| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
37. உக்³க³ஹனித்³தே³ஸவண்ணனா
37. Uggahaniddesavaṇṇanā
281. புக்³க³ல-ஸத்³த³மத்தே பயுத்தே அத்தனோபி க³ஹணஸம்ப⁴வோ ஸியாதி ப்³யபி⁴சாரத்த²ங் அஞ்ஞ-ஸத்³த³ப்பயோகோ³. ஸதி ஸம்ப⁴வே ப்³யபி⁴சாரே விஸேஸனங் ஸாத்த²கங் ஹோதீதி. த³ஸபே⁴த³ம்பி ரதனந்தி ‘‘முத்தா மணி வேளுரியோ ஸங்கோ² ஸிலா பவாளங் ரஜதங் ஜாதரூபங் லோஹிதங்கோ மஸாரக³ல்ல’’ந்தி (பாசி॰ 506) ஏவங் வுத்தங் த³ஸபே⁴த³ம்பி ரதனங். உக்³க³ண்ஹந்தஸ்ஸாதி க³ண்ஹந்தஸ்ஸ ஸம்படிச்ச²ந்தஸ்ஸ.
281. Puggala-saddamatte payutte attanopi gahaṇasambhavo siyāti byabhicāratthaṃ añña-saddappayogo. Sati sambhave byabhicāre visesanaṃ sātthakaṃ hotīti. Dasabhedampi ratananti ‘‘muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragalla’’nti (pāci. 506) evaṃ vuttaṃ dasabhedampi ratanaṃ. Uggaṇhantassāti gaṇhantassa sampaṭicchantassa.
282-3. தேஸு அத்தத்த²ங் உக்³க³ண்ஹந்தஸ்ஸ த்³வீஸு நிஸ்ஸக்³கீ³தி ஸம்ப³ந்தோ⁴. தேஸூதி தேஸு த³ஸஸு மஜ்ஜே². த்³வீஸூதி ரஜதஜாதரூபஸங்கா²தேஸு த்³வீஸு நிஸ்ஸக்³கி³யவத்தூ²ஸு. அத்தத்த²ந்தி இமினா நவகம்மாதீ³னங் பஞ்சன்னங் அத்தா²ய து³க்கடந்தி தீ³பேதி. ஸேஸேஸு து³க்கடந்தி அவஸேஸேஸு அட்ட²ஸு ஸப்³பே³ஸம்பி அத்தா²ய உக்³க³ண்ஹந்தஸ்ஸ து³க்கடந்தி அத்தோ². க³ணஞ்ச ஸங்க⁴ஞ்ச புக்³க³லஞ்ச அனாமஸித்வா ‘‘செத்யஸ்ஸ நவகம்மஸ்ஸ த³ம்மீ’’தி வுத்தே ச ந படிக்கி²பேதி ஸம்ப³ந்த⁴னீயங். ந படிக்கி²பேதி இமினா ஸங்கா⁴தி³ங் ஆமஸித்வா வுத்தே படிக்கி²பனங் தீ³பேதி. படிக்கி²த்தே ‘‘கப்பியகாரகானங் வா ஹத்தே² ப⁴விஸ்ஸதி, மம புரிஸானங் மய்ஹமேவ வா ஹத்தே² ப⁴விஸ்ஸதி, கேவலங் தும்ஹே பச்சயே பரிபு⁴ஞ்ஜதா²’’தி வத³தி, வட்டதி. சதுபச்சயத்தா²ய ச தி³ன்னங் யேன யேன அத்தோ² ஹோதி, தத³த்த²ங் உபனேதப்³ப³ங். தேஸங் சீவரத்தா²ய தி³ன்னங் சீவரேயேவ உபனேதப்³ப³ங். ஸசே சீவரேன தாதி³ஸோ அத்தோ² நத்தி², பிண்ட³பாதாதீ³ஹி ஸங்கோ⁴ கிலமதி, ஸங்க⁴ஸுட்டு²தாய அபலோகெத்வா தத³த்தா²யபி உபனேதப்³ப³ங். ஏஸ நயோ பிண்ட³பாதகி³லானபச்சயத்தா²ய தி³ன்னேபி. ஸேனாஸனத்தா²ய தி³ன்னங் பன க³ருப⁴ண்ட³த்தா தத்தே²வ உபனேதப்³ப³ங், ஸேனாஸனேஸு நஸ்ஸந்தேஸு ஜக்³க³னத்த²ங் மூலச்சே²ஜ்ஜங் அகத்வா அவிஸ்ஸஜ்ஜெத்வா யாபனமத்தங் பரிபு⁴ஞ்ஜிதப்³ப³ங்.
282-3. Tesu attatthaṃ uggaṇhantassa dvīsu nissaggīti sambandho. Tesūti tesu dasasu majjhe. Dvīsūti rajatajātarūpasaṅkhātesu dvīsu nissaggiyavatthūsu. Attatthanti iminā navakammādīnaṃ pañcannaṃ atthāya dukkaṭanti dīpeti. Sesesu dukkaṭanti avasesesu aṭṭhasu sabbesampi atthāya uggaṇhantassa dukkaṭanti attho. Gaṇañca saṅghañca puggalañca anāmasitvā ‘‘cetyassa navakammassa dammī’’ti vutte ca na paṭikkhipeti sambandhanīyaṃ. Na paṭikkhipeti iminā saṅghādiṃ āmasitvā vutte paṭikkhipanaṃ dīpeti. Paṭikkhitte ‘‘kappiyakārakānaṃ vā hatthe bhavissati, mama purisānaṃ mayhameva vā hatthe bhavissati, kevalaṃ tumhe paccaye paribhuñjathā’’ti vadati, vaṭṭati. Catupaccayatthāya ca dinnaṃ yena yena attho hoti, tadatthaṃ upanetabbaṃ. Tesaṃ cīvaratthāya dinnaṃ cīvareyeva upanetabbaṃ. Sace cīvarena tādiso attho natthi, piṇḍapātādīhi saṅgho kilamati, saṅghasuṭṭhutāya apaloketvā tadatthāyapi upanetabbaṃ. Esa nayo piṇḍapātagilānapaccayatthāya dinnepi. Senāsanatthāya dinnaṃ pana garubhaṇḍattā tattheva upanetabbaṃ, senāsanesu nassantesu jagganatthaṃ mūlacchejjaṃ akatvā avissajjetvā yāpanamattaṃ paribhuñjitabbaṃ.
284. கெ²த்தாதீ³னங் கேஸஞ்சி து³க்கடவத்தூ²னங் ஸம்படிச்ச²னூபாயங் த³ஸ்ஸேதுங் ‘‘கெ²த்த’’ந்திஆதி³ வுத்தங். தத்த² கெ²த்தந்தி புப்³ப³ண்ணவிருஹனட்டா²னங். வத்து²ந்தி அபரண்ணஉச்சு²ப²லாதீ³னங் விருஹனட்டா²னங். தா³ஸபஸ்வாதி³கந்தி தா³ஸபஸுபுப்பா²ராமப²லாராமாதி³கங். படிக்கி²பித்வா கப்பியேன கமேன ச க³ண்ஹெய்யாதி ஸம்ப³ந்தோ⁴. கப்பியேன கமேன சாதி எத்த² கம-ஸத்³தோ³ வோஹாரப்படிபாடிவசனோ, தஸ்மா பரேஸங் அத்தனோ ச கப்பியவோஹாரக்கமேனேவாதி அத்தோ².
284. Khettādīnaṃ kesañci dukkaṭavatthūnaṃ sampaṭicchanūpāyaṃ dassetuṃ ‘‘khetta’’ntiādi vuttaṃ. Tattha khettanti pubbaṇṇaviruhanaṭṭhānaṃ. Vatthunti aparaṇṇaucchuphalādīnaṃ viruhanaṭṭhānaṃ. Dāsapasvādikanti dāsapasupupphārāmaphalārāmādikaṃ. Paṭikkhipitvā kappiyena kamena ca gaṇheyyāti sambandho. Kappiyena kamena cāti ettha kama-saddo vohārappaṭipāṭivacano, tasmā paresaṃ attano ca kappiyavohārakkamenevāti attho.
ஸோ ச கெ²த்தவத்தூ²ஸு தாவ ‘‘சத்தாரோ பச்சயே பரிபு⁴ஞ்ஜதா²’’தி வா ‘‘கப்பியகாரகானங் ஹத்தே² ப⁴விஸ்ஸதீ’’தி வா ‘‘ஸங்கோ⁴ கப்பியப⁴ண்ட³ங் பு⁴ஞ்ஜதூ’’தி வா ‘‘ஸீமங் தே³மா’’தி வா பரேஹி வுத்தோ, ‘‘ஸாது⁴, உபாஸக மிக³பக்கி²னோ எத்த² நிப்³ப⁴யா ஸுகே²ன ஜீவிஸ்ஸந்தீ’’தி அத்தனா வா தளாகே யதா²வுத்தேனேவ ‘‘உத³கங் பரிபு⁴ஞ்ஜிஸ்ஸந்தி, ப⁴ண்ட³கங் தோ⁴விஸ்ஸந்தி, மிக³பக்கி²னோ பிவிஸ்ஸந்தீ’’தி பரேஹி வா ‘‘ஸாது⁴, உபாஸக, ஸங்கோ⁴ பானீயங் பிவிஸ்ஸதீ’’திஆதி³னா அத்தனா வா தா³ஸே ‘‘ஆராமிகங் த³ம்மி, வெய்யாவச்சகரங் த³ம்மி, கப்பியகாரகங் த³ம்மீ’’தி வா பஸூஸு ‘‘பஞ்சகோ³ரஸபரிபோ⁴க³த்தா²ய த³ம்மீ’’தி ஆராமே ‘‘வனங் த³ம்மீ’’தி ஏவமாதி³னா வுத்தோ வேதி³தப்³போ³. ஸசே பன கோசி அப்³யத்தோ அகப்பியவோஹாரேன கெ²த்தாதி³ங் படிக்³க³ண்ஹாதி வா காரேதி வா, தங் பி⁴க்கூ²ஹி ந பரிபு⁴ஞ்ஜிதப்³ப³ங், தங் நிஸ்ஸாய லத்³த⁴ங் கப்பியப⁴ண்ட³ம்பி அகப்பியமேவ. அப்³யத்தேன பன லஜ்ஜீபி⁴க்கு²னா காராபிதேஸு கிஞ்சாபி படிக்³க³ஹணங் கப்பியங், பி⁴க்கு²ஸ்ஸ பயோக³பச்சயா உப்பன்னேன மிஸ்ஸத்தா விஸக³தபிண்ட³பாதோ விய, அகப்பியமங்ஸபோ⁴ஜனங் விய ச து³ப்³பி³னிப்³போ⁴க³ங் ஹோதி, ஸப்³பே³ஸங் அகப்பியமேவ.
So ca khettavatthūsu tāva ‘‘cattāro paccaye paribhuñjathā’’ti vā ‘‘kappiyakārakānaṃ hatthe bhavissatī’’ti vā ‘‘saṅgho kappiyabhaṇḍaṃ bhuñjatū’’ti vā ‘‘sīmaṃ demā’’ti vā parehi vutto, ‘‘sādhu, upāsaka migapakkhino ettha nibbhayā sukhena jīvissantī’’ti attanā vā taḷāke yathāvutteneva ‘‘udakaṃ paribhuñjissanti, bhaṇḍakaṃ dhovissanti, migapakkhino pivissantī’’ti parehi vā ‘‘sādhu, upāsaka, saṅgho pānīyaṃ pivissatī’’tiādinā attanā vā dāse ‘‘ārāmikaṃ dammi, veyyāvaccakaraṃ dammi, kappiyakārakaṃ dammī’’ti vā pasūsu ‘‘pañcagorasaparibhogatthāya dammī’’ti ārāme ‘‘vanaṃ dammī’’ti evamādinā vutto veditabbo. Sace pana koci abyatto akappiyavohārena khettādiṃ paṭiggaṇhāti vā kāreti vā, taṃ bhikkhūhi na paribhuñjitabbaṃ, taṃ nissāya laddhaṃ kappiyabhaṇḍampi akappiyameva. Abyattena pana lajjībhikkhunā kārāpitesu kiñcāpi paṭiggahaṇaṃ kappiyaṃ, bhikkhussa payogapaccayā uppannena missattā visagatapiṇḍapāto viya, akappiyamaṃsabhojanaṃ viya ca dubbinibbhogaṃ hoti, sabbesaṃ akappiyameva.
285-6. நவ…பே॰… கிரியா ச அனவே மத்திகுத்³தா⁴ரணஞ்ச ப³ந்தோ⁴ ச ஆளியா தி²ரகாரோ ச அனவே கேதா³ரே அதிரேகபா⁴க³க்³க³ஹணஞ்ச நவே ச அபரிச்சி²ன்னபா⁴கே³ ஸஸ்ஸே ‘‘எத்தகே தே³தா²’’தி கஹாபணுட்டா²பனஞ்சாதி ஸப்³பே³ஸம்பி அகப்பியந்தி ஸம்ப³ந்தோ⁴. மாதிகா ச கேதா³ரோ ச தளாகோ சாதி த்³வந்தோ³ மாதிக…பே॰… தளாகா. தேஸங் கிரியாதி ஸமாஸோ. அனவேதி சதுபச்சயவஸேன படிக்³க³ஹிதே புராணதளாகே. உத³கவஸேன படிக்³க³ஹிதே பன ஸுத்³த⁴சித்தானங் வட்டதி. ப³ந்தோ⁴தி பாளியா ப³ந்தோ⁴. போராணகேதா³ரே நியமிதபகதிபா⁴க³த்தா ஆஹ ‘‘அனவே’’தி. அபரிச்சி²ன்னபா⁴கே³தி ‘‘எத்தகே பூ⁴மிபா⁴கே³ எத்தகோ பா⁴கோ³ தா³தப்³போ³’’தி ஏவங் அபரிச்சி²ன்னபா⁴கே³.
285-6. Nava…pe… kiriyā ca anave mattikuddhāraṇañca bandho ca āḷiyā thirakāro ca anave kedāre atirekabhāgaggahaṇañca nave ca aparicchinnabhāge sasse ‘‘ettake dethā’’ti kahāpaṇuṭṭhāpanañcāti sabbesampi akappiyanti sambandho. Mātikā ca kedāro ca taḷāko cāti dvando mātika…pe… taḷākā. Tesaṃ kiriyāti samāso. Anaveti catupaccayavasena paṭiggahite purāṇataḷāke. Udakavasena paṭiggahite pana suddhacittānaṃ vaṭṭati. Bandhoti pāḷiyā bandho. Porāṇakedāre niyamitapakatibhāgattā āha ‘‘anave’’ti. Aparicchinnabhāgeti ‘‘ettake bhūmibhāge ettako bhāgo dātabbo’’ti evaṃ aparicchinnabhāge.
287-9. ‘‘கஸ வப்ப’’ இச்சாதி³ங் அவத்வா ச ‘‘எத்தகாய பூ⁴மியா எத்தகோ பா⁴கோ³ தெ³ய்யோ’’தி பூ⁴மிங் வா பதிட்டா²பேதி, தஸ்ஸேவேதமகப்பியந்தி ஸம்ப³ந்தோ⁴. ச-ஸத்³தோ³ அவதா⁴ரணே. பதிட்டா²பேதீதி யோ பி⁴க்கு² பதிட்டா²பேதி. தஸ்ஸேவாதி தஸ்ஸ பதிட்டா²பகபி⁴க்கு²ஸ்ஸேவ. ஏதந்தி பதிட்டா²பிதபூ⁴மிதோ லத்³த⁴த⁴ஞ்ஞங் ‘‘எத்தகே பூ⁴மிபா⁴கே³ ஸஸ்ஸங் கதங், எத்தகங் க³ண்ஹதா²’’தி ஏவங் வத³ந்தே பமாணக³ண்ஹனத்த²ங் த³ண்ட³ரஜ்ஜுபி⁴ மினநே வா க²லே ட²த்வா ரக்க²ணே வா தங் நீஹராபனே வா கொட்டா²கா³ராதி³படிஸாமனே வா ஏதங் தஸ்ஸேவ அகப்பியந்தி ஸம்ப³ந்த⁴னீயங். பதிட்டா²பேதி சாதி ஸோ பி⁴க்கு² பதிட்டா²பேதி ச. கதந்தி அம்ஹேஹி கதங். வத³ந்தேவந்தி ஏவங் கஸ்ஸகே வத³ந்தே. பமாணந்தி பூ⁴மிப்பமாணங். நீஹராபனேதி க²லதோ கே³ஹஸ்ஸ நீஹராபனே. ஏதந்தி மிதலத்³த⁴ரக்கி²தாதி³கங். தஸ்ஸேவாதி மானகரக்க²காதி³னோ ஏவ. அபுப்³ப³ஸ்ஸ அனுப்பாதி³தத்தா அஞ்ஞேஸங் கப்பதீதி ஆஹ ‘‘தஸ்ஸேவேதமகப்பிய’’ந்தி.
287-9. ‘‘Kasa vappa’’ iccādiṃ avatvā ca ‘‘ettakāya bhūmiyā ettako bhāgo deyyo’’ti bhūmiṃ vā patiṭṭhāpeti, tassevetamakappiyanti sambandho. Ca-saddo avadhāraṇe. Patiṭṭhāpetīti yo bhikkhu patiṭṭhāpeti. Tassevāti tassa patiṭṭhāpakabhikkhusseva. Etanti patiṭṭhāpitabhūmito laddhadhaññaṃ ‘‘ettake bhūmibhāge sassaṃ kataṃ, ettakaṃ gaṇhathā’’ti evaṃ vadante pamāṇagaṇhanatthaṃ daṇḍarajjubhi minane vā khale ṭhatvā rakkhaṇe vā taṃ nīharāpane vā koṭṭhāgārādipaṭisāmane vā etaṃ tasseva akappiyanti sambandhanīyaṃ. Patiṭṭhāpeti cāti so bhikkhu patiṭṭhāpeti ca. Katanti amhehi kataṃ. Vadantevanti evaṃ kassake vadante. Pamāṇanti bhūmippamāṇaṃ. Nīharāpaneti khalato gehassa nīharāpane. Etanti mitaladdharakkhitādikaṃ. Tassevāti mānakarakkhakādino eva. Apubbassa anuppāditattā aññesaṃ kappatīti āha ‘‘tassevetamakappiya’’nti.
290. படிஸாமனப்பஸங்கே³னாஹ ‘‘படிஸாமெய்யா’’திஆதி³. பிதுஸந்தகம்பி கி³ஹிஸந்தகங் யங் கிஞ்சீதி ஸம்ப³ந்தோ⁴. பிதுஸந்தகந்தி பிதா ச மாதா ச பிதரோ, தேஸங் ஸந்தகங். கி³ஹிஸந்தகந்தி இமினா பஞ்சன்னங் ஸஹத⁴ம்மிகானங் ஸந்தகங் யங் கிஞ்சி பரிக்கா²ரங் படிஸாமேதுங் வட்டதீதி தீ³பேதி. யங் கிஞ்சீதி கப்பியங் அகப்பியங் வா அந்தமஸோ மாதுகண்ணபிளந்த⁴னதாலபண்ணம்பி. ப⁴ண்டா³கா³ரிகஸீஸேனாதி ஸீஸங்க³மிவ பதா⁴னங் யங் கிஞ்சி ‘‘ஸீஸ’’ந்தி இத⁴ உபசாரவஸேன வுச்சதி, ததா² ப⁴ண்டா³கா³ரிகஸத்³தோ³பி பா⁴வப்பதா⁴னோ, ப⁴ண்டா³கா³ரிகோ ப⁴ண்டா³கா³ரிகத்தங் ஸீஸங் பதா⁴னந்தி விஸேஸனபரபதே³ கம்மதா⁴ரயோ, தேன, ப⁴ண்டா³கா³ரிகத்தஸ்ஸ பதா⁴னகரணேனாதி அத்தோ².
290. Paṭisāmanappasaṅgenāha ‘‘paṭisāmeyyā’’tiādi. Pitusantakampi gihisantakaṃ yaṃ kiñcīti sambandho. Pitusantakanti pitā ca mātā ca pitaro, tesaṃ santakaṃ. Gihisantakanti iminā pañcannaṃ sahadhammikānaṃ santakaṃ yaṃ kiñci parikkhāraṃ paṭisāmetuṃ vaṭṭatīti dīpeti. Yaṃ kiñcīti kappiyaṃ akappiyaṃ vā antamaso mātukaṇṇapiḷandhanatālapaṇṇampi. Bhaṇḍāgārikasīsenāti sīsaṅgamiva padhānaṃ yaṃ kiñci ‘‘sīsa’’nti idha upacāravasena vuccati, tathā bhaṇḍāgārikasaddopi bhāvappadhāno, bhaṇḍāgāriko bhaṇḍāgārikattaṃ sīsaṃ padhānanti visesanaparapade kammadhārayo, tena, bhaṇḍāgārikattassa padhānakaraṇenāti attho.
291-2. அவஸ்ஸங் படிஸாமியந்தி அவஸ்ஸங் ஸங்கோ³பேதப்³ப³ங். வுத்தேபீதி மாதாபிதூஹி வுத்தேபி.
291-2.Avassaṃ paṭisāmiyanti avassaṃ saṅgopetabbaṃ. Vuttepīti mātāpitūhi vuttepi.
293-4. வட்³ட⁴கிஆத³யோ வா ராஜவல்லபா⁴ வா ‘‘ஸகங் பரிக்கா²ரங் வா ஸயனப⁴ண்ட³ங் வா படிஸாமெத்வா தே³ஹீ’’தி யதி³ வத³ந்தி, ச²ந்த³தோபி ப⁴யாபி ந கரெய்யாதி யோஜனா. பரிக்கா²ரந்தி வாஸிப²ரஸுஆதி³உபகரணப⁴ண்ட³ங். ச²ந்த³தோபி ப⁴யாபீதி வட்³ட⁴கிஆதீ³ஸு ச²ந்தே³ன, ராஜவல்லபே⁴ஸு ப⁴யேன.
293-4. Vaḍḍhakiādayo vā rājavallabhā vā ‘‘sakaṃ parikkhāraṃ vā sayanabhaṇḍaṃ vā paṭisāmetvā dehī’’ti yadi vadanti, chandatopi bhayāpi na kareyyāti yojanā. Parikkhāranti vāsipharasuādiupakaraṇabhaṇḍaṃ. Chandatopi bhayāpīti vaḍḍhakiādīsu chandena, rājavallabhesu bhayena.
295-6. படிஸாமிதுங் வட்டதீதி யோஜேதப்³ப³ங். ஸங்கந்தீதி யாதி³ஸே பதே³ஸே ‘‘பி⁴க்கூ²ஹி வா ஸாமணேரேஹி வா க³ஹிதங் ப⁴விஸ்ஸதீ’’தி ஸங்கங் உப்பாதெ³ந்தி, தாதி³ஸே விஹாராவஸத²ஸ்ஸந்தோதி யோஜனீயங். விஹாராவஸத²ஸ்ஸாதி விஹாரஸ்ஸ ச ஆவஸத²ஸ்ஸ ச. ரதனந்தி த³ஸவித⁴ங் ரதனங். ரத்னஸம்மதந்தி வத்தா²தி³கங். நிக்கி²பெய்யாதி ஸாமிகே தி³ட்டே² நியமெத்வா தா³துங் ‘‘எத்தகா கஹாபணா’’திஆதி³னானுரூபேன மத்திகலஞ்ச²னாதி³னிமித்தேன வா ஸஞ்ஞாணங் கத்வா நிக்கி²பெய்ய. க³ஹெத்வானாதி தாதி³ஸே அஸதி அத்தனாவ க³ஹெத்வா. தாதி³ஸேதி ரதனே வா ரதனஸம்மதே வா ஸதி. ஸாமிகானாக³மங் ஞத்வாதி யதி³ அத்தனி ஆஸங்கந்தி, மக்³கா³ ஓக்கம்ம நிஸீதி³ய பச்சா² ஸாமிகானங் அனாக³மனங் விஞ்ஞாய. பதிரூபந்தி ரதனஸம்மதே பங்ஸுகூலக்³க³ஹணங் ரதனே நிருஸ்ஸுக்கக³மனந்தி ஏவரூபங் பி⁴க்கூ²னங் அனுரூபந்தி.
295-6. Paṭisāmituṃ vaṭṭatīti yojetabbaṃ. Saṅkantīti yādise padese ‘‘bhikkhūhi vā sāmaṇerehi vā gahitaṃ bhavissatī’’ti saṅkaṃ uppādenti, tādise vihārāvasathassantoti yojanīyaṃ. Vihārāvasathassāti vihārassa ca āvasathassa ca. Ratananti dasavidhaṃ ratanaṃ. Ratnasammatanti vatthādikaṃ. Nikkhipeyyāti sāmike diṭṭhe niyametvā dātuṃ ‘‘ettakā kahāpaṇā’’tiādinānurūpena mattikalañchanādinimittena vā saññāṇaṃ katvā nikkhipeyya. Gahetvānāti tādise asati attanāva gahetvā. Tādiseti ratane vā ratanasammate vā sati. Sāmikānāgamaṃ ñatvāti yadi attani āsaṅkanti, maggā okkamma nisīdiya pacchā sāmikānaṃ anāgamanaṃ viññāya. Patirūpanti ratanasammate paṃsukūlaggahaṇaṃ ratane nirussukkagamananti evarūpaṃ bhikkhūnaṃ anurūpanti.
உக்³க³ஹனித்³தே³ஸவண்ணனா நிட்டி²தா.
Uggahaniddesavaṇṇanā niṭṭhitā.
