḍhetī’’ti. Cakkavattināpi pabbajitassa abhivādanādi karīyatevāti pabbajjā seṭṭhā guṇavisesayogato, dosavirahitato ca, yato sā paṇḍitapaññattā vuttā. Gihibhāvo pana nihīno tadubhayābhāvatoti āha ‘‘hīnāya gihibhāvatthāyā’’ti.
71. д̇ажаббад̇д̇аад̇и д̇ажам̣ бад̇д̇аа, д̇ажасад̣̇исаа ход̇ийд̇и ад̇т̇о.
71.Tacappattāti tacaṃ pattā, tacasadisā hotīti attho.
74. д̇ид̇т̇ияаанам̣ васзнаад̇и д̇ид̇т̇ияаанам̣ самаяавасзна. нзсанд̇и д̇ид̇т̇ияаанам̣. д̇анд̇и д̣̇иб̣б̣ажагкум̣. сийласамбад̣̇аад̇и саб̣б̣аагаарасамбаннам̣ жад̇убаарисуд̣̇д̇хисийлам̣. д̇ажасаарасамбад̇д̇ид̇од̇и д̇ажад̇абож̇иг̇ужчааяаасаарасамбад̇д̇ид̇о. висзсабхааванд̇и висзсасабхаавам̣.
74. Titthiyānaṃ vasenāti titthiyānaṃ samayavasena. Nesanti titthiyānaṃ. Tanti dibbacakkhuṃ. Sīlasampadāti sabbākārasampannaṃ catupārisuddhisīlaṃ. Tacasārasampattitoti tacatapojigucchāyāsārasampattito. Visesabhāvanti visesasabhāvaṃ.
ажзлагабаал̣имад̇д̇амбийд̇и ажзлагабаал̣иааг̇ад̇ад̇т̇амад̇д̇амби над̇т̇и, д̇асмаа маяам̣ анассаама винадтаад̇и ад̇т̇о. а-гааро ваа нибаад̇амад̇д̇ам̣, нассаамаад̇и винассаама. гуд̇о барисуд̣̇д̇хабаал̣ийд̇и гуд̇о зва амхзсу барисуд̣̇д̇хабаал̣иааг̇ад̇абадибад̇д̇и. зса наяо сзсзсуби. суд̇ивасзнаабийд̇и сод̇абат̇ааг̇аманамад̇д̇знааби на ж̇аанаама.
Acelakapāḷimattampīti acelakapāḷiāgatatthamattampi natthi, tasmā mayaṃ anassāma vinaṭṭhāti attho. A-kāro vā nipātamattaṃ, nassāmāti vinassāma. Kuto parisuddhapāḷīti kuto eva amhesu parisuddhapāḷiāgatapaṭipatti. Esa nayo sesesupi. Sutivasenāpīti sotapathāgamanamattenāpi na jānāma.
ниг̇род̇хассабаж̇жхааяанаван̣н̣анаа
Nigrodhassapajjhāyanavaṇṇanā
75. ассаад̇и санд̇хаанасса г̇ахабад̇исса. гагкал̣анд̇и парусам̣. д̣̇ураасад̣̇аважананд̇и авад̇д̇аб̣б̣аважанам̣. яасмаа парусаважанам̣ яам̣ уд̣̇д̣̇исса баяуд̇д̇ам̣, д̇асмим̣ камаабид̇з камаабагасса бадибаагад̇игам̣ ход̇и, д̇асмаа ‘‘аяам̣ маяий’’д̇иаад̣̇и вуд̇д̇ам̣.
75.Assāti sandhānassa gahapatissa. Kakkhaḷanti pharusaṃ. Durāsadavacananti avattabbavacanaṃ. Yasmā pharusavacanaṃ yaṃ uddissa payuttaṃ, tasmiṃ khamāpite khamāpakassa paṭipākatikaṃ hoti, tasmā ‘‘ayaṃ mayī’’tiādi vuttaṃ.
76. б̣од̇хад̇т̇ааяа д̇хаммам̣ д̣̇зсзд̇и, на ад̇д̇ано б̣уд̣̇д̇хабхаавагхосанад̇т̇ааяа. ваад̣̇ад̇т̇ааяаад̇и бараваад̣̇абхан̃ж̇анаваад̣̇ад̇т̇ааяа. рааг̇аад̣̇исаманад̇т̇ааяа д̇хаммам̣ д̣̇зсзд̇и, на анд̇зваасигамяад̇ааяа. огханид̇т̇аран̣ад̇т̇ааяаад̇и жад̇урогханид̇т̇аран̣ад̇т̇ааяа д̇хаммам̣ д̣̇зсзд̇и саб̣б̣асо орабаараад̇ин̣н̣амаавахад̇д̇аа д̣̇зсанааяа. саб̣б̣агилзсабариниб̣б̣аанад̇т̇ааяа д̇хаммам̣ д̣̇зсзд̇и гилзсаанам̣ лзсзнаби д̣̇зсанааяа абараамадтабхаавад̇о.
76.Bodhatthāya dhammaṃ deseti, na attano buddhabhāvaghosanatthāya. Vādatthāyāti paravādabhañjanavādatthāya. Rāgādisamanatthāya dhammaṃ deseti, na antevāsikamyatāya. Oghanittharaṇatthāyāti caturoghanittharaṇatthāya dhammaṃ deseti sabbaso orapārātiṇṇamāvahattā desanāya. Sabbakilesaparinibbānatthāya dhammaṃ deseti kilesānaṃ lesenapi desanāya aparāmaṭṭhabhāvato.
б̣рахмажарияабарияосаанаад̣̇иван̣н̣анаа
Brahmacariyapariyosānādivaṇṇanā
77. ид̣̇ам̣ саб̣б̣амбийд̇и сад̇д̇авассад̇о бадтааяа яаава ‘‘сад̇д̇ааха’’нд̇и бад̣̇ам̣, ид̣̇ам̣ саб̣б̣амби важанам̣. асато бана амааяаавий уж̇уж̇аад̇иго д̇игкабан̃н̃о уг̇гхадид̇ан̃н̃ууд̇и ад̇хиббааяо. со хи д̇ам̣мухуд̇д̇знзва арахад̇д̇ам̣ бад̇д̇ум̣ сагкиссад̇ийд̇и. ван̇гаван̇год̇и гааяаван̇гаад̣̇ийхиби ван̇гзхи ван̇го ж̇имхо гудило. ‘‘сатам̣ банаахам̣ анусаасид̇ум̣ на саггомий’’д̇и на ид̣̇ам̣ бхаг̇аваа гилаасубхаавзнзва вад̣̇ад̇и, ат̇а ко д̇асса абхааж̇анабхаавзнзва.
77.Idaṃ sabbampīti sattavassato paṭṭhāya yāva ‘‘sattāha’’nti padaṃ, idaṃ sabbampi vacanaṃ. Asaṭho pana amāyāvī ujujātiko tikkhapañño ugghaṭitaññūti adhippāyo. So hi taṃmuhutteneva arahattaṃ pattuṃ sakkhissatīti. Vaṅkavaṅkoti kāyavaṅkādīhipi vaṅkehi vaṅko jimho kuṭilo. ‘‘Saṭhaṃ panāhaṃ anusāsituṃ na sakkomī’’ti na idaṃ bhagavā kilāsubhāveneva vadati, atha kho tassa abhājanabhāveneva.
78. багад̇ияаа аажарияод̇и яо зва д̇умхаагам̣ ид̇о буб̣б̣з багад̇ияаа аажарияо ахоси, со зва ид̣̇ааниби буб̣б̣аажин̣н̣авасзна аажарияо ход̇у, на маяам̣ д̇умхз анд̇зваасигз гаад̇угаамаад̇и ад̇хиббааяо. на маяам̣ д̇умхаагам̣ уд̣̇д̣̇зсзна ад̇т̇игаа, д̇хаммад̇анд̇и мзва бана д̇умхз н̃аабзд̇угаамамхаад̇и ад̇хиббааяо. ааж̇ийвад̇од̇и ж̇ийвигааяа вуд̇д̇ид̇о. агусалаад̇и годтаасам̣ бад̇д̇аад̇и агусалаад̇и д̇ам̣ д̇ам̣ годтаасад̇ам̣язва убаг̇ад̇аа. гилзсад̣̇арат̇асамбаяуд̇д̇аад̇и гилзсад̣̇арат̇асахид̇аа д̇ам̣самб̣анд̇ханад̇о . ж̇аад̇иж̇араамаран̣аанам̣ хид̇аад̇и ж̇аад̇иж̇араамаран̣ияаа. сам̣гилзсо зд̇т̇а ад̇т̇и, сам̣гилзсз ваа нияуд̇д̇аад̇и сам̣гилзсигаа. вод̣̇аанам̣ вужжад̇и висуд̣̇д̇хи, д̇асса бажжаяабхууд̇ад̇д̇аа вод̣̇аанияаа. д̇ат̇аабхууд̇аа жзд̇з вод̣̇аабзнд̇ийд̇и ааха ‘‘сад̇д̇з вод̣̇аабзнд̇ий’’д̇и. сикааббад̇д̇аа бан̃н̃ааяа баарибууривзбуллад̇аа маг̇г̇апалавасзнзва ижчид̇аб̣б̣аад̇и ааха ‘‘маг̇г̇абан̃н̃аа…бз… взбуллад̇а’’нд̇и. убхоби ваа зд̇аани баарибууривзбуллаани. яаа хи д̇асса баарибуурий, саа зва взбуллад̇аад̇и. д̇ад̇од̇и сам̣гилзсад̇хаммаббахаанавод̣̇аанад̇хаммаабхиб̣уд̣̇д̇хихзд̇у.
78.Pakatiyā ācariyoti yo eva tumhākaṃ ito pubbe pakatiyā ācariyo ahosi, so eva idānipi pubbāciṇṇavasena ācariyo hotu, na mayaṃ tumhe antevāsike kātukāmāti adhippāyo. Namayaṃ tumhākaṃ uddesena atthikā, dhammatanti meva pana tumhe ñāpetukāmamhāti adhippāyo. Ājīvatoti jīvikāya vuttito. Akusalāti koṭṭhāsaṃ pattāti akusalāti taṃ taṃ koṭṭhāsataṃyeva upagatā. Kilesadarathasampayuttāti kilesadarathasahitā taṃsambandhanato . Jātijarāmaraṇānaṃ hitāti jātijarāmaraṇiyā. Saṃkileso ettha atthi, saṃkilese vā niyuttāti saṃkilesikā. Vodānaṃ vuccati visuddhi, tassa paccayabhūtattā vodāniyā. Tathābhūtā cete vodāpentīti āha ‘‘satte vodāpentī’’ti. Sikhāppattā paññāya pāripūrivepullatā maggaphalavaseneva icchitabbāti āha ‘‘maggapaññā…pe… vepullata’’nti. Ubhopi vā etāni pāripūrivepullāni. Yā hi tassa pāripūrī, sā eva vepullatāti. Tatoti saṃkilesadhammappahānavodānadhammābhibuddhihetu.
79. ‘‘яат̇аа маарзнаа’’д̇и наяид̣̇ам̣ нид̣̇ассанавасзна вуд̇д̇ам̣, ат̇а ко д̇ат̇аабхаавагат̇анамзваад̇и д̣̇ассзд̇ум̣ ‘‘мааро гираа’’д̇иаад̣̇и вуд̇д̇ам̣. ат̇аад̇и маарзна д̇зсам̣ барияудтаанаббад̇д̇ид̇о бажчаа ан̃н̃аасийд̇и яож̇анаа. гасмаа бана бхаг̇аваа баг̇зва на ан̃н̃аасийд̇и? анааваж̇ж̇ид̇ад̇д̇аа. маарам̣ бадиб̣аахид̇ваад̇и маарзна д̇зсу гад̇ам̣ барияудтаанам̣ вид̇хамзд̇ваа, на д̇зсам̣ сад̇и баяож̇анз б̣уд̣̇д̇хаанам̣ д̣̇уггарам̣. сод̇и маг̇г̇апалуббад̇д̇ихзд̇у. д̇зсам̣ бариб̣б̣ааж̇агаанам̣.
79.‘‘Yathā mārenā’’ti nayidaṃ nidassanavasena vuttaṃ, atha kho tathābhāvakathanamevāti dassetuṃ ‘‘māro kirā’’tiādi vuttaṃ. Athāti mārena tesaṃ pariyuṭṭhānappattito pacchā aññāsīti yojanā. Kasmā pana bhagavā pageva na aññāsīti? Anāvajjitattā. Māraṃ paṭibāhitvāti mārena tesu kataṃ pariyuṭṭhānaṃ vidhametvā, na tesaṃ sati payojane buddhānaṃ dukkaraṃ. Soti maggaphaluppattihetu. Tesaṃ paribbājakānaṃ.
пудтаад̇и барияудтаанавасзна пудтаа. яад̇раад̇и нид̣̇д̇хааран̣з бхумманд̇и ааха ‘‘язсуу’’д̇и. ан̃н̃аан̣ад̇т̇анд̇и ааж̇аананад̇т̇ам̣, убасаг̇г̇амад̇д̇ан̃жзд̇т̇а аа-гаарод̇и ааха ‘‘ж̇аананад̇т̇а’’нд̇и, виймам̣санад̇т̇анд̇и ад̇т̇о. жид̇д̇ам̣ нуббаннанд̇и ‘‘ж̇аанаама д̇аавасса д̇хамма’’нд̇и ааж̇аананад̇т̇ам̣ ‘‘б̣рахмажарияам̣ жариссаамаа’’д̇и згасмим̣ д̣̇ивасз згаваарамби д̇зсам̣ жид̇д̇ам̣ нуббаннам̣. сад̇д̇аахо бана вужжамаано зд̇зсам̣ гим̣ гариссад̇ийд̇и яож̇анаа. сад̇д̇аахам̣ буурзд̇унд̇и сад̇д̇аахам̣ б̣рахмажарияам̣ буурзд̇ум̣, б̣рахмажарияавасзна ваа сад̇д̇аахам̣ буурзд̇унд̇и ад̇т̇о. бараваад̣̇абхинд̣̇ананд̇и бараваад̣̇амад̣̇д̣̇анам̣. сагаваад̣̇асамуссаабананд̇и сагаваад̣̇абаг̇г̇ан̣ханам̣. ваасанааяаад̇и сажжасамбадивзд̇хаваасанааяа. нзсанд̇и жа багаран̣авасзна вуд̇д̇ам̣. д̇ад̣̇ан̃н̃зсамби хи бхаг̇авад̇о саммукаа, барамбарааяа жа д̣̇звамануссаанам̣ сун̣анд̇аанам̣ ваасанааяа бажжаяо зваад̇и. яам̣ банзд̇т̇а ад̇т̇ад̇о на вибхад̇д̇ам̣, д̇ам̣ сувин̃н̃зяяамзваад̇и.
Phuṭṭhāti pariyuṭṭhānavasena phuṭṭhā. Yatrāti niddhāraṇe bhummanti āha ‘‘yesū’’ti. Aññāṇatthanti ājānanatthaṃ, upasaggamattañcettha ā-kāroti āha ‘‘jānanattha’’nti, vīmaṃsanatthanti attho. Cittaṃ nuppannanti ‘‘jānāma tāvassa dhamma’’nti ājānanatthaṃ ‘‘brahmacariyaṃ carissāmā’’ti ekasmiṃ divase ekavārampi tesaṃ cittaṃ nuppannaṃ. Sattāho pana vuccamāno etesaṃ kiṃ karissatīti yojanā. Sattāhaṃ pūretunti sattāhaṃ brahmacariyaṃ pūretuṃ, brahmacariyavasena vā sattāhaṃ pūretunti attho. Paravādabhindananti paravādamaddanaṃ. Sakavādasamussāpananti sakavādapaggaṇhanaṃ. Vāsanāyāti saccasampaṭivedhavāsanāya. Nesanti ca pakaraṇavasena vuttaṃ. Tadaññesampi hi bhagavato sammukhā, paramparāya ca devamanussānaṃ suṇantānaṃ vāsanāya paccayo evāti. Yaṃ panettha atthato na vibhattaṃ, taṃ suviññeyyamevāti.
уд̣̇умб̣аригасуд̇д̇аван̣н̣анааяа лийнад̇т̇аббагаасанаа.
Udumbarikasuttavaṇṇanāya līnatthappakāsanā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / д̣̇ийгханигааяа • Dīghanikāya / 2. уд̣̇умб̣аригасуд̇д̇ам̣ • 2. Udumbarikasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / д̣̇ийгха нигааяа (адтагат̇аа) • Dīgha nikāya (aṭṭhakathā) / 2. уд̣̇умб̣аригасуд̇д̇аван̣н̣анаа • 2. Udumbarikasuttavaṇṇanā
