| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၃၇. ဥဂ္ဂဟနိဒ္ဒေသဝဏ္ဏနာ
37. Uggahaniddesavaṇṇanā
၂၈၁. ပုဂ္ဂလ-သဒ္ဒမတ္တေ ပယုတ္တေ အတ္တနောပိ ဂဟဏသမ္ဘဝော သိယာတိ ဗ္ယဘိစာရတ္ထံ အည-သဒ္ဒပ္ပယောဂော။ သတိ သမ္ဘဝေ ဗ္ယဘိစာရေ ဝိသေသနံ သာတ္ထကံ ဟောတီတိ။ ဒသဘေဒမ္ပိ ရတနန္တိ ‘‘မုတ္တာ မဏိ ဝေဠုရိယော သင္ခော သိလာ ပဝာဠံ ရဇတံ ဇာတရူပံ လောဟိတင္ကော မသာရဂလ္လ’’န္တိ (ပာစိ. ၅၀၆) ဧဝံ ဝုတ္တံ ဒသဘေဒမ္ပိ ရတနံ။ ဥဂ္ဂဏ္ဟန္တသ္သာတိ ဂဏ္ဟန္တသ္သ သမ္ပဋိစ္ဆန္တသ္သ။
281. Puggala-saddamatte payutte attanopi gahaṇasambhavo siyāti byabhicāratthaṃ añña-saddappayogo. Sati sambhave byabhicāre visesanaṃ sātthakaṃ hotīti. Dasabhedampi ratananti ‘‘muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅko masāragalla’’nti (pāci. 506) evaṃ vuttaṃ dasabhedampi ratanaṃ. Uggaṇhantassāti gaṇhantassa sampaṭicchantassa.
၂၈၂-၃. တေသု အတ္တတ္ထံ ဥဂ္ဂဏ္ဟန္တသ္သ ဒ္ဝီသု နိသ္သဂ္ဂီတိ သမ္ဗန္ဓော။ တေသူတိ တေသု ဒသသု မဇ္ဈေ။ ဒ္ဝီသူတိ ရဇတဇာတရူပသင္ခာတေသု ဒ္ဝီသု နိသ္သဂ္ဂိယဝတ္ထူသု။ အတ္တတ္ထန္တိ ဣမိနာ နဝကမ္မာဒီနံ ပဉ္စန္နံ အတ္ထာယ ဒုက္ကဋန္တိ ဒီပေတိ။ သေသေသု ဒုက္ကဋန္တိ အဝသေသေသု အဋ္ဌသု သဗ္ဗေသမ္ပိ အတ္ထာယ ဥဂ္ဂဏ္ဟန္တသ္သ ဒုက္ကဋန္တိ အတ္ထော။ ဂဏဉ္စ သင္ဃဉ္စ ပုဂ္ဂလဉ္စ အနာမသိတ္ဝာ ‘‘စေတ္ယသ္သ နဝကမ္မသ္သ ဒမ္မီ’’တိ ဝုတ္တေ စ န ပဋိက္ခိပေတိ သမ္ဗန္ဓနီယံ။ န ပဋိက္ခိပေတိ ဣမိနာ သင္ဃာဒိံ အာမသိတ္ဝာ ဝုတ္တေ ပဋိက္ခိပနံ ဒီပေတိ။ ပဋိက္ခိတ္တေ ‘‘ကပ္ပိယကာရကာနံ ဝာ ဟတ္ထေ ဘဝိသ္သတိ, မမ ပုရိသာနံ မယ္ဟမေဝ ဝာ ဟတ္ထေ ဘဝိသ္သတိ, ကေဝလံ တုမ္ဟေ ပစ္စယေ ပရိဘုဉ္ဇထာ’’တိ ဝဒတိ, ဝဋ္ဋတိ။ စတုပစ္စယတ္ထာယ စ ဒိန္နံ ယေန ယေန အတ္ထော ဟောတိ, တဒတ္ထံ ဥပနေတဗ္ဗံ။ တေသံ စီဝရတ္ထာယ ဒိန္နံ စီဝရေယေဝ ဥပနေတဗ္ဗံ။ သစေ စီဝရေန တာဒိသော အတ္ထော နတ္ထိ, ပိဏ္ဍပာတာဒီဟိ သင္ဃော ကိလမတိ, သင္ဃသုဋ္ဌုတာယ အပလောကေတ္ဝာ တဒတ္ထာယပိ ဥပနေတဗ္ဗံ။ ဧသ နယော ပိဏ္ဍပာတဂိလာနပစ္စယတ္ထာယ ဒိန္နေပိ။ သေနာသနတ္ထာယ ဒိန္နံ ပန ဂရုဘဏ္ဍတ္တာ တတ္ထေဝ ဥပနေတဗ္ဗံ, သေနာသနေသု နသ္သန္တေသု ဇဂ္ဂနတ္ထံ မူလစ္ဆေဇ္ဇံ အကတ္ဝာ အဝိသ္သဇ္ဇေတ္ဝာ ယာပနမတ္တံ ပရိဘုဉ္ဇိတဗ္ဗံ။
282-3. Tesu attatthaṃ uggaṇhantassa dvīsu nissaggīti sambandho. Tesūti tesu dasasu majjhe. Dvīsūti rajatajātarūpasaṅkhātesu dvīsu nissaggiyavatthūsu. Attatthanti iminā navakammādīnaṃ pañcannaṃ atthāya dukkaṭanti dīpeti. Sesesu dukkaṭanti avasesesu aṭṭhasu sabbesampi atthāya uggaṇhantassa dukkaṭanti attho. Gaṇañca saṅghañca puggalañca anāmasitvā ‘‘cetyassa navakammassa dammī’’ti vutte ca na paṭikkhipeti sambandhanīyaṃ. Na paṭikkhipeti iminā saṅghādiṃ āmasitvā vutte paṭikkhipanaṃ dīpeti. Paṭikkhitte ‘‘kappiyakārakānaṃ vā hatthe bhavissati, mama purisānaṃ mayhameva vā hatthe bhavissati, kevalaṃ tumhe paccaye paribhuñjathā’’ti vadati, vaṭṭati. Catupaccayatthāya ca dinnaṃ yena yena attho hoti, tadatthaṃ upanetabbaṃ. Tesaṃ cīvaratthāya dinnaṃ cīvareyeva upanetabbaṃ. Sace cīvarena tādiso attho natthi, piṇḍapātādīhi saṅgho kilamati, saṅghasuṭṭhutāya apaloketvā tadatthāyapi upanetabbaṃ. Esa nayo piṇḍapātagilānapaccayatthāya dinnepi. Senāsanatthāya dinnaṃ pana garubhaṇḍattā tattheva upanetabbaṃ, senāsanesu nassantesu jagganatthaṃ mūlacchejjaṃ akatvā avissajjetvā yāpanamattaṃ paribhuñjitabbaṃ.
၂၈၄. ခေတ္တာဒီနံ ကေသဉ္စိ ဒုက္ကဋဝတ္ထူနံ သမ္ပဋိစ္ဆနူပာယံ ဒသ္သေတုံ ‘‘ခေတ္တ’’န္တိအာဒိ ဝုတ္တံ။ တတ္ထ ခေတ္တန္တိ ပုဗ္ဗဏ္ဏဝိရုဟနဋ္ဌာနံ။ ဝတ္ထုန္တိ အပရဏ္ဏဥစ္ဆုဖလာဒီနံ ဝိရုဟနဋ္ဌာနံ။ ဒာသပသ္ဝာဒိကန္တိ ဒာသပသုပုပ္ဖာရာမဖလာရာမာဒိကံ။ ပဋိက္ခိပိတ္ဝာ ကပ္ပိယေန ကမေန စ ဂဏ္ဟေယ္ယာတိ သမ္ဗန္ဓော။ ကပ္ပိယေန ကမေန စာတိ ဧတ္ထ ကမ-သဒ္ဒော ဝောဟာရပ္ပဋိပာဋိဝစနော, တသ္မာ ပရေသံ အတ္တနော စ ကပ္ပိယဝောဟာရက္ကမေနေဝာတိ အတ္ထော။
284. Khettādīnaṃ kesañci dukkaṭavatthūnaṃ sampaṭicchanūpāyaṃ dassetuṃ ‘‘khetta’’ntiādi vuttaṃ. Tattha khettanti pubbaṇṇaviruhanaṭṭhānaṃ. Vatthunti aparaṇṇaucchuphalādīnaṃ viruhanaṭṭhānaṃ. Dāsapasvādikanti dāsapasupupphārāmaphalārāmādikaṃ. Paṭikkhipitvā kappiyena kamena ca gaṇheyyāti sambandho. Kappiyena kamena cāti ettha kama-saddo vohārappaṭipāṭivacano, tasmā paresaṃ attano ca kappiyavohārakkamenevāti attho.
သော စ ခေတ္တဝတ္ထူသု တာဝ ‘‘စတ္တာရော ပစ္စယေ ပရိဘုဉ္ဇထာ’’တိ ဝာ ‘‘ကပ္ပိယကာရကာနံ ဟတ္ထေ ဘဝိသ္သတီ’’တိ ဝာ ‘‘သင္ဃော ကပ္ပိယဘဏ္ဍံ ဘုဉ္ဇတူ’’တိ ဝာ ‘‘သီမံ ဒေမာ’’တိ ဝာ ပရေဟိ ဝုတ္တော, ‘‘သာဓု, ဥပာသက မိဂပက္ခိနော ဧတ္ထ နိဗ္ဘယာ သုခေန ဇီဝိသ္သန္တီ’’တိ အတ္တနာ ဝာ တဠာကေ ယထာဝုတ္တေနေဝ ‘‘ဥဒကံ ပရိဘုဉ္ဇိသ္သန္တိ, ဘဏ္ဍကံ ဓောဝိသ္သန္တိ, မိဂပက္ခိနော ပိဝိသ္သန္တီ’’တိ ပရေဟိ ဝာ ‘‘သာဓု, ဥပာသက, သင္ဃော ပာနီယံ ပိဝိသ္သတီ’’တိအာဒိနာ အတ္တနာ ဝာ ဒာသေ ‘‘အာရာမိကံ ဒမ္မိ, ဝေယ္ယာဝစ္စကရံ ဒမ္မိ, ကပ္ပိယကာရကံ ဒမ္မီ’’တိ ဝာ ပသူသု ‘‘ပဉ္စဂောရသပရိဘောဂတ္ထာယ ဒမ္မီ’’တိ အာရာမေ ‘‘ဝနံ ဒမ္မီ’’တိ ဧဝမာဒိနာ ဝုတ္တော ဝေဒိတဗ္ဗော။ သစေ ပန ကောစိ အဗ္ယတ္တော အကပ္ပိယဝောဟာရေန ခေတ္တာဒိံ ပဋိဂ္ဂဏ္ဟာတိ ဝာ ကာရေတိ ဝာ, တံ ဘိက္ခူဟိ န ပရိဘုဉ္ဇိတဗ္ဗံ, တံ နိသ္သာယ လဒ္ဓံ ကပ္ပိယဘဏ္ဍမ္ပိ အကပ္ပိယမေဝ။ အဗ္ယတ္တေန ပန လဇ္ဇီဘိက္ခုနာ ကာရာပိတေသု ကိဉ္စာပိ ပဋိဂ္ဂဟဏံ ကပ္ပိယံ, ဘိက္ခုသ္သ ပယောဂပစ္စယာ ဥပ္ပန္နေန မိသ္သတ္တာ ဝိသဂတပိဏ္ဍပာတော ဝိယ, အကပ္ပိယမံသဘောဇနံ ဝိယ စ ဒုဗ္ဗိနိဗ္ဘောဂံ ဟောတိ, သဗ္ဗေသံ အကပ္ပိယမေဝ။
So ca khettavatthūsu tāva ‘‘cattāro paccaye paribhuñjathā’’ti vā ‘‘kappiyakārakānaṃ hatthe bhavissatī’’ti vā ‘‘saṅgho kappiyabhaṇḍaṃ bhuñjatū’’ti vā ‘‘sīmaṃ demā’’ti vā parehi vutto, ‘‘sādhu, upāsaka migapakkhino ettha nibbhayā sukhena jīvissantī’’ti attanā vā taḷāke yathāvutteneva ‘‘udakaṃ paribhuñjissanti, bhaṇḍakaṃ dhovissanti, migapakkhino pivissantī’’ti parehi vā ‘‘sādhu, upāsaka, saṅgho pānīyaṃ pivissatī’’tiādinā attanā vā dāse ‘‘ārāmikaṃ dammi, veyyāvaccakaraṃ dammi, kappiyakārakaṃ dammī’’ti vā pasūsu ‘‘pañcagorasaparibhogatthāya dammī’’ti ārāme ‘‘vanaṃ dammī’’ti evamādinā vutto veditabbo. Sace pana koci abyatto akappiyavohārena khettādiṃ paṭiggaṇhāti vā kāreti vā, taṃ bhikkhūhi na paribhuñjitabbaṃ, taṃ nissāya laddhaṃ kappiyabhaṇḍampi akappiyameva. Abyattena pana lajjībhikkhunā kārāpitesu kiñcāpi paṭiggahaṇaṃ kappiyaṃ, bhikkhussa payogapaccayā uppannena missattā visagatapiṇḍapāto viya, akappiyamaṃsabhojanaṃ viya ca dubbinibbhogaṃ hoti, sabbesaṃ akappiyameva.
၂၈၅-၆. နဝ။ပေ.။ ကိရိယာ စ အနဝေ မတ္တိကုဒ္ဓာရဏဉ္စ ဗန္ဓော စ အာဠိယာ ထိရကာရော စ အနဝေ ကေဒာရေ အတိရေကဘာဂဂ္ဂဟဏဉ္စ နဝေ စ အပရိစ္ဆိန္နဘာဂေ သသ္သေ ‘‘ဧတ္တကေ ဒေထာ’’တိ ကဟာပဏုဋ္ဌာပနဉ္စာတိ သဗ္ဗေသမ္ပိ အကပ္ပိယန္တိ သမ္ဗန္ဓော။ မာတိကာ စ ကေဒာရော စ တဠာကော စာတိ ဒ္ဝန္ဒော မာတိက။ပေ.။ တဠာကာ။ တေသံ ကိရိယာတိ သမာသော။ အနဝေတိ စတုပစ္စယဝသေန ပဋိဂ္ဂဟိတေ ပုရာဏတဠာကေ။ ဥဒကဝသေန ပဋိဂ္ဂဟိတေ ပန သုဒ္ဓစိတ္တာနံ ဝဋ္ဋတိ။ ဗန္ဓောတိ ပာဠိယာ ဗန္ဓော။ ပောရာဏကေဒာရေ နိယမိတပကတိဘာဂတ္တာ အာဟ ‘‘အနဝေ’’တိ။ အပရိစ္ဆိန္နဘာဂေတိ ‘‘ဧတ္တကေ ဘူမိဘာဂေ ဧတ္တကော ဘာဂော ဒာတဗ္ဗော’’တိ ဧဝံ အပရိစ္ဆိန္နဘာဂေ။
285-6. Nava…pe… kiriyā ca anave mattikuddhāraṇañca bandho ca āḷiyā thirakāro ca anave kedāre atirekabhāgaggahaṇañca nave ca aparicchinnabhāge sasse ‘‘ettake dethā’’ti kahāpaṇuṭṭhāpanañcāti sabbesampi akappiyanti sambandho. Mātikā ca kedāro ca taḷāko cāti dvando mātika…pe… taḷākā. Tesaṃ kiriyāti samāso. Anaveti catupaccayavasena paṭiggahite purāṇataḷāke. Udakavasena paṭiggahite pana suddhacittānaṃ vaṭṭati. Bandhoti pāḷiyā bandho. Porāṇakedāre niyamitapakatibhāgattā āha ‘‘anave’’ti. Aparicchinnabhāgeti ‘‘ettake bhūmibhāge ettako bhāgo dātabbo’’ti evaṃ aparicchinnabhāge.
၂၈၇-၉. ‘‘ကသ ဝပ္ပ’’ ဣစ္စာဒိံ အဝတ္ဝာ စ ‘‘ဧတ္တကာယ ဘူမိယာ ဧတ္တကော ဘာဂော ဒေယ္ယော’’တိ ဘူမိံ ဝာ ပတိဋ္ဌာပေတိ, တသ္သေဝေတမကပ္ပိယန္တိ သမ္ဗန္ဓော။ စ-သဒ္ဒော အဝဓာရဏေ။ ပတိဋ္ဌာပေတီတိ ယော ဘိက္ခု ပတိဋ္ဌာပေတိ။ တသ္သေဝာတိ တသ္သ ပတိဋ္ဌာပကဘိက္ခုသ္သေဝ။ ဧတန္တိ ပတိဋ္ဌာပိတဘူမိတော လဒ္ဓဓညံ ‘‘ဧတ္တကေ ဘူမိဘာဂေ သသ္သံ ကတံ, ဧတ္တကံ ဂဏ္ဟထာ’’တိ ဧဝံ ဝဒန္တေ ပမာဏဂဏ္ဟနတ္ထံ ဒဏ္ဍရဇ္ဇုဘိ မိနနေ ဝာ ခလေ ဌတ္ဝာ ရက္ခဏေ ဝာ တံ နီဟရာပနေ ဝာ ကောဋ္ဌာဂာရာဒိပဋိသာမနေ ဝာ ဧတံ တသ္သေဝ အကပ္ပိယန္တိ သမ္ဗန္ဓနီယံ။ ပတိဋ္ဌာပေတိ စာတိ သော ဘိက္ခု ပတိဋ္ဌာပေတိ စ။ ကတန္တိ အမ္ဟေဟိ ကတံ။ ဝဒန္တေဝန္တိ ဧဝံ ကသ္သကေ ဝဒန္တေ။ ပမာဏန္တိ ဘူမိပ္ပမာဏံ။ နီဟရာပနေတိ ခလတော ဂေဟသ္သ နီဟရာပနေ။ ဧတန္တိ မိတလဒ္ဓရက္ခိတာဒိကံ။ တသ္သေဝာတိ မာနကရက္ခကာဒိနော ဧဝ။ အပုဗ္ဗသ္သ အနုပ္ပာဒိတတ္တာ အညေသံ ကပ္ပတီတိ အာဟ ‘‘တသ္သေဝေတမကပ္ပိယ’’န္တိ။
287-9. ‘‘Kasa vappa’’ iccādiṃ avatvā ca ‘‘ettakāya bhūmiyā ettako bhāgo deyyo’’ti bhūmiṃ vā patiṭṭhāpeti, tassevetamakappiyanti sambandho. Ca-saddo avadhāraṇe. Patiṭṭhāpetīti yo bhikkhu patiṭṭhāpeti. Tassevāti tassa patiṭṭhāpakabhikkhusseva. Etanti patiṭṭhāpitabhūmito laddhadhaññaṃ ‘‘ettake bhūmibhāge sassaṃ kataṃ, ettakaṃ gaṇhathā’’ti evaṃ vadante pamāṇagaṇhanatthaṃ daṇḍarajjubhi minane vā khale ṭhatvā rakkhaṇe vā taṃ nīharāpane vā koṭṭhāgārādipaṭisāmane vā etaṃ tasseva akappiyanti sambandhanīyaṃ. Patiṭṭhāpeti cāti so bhikkhu patiṭṭhāpeti ca. Katanti amhehi kataṃ. Vadantevanti evaṃ kassake vadante. Pamāṇanti bhūmippamāṇaṃ. Nīharāpaneti khalato gehassa nīharāpane. Etanti mitaladdharakkhitādikaṃ. Tassevāti mānakarakkhakādino eva. Apubbassa anuppāditattā aññesaṃ kappatīti āha ‘‘tassevetamakappiya’’nti.
၂၉၀. ပဋိသာမနပ္ပသင္ဂေနာဟ ‘‘ပဋိသာမေယ္ယာ’’တိအာဒိ။ ပိတုသန္တကမ္ပိ ဂိဟိသန္တကံ ယံ ကိဉ္စီတိ သမ္ဗန္ဓော။ ပိတုသန္တကန္တိ ပိတာ စ မာတာ စ ပိတရော, တေသံ သန္တကံ။ ဂိဟိသန္တကန္တိ ဣမိနာ ပဉ္စန္နံ သဟဓမ္မိကာနံ သန္တကံ ယံ ကိဉ္စိ ပရိက္ခာရံ ပဋိသာမေတုံ ဝဋ္ဋတီတိ ဒီပေတိ။ ယံ ကိဉ္စီတိ ကပ္ပိယံ အကပ္ပိယံ ဝာ အန္တမသော မာတုကဏ္ဏပိဠန္ဓနတာလပဏ္ဏမ္ပိ။ ဘဏ္ဍာဂာရိကသီသေနာတိ သီသင္ဂမိဝ ပဓာနံ ယံ ကိဉ္စိ ‘‘သီသ’’န္တိ ဣဓ ဥပစာရဝသေန ဝုစ္စတိ, တထာ ဘဏ္ဍာဂာရိကသဒ္ဒောပိ ဘာဝပ္ပဓာနော, ဘဏ္ဍာဂာရိကော ဘဏ္ဍာဂာရိကတ္တံ သီသံ ပဓာနန္တိ ဝိသေသနပရပဒေ ကမ္မဓာရယော, တေန, ဘဏ္ဍာဂာရိကတ္တသ္သ ပဓာနကရဏေနာတိ အတ္ထော။
290. Paṭisāmanappasaṅgenāha ‘‘paṭisāmeyyā’’tiādi. Pitusantakampi gihisantakaṃ yaṃ kiñcīti sambandho. Pitusantakanti pitā ca mātā ca pitaro, tesaṃ santakaṃ. Gihisantakanti iminā pañcannaṃ sahadhammikānaṃ santakaṃ yaṃ kiñci parikkhāraṃ paṭisāmetuṃ vaṭṭatīti dīpeti. Yaṃ kiñcīti kappiyaṃ akappiyaṃ vā antamaso mātukaṇṇapiḷandhanatālapaṇṇampi. Bhaṇḍāgārikasīsenāti sīsaṅgamiva padhānaṃ yaṃ kiñci ‘‘sīsa’’nti idha upacāravasena vuccati, tathā bhaṇḍāgārikasaddopi bhāvappadhāno, bhaṇḍāgāriko bhaṇḍāgārikattaṃ sīsaṃ padhānanti visesanaparapade kammadhārayo, tena, bhaṇḍāgārikattassa padhānakaraṇenāti attho.
၂၉၁-၂. အဝသ္သံ ပဋိသာမိယန္တိ အဝသ္သံ သင္ဂောပေတဗ္ဗံ။ ဝုတ္တေပီတိ မာတာပိတူဟိ ဝုတ္တေပိ။
291-2.Avassaṃ paṭisāmiyanti avassaṃ saṅgopetabbaṃ. Vuttepīti mātāpitūhi vuttepi.
၂၉၃-၄. ဝဍ္ဎကိအာဒယော ဝာ ရာဇဝလ္လဘာ ဝာ ‘‘သကံ ပရိက္ခာရံ ဝာ သယနဘဏ္ဍံ ဝာ ပဋိသာမေတ္ဝာ ဒေဟီ’’တိ ယဒိ ဝဒန္တိ, ဆန္ဒတောပိ ဘယာပိ န ကရေယ္ယာတိ ယောဇနာ။ ပရိက္ခာရန္တိ ဝာသိဖရသုအာဒိဥပကရဏဘဏ္ဍံ။ ဆန္ဒတောပိ ဘယာပီတိ ဝဍ္ဎကိအာဒီသု ဆန္ဒေန, ရာဇဝလ္လဘေသု ဘယေန။
293-4. Vaḍḍhakiādayo vā rājavallabhā vā ‘‘sakaṃ parikkhāraṃ vā sayanabhaṇḍaṃ vā paṭisāmetvā dehī’’ti yadi vadanti, chandatopi bhayāpi na kareyyāti yojanā. Parikkhāranti vāsipharasuādiupakaraṇabhaṇḍaṃ. Chandatopi bhayāpīti vaḍḍhakiādīsu chandena, rājavallabhesu bhayena.
၂၉၅-၆. ပဋိသာမိတုံ ဝဋ္ဋတီတိ ယောဇေတဗ္ဗံ။ သင္ကန္တီတိ ယာဒိသေ ပဒေသေ ‘‘ဘိက္ခူဟိ ဝာ သာမဏေရေဟိ ဝာ ဂဟိတံ ဘဝိသ္သတီ’’တိ သင္ကံ ဥပ္ပာဒေန္တိ, တာဒိသေ ဝိဟာရာဝသထသ္သန္တောတိ ယောဇနီယံ။ ဝိဟာရာဝသထသ္သာတိ ဝိဟာရသ္သ စ အာဝသထသ္သ စ။ ရတနန္တိ ဒသဝိဓံ ရတနံ။ ရတ္နသမ္မတန္တိ ဝတ္ထာဒိကံ။ နိက္ခိပေယ္ယာတိ သာမိကေ ဒိဋ္ဌေ နိယမေတ္ဝာ ဒာတုံ ‘‘ဧတ္တကာ ကဟာပဏာ’’တိအာဒိနာနုရူပေန မတ္တိကလဉ္ဆနာဒိနိမိတ္တေန ဝာ သညာဏံ ကတ္ဝာ နိက္ခိပေယ္ယ။ ဂဟေတ္ဝာနာတိ တာဒိသေ အသတိ အတ္တနာဝ ဂဟေတ္ဝာ။ တာဒိသေတိ ရတနေ ဝာ ရတနသမ္မတေ ဝာ သတိ။ သာမိကာနာဂမံ ဉတ္ဝာတိ ယဒိ အတ္တနိ အာသင္ကန္တိ, မဂ္ဂာ ဩက္ကမ္မ နိသီဒိယ ပစ္ဆာ သာမိကာနံ အနာဂမနံ ဝိညာယ။ ပတိရူပန္တိ ရတနသမ္မတေ ပံသုကူလဂ္ဂဟဏံ ရတနေ နိရုသ္သုက္ကဂမနန္တိ ဧဝရူပံ ဘိက္ခူနံ အနုရူပန္တိ။
295-6. Paṭisāmituṃ vaṭṭatīti yojetabbaṃ. Saṅkantīti yādise padese ‘‘bhikkhūhi vā sāmaṇerehi vā gahitaṃ bhavissatī’’ti saṅkaṃ uppādenti, tādise vihārāvasathassantoti yojanīyaṃ. Vihārāvasathassāti vihārassa ca āvasathassa ca. Ratananti dasavidhaṃ ratanaṃ. Ratnasammatanti vatthādikaṃ. Nikkhipeyyāti sāmike diṭṭhe niyametvā dātuṃ ‘‘ettakā kahāpaṇā’’tiādinānurūpena mattikalañchanādinimittena vā saññāṇaṃ katvā nikkhipeyya. Gahetvānāti tādise asati attanāva gahetvā. Tādiseti ratane vā ratanasammate vā sati. Sāmikānāgamaṃ ñatvāti yadi attani āsaṅkanti, maggā okkamma nisīdiya pacchā sāmikānaṃ anāgamanaṃ viññāya. Patirūpanti ratanasammate paṃsukūlaggahaṇaṃ ratane nirussukkagamananti evarūpaṃ bhikkhūnaṃ anurūpanti.
ဥဂ္ဂဟနိဒ္ဒေသဝဏ္ဏနာ နိဋ္ဌိတာ။
Uggahaniddesavaṇṇanā niṭṭhitā.
