| Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā) |
༢. ཨུདུམྦརིཀསུཏྟཝཎྞནཱ
2. Udumbarikasuttavaṇṇanā
ནིགྲོདྷཔརིབྦཱཛཀཝཏྠུཝཎྞནཱ
Nigrodhaparibbājakavatthuvaṇṇanā
༤༩. ཨུདུམྦརིཀཱཡཱཏི སམྦནྡྷེ སཱམིཝཙནནྟི ཨཱཧ ‘‘ཨུདུམྦརིཀཱཡ དེཝིཡཱ སནྟཀེ པརིབྦཱཛཀཱརཱམེ’’ཏི། ‘‘ཨུདུམྦརིཀཱཡ’’ནྟི ཝཱ པཱཋོ, ཏཐཱ སཏི ཨདྷིཀརཎེ ཨེཏཾ བྷུམྨཾ། ཨཡཉྷེཏྠ ཨཏྠོ ཨུདུམྦརིཀཱཡ རཉྙོ དེཝིཡཱ ནིབྦཏྟིཏོ ཨཱརཱམོ ཨུདུམྦརིཀཱ, ཏསྶཾ ཨུདུམྦརིཀཱཡཾ། ཏེནཱཧ ‘‘ཨུདུམྦརིཀཱཡ དེཝིཡཱ སནྟཀེ’’ཏི། ཏཱཡ ཧི ནིབྦཏྟིཏོ ཏསྶཱ སནྟཀོ། ཝརཎཱདིཔཱཋཝསེན ཙེཏྠ ནིབྦཏྟཏྠབོདྷཀསྶ སདྡསྶ ཨདསྶནཾ། སནྡྷཱནོཏི བྷིནྣཱནམྤི ཏེསཾ སནྡྷཱཔནེན ‘‘སནྡྷཱནོ’’ཏི ཨེཝཾ ལདྡྷནཱམོ། སཾཝཎྞིཏོཏི པསཾསིཏོ། ཨིརིཡཏཱིཏི པཝཏྟཏི། ཨརིཡེན ཉཱཎེནཱཏི ཀིལེསེཧི ཨཱརཀཏྟཱ ཨརིཡེན ལོཀུཏྟརེན ཉཱཎེན། ཨརིཡཱཡ ཝིམུཏྟིཡཱཏི སུཝིསུདྡྷཱཡ ལོཀུཏྟརཕལཝིམུཏྟིཡཱ།
49.Udumbarikāyāti sambandhe sāmivacananti āha ‘‘udumbarikāya deviyā santake paribbājakārāme’’ti. ‘‘Udumbarikāya’’nti vā pāṭho, tathā sati adhikaraṇe etaṃ bhummaṃ. Ayañhettha attho udumbarikāya rañño deviyā nibbattito ārāmo udumbarikā, tassaṃ udumbarikāyaṃ. Tenāha ‘‘udumbarikāya deviyā santake’’ti. Tāya hi nibbattito tassā santako. Varaṇādipāṭhavasena cettha nibbattatthabodhakassa saddassa adassanaṃ. Sandhānoti bhinnānampi tesaṃ sandhāpanena ‘‘sandhāno’’ti evaṃ laddhanāmo. Saṃvaṇṇitoti pasaṃsito. Iriyatīti pavattati. Ariyena ñāṇenāti kilesehi ārakattā ariyena lokuttarena ñāṇena. Ariyāya vimuttiyāti suvisuddhāya lokuttaraphalavimuttiyā.
དིཝཱ-སདྡོ དིན-སདྡོ ཝིཡ དིཝསཔརིཡཱཡོ, ཏསྶ ཝིསེསནབྷཱཝེན ཝུཙྩམཱནོ དིཝཱ-སདྡོ སཝིསེསཾ དིཝསབྷཱགཾ དཱིཔེཏཱིཏི ཨཱཧ ‘‘དིཝསསྶ དིཝཱ’’ཏིཨཱདི། ཡསྨཱ སམཱཔནྣསྶ ཙིཏྟཾ ནཱནཱརམྨཎཏོ པཊིསཾཧཏཾ ཧོཏི, ཛྷཱནསམངྒཱི ཙ པཝིཝེཀཱུཔགམནེན སངྒཎིཀཱབྷཱཝཏོ ཨེཀཱཀིཡཱཡ ནིལཱིནོ ཝིཡ ཧོཏི, ཏསྨཱ ཝུཏྟཾ ‘‘ཏཏོ ཏཏོ…པེ॰… གཏོ’’ཏི། མནོ བྷཝནྟི མནསོ ཝིཝཊྚནིསྶིཏཾ ཝཌྜྷིཾ ཨཱཝཧནྟཱིཏི མནོབྷཱཝནིཡཱཏི ཨཱཧ ‘‘མནཝཌྜྷཀཱན’’ནྟིཨཱདི། ཨུནྣམཏི ན སངྐུཙཏི, ཨལཱིནཉྩ ཧོཏཱིཏི ཨཏྠོ།
Divā-saddo dina-saddo viya divasapariyāyo, tassa visesanabhāvena vuccamāno divā-saddo savisesaṃ divasabhāgaṃ dīpetīti āha ‘‘divasassa divā’’tiādi. Yasmā samāpannassa cittaṃ nānārammaṇato paṭisaṃhataṃ hoti, jhānasamaṅgī ca pavivekūpagamanena saṅgaṇikābhāvato ekākiyāya nilīno viya hoti, tasmā vuttaṃ ‘‘tato tato…pe… gato’’ti. Mano bhavanti manaso vivaṭṭanissitaṃ vaḍḍhiṃ āvahantīti manobhāvaniyāti āha ‘‘manavaḍḍhakāna’’ntiādi. Unnamati na saṅkucati, alīnañca hotīti attho.
༥༡. ཡཱཝཏཱཏི ཡཱཝནྟོཏི ཨཡམེཏྠ ཨཏྠོཏི ཨཱཧ ‘‘ཡཏྟཀཱ’’ཏི། ཏེསནྟི ནིདྡྷཱརཎེ སཱམིཝཙནཾ། ནིདྡྷཱརཎཉྩ ཀེནཙི ཝིསེསེན ཨིཙྪིཏབྦཾ། ཡེཧི ཙ གུཎཝིསེསེཧི སམནྣཱགཏཱ བྷགཝཏོ སཱཝཀཱ ཨུཔཱསཀཱ རཱཛགཧེ པཊིཝསནྟི, ཨཡཉྩ ཏེཧི སམནྣཱགཏོཏི ཨིམཾ ཝིསེསཾ དཱིཔེཏུཾ ‘‘ཏེསཾ ཨབྦྷནྟརོ’’ཏི ཝུཏྟཾ། ཏེནཱཧ ‘‘བྷགཝཏོ ཀིརཱ’’ཏིཨཱདི།
51.Yāvatāti yāvantoti ayamettha atthoti āha ‘‘yattakā’’ti. Tesanti niddhāraṇe sāmivacanaṃ. Niddhāraṇañca kenaci visesena icchitabbaṃ. Yehi ca guṇavisesehi samannāgatā bhagavato sāvakā upāsakā rājagahe paṭivasanti, ayañca tehi samannāgatoti imaṃ visesaṃ dīpetuṃ ‘‘tesaṃ abbhantaro’’ti vuttaṃ. Tenāha ‘‘bhagavato kirā’’tiādi.
༥༢. ཏེསནྟི པརིབྦཱཛཀཱནཾ། ཀཐཱཡཱཏི ཏིརཙྪཱནཀཐཱཡ། དསྶནེནཱཏི དིཊྛིདསྶནེན། ཨཱཀཔྤེནཱཏི ཝེསེན། ཀུཏྟེནཱཏི ཀིརིཡཱཡ། ཨཱཙཱརེནཱཏི ཨཉྙམཉྙསྨིཾ ཨཱཙརིཏབྦཨཱཙཱརེན། ཝིཧཱརེནཱཏི རཏྟིནྡིཝཾ ཝིཧརིཏབྦཝིཧརཎེན། ཨིརིཡཱཔཐེནཱཏི ཋཱནཱདིཨིརིཡཱཔཐེན། ཨཉྙཱཀཱརཏཱཡ ཨཉྙཏིཏྠེ ནིཡུཏྟཱཏི ཨཉྙཏིཏྠིཡཱ། སངྒནྟྭཱ སམཱགནྟྭཱ རཱསཱི ཧུཏྭཱ པརེཧི ནིསིནྣཊྛཱནེ། ཨརཉྙཱནི ཙ ཏཱནི ཝནཔཏྠཱནི ཙཱཏི ཨརཉྙཝནཔཏྠཱནི། ཏཏྠ ཡཾ ཨརཉྙཀངྒནིཔྥཱདཀཾ ཨཱརཉྙཀཱནཾ, ཏཾ ‘‘ཨརཉྙ’’ནྟི ཝེདིཏབྦཾ། ཝནཔཏྠནྟི གཱམནྟཾ ཨཏིཀྐམིཏྭཱ མནུསྶཱནཾ ཨནུཔཙཱརཊྛཱནཾ, ཡཏྠ ན ཀསཱིཡཏི ན ཝཔྤཱིཡཏི། ཝུཏྟཉྷེཏཾ ‘‘ཝནཔཏྠནྟི དཱུརཱནམེཏཾ སེནཱསནཱནཾ ཨདྷིཝཙན’’ནྟི ‘‘ཝནཔཏྠནྟི ཝནསཎྜཱནམེཏཾ སེནཱསནཱནཾ, ཝནཔཏྠནྟི བྷཱིསནཀཱནམེཏཾ, ཝནཔཏྠནྟི སལོམཧཾསཱནམེཏཾ, ཝནཔཏྠནྟི པརིཡནྟཱནམེཏཾ ཝནཔཏྠནྟི ན མནུསྶཱུཔཙཱརཱནམེཏཾ སེནཱསནཱནཾ ཨདྷིཝཙན’’ནྟི (ཝིབྷ॰ ༥༣༡)། ཏེན ཝུཏྟཾ ‘‘གཱམཱུཔཙཱརཏོ མུཏྟཱནཱི’’ཏིཨཱདི། པནྟཱནཱིཏི པརིཡནྟཱནི ཨཏིདཱུརཱནི། ཏེནཱཧ ‘‘དཱུརཏརཱནཱི’’ཏིཨཱདི། ཝིཧཱརཱུཔཙཱརེནཱཏི ཝིཧཱརསྶ ཨུཔཙཱརཔྤདེསེན། ཨདྡྷིཀཛནསྶཱཏི མགྒགཱམིནོ ཛནསྶ། མནྡསདྡཱནཱིཏི ཨུཙྩཱསདྡམཧཱསདྡཱབྷཱཝཏོ ཏནུསདྡཱནི། མནུསྶེཧི སམཱགམྨ ཨེཀཛ྄ཛྷཾ པཝཏྟིཏསདྡོ ནིགྒྷོསོ, ཏསྶ ཡསྨཱ ཨཏྠོ དུབྦིབྷཱཝིཏོ ཧོཏི, ཏསྨཱ ཝུཏྟཾ ‘‘ཨཝིབྷཱཝིཏཏྠེན ནིགྒྷོསེནཱ’’ཏི། ཝིགཏཝཱཏཱནཱིཏི ཝིགཏསདྡཱནི། ‘‘རཧསྶ ཀརཎསྶ ཡུཏྟཱནཱི’’ཏི ཨིམིནཱཔི ཏེསཾ ཋཱནཱནཾ ཨརཉྙལཀྑཎཡུཏྟཏཾ, ཛནཝིཝིཏྟཏཾ, ཝནཝིཝིཏྟམེཝ ཙ ཝིབྷཱཝེཏི, ཏཐཱ ‘‘ཨེཀཱིབྷཱཝསྶ ཨནུརཱུཔཱནཱི’’ཏི ཨིམིནཱ།
52.Tesanti paribbājakānaṃ. Kathāyāti tiracchānakathāya. Dassanenāti diṭṭhidassanena. Ākappenāti vesena. Kuttenāti kiriyāya. Ācārenāti aññamaññasmiṃ ācaritabbaācārena. Vihārenāti rattindivaṃ viharitabbaviharaṇena. Iriyāpathenāti ṭhānādiiriyāpathena. Aññākāratāya aññatitthe niyuttāti aññatitthiyā. Saṅgantvā samāgantvā rāsī hutvā parehi nisinnaṭṭhāne. Araññāni ca tāni vanapatthāni cāti araññavanapatthāni. Tattha yaṃ araññakaṅganipphādakaṃ āraññakānaṃ, taṃ ‘‘arañña’’nti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vappīyati. Vuttañhetaṃ ‘‘vanapatthanti dūrānametaṃ senāsanānaṃ adhivacana’’nti ‘‘vanapatthanti vanasaṇḍānametaṃ senāsanānaṃ, vanapatthanti bhīsanakānametaṃ, vanapatthanti salomahaṃsānametaṃ, vanapatthanti pariyantānametaṃ vanapatthanti na manussūpacārānametaṃ senāsanānaṃ adhivacana’’nti (vibha. 531). Tena vuttaṃ ‘‘gāmūpacārato muttānī’’tiādi. Pantānīti pariyantāni atidūrāni. Tenāha ‘‘dūratarānī’’tiādi. Vihārūpacārenāti vihārassa upacārappadesena. Addhikajanassāti maggagāmino janassa. Mandasaddānīti uccāsaddamahāsaddābhāvato tanusaddāni. Manussehi samāgamma ekajjhaṃ pavattitasaddo nigghoso, tassa yasmā attho dubbibhāvito hoti, tasmā vuttaṃ ‘‘avibhāvitatthena nigghosenā’’ti. Vigatavātānīti vigatasaddāni. ‘‘Rahassa karaṇassa yuttānī’’ti imināpi tesaṃ ṭhānānaṃ araññalakkhaṇayuttataṃ, janavivittataṃ, vanavivittameva ca vibhāveti, tathā ‘‘ekībhāvassa anurūpānī’’ti iminā.
༥༣. ཀེནཱཏི ཧེཏུམྷི, སཧཡོགེ ཙ ཀརཎཝཙནནྟི ཨཱཧ ‘‘ཀེན ཀཱརཎེན ཀེན པུགྒལེན སདྡྷི’’ནྟི། ཨེཀོཔི ཧི ཝིབྷཏྟིནིདྡེསོ ཨནེཀཏྠཝིབྷཱཝནོ ཧོཏི, ཏཐཱ ཏདྡྷིཏཏྠཔདསམཱཧཱརེཏི།
53.Kenāti hetumhi, sahayoge ca karaṇavacananti āha ‘‘kena kāraṇena kena puggalena saddhi’’nti. Ekopi hi vibhattiniddeso anekatthavibhāvano hoti, tathā taddhitatthapadasamāhāreti.
སཾསནྡནནྟི ཨཱལཱཔསལླཱཔཝསེན ཀཐཱསཾསནྡནཾ། ཉཱཎབྱཏྟབྷཱཝནྟི བྱཏྟཉཱཎབྷཱཝཾ, སོ པན པརསྶ ཝཙནེ ཨུཏྟརདཱནཝསེན, པརེན ཝཱ ཝུཏྟཨུཏྟརེ པཙྩུཏྟརདཱནཝསེན སིཡཱཏི ཨཱཧ ‘‘ཨུཏྟརཔཙྩུཏྟརནཡེནཱ’’ཏི། ཡོ ཧི པརསྶ ཝཙནཾ ཏིཔུཀྑལེན ནཡེན རཱུཔེཏི, ཏཐཱ པརསྶ རཱུཔནཝཙནཾ ཛཱཏིབྷཱཝཾ ཨཱཔཱདེཏི, ཏསྶ ཏཱདིསཾ ཝཙནསབྷཱཝཾ ཉཱཎཝེཡྻཏྟིཡཾ ཝིབྷཱཝེཏི པཱཀཊཾ ཀརོཏཱིཏི། སུཉྙཱགཱརེསུ ནཊྛཱཏི སུཉྙཱགཱརེསུ ནིཝཱསེསུ ནཊྛཱ ཝིནཊྛཱ ཨབྷཱཝཾ གཏཱ། ནཱསྶ པཉྙཱ ནསྶེཡྻ ཏེཧི ཏེཧི ཀཏཔུཙྪནཔཊིཔུཙྪནནིམིཏྟཾ ནཱནཱཔཊིབྷཱནུཔྤཏྟིཡཱ ཝིསཱརམཱཔནྣཾ པུཙྪིཏཾ པཉྷཾ ཝིསྶཛྫེཏུཾ ཨསམཏྠཏཱཡ། ཨོརོདྷེཡྻཱམཱཏི ནིརུསྶཱཧཾ ཝིཡ ཀརོནྟཱ ཨཝརོདྷེཡྻཱམ, ཏཾ པརསྶ ཨོརོདྷནཾ ཝཱདཛཱལེན ཝིནནྡྷནཾ ཝིཡ ཧོཏཱིཏི ཨཱཧ ‘‘ཝིནནྡྷེཡྻཱམཱ’’ཏི ། ཏདཏྠཾ ཏེན ཏུཙྪཀུམྦྷིནིདསྶནཾ ཀཏཾ, ཏཾ བྱཏིརེཀམུཁེན དསྶེཏུཾ ‘‘པཱུརིཏགྷཊོ ཧཱི’’ཏིཨཱདི ཝུཏྟཾ།
Saṃsandananti ālāpasallāpavasena kathāsaṃsandanaṃ. Ñāṇabyattabhāvanti byattañāṇabhāvaṃ, so pana parassa vacane uttaradānavasena, parena vā vuttauttare paccuttaradānavasena siyāti āha ‘‘uttarapaccuttaranayenā’’ti. Yo hi parassa vacanaṃ tipukkhalena nayena rūpeti, tathā parassa rūpanavacanaṃ jātibhāvaṃ āpādeti, tassa tādisaṃ vacanasabhāvaṃ ñāṇaveyyattiyaṃ vibhāveti pākaṭaṃ karotīti. Suññāgāresu naṭṭhāti suññāgāresu nivāsesu naṭṭhā vinaṭṭhā abhāvaṃ gatā. Nāssa paññā nasseyya tehi tehi katapucchanapaṭipucchananimittaṃ nānāpaṭibhānuppattiyā visāramāpannaṃ pucchitaṃ pañhaṃ vissajjetuṃ asamatthatāya. Orodheyyāmāti nirussāhaṃ viya karontā avarodheyyāma, taṃ parassa orodhanaṃ vādajālena vinandhanaṃ viya hotīti āha ‘‘vinandheyyāmā’’ti . Tadatthaṃ tena tucchakumbhinidassanaṃ kataṃ, taṃ byatirekamukhena dassetuṃ ‘‘pūritaghaṭo hī’’tiādi vuttaṃ.
བལཾ དཱིཔེནྟོཏི ཨབྷཱུཏམེཝ ཨཏྟནོ ཉཱཎབལཾ པཀཱསེནྟོ། ཨསམྦྷིནྣནྟི ཛཱཏིསམྦྷེདཱབྷཱཝེན ཨསམྦྷིནྣཾ། ཨཉྙཛཱཏིསམྦྷེདེ སཏི ཨསྶཏརསྶ ཨསྶསྶ ཛཱཏབྷཱཝོ ཝིཡ སཱིཧསྶཔི སཱིཧཐཱམཱབྷཱཝོ སིཡཱཏི ཨཱཧ ‘‘ཨསམྦྷིནྣཀེསརསཱིཧ’’ནྟི། ཋཱནསོ ཝཱཏི ཏངྑཎེ ཨེཝ།
Balaṃ dīpentoti abhūtameva attano ñāṇabalaṃ pakāsento. Asambhinnanti jātisambhedābhāvena asambhinnaṃ. Aññajātisambhede sati assatarassa assassa jātabhāvo viya sīhassapi sīhathāmābhāvo siyāti āha ‘‘asambhinnakesarasīha’’nti. Ṭhānaso vāti taṅkhaṇe eva.
༥༤. ‘‘སུམཱགདྷཱ ནཱམ ནདཱི’’ཏི ཀེཙི, ཏཾ མིཙྪཱཏི དསྶེནྟོ ‘‘སུམཱགདྷཱ ནཱམ པོཀྑརཎཱི’’ཏི ཝཏྭཱ ཏསྶཱ པོཀྑརཎིབྷཱཝསྶ སུཏྟནྟརེ ཨཱགཏཏཾ དསྶེཏུཾ ‘‘ཡསྶཱ ཏཱིརེ’’ཏིཨཱདི ཝུཏྟཾ། མོརཱནཾ ནིཝཱཔོ ཨེཏྠཱཏི མོརནིཝཱཔོ། བྱདྷིཀརཎཱནམྤི ཧི པདཱནཾ བཱཧིརཏྠསམཱསོ ཧོཏིཡེཝ ཡཐཱ ‘‘ཨུརསིལོམོ’’ཏི། ཨཐ ཝཱ ནིཝུཏྠཾ ཨེཏྠཱཏི ནིཝཱཔོ, མོརཱནཾ ནིཝཱཔོ མོརནིཝཱཔོ, མོརཱནཾ ནིཝཱཔདིནྣཊྛཱནཾ། ཏེནཱཧ ‘‘ཡཏྠ མོརཱན’’ནྟིཨཱདི། ཡསྨཱ ནིགྲོདྷོ ཏཔོཛིགུཙྪཝཱདོ, སཱསནེ ཙ བྷིཀྑཱུ ཨཏྟཀིལམཐཱནུཡོགཾ ཝཛྫེཏྭཱ བྷཱཝནཱནུཡོགེན པརམསྶཱསཔྤཏྟེ ཝིཧརནྟེ པསྶཏི, ཏསྨཱ ‘‘ཀཐཾ ནུ ཁོ སམཎོ གོཏམོ ཀཱཡཀིལམཐེན ཝིནཱཝ སཱཝཀེ ཝིནེཏཱི’’ཏི སཉྫཱཏསནྡེཧོ ‘‘ཀོ ནཱམ སོ’’ཏིཨཱདིནཱ བྷགཝནྟཾ པུཙྪི། ཨསྶསཏི ཨནུསངྐིཏཔརིསངྐིཏོ ཧོཏི ཨེཏེནཱཏི ཨསྶཱསོ, པཱིཏིསོམནསྶནྟི ཨཱཧ ‘‘ཨསྶཱསཔྤཏྟཱཏི ཏུཊྛིཔྤཏྟཱ སོམནསྶཔྤཏྟཱ’’ཏི། ཨདྷིཀོ སེཊྛོ ཨཱསཡོ ནིསྶཡོ ཨཛ྄ཛྷཱསཡོཏི ཨཱཧ ‘‘ཨུཏྟམནིསྶཡབྷཱུཏ’’ནྟི། ཨཱདིབྷཱུཏཾ པུརཱཏནཾ སེཊྛཙརིཡཾ ཨཱདིབྲཧྨཙརིཡཾ, ལོཀུཏྟརམགྒནྟི ཨཏྠོ། ཏཐཱ ཧེས སབྦབུདྡྷཔཙྩེཀབུདྡྷསཱཝཀེཧི ཏེནེཝ ཨཱཀཱརེན ཨདྷིགཏོ། ཏེནཱཧ ‘‘པུརཱཎ…པེ॰… ཨརིཡམགྒ’’ནྟི། ཏཐཱ ཧི ཏཾ བྷགཝཱ ‘‘ཨདྡས པུརཱཎཾ མགྒཾ པུརཱཎམཉྫས’’ནྟི ཨཝོཙ། པཱུརེཏྭཱ བྷཱཝནཱཔཱརིཔཱུརིཝསེན། ‘‘པཱུརེཏྭཱ’’ཏི ཝཱ ཨིདཾ ‘‘ཨཛ྄ཛྷཱསཡཾ ཨཱདིབྲཧྨཙརིཡ’’ནྟི ཨེཏྠ པཱཋསེསོཏི ཝདནྟི། ‘‘ཨཛ྄ཛྷཱསཡཾ ཨཱདིབྲཧྨཙརིཡཾ པཊིཛཱནནྟི ཨསྶཱསཔྤཏྟཱ’’ཏི ཨེཝཾ ཝཱ ཨེཏྠ ཡོཛནཱ།
54. ‘‘Sumāgadhā nāma nadī’’ti keci, taṃ micchāti dassento ‘‘sumāgadhā nāma pokkharaṇī’’ti vatvā tassā pokkharaṇibhāvassa suttantare āgatataṃ dassetuṃ ‘‘yassā tīre’’tiādi vuttaṃ. Morānaṃ nivāpo etthāti moranivāpo. Byadhikaraṇānampi hi padānaṃ bāhiratthasamāso hotiyeva yathā ‘‘urasilomo’’ti. Atha vā nivutthaṃ etthāti nivāpo, morānaṃ nivāpo moranivāpo, morānaṃ nivāpadinnaṭṭhānaṃ. Tenāha ‘‘yattha morāna’’ntiādi. Yasmā nigrodho tapojigucchavādo, sāsane ca bhikkhū attakilamathānuyogaṃ vajjetvā bhāvanānuyogena paramassāsappatte viharante passati, tasmā ‘‘kathaṃ nu kho samaṇo gotamo kāyakilamathena vināva sāvake vinetī’’ti sañjātasandeho ‘‘ko nāma so’’tiādinā bhagavantaṃ pucchi. Assasati anusaṅkitaparisaṅkito hoti etenāti assāso, pītisomanassanti āha ‘‘assāsappattāti tuṭṭhippattā somanassappattā’’ti. Adhiko seṭṭho āsayo nissayo ajjhāsayoti āha ‘‘uttamanissayabhūta’’nti. Ādibhūtaṃ purātanaṃ seṭṭhacariyaṃ ādibrahmacariyaṃ, lokuttaramagganti attho. Tathā hesa sabbabuddhapaccekabuddhasāvakehi teneva ākārena adhigato. Tenāha ‘‘purāṇa…pe… ariyamagga’’nti. Tathā hi taṃ bhagavā ‘‘addasa purāṇaṃ maggaṃ purāṇamañjasa’’nti avoca. Pūretvā bhāvanāpāripūrivasena. ‘‘Pūretvā’’ti vā idaṃ ‘‘ajjhāsayaṃ ādibrahmacariya’’nti ettha pāṭhasesoti vadanti. ‘‘Ajjhāsayaṃ ādibrahmacariyaṃ paṭijānanti assāsappattā’’ti evaṃ vā ettha yojanā.
ཏཔོཛིགུཙྪཱཝཱདཝཎྞནཱ
Tapojigucchāvādavaṇṇanā
༥༥. པཀཏཱ ཧུཏྭཱ ཝིཙྪིནྣཱ ཝིཔྤཀཏཱཏི ཨཱཧ ‘‘ཨནིཊྛིཏཱཝ ཧུཏྭཱ ཋིཏཱ’’ཏི།
55. Pakatā hutvā vicchinnā vippakatāti āha ‘‘aniṭṭhitāva hutvā ṭhitā’’ti.
༥༦. ཝཱིརིཡེན པཱཔཛིགུཙྪནཝཱདོཏི ལཱུཁཔཊིཔཏྟིསཱདྷནེན ཝཱིརིཡེན ཨཏྟཏཎྷཱཝིནོདནཝསེན པཱཔཀསྶ ཛིགུཙྪནཝཱདོ། ཛིགུཙྪཏཱིཏི ཛིགུཙྪོ, ཏབྦྷཱཝོ ཛེགུཙྪཾ, ཨདྷིཀཾ ཛེགུཙྪཾ ཨདྷིཛེགུཙྪཾ, ཨཏིཝིཡ པཱཔཛིགུཙྪནཾ, ཏསྨིཾ ཨདྷིཛེགུཙྪེ། ཀཱཡདལ༹ྷཱིབཧུལཾ ཏཔཏཱིཏི ཏཔོ, ཨཏྟཀིལམཐཱནུཡོགཝསེན པཝཏྟཾ ཝཱིརིཡཾ, ཏེན ཀཱཡདལ༹ྷཱིབཧུལཏཱནིམིཏྟསྶ པཱཔསྶ ཛིགུཙྪནཾ, ཝིརཛྫནམྤི ཏཔོཛིགུཙྪཱཏི ཨཱཧ ‘‘ཝཱིརིཡེན པཱཔཛིགུཙྪཱ’’ཏི། གྷཱསཙྪཱདནསེནཱསནཏཎྷཱཝིནོདནམུཁེན ཨཏྟསྣེཧཝིརཛྫནནྟི ཨཏྠོ། ཨུཔརི ཝུཙྩམཱནེསུ ནཱནཱཀཱརེསུ ཨཙེལཀཱདིཝཏེསུ ཨེཀཛ྄ཛྷཾ སམཱདིནྣཱནཾ པརིསོདྷནམེཝེཏྠ པཱརིཔཱུརཎཾ , ན སབྦེསཾ ཨནཝསེསཏོ སམཱདཱནཾ ཏསྶ ཨསམྦྷཝཏོཏི ཨཱཧ ‘‘པརིཔུཎྞཱཏི པརིསུདྡྷཱ’’ཏི། པརིསོདྷནཉྩ ནེསཾ སཀསམཡསིདྡྷེན ནཡེན པཊིཔཛྫནམེཝ། ཝིཔརིཡཱཡེན ཨཔརིསུདྡྷཏཱ ཝེདིཏབྦཱ།
56.Vīriyena pāpajigucchanavādoti lūkhapaṭipattisādhanena vīriyena attataṇhāvinodanavasena pāpakassa jigucchanavādo. Jigucchatīti jiguccho, tabbhāvo jegucchaṃ, adhikaṃ jegucchaṃ adhijegucchaṃ, ativiya pāpajigucchanaṃ, tasmiṃ adhijegucche. Kāyadaḷhībahulaṃ tapatīti tapo, attakilamathānuyogavasena pavattaṃ vīriyaṃ, tena kāyadaḷhībahulatānimittassa pāpassa jigucchanaṃ, virajjanampi tapojigucchāti āha ‘‘vīriyena pāpajigucchā’’ti. Ghāsacchādanasenāsanataṇhāvinodanamukhena attasnehavirajjananti attho. Upari vuccamānesu nānākāresu acelakādivatesu ekajjhaṃ samādinnānaṃ parisodhanamevettha pāripūraṇaṃ, na sabbesaṃ anavasesato samādānaṃ tassa asambhavatoti āha ‘‘paripuṇṇāti parisuddhā’’ti. Parisodhanañca nesaṃ sakasamayasiddhena nayena paṭipajjanameva. Vipariyāyena aparisuddhatā veditabbā.
༥༧. ‘‘ཨེཀཾ པཉྷམྤི ན ཀཐེཏཱི’’ཏི པཋམཾ ཨཏྟནཱ པུཙྪིཏཔཉྷསྶ ཨཀཐིཏཏྟཱ ཝུཏྟཾ།
57.‘‘Ekaṃ pañhampi na kathetī’’ti paṭhamaṃ attanā pucchitapañhassa akathitattā vuttaṃ.
ཏཔནིསྶིཏཀོཏི ཨཏྟཀིལམཐཱནུཡོགསངྑཱཏཾ ཏཔཾ ནིསྶཱཡ སམཱདཱཡ ཝཏྟནཀོ། སཱིཧནཱདེཏི སཱིཧནཱདསུཏྟཝཎྞནཱཡཾ། ཡསྨཱ ཏཏྠ ཝིཏྠཱརིཏནཡེན ཝེདིཏབྦཱནི, ཏསྨཱ ཏསྶཱ ཨཏྠཔྤཀཱསནཱཡ ཝུཏྟནཡེནཔི ཝེདིཏབྦཱནི།
Tapanissitakoti attakilamathānuyogasaṅkhātaṃ tapaṃ nissāya samādāya vattanako. Sīhanādeti sīhanādasuttavaṇṇanāyaṃ. Yasmā tattha vitthāritanayena veditabbāni, tasmā tassā atthappakāsanāya vuttanayenapi veditabbāni.
ཨུཔཀྐིལེསཝཎྞནཱ
Upakkilesavaṇṇanā
༥༨. ‘‘སམྨཱ ཨཱདིཡཏཱི’’ཏི ཝཏྭཱ སམྨཱ ཨཱདིཡནཉྩསྶ དལ༹ྷགྒཱཧོ ཨེཝཱཏི ཨཱཧ ‘‘དལ༹ྷཾ གཎྷཱཏཱི’’ཏི། ‘‘སཱསནཱཝཙརེནཱཔི དཱིཔེཏབྦ’’ནྟི ཝཏྭཱ ཏཾ དསྶེཏུཾ ‘‘ཨེཀཙྩོ ཧཱི’’ཏིཨཱདི ཝུཏྟཾ, ཏེན དྷུཏངྒདྷརཏཱམཏྟེན ཨཏྟམནཏཱ, པརིཔུཎྞསངྐཔྤཏཱ སམྨཱཔཊིཔཏྟིཡཱ ཨུཔཀྐིལེསོཏི ཨིམམཏྠཾ དསྶེཏི, ན ཡཐཱཝུཏྟཏཔསམཱདཱནདྷུཏངྒདྷརཏཱནཾ སཏིཔི ཨནིཡྻཱནིཀཏྟེ སདིསཏནྟི དཊྛབྦཾ།
58. ‘‘Sammā ādiyatī’’ti vatvā sammā ādiyanañcassa daḷhaggāho evāti āha ‘‘daḷhaṃ gaṇhātī’’ti. ‘‘Sāsanāvacarenāpi dīpetabba’’nti vatvā taṃ dassetuṃ ‘‘ekacco hī’’tiādi vuttaṃ, tena dhutaṅgadharatāmattena attamanatā, paripuṇṇasaṅkappatā sammāpaṭipattiyā upakkilesoti imamatthaṃ dasseti, na yathāvuttatapasamādānadhutaṅgadharatānaṃ satipi aniyyānikatte sadisatanti daṭṭhabbaṃ.
‘‘དུཝིདྷསྶཱཔཱིཏི ‘ཨཏྟམནོ ཧོཏི པརིཔུཎྞསངྐཔྤོ’ཏི ཙ ཨེཝཾ ཨུཔཀྐིལེསབྷེདེན ཝུཏྟསྶ དུཝིདྷསྶཱཔི ཏཔསྶིནོ’’ཏི ཀེཙི། ཡསྨཱ པན ཨཊྛཀཐཱཡཾ སཱསནིཀཝསེནཱཔི ཨཏྠོ དཱིཔིཏོ, ཏསྨཱ བཱཧིརཀསྶ, སཱསནིཀསྶ ཙཱཏི ཨེཝཾ དུཝིདྷསྶཱཔི ཏཔསྶིནོཏི ཨཏྠོ ཝེདིཏབྦོ། ཏཐཱ ཙེཝ ཧི ཨུཔརིཔི ཨཏྠཝཎྞནཾ ཝཀྑཏཱིཏི། ཨེཏྟཱཝཏཱཏི ཡདིདཾ ‘‘ཀོ ཨཉྙོ མཡཱ སདིསོ’’ཏི ཨེཝཾ ཨཏིམཱནསྶ, ཨནིཊྛིཏཀིཙྩསྶེཝ ཙ ‘‘ཨལམེཏྟཱཝཏཱ’’ཏི ཨེཝཾ ཨཏིམཱནསྶ ཙ ཨུཔྤཱདནཾ, ཨེཏྟཱཝཏཱ།
‘‘Duvidhassāpīti ‘attamano hoti paripuṇṇasaṅkappo’ti ca evaṃ upakkilesabhedena vuttassa duvidhassāpi tapassino’’ti keci. Yasmā pana aṭṭhakathāyaṃ sāsanikavasenāpi attho dīpito, tasmā bāhirakassa, sāsanikassa cāti evaṃ duvidhassāpi tapassinoti attho veditabbo. Tathā ceva hi uparipi atthavaṇṇanaṃ vakkhatīti. Ettāvatāti yadidaṃ ‘‘ko añño mayā sadiso’’ti evaṃ atimānassa, aniṭṭhitakiccasseva ca ‘‘alamettāvatā’’ti evaṃ atimānassa ca uppādanaṃ, ettāvatā.
ཨུཀྐཾསཏཱིཏི ཨུཀྐཊྛཾ ཀརོཏི། ཨུཀྑིཔཏཱིཏི ཨཉྙེསཾ ཨུཔརི ཁིཔཏི, པགྒཎྷཱཏཱིཏི ཨཏྠོ། པརཾ སཾཧཱརེཏཱིཏི པརཾ སཾཧརཾ ནིཧཱིནཾ ཀརོཏི། ཨཝཀྑིཔཏཱིཏི ཨདྷོ ཁིཔཏི, ཨཝམཉྙཏཱིཏི ཨཏྠོ།
Ukkaṃsatīti ukkaṭṭhaṃ karoti. Ukkhipatīti aññesaṃ upari khipati, paggaṇhātīti attho. Paraṃ saṃhāretīti paraṃ saṃharaṃ nihīnaṃ karoti. Avakkhipatīti adho khipati, avamaññatīti attho.
མཱནམདཀརཎེནཱཏི མཱནསངྑཱཏསྶ མདསྶ ཀརཎེན ཨུཔྤཱདནེན། མུཙྪིཏོ ཧོཏཱིཏི མུཙྪཱཔནྣོ ཧོཏི, སཱ པན མུཙྪཱཔཏྟི ཨབྷིཛ྄ཛྷཱསཱིལབྦཏཔརཱམཱསཀཱཡགནྠེཧི གདྷིཏཙིཏྟཏཱ, ཏཏྠ ཙ ཨཏིལགྒབྷཱཝོཏི ཨཱཧ ‘‘གདྷིཏོ ཨཛ྄ཛྷོསནྣོ’’ཏི། པམཛྫནཉྩེཏྠ པམཛྫནམེཝཱཏི ཨཱཧ ‘‘པམཱདམཱཔཛྫཏཱི’’ཏི། ཀེཝལཾ དྷུཏངྒསུདྡྷིཀོ ཧུཏྭཱ ཀམྨཊྛཱནཾ ཨནནུཡུཉྫནྟོ ཏཱཡ ཨེཝ དྷུཏངྒསུདྡྷིཀཏཱཡ ཨཏྟུཀྐཾསནཱདིཝསེན པཝཏྟེཡྻཱཏི དསྶེཏུཾ ‘‘སཱསནེ’’ཏིཨཱདི ཝུཏྟཾ། ཏེནཱཧ ‘‘དྷུཏངྒམེཝ…པེ॰… པཙྩེཏཱི’’ཏི།
Mānamadakaraṇenāti mānasaṅkhātassa madassa karaṇena uppādanena. Mucchitohotīti mucchāpanno hoti, sā pana mucchāpatti abhijjhāsīlabbataparāmāsakāyaganthehi gadhitacittatā, tattha ca atilaggabhāvoti āha ‘‘gadhito ajjhosanno’’ti. Pamajjanañcettha pamajjanamevāti āha ‘‘pamādamāpajjatī’’ti. Kevalaṃ dhutaṅgasuddhiko hutvā kammaṭṭhānaṃ ananuyuñjanto tāya eva dhutaṅgasuddhikatāya attukkaṃsanādivasena pavatteyyāti dassetuṃ ‘‘sāsane’’tiādi vuttaṃ. Tenāha ‘‘dhutaṅgameva…pe… paccetī’’ti.
༥༩. ཏེཡེཝ པཙྩཡཱ། སུཊྛུ ཀཏྭཱ པཊིསངྑརིཏྭཱ ལདྡྷཱཏི ཨཱདརགཱརཝཡོགེན སཀྐཙྩཾ ཨབྷིསངྑརིཏྭཱ དཱནཝསེན ཨུཔནཡཝསེན ལདྡྷཱ། ཝཎྞབྷཎནནྟི གུཎཀིཏྟནཾ། ཨསྶཱཏི ཏཔསྶིནོ།
59.Teyeva paccayā. Suṭṭhu katvā paṭisaṅkharitvā laddhāti ādaragāravayogena sakkaccaṃ abhisaṅkharitvā dānavasena upanayavasena laddhā. Vaṇṇabhaṇananti guṇakittanaṃ. Assāti tapassino.
༦༠. ཝོདཱསནྟི བྱཱསནཾ, ཝིབྷཛྫནནྟི ཨཏྠོ། ཏཾ པནེཏྠ ཝིབྷཛྫནཾ དྭིདྷཱ ཨིཙྪིཏནྟི ཨཱཧ ‘‘དྭེབྷཱགཾ ཨཱཔཛྫཏཱི’’ཏི། དྭེ བྷཱགེ ཀརོཏི རུཙྩནཱརུཙྩནཝསེན ། གེདྷཛཱཏོཏི སཉྫཱཏགེདྷོ། མུཙྪནཾ ནཱམ སཏིཝིཔྤཝཱསེནེཝ ཧོཏི, ན སཏིཡཱ སཏཱིཏི ཨཱཧ ‘‘སམུཊྛསྶཏཱི’’ཏི། ཨཱདཱིནཝམཏྟམྤཱིཏི གདྷིཏཱདིབྷཱཝེན པརིབྷོགེ ཨཱདཱིནཝམཏྟམྤི ན པསྶཏི། མཏྟཉྙུཏཱཏི པརིབྷོགེ མཏྟཉྙུཏཱ། པཙྩཝེཀྑཎཔརིབྷོགམཏྟམྤཱིཏི པཙྩཝེཀྑཎམཏྟེན པརིབྷོགམྤི ཨེཀཝཱརཾ པཙྩཝེཀྑིཏྭཱཔི པརིབྷུཉྫནམྤི ན ཀརོཏི།
60.Vodāsanti byāsanaṃ, vibhajjananti attho. Taṃ panettha vibhajjanaṃ dvidhā icchitanti āha ‘‘dvebhāgaṃ āpajjatī’’ti. Dve bhāge karoti ruccanāruccanavasena . Gedhajātoti sañjātagedho. Mucchanaṃ nāma sativippavāseneva hoti, na satiyā satīti āha ‘‘samuṭṭhassatī’’ti. Ādīnavamattampīti gadhitādibhāvena paribhoge ādīnavamattampi na passati. Mattaññutāti paribhoge mattaññutā. Paccavekkhaṇaparibhogamattampīti paccavekkhaṇamattena paribhogampi ekavāraṃ paccavekkhitvāpi paribhuñjanampi na karoti.
༦༡. ཝིཙཀྐསཎྛཱནཱཏི ཝིཔུལཏམཙཀྐསཎྛཱནཱ། སབྦསྶ བྷུཉྫནཏོ ཨཡོཀཱུཊསདིསཱ དནྟཱ ཨེཝ དནྟཀཱུཊཾ། ཨཔསཱདེཏཱིཏི པསཱདེཏི། ཨཙེལཀཱདིཝསེནཱཏི ཨཙེལཀཝཏཱདིཝསེན། ལཱུཁཱཛཱིཝིནྟི སལླེཁཔཊིཔཏྟིཡཱ ལཱུཁཛཱིཝིཀཾ།
61.Vicakkasaṇṭhānāti vipulatamacakkasaṇṭhānā. Sabbassa bhuñjanato ayokūṭasadisā dantā eva dantakūṭaṃ.Apasādetīti pasādeti. Acelakādivasenāti acelakavatādivasena. Lūkhājīvinti sallekhapaṭipattiyā lūkhajīvikaṃ.
༦༢. ཏཔཾ ཀརོཏཱིཏི བྷཱཝནཱམནསིཀཱརལཀྑཎཾ ཏཔཾ ཙརཏི ཙརནྟོ ཝིཡ ཧོཏི། ཙངྐམཾ ཨོཏརཏི བྷཱཝནཾ ཨནུཡུཉྫནྟོ ཝིཡ། ཝིཧཱརངྒཎཾ སམྨཛྫཏི ཝཏྟཔཊིཔཏྟིཾ པཱུརེནྟོ ཝིཡ།
62.Tapaṃ karotīti bhāvanāmanasikāralakkhaṇaṃ tapaṃ carati caranto viya hoti. Caṅkamaṃ otarati bhāvanaṃ anuyuñjanto viya. Vihāraṅgaṇaṃ sammajjati vattapaṭipattiṃ pūrento viya.
‘‘ཨཱདསྶཡམཱནོ’’ཏི ཝཱ པཱཋོ།
‘‘Ādassayamāno’’ti vā pāṭho.
ཀིཉྩི ཝཛྫནྟི ཀིཉྩི ཀཱཡིཀཾ ཝཱ ཝཱཙསིཀཾ ཝཱ དོསཾ། དིཊྛིགཏནྟི ཝིཔརཱིཏདསྶནཾ། ཨརུཙྩམཱནནྟི ཨཏྟནོ སིདྡྷནྟེ པཊིཀྑིཏྟབྷཱཝེན ཨརུཙྩམཱནཾ། རུཙྩཏི མེཏི ‘‘ཀཔྤཏི མེ’’ཏི ཝདཏི། ཨནུཛཱནིཏབྦནྟི ཏཙྪཱཝིཔརཱིཏབྷཱུཏབྷཱཝེན ‘‘ཨེཝམེཏ’’ནྟི ཨནུཛཱནིཏབྦཾ། སཝནམནོཧཱརིཏཱཡ ‘‘སཱདྷུ སུཊྛཱུ’’ཏི ཨནུམོདིཏབྦཾ།
Kiñcivajjanti kiñci kāyikaṃ vā vācasikaṃ vā dosaṃ. Diṭṭhigatanti viparītadassanaṃ. Aruccamānanti attano siddhante paṭikkhittabhāvena aruccamānaṃ. Ruccati meti ‘‘kappati me’’ti vadati. Anujānitabbanti tacchāviparītabhūtabhāvena ‘‘evameta’’nti anujānitabbaṃ. Savanamanohāritāya ‘‘sādhu suṭṭhū’’ti anumoditabbaṃ.
༦༣. ཀུཛ྄ཛྷནསཱིལཏཱཡ ཀོདྷནོ། ཝུཏྟལཀྑཎོ ཨུཔནཱཧོ ཨེཏསྶ ཨཏྠཱིཏི ཨུཔནཱཧཱི། ཨེཝཾབྷཱུཏོ ཙ ཏཾསམངྒཱི ཧོཏཱིཏི ‘‘སམནྣཱགཏོ ཧོཏཱི’’ཏི ཝུཏྟཾ། ཨེས ནཡོ ཨིཏོ པརེསུཔི།
63. Kujjhanasīlatāya kodhano. Vuttalakkhaṇo upanāho etassa atthīti upanāhī. Evaṃbhūto ca taṃsamaṅgī hotīti ‘‘samannāgato hotī’’ti vuttaṃ. Esa nayo ito paresupi.
ཨཡཾ པན ཝིསེསོ – ཨིསྶཏི ཨུསཱུཡཏཱིཏི ཨུསྶུཀཱི། སཋནཾ ཨསནྟགུཎསམྦྷཱཝནཾ སཋོ, སོ ཨེཏསྶ ཨཏྠཱིཏི སཋོ། སནྟདོསཔཊིཙྪཱདནསབྷཱཝཱ མཱཡཱ, མཱཡཱ ཨེཏསྶ ཨཏྠཱིཏི མཱཡཱཝཱི། གརུཊྛཱནིཡཱནམྤི པཎིཔཱཏཱཀརཎལཀྑཎཾ ཐམྦྷནཾ ཐདྡྷཾ, ཏམེཏྠ ཨཏྠཱིཏི ཐདྡྷོ། གུཎེཧི སམཱནཾ, ཨདྷིཀཉྩ ཨཏིཀྐམིཏྭཱ ནིཧཱིནཾ ཀཏྭཱ མཉྙནསཱིལཏཱཡ ཨཏིམཱནཱི། ཨསནྟགུཎསམྦྷཱཝནཏྠིཀཏཱསངྑཱཏཱ པཱཔཱ ལཱམཀཱ ཨིཙྪཱ ཨེཏསྶཱཏི པཱཔིཙྪོ། མིཙྪཱ ཝིཔརཱིཏཱ དིཊྛི ཨེཏསྶཱཏི མིཙྪཱདིཊྛིཀོ། ‘‘ཨིདམེཝ སཙྩཾ, མོགྷམཉྙ’’ནྟི (མ॰ ནི॰ ༡༨༧, ༢༠༢, ༤༢༧; ༣.༢༧, ༢༩; ཨུདཱ॰ ༥༥; མཧཱནི॰ ༢༠; ནེཏྟི॰ ༥༨) ཨེཝཾ ཨཏྟནཱ ཨཏྟཱབྷིནིཝིཊྛཏཱཡ སཏཱ དིཊྛི སནྡིཊྛི, ཏམེཝ པརཱམསཏཱིཏི སནྡིཊྛིཔརཱམཱསཱི། ཨཊྛཀཐཱཡཾ པན ‘‘སཡཾ དིཊྛི སནྡིཊྛཱི’’ཏི ཝཏྠུཝསེན ཨཏྠོ ཝུཏྟོ། ཨཱ བཱལ༹ྷཾ ཝིཡ དྷཱིཡཏཱིཏི ཨཱདྷཱནནྟི ཨཱཧ ‘‘དལ༹ྷཾ སུཊྛུ ཋཔིཏ’’ནྟི། ཡཐཱགཧིཏཾ གཱཧཾ པཊིནིསྶཛྫནསཱིལོ པཊིནིསྶགྒཱི, ཏཔྤཊིཀྑེཔེན དུཔྤཊིནིསྶགྒཱི། པཊིསེདྷཏྠོ ཧི ཨཡཾ དུ-སདྡོ ཡཐཱ ‘‘དུཔྤཉྙོ, (མ॰ ནི॰ ༡.༤༤༩) དུསྶཱིལོ’’ཏི (ཨ॰ ནི॰ ༥.༢༡༣; ༡༠.༧༥; པཱརཱ॰ ༡༩༥; དྷ॰ པ॰ ༣༠༨) ཙ།
Ayaṃ pana viseso – issati usūyatīti ussukī. Saṭhanaṃ asantaguṇasambhāvanaṃ saṭho, so etassa atthīti saṭho. Santadosapaṭicchādanasabhāvā māyā, māyā etassa atthīti māyāvī. Garuṭṭhāniyānampi paṇipātākaraṇalakkhaṇaṃ thambhanaṃ thaddhaṃ, tamettha atthīti thaddho. Guṇehi samānaṃ, adhikañca atikkamitvā nihīnaṃ katvā maññanasīlatāya atimānī. Asantaguṇasambhāvanatthikatāsaṅkhātā pāpā lāmakā icchā etassāti pāpiccho. Micchā viparītā diṭṭhi etassāti micchādiṭṭhiko. ‘‘Idameva saccaṃ, moghamañña’’nti (ma. ni. 187, 202, 427; 3.27, 29; udā. 55; mahāni. 20; netti. 58) evaṃ attanā attābhiniviṭṭhatāya satā diṭṭhi sandiṭṭhi, tameva parāmasatīti sandiṭṭhiparāmāsī. Aṭṭhakathāyaṃ pana ‘‘sayaṃ diṭṭhi sandiṭṭhī’’ti vatthuvasena attho vutto. Ā bāḷhaṃ viya dhīyatīti ādhānanti āha ‘‘daḷhaṃ suṭṭhu ṭhapita’’nti. Yathāgahitaṃ gāhaṃ paṭinissajjanasīlo paṭinissaggī, tappaṭikkhepena duppaṭinissaggī. Paṭisedhattho hi ayaṃ du-saddo yathā ‘‘duppañño, (ma. ni. 1.449) dussīlo’’ti (a. ni. 5.213; 10.75; pārā. 195; dha. pa. 308) ca.
པརིསུདྡྷཔཔཊིཀཔྤཏྟཀཐཱཝཎྞནཱ
Parisuddhapapaṭikappattakathāvaṇṇanā
༦༤. ཨིདྷ ནིགྲོདྷ ཏཔསྶཱིཏི ཡཐཱནུཀྐནྟཾ པུརིམཔཱལི༹ཾ ནིགམནཝསེན ཨེཀདེསེན དསྶེཏི། ཏེནཱཧ ‘‘ཨེཝཾ བྷགཝཱ’’ཏིཨཱདི། གཧིཏལདྡྷིནྟི ‘‘ཨཙེལཀཱདིབྷཱཝོ སེཡྻོ, ཏེན ཙ སཾསཱརསུདྡྷི ཧོཏཱི’’ཏི ཨེཝཾ གཧིཏལདྡྷིཾ། རཀྑིཏཾ ཏཔནྟི ཏཱཡ ལདྡྷིཡཱ སམཱདིཡིཏྭཱ རཀྑིཏཾ ཨཙེལཀཝཏཱདིཏཔཾ། ‘‘སབྦམེཝ སཾཀིལིཊྛ’’ནྟི ཨིམིནཱ ཡཾ ཝཀྑཏི པརིསུདྡྷཔཱལི༹ཝཎྞནཱཡཾ ‘‘ལཱུཁཏཔསྶིནོ ཙེཝ དྷུཏངྒདྷརསྶ ཙ ཝསེན ཡོཛནཱ ཝེདིཏབྦཱ’’ཏི (དཱི॰ ནི॰ ཨཊྛ॰ ༣.༦༤), ཏསྶ པརིཀཔྤིཏརཱུཔསྶ ལཱུཁསྶ ཏཔསྶིནོཏི ཨཡམེཏྠ ཨདྷིཔྤཱཡོཏི དསྶེཏི། ‘‘པརིསུདྡྷཔཱལི༹དསྶནཏྠ’’ནྟི ཙ ཨིམིནཱ ཏིཏྠིཡཱནཾ ཝསེན པཱལི༹ ཡེཝེཏྠ ལབྦྷཏི, ན པན ཏདཏྠོཏི དསྶེཏི། ཝུཏྟཝིཔཀྑཝསེནཱཏི ཝུཏྟསྶ ཨཏྠསྶ པཊིཔཀྑཝསེན, པཊིཀྑེཔཝསེནཱཏི ཨཏྠོ། ཏསྨིཾ ཋཱནེཏི ཧེཏུཨཏྠེ བྷུམྨནྟི ཏསྶ ཧེཏུཨཏྠེན ཀརཎཝཙནེན ཨཏྠཾ དསྶེནྟོ ‘‘ཨེཝཾ སོ ཏེནཱ’’ཏིཨཱདིམཱཧ། ཨུཏྟརི ཝཱཡམམཱནོཏི ཡཐཱསམཱདིནྣེཧི དྷུཏདྷམྨེཧི ཨཔརིཏུཊྛོ, ཨཔརིཡོསིཏསངྐཔྤོ ཙ ཧུཏྭཱ ཨུཔརི བྷཱཝནཱནུཡོགཝསེན སམྨཱཝཱཡཱམཾ ཀརོནྟོ།
64.Idha nigrodha tapassīti yathānukkantaṃ purimapāḷiṃ nigamanavasena ekadesena dasseti. Tenāha ‘‘evaṃ bhagavā’’tiādi. Gahitaladdhinti ‘‘acelakādibhāvo seyyo, tena ca saṃsārasuddhi hotī’’ti evaṃ gahitaladdhiṃ. Rakkhitaṃ tapanti tāya laddhiyā samādiyitvā rakkhitaṃ acelakavatāditapaṃ. ‘‘Sabbameva saṃkiliṭṭha’’nti iminā yaṃ vakkhati parisuddhapāḷivaṇṇanāyaṃ ‘‘lūkhatapassino ceva dhutaṅgadharassa ca vasena yojanā veditabbā’’ti (dī. ni. aṭṭha. 3.64), tassa parikappitarūpassa lūkhassa tapassinoti ayamettha adhippāyoti dasseti. ‘‘Parisuddhapāḷidassanattha’’nti ca iminā titthiyānaṃ vasena pāḷi yevettha labbhati, na pana tadatthoti dasseti. Vuttavipakkhavasenāti vuttassa atthassa paṭipakkhavasena, paṭikkhepavasenāti attho. Tasmiṃ ṭhāneti hetuatthe bhummanti tassa hetuatthena karaṇavacanena atthaṃ dassento ‘‘evaṃ so tenā’’tiādimāha. Uttari vāyamamānoti yathāsamādinnehi dhutadhammehi aparituṭṭho, apariyositasaṅkappo ca hutvā upari bhāvanānuyogavasena sammāvāyāmaṃ karonto.
༦༩. ཨིཏོ པརནྟི ཨིཏོ ཡཐཱཝུཏྟནཡཏོ པརཾ། ཨགྒབྷཱཝཾ ཝཱ སཱརབྷཱཝཾ ཝཱཏི ཏཔོཛིགུཙྪཱཡ ཨགྒབྷཱཝཾ ཝཱ སཱརབྷཱཝཾ ཝཱ ཨཛཱནནྟོ། ‘‘ཨཡམེཝསྶ ཨགྒབྷཱཝོ སཱརབྷཱཝོ’’ཏི མཉྙམཱནོ ‘‘ཨགྒཔྤཏྟཱ, སཱརཔྤཏྟཱ ཙཱ’’ཏི ཨཱཧ།
69.Ito paranti ito yathāvuttanayato paraṃ. Aggabhāvaṃ vā sārabhāvaṃ vāti tapojigucchāya aggabhāvaṃ vā sārabhāvaṃ vā ajānanto. ‘‘Ayamevassa aggabhāvo sārabhāvo’’ti maññamāno ‘‘aggappattā, sārappattā cā’’ti āha.
པརིསུདྡྷཏཙཔྤཏྟཱདིཀཐཱཝཎྞནཱ
Parisuddhatacappattādikathāvaṇṇanā
༧༠. ཡམནཾ སཾཡམནཾ ཡཱམོ, ཧིཾསཱདཱིནཾ ཨཀརཎཝསེན ཙཏུབྦིདྷོ ཡཱམོཝ ཙཱཏུཡཱམོ, སོ ཨེཝ སཾཝརོ, ཏེན སཾཝུཏོ གུཏྟསབྦདྭཱརོ ཙཱཏུཡཱམསཾཝརསཾཝུཏོ། ཏེནཱཧ ‘‘ཙཏུབྦིདྷེན སཾཝརེན པིཧིཏོ’’ཏི། ཨཏིཔཱཏནཾ ཧིཾསནནྟི ཨཱཧ ‘‘པཱཎཾ ན ཧནཏཱི’’ཏི། ལོབྷཙིཏྟེན བྷཱཝིཏཾ སམྦྷཱཝིཏནྟི ཀཏྭཱ བྷཱཝིཏཾ ནཱམ པཉྩ ཀཱམགུཎཱ། ཨཡཉྩ ཏེསུ ཏེསཾཡེཝ སམུདཱཙཱརོ མགྒོཊྛཱཔཀཾ ཝིཡཱཏི ཨཱཧ ‘‘ཏེསཾ སཉྙཱཡཱ’’ཏི།
70. Yamanaṃ saṃyamanaṃ yāmo, hiṃsādīnaṃ akaraṇavasena catubbidho yāmova cātuyāmo, so eva saṃvaro, tena saṃvuto guttasabbadvāro cātuyāmasaṃvarasaṃvuto. Tenāha ‘‘catubbidhena saṃvarena pihito’’ti. Atipātanaṃ hiṃsananti āha ‘‘pāṇaṃ na hanatī’’ti. Lobhacittena bhāvitaṃ sambhāvitanti katvā bhāvitaṃ nāma pañca kāmaguṇā. Ayañca tesu tesaṃyeva samudācāro maggoṭṭhāpakaṃ viyāti āha ‘‘tesaṃ saññāyā’’ti.
ཨེཏནྟི ཨབྷིཧརཎཾ, ཧཱིནཱཡ ཨནཱཝཏྟནཉྩ། ཏེནཱཧ ‘‘སོ ཨབྷིཧརཏཱིཏི ཨཱདིལཀྑཎ’’ནྟི། ཨབྷིཧརཏཱིཏི ཨབྷིབུདྡྷིཾ ནེཏི། ཏེནཱཧ ‘‘ཨུཔརཱུཔརི ཝཌྜྷེཏཱི’’ཏི། ཙཀྐཝཏྟིནཱཔི པབྦཛིཏསྶ ཨབྷིཝཱདནཱདི ཀརཱིཡཏེཝཱཏི པབྦཛྫཱ སེཊྛཱ གུཎཝིསེསཡོགཏོ, དོསཝིརཧིཏཏོ ཙ, ཡཏོ སཱ པཎྜིཏཔཉྙཏྟཱ ཝུཏྟཱ། གིཧིབྷཱཝོ པན ནིཧཱིནོ ཏདུབྷཡཱབྷཱཝཏོཏི ཨཱཧ ‘‘ཧཱིནཱཡ གིཧིབྷཱཝཏྠཱཡཱ’’ཏི།
Etanti abhiharaṇaṃ, hīnāya anāvattanañca. Tenāha ‘‘so abhiharatīti ādilakkhaṇa’’nti. Abhiharatīti abhibuddhiṃ neti. Tenāha ‘‘uparūpari vaḍḍhetī’’ti. Cakkavattināpi pabbajitassa abhivādanādi karīyatevāti pabbajjā seṭṭhā guṇavisesayogato, dosavirahitato ca, yato sā paṇḍitapaññattā vuttā. Gihibhāvo pana nihīno tadubhayābhāvatoti āha ‘‘hīnāya gihibhāvatthāyā’’ti.
༧༡. ཏཙཔྤཏྟཱཏི ཏཙཾ པཏྟཱ, ཏཙསདིསཱ ཧོཏཱིཏི ཨཏྠོ།
71.Tacappattāti tacaṃ pattā, tacasadisā hotīti attho.
༧༤. ཏིཏྠིཡཱནཾ ཝསེནཱཏི ཏིཏྠིཡཱནཾ སམཡཝསེན། ནེསནྟི ཏིཏྠིཡཱནཾ། ཏནྟི དིབྦཙཀྑུཾ། སཱིལསམྤདཱཏི སབྦཱཀཱརསམྤནྣཾ ཙཏུཔཱརིསུདྡྷིསཱིལཾ། ཏཙསཱརསམྤཏྟིཏོཏི ཏཙཏཔོཛིགུཙྪཱཡཱསཱརསམྤཏྟིཏོ། ཝིསེསབྷཱཝནྟི ཝིསེསསབྷཱཝཾ།
74. Titthiyānaṃ vasenāti titthiyānaṃ samayavasena. Nesanti titthiyānaṃ. Tanti dibbacakkhuṃ. Sīlasampadāti sabbākārasampannaṃ catupārisuddhisīlaṃ. Tacasārasampattitoti tacatapojigucchāyāsārasampattito. Visesabhāvanti visesasabhāvaṃ.
ཨཙེལཀཔཱལི༹མཏྟམྤཱིཏི ཨཙེལཀཔཱལི༹ཨཱགཏཏྠམཏྟམྤི ནཏྠི, ཏསྨཱ མཡཾ ཨནསྶཱམ ཝིནཊྛཱཏི ཨཏྠོ། ཨ-ཀཱརོ ཝཱ ནིཔཱཏམཏྟཾ, ནསྶཱམཱཏི ཝིནསྶཱམ། ཀུཏོ པརིསུདྡྷཔཱལཱི༹ཏི ཀུཏོ ཨེཝ ཨམྷེསུ པརིསུདྡྷཔཱལི༹ཨཱགཏཔཊིཔཏྟི། ཨེས ནཡོ སེསེསུཔི། སུཏིཝསེནཱཔཱིཏི སོཏཔཐཱགམནམཏྟེནཱཔི ན ཛཱནཱམ།
Acelakapāḷimattampīti acelakapāḷiāgatatthamattampi natthi, tasmā mayaṃ anassāma vinaṭṭhāti attho. A-kāro vā nipātamattaṃ, nassāmāti vinassāma. Kuto parisuddhapāḷīti kuto eva amhesu parisuddhapāḷiāgatapaṭipatti. Esa nayo sesesupi. Sutivasenāpīti sotapathāgamanamattenāpi na jānāma.
ནིགྲོདྷསྶཔཛ྄ཛྷཱཡནཝཎྞནཱ
Nigrodhassapajjhāyanavaṇṇanā
༧༥. ཨསྶཱཏི སནྡྷཱནསྶ གཧཔཏིསྶ། ཀཀྑལ༹ནྟི ཕརུསཾ། དུརཱསདཝཙནནྟི ཨཝཏྟབྦཝཙནཾ། ཡསྨཱ ཕརུསཝཙནཾ ཡཾ ཨུདྡིསྶ པཡུཏྟཾ, ཏསྨིཾ ཁམཱཔིཏེ ཁམཱཔཀསྶ པཊིཔཱཀཏིཀཾ ཧོཏི, ཏསྨཱ ‘‘ཨཡཾ མཡཱི’’ཏིཨཱདི ཝུཏྟཾ།
75.Assāti sandhānassa gahapatissa. Kakkhaḷanti pharusaṃ. Durāsadavacananti avattabbavacanaṃ. Yasmā pharusavacanaṃ yaṃ uddissa payuttaṃ, tasmiṃ khamāpite khamāpakassa paṭipākatikaṃ hoti, tasmā ‘‘ayaṃ mayī’’tiādi vuttaṃ.
༧༦. བོདྷཏྠཱཡ དྷམྨཾ དེསེཏི, ན ཨཏྟནོ བུདྡྷབྷཱཝགྷོསནཏྠཱཡ། ཝཱདཏྠཱཡཱཏི པརཝཱདབྷཉྫནཝཱདཏྠཱཡ། རཱགཱདིསམནཏྠཱཡ དྷམྨཾ དེསེཏི, ན ཨནྟེཝཱསིཀམྱཏཱཡ། ཨོགྷནིཏྠརཎཏྠཱཡཱཏི ཙཏུརོགྷནིཏྠརཎཏྠཱཡ དྷམྨཾ དེསེཏི སབྦསོ ཨོརཔཱརཱཏིཎྞམཱཝཧཏྟཱ དེསནཱཡ། སབྦཀིལེསཔརིནིབྦཱནཏྠཱཡ དྷམྨཾ དེསེཏི ཀིལེསཱནཾ ལེསེནཔི དེསནཱཡ ཨཔརཱམཊྛབྷཱཝཏོ།
76.Bodhatthāya dhammaṃ deseti, na attano buddhabhāvaghosanatthāya. Vādatthāyāti paravādabhañjanavādatthāya. Rāgādisamanatthāya dhammaṃ deseti, na antevāsikamyatāya. Oghanittharaṇatthāyāti caturoghanittharaṇatthāya dhammaṃ deseti sabbaso orapārātiṇṇamāvahattā desanāya. Sabbakilesaparinibbānatthāya dhammaṃ deseti kilesānaṃ lesenapi desanāya aparāmaṭṭhabhāvato.
བྲཧྨཙརིཡཔརིཡོསཱནཱདིཝཎྞནཱ
Brahmacariyapariyosānādivaṇṇanā
༧༧. ཨིདཾ སབྦམྤཱིཏི སཏྟཝསྶཏོ པཊྛཱཡ ཡཱཝ ‘‘སཏྟཱཧ’’ནྟི པདཾ, ཨིདཾ སབྦམྤི ཝཙནཾ། ཨསཋོ པན ཨམཱཡཱཝཱི ཨུཛུཛཱཏིཀོ ཏིཀྑཔཉྙོ ཨུགྒྷཊིཏཉྙཱུཏི ཨདྷིཔྤཱཡོ། སོ ཧི ཏཾམུཧུཏྟེནེཝ ཨརཧཏྟཾ པཏྟུཾ སཀྑིསྶཏཱིཏི། ཝངྐཝངྐོཏི ཀཱཡཝངྐཱདཱིཧིཔི ཝངྐེཧི ཝངྐོ ཛིམྷོ ཀུཊིལོ། ‘‘སཋཾ པནཱཧཾ ཨནུསཱསིཏུཾ ན སཀྐོམཱི’’ཏི ན ཨིདཾ བྷགཝཱ ཀིལཱསུབྷཱཝེནེཝ ཝདཏི, ཨཐ ཁོ ཏསྶ ཨབྷཱཛནབྷཱཝེནེཝ།
77.Idaṃ sabbampīti sattavassato paṭṭhāya yāva ‘‘sattāha’’nti padaṃ, idaṃ sabbampi vacanaṃ. Asaṭho pana amāyāvī ujujātiko tikkhapañño ugghaṭitaññūti adhippāyo. So hi taṃmuhutteneva arahattaṃ pattuṃ sakkhissatīti. Vaṅkavaṅkoti kāyavaṅkādīhipi vaṅkehi vaṅko jimho kuṭilo. ‘‘Saṭhaṃ panāhaṃ anusāsituṃ na sakkomī’’ti na idaṃ bhagavā kilāsubhāveneva vadati, atha kho tassa abhājanabhāveneva.
༧༨. པཀཏིཡཱ ཨཱཙརིཡོཏི ཡོ ཨེཝ ཏུམྷཱཀཾ ཨིཏོ པུབྦེ པཀཏིཡཱ ཨཱཙརིཡོ ཨཧོསི, སོ ཨེཝ ཨིདཱནིཔི པུབྦཱཙིཎྞཝསེན ཨཱཙརིཡོ ཧོཏུ, ན མཡཾ ཏུམྷེ ཨནྟེཝཱསིཀེ ཀཱཏུཀཱམཱཏི ཨདྷིཔྤཱཡོ། ན མཡཾ ཏུམྷཱཀཾ ཨུདྡེསེན ཨཏྠིཀཱ, དྷམྨཏནྟི མེཝ པན ཏུམྷེ ཉཱཔེཏུཀཱམམྷཱཏི ཨདྷིཔྤཱཡོ། ཨཱཛཱིཝཏོཏི ཛཱིཝིཀཱཡ ཝུཏྟིཏོ། ཨཀུསལཱཏི ཀོཊྛཱསཾ པཏྟཱཏི ཨཀུསལཱཏི ཏཾ ཏཾ ཀོཊྛཱསཏཾཡེཝ ཨུཔགཏཱ། ཀིལེསདརཐསམྤཡུཏྟཱཏི ཀིལེསདརཐསཧིཏཱ ཏཾསམྦནྡྷནཏོ ། ཛཱཏིཛརཱམརཎཱནཾ ཧིཏཱཏི ཛཱཏིཛརཱམརཎིཡཱ། སཾཀིལེསོ ཨེཏྠ ཨཏྠི, སཾཀིལེསེ ཝཱ ནིཡུཏྟཱཏི སཾཀིལེསིཀཱ། ཝོདཱནཾ ཝུཙྩཏི ཝིསུདྡྷི, ཏསྶ པཙྩཡབྷཱུཏཏྟཱ ཝོདཱནིཡཱ། ཏཐཱབྷཱུཏཱ ཙེཏེ ཝོདཱཔེནྟཱིཏི ཨཱཧ ‘‘སཏྟེ ཝོདཱཔེནྟཱི’’ཏི། སིཁཱཔྤཏྟཱ པཉྙཱཡ པཱརིཔཱུརིཝེཔུལླཏཱ མགྒཕལཝསེནེཝ ཨིཙྪིཏབྦཱཏི ཨཱཧ ‘‘མགྒཔཉྙཱ…པེ॰… ཝེཔུལླཏ’’ནྟི། ཨུབྷོཔི ཝཱ ཨེཏཱནི པཱརིཔཱུརིཝེཔུལླཱནི། ཡཱ ཧི ཏསྶ པཱརིཔཱུརཱི, སཱ ཨེཝ ཝེཔུལླཏཱཏི། ཏཏོཏི སཾཀིལེསདྷམྨཔྤཧཱནཝོདཱནདྷམྨཱབྷིབུདྡྷིཧེཏུ།
78.Pakatiyā ācariyoti yo eva tumhākaṃ ito pubbe pakatiyā ācariyo ahosi, so eva idānipi pubbāciṇṇavasena ācariyo hotu, na mayaṃ tumhe antevāsike kātukāmāti adhippāyo. Namayaṃ tumhākaṃ uddesena atthikā, dhammatanti meva pana tumhe ñāpetukāmamhāti adhippāyo. Ājīvatoti jīvikāya vuttito. Akusalāti koṭṭhāsaṃ pattāti akusalāti taṃ taṃ koṭṭhāsataṃyeva upagatā. Kilesadarathasampayuttāti kilesadarathasahitā taṃsambandhanato . Jātijarāmaraṇānaṃ hitāti jātijarāmaraṇiyā. Saṃkileso ettha atthi, saṃkilese vā niyuttāti saṃkilesikā. Vodānaṃ vuccati visuddhi, tassa paccayabhūtattā vodāniyā. Tathābhūtā cete vodāpentīti āha ‘‘satte vodāpentī’’ti. Sikhāppattā paññāya pāripūrivepullatā maggaphalavaseneva icchitabbāti āha ‘‘maggapaññā…pe… vepullata’’nti. Ubhopi vā etāni pāripūrivepullāni. Yā hi tassa pāripūrī, sā eva vepullatāti. Tatoti saṃkilesadhammappahānavodānadhammābhibuddhihetu.
༧༩. ‘‘ཡཐཱ མཱརེནཱ’’ཏི ནཡིདཾ ནིདསྶནཝསེན ཝུཏྟཾ, ཨཐ ཁོ ཏཐཱབྷཱཝཀཐནམེཝཱཏི དསྶེཏུཾ ‘‘མཱརོ ཀིརཱ’’ཏིཨཱདི ཝུཏྟཾ། ཨཐཱཏི མཱརེན ཏེསཾ པརིཡུཊྛཱནཔྤཏྟིཏོ པཙྪཱ ཨཉྙཱསཱིཏི ཡོཛནཱ། ཀསྨཱ པན བྷགཝཱ པགེཝ ན ཨཉྙཱསཱིཏི? ཨནཱཝཛྫིཏཏྟཱ། མཱརཾ པཊིབཱཧིཏྭཱཏི མཱརེན ཏེསུ ཀཏཾ པརིཡུཊྛཱནཾ ཝིདྷམེཏྭཱ, ན ཏེསཾ སཏི པཡོཛནེ བུདྡྷཱནཾ དུཀྐརཾ། སོཏི མགྒཕལུཔྤཏྟིཧེཏུ། ཏེསཾ པརིབྦཱཛཀཱནཾ།
79.‘‘Yathā mārenā’’ti nayidaṃ nidassanavasena vuttaṃ, atha kho tathābhāvakathanamevāti dassetuṃ ‘‘māro kirā’’tiādi vuttaṃ. Athāti mārena tesaṃ pariyuṭṭhānappattito pacchā aññāsīti yojanā. Kasmā pana bhagavā pageva na aññāsīti? Anāvajjitattā. Māraṃ paṭibāhitvāti mārena tesu kataṃ pariyuṭṭhānaṃ vidhametvā, na tesaṃ sati payojane buddhānaṃ dukkaraṃ. Soti maggaphaluppattihetu. Tesaṃ paribbājakānaṃ.
ཕུཊྛཱཏི པརིཡུཊྛཱནཝསེན ཕུཊྛཱ། ཡཏྲཱཏི ནིདྡྷཱརཎེ བྷུམྨནྟི ཨཱཧ ‘‘ཡེསཱུ’’ཏི། ཨཉྙཱཎཏྠནྟི ཨཱཛཱནནཏྠཾ, ཨུཔསགྒམཏྟཉྩེཏྠ ཨཱ-ཀཱརོཏི ཨཱཧ ‘‘ཛཱནནཏྠ’’ནྟི, ཝཱིམཾསནཏྠནྟི ཨཏྠོ། ཙིཏྟཾ ནུཔྤནྣནྟི ‘‘ཛཱནཱམ ཏཱཝསྶ དྷམྨ’’ནྟི ཨཱཛཱནནཏྠཾ ‘‘བྲཧྨཙརིཡཾ ཙརིསྶཱམཱ’’ཏི ཨེཀསྨིཾ དིཝསེ ཨེཀཝཱརམྤི ཏེསཾ ཙིཏྟཾ ནུཔྤནྣཾ། སཏྟཱཧོ པན ཝུཙྩམཱནོ ཨེཏེསཾ ཀིཾ ཀརིསྶཏཱིཏི ཡོཛནཱ། སཏྟཱཧཾ པཱུརེཏུནྟི སཏྟཱཧཾ བྲཧྨཙརིཡཾ པཱུརེཏུཾ, བྲཧྨཙརིཡཝསེན ཝཱ སཏྟཱཧཾ པཱུརེཏུནྟི ཨཏྠོ། པརཝཱདབྷིནྡནནྟི པརཝཱདམདྡནཾ། སཀཝཱདསམུསྶཱཔནནྟི སཀཝཱདཔགྒཎྷནཾ། ཝཱསནཱཡཱཏི སཙྩསམྤཊིཝེདྷཝཱསནཱཡ། ནེསནྟི ཙ པཀརཎཝསེན ཝུཏྟཾ། ཏདཉྙེསམྤི ཧི བྷགཝཏོ སམྨུཁཱ, པརམྤརཱཡ ཙ དེཝམནུསྶཱནཾ སུཎནྟཱནཾ ཝཱསནཱཡ པཙྩཡོ ཨེཝཱཏི། ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻམེཝཱཏི།
Phuṭṭhāti pariyuṭṭhānavasena phuṭṭhā. Yatrāti niddhāraṇe bhummanti āha ‘‘yesū’’ti. Aññāṇatthanti ājānanatthaṃ, upasaggamattañcettha ā-kāroti āha ‘‘jānanattha’’nti, vīmaṃsanatthanti attho. Cittaṃ nuppannanti ‘‘jānāma tāvassa dhamma’’nti ājānanatthaṃ ‘‘brahmacariyaṃ carissāmā’’ti ekasmiṃ divase ekavārampi tesaṃ cittaṃ nuppannaṃ. Sattāho pana vuccamāno etesaṃ kiṃ karissatīti yojanā. Sattāhaṃ pūretunti sattāhaṃ brahmacariyaṃ pūretuṃ, brahmacariyavasena vā sattāhaṃ pūretunti attho. Paravādabhindananti paravādamaddanaṃ. Sakavādasamussāpananti sakavādapaggaṇhanaṃ. Vāsanāyāti saccasampaṭivedhavāsanāya. Nesanti ca pakaraṇavasena vuttaṃ. Tadaññesampi hi bhagavato sammukhā, paramparāya ca devamanussānaṃ suṇantānaṃ vāsanāya paccayo evāti. Yaṃ panettha atthato na vibhattaṃ, taṃ suviññeyyamevāti.
ཨུདུམྦརིཀསུཏྟཝཎྞནཱཡ ལཱིནཏྠཔྤཀཱསནཱ།
Udumbarikasuttavaṇṇanāya līnatthappakāsanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༢. ཨུདུམྦརིཀསུཏྟཾ • 2. Udumbarikasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༢. ཨུདུམྦརིཀསུཏྟཝཎྞནཱ • 2. Udumbarikasuttavaṇṇanā
