| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༣༧. ཨུགྒཧནིདྡེསཝཎྞནཱ
37. Uggahaniddesavaṇṇanā
༢༨༡. དསབྷེདམྤཱིཏི སཙེ ཀེནཙི ཧེཊྛཱ དསྶིཏཾ དསཝིདྷཾ རཏནཾ ཨཱནེཏྭཱ ‘‘ཨིདཾ སངྒྷསྶ ཝཱ ཙེཏིཡསྶ ཝཱ ནཝཀམྨསྶ ཝཱ ཨཉྙཔུགྒལསྶ ཝཱ སུཏྟནྟིཀགཎསྶ ཝཱ དམྨཱི’’ཏི ཝུཏྟེ ‘‘སཱདྷཱུ’’ཏི སམྤཊིཙྪནྟསྶ དུཀྐཊཾ ཧོཏཱིཏི ཨཏྠོ།
281.Dasabhedampīti sace kenaci heṭṭhā dassitaṃ dasavidhaṃ ratanaṃ ānetvā ‘‘idaṃ saṅghassa vā cetiyassa vā navakammassa vā aññapuggalassa vā suttantikagaṇassa vā dammī’’ti vutte ‘‘sādhū’’ti sampaṭicchantassa dukkaṭaṃ hotīti attho.
༢༨༢-༣. ཏེསུ དསཝིདྷེསུ རཏནེསཱུཏི ཨཏྠོ། དྭཱིསཱུཏི རཛཏཛཱཏརཱུཔེསུ། གཎསངྒྷཔུགྒལེ (པཱརཱ॰ ཨཊྛ॰ ༢.༥༣༨-༥༣༩) ཨནཱམསིཏྭཱ ‘‘ཨིདཾ ཧིརཉྙསུཝཎྞཾ ཙེཏིཡསྶ དམྨི, ནཝཀམྨསྶ དམྨཱི’’ཏི ཝུཏྟེ ན པཊིཀྑིཔེཏི ཨཏྠོ། ཀིཾ ཀཱཏབྦནྟི ཙེ? ཏཾ དསྶེཏུཾ ‘‘ཝདེ’’ཏིཨཱདི ཝུཏྟཾ། ‘‘ཨིམེ ཨེཝཾ ཝདནྟཱི’’ཏི ཀཔྤིཡཀཱརཱནཾ ཨཱཙིཀྑིཏབྦནྟི ཨཏྠོ།
282-3. Tesu dasavidhesu ratanesūti attho. Dvīsūti rajatajātarūpesu. Gaṇasaṅghapuggale (pārā. aṭṭha. 2.538-539) anāmasitvā ‘‘idaṃ hiraññasuvaṇṇaṃ cetiyassa dammi, navakammassa dammī’’ti vutte na paṭikkhipeti attho. Kiṃ kātabbanti ce? Taṃ dassetuṃ ‘‘vade’’tiādi vuttaṃ. ‘‘Ime evaṃ vadantī’’ti kappiyakārānaṃ ācikkhitabbanti attho.
༢༨༤. ན ཀེཝལཾ ཧིརཉྙསུཝཎྞཱདིཀམེཝ, ཨཉྙམྤི ཁེཏྟཝཏྠཱདིཀཾ ཨཀཔྤིཡཾ ན སམྤཊིཙྪིཏབྦནྟི ཏཾ དསྶེཏུཾ ‘‘ཁེཏྟཾ ཝཏྠུ’’ནྟིཨཱདིམཱཧ། དཱསཔསུཨཱདིཀཾ དཱསཔསྭཱདིཀཾ། སཙེ ཧི ཀོཙི ‘‘མཡ྄ཧཾ སསྶསམྤཱདཀཾ མཧཱཏལཱ༹ཀཾ ཨཏྠི, ཏཾ སངྒྷསྶ དམྨཱི’’ཏི ཝདཏི, ཏཉྩེ སངྒྷོ སམྤཊིཙྪཏི། པཊིགྒཧཎེཔི པརིབྷོགེཔི ཨཱཔཏྟིཡེཝ། ཨེཝཾ སེསེསུཔི།
284. Na kevalaṃ hiraññasuvaṇṇādikameva, aññampi khettavatthādikaṃ akappiyaṃ na sampaṭicchitabbanti taṃ dassetuṃ ‘‘khettaṃ vatthu’’ntiādimāha. Dāsapasuādikaṃ dāsapasvādikaṃ. Sace hi koci ‘‘mayhaṃ sassasampādakaṃ mahātaḷākaṃ atthi, taṃ saṅghassa dammī’’ti vadati, tañce saṅgho sampaṭicchati. Paṭiggahaṇepi paribhogepi āpattiyeva. Evaṃ sesesupi.
ཀཔྤིཡེན ཀམེན གཎྷེཡྻཱཏི སམྦནྡྷོ། ‘‘ཁེཏྟཾ དམྨཱི’’ཏི ཝུཏྟེ ‘‘ན ཝཊྚཏཱི’’ཏི པཊིཀྑིཔིཏྭཱ ‘‘ཨིཏོ ཙཏྟཱརོ པཙྩཡེ པརིབྷུཉྫཐཱ’’ཏི ཝཱ ‘‘ཙཏུཔཙྩཡཔརིབྷོགཏྠཱཡ དམྨཱི’’ཏི ཝཱ ཝདཏི ཙེ, གཧེཏབྦཾ། ཝཏྠུམྷིཔི ཨེསེཝ ནཡོ། ‘‘ཏལཱ༹ཀཾ དམྨཱི’’ཏི ཝུཏྟེ པཊིཀྑིཔིཏྭཱ ‘‘ཙཏྟཱརོ པཙྩཡེ པརིབྷུཉྫཐཱ’’ཏི ཝཱ ‘‘སངྒྷོ ཨུདཀཾ པརིབྷུཉྫིསྶཏི, བྷཎྜཀཾ དྷོཝིསྶཏཱི’’ཏི ཝཱ ཨཱདིནཱ ནཡེན ཝུཏྟེ སམྤཊིཙྪིཏབྦཾ། ‘‘དཱསཾ དམྨཱི’’ཏི ཝུཏྟེ པཊིཀྑིཔིཏྭཱ ‘‘ཨཱརཱམིཀཾ, ཝེཡྻཱཝཙྩཀརཾ, ཀཔྤིཡཀཱརཀཾ དམྨཱི’’ཏི ཝུཏྟེ སམྤཊིཙྪིཏབྦཾ། ‘‘གོམཧིཾསཨཛེལ༹ཀཱདཡོ དམྨཱི’’ཏི ཝུཏྟེ པཊིཀྑིཔིཏྭཱ ‘‘པཉྩགོརསཔརིབྷོགཏྠཱཡཱ’’ཏི ཝུཏྟེ སམྤཊིཙྪིཏབྦཾ། ཨེདིསཾ གཧཎཾ སནྡྷཱཡ ‘‘པཊིཀྑིཔིཏྭཱ གཎྷེཡྻཱ’’ཏི ཝུཏྟཾ།
Kappiyena kamena gaṇheyyāti sambandho. ‘‘Khettaṃ dammī’’ti vutte ‘‘na vaṭṭatī’’ti paṭikkhipitvā ‘‘ito cattāro paccaye paribhuñjathā’’ti vā ‘‘catupaccayaparibhogatthāya dammī’’ti vā vadati ce, gahetabbaṃ. Vatthumhipi eseva nayo. ‘‘Taḷākaṃ dammī’’ti vutte paṭikkhipitvā ‘‘cattāro paccaye paribhuñjathā’’ti vā ‘‘saṅgho udakaṃ paribhuñjissati, bhaṇḍakaṃ dhovissatī’’ti vā ādinā nayena vutte sampaṭicchitabbaṃ. ‘‘Dāsaṃ dammī’’ti vutte paṭikkhipitvā ‘‘ārāmikaṃ, veyyāvaccakaraṃ, kappiyakārakaṃ dammī’’ti vutte sampaṭicchitabbaṃ. ‘‘Gomahiṃsaajeḷakādayo dammī’’ti vutte paṭikkhipitvā ‘‘pañcagorasaparibhogatthāyā’’ti vutte sampaṭicchitabbaṃ. Edisaṃ gahaṇaṃ sandhāya ‘‘paṭikkhipitvā gaṇheyyā’’ti vuttaṃ.
༢༨༥-༦. ནཝམཱཏིཀཀེདཱརཏལཱ༹ཀཀིརིཡཱ (པཱརཱ॰ ཨཊྛ॰ ༢.༢༣༨-༢༣༩) ཙ ཨནཝེ པུབྦེ ཀཔྤིཡཝོཧཱརེན པཊིཀྑིཔིཏྭཱ གཧིཏཏལཱ༹ཀེ མཏྟིཀུདྡྷརཎཉྩ བྷིནྣཊྛཱནེ པཱལི༹བནྡྷོ ཙ དུབྦལཊྛཱནེ ཨཱལི༹ཡཱ ཐིརཀཱརོ ཙ ཨནཝེ ཀེདཱརེ པུརཱཎབྷཱགཏོ ཨཏིརེཀབྷཱགགྒཧཎཉྩ ནཝེ ཀེདཱརེ ཨཔརིཙྪིནྣབྷཱགེ ‘‘སསྶེ དེཐ ཨེཏྟཀེ’’ཏི ཀཧཱཔཎུཊྛཱཔནཉྩཱཔཱིཏི ཨིདཾ སབྦཾ བྷིཀྑུསྶ ཀཱཏུཾ ན ཝཊྚཏི། སཙེ ཀརོཏི, ཨེཝམཱདིཀཾ སབྦེསམྤི ཨཀཔྤིཡནྟི ཨཏྠོ།
285-6.Navamātikakedārataḷākakiriyā (pārā. aṭṭha. 2.238-239) ca anave pubbe kappiyavohārena paṭikkhipitvā gahitataḷāke mattikuddharaṇañca bhinnaṭṭhāne pāḷibandho ca dubbalaṭṭhāne āḷiyā thirakāro ca anave kedāre purāṇabhāgato atirekabhāgaggahaṇañca nave kedāre aparicchinnabhāge ‘‘sasse detha ettake’’ti kahāpaṇuṭṭhāpanañcāpīti idaṃ sabbaṃ bhikkhussa kātuṃ na vaṭṭati. Sace karoti, evamādikaṃ sabbesampi akappiyanti attho.
༢༨༧-༩. ཨིདཱནི ཏཾཡེཝ ཨཀཔྤིཡཾ དསྶེཏུཾ ‘‘ཨཝཏྭཱ’’ཏིཨཱདི ཝུཏྟཾ། ཏསྶཏྠོ (པཱརཱ॰ ཨཊྛ॰ ༢.༢༣༨-༢༣༩) – ཡོ པན ‘‘ཀས, ཝཔྤ’’ ཨིཙྩཱདིཀཾ ཨཝཏྭཱ ‘‘ཨེཏྟིཀཱཡ བྷཱུམིཡཱ ཨེཏྟཀོ བྷཱགོ དེཡྻོ’’ཏི བྷཱུམིཾ ཝཱ པཏིཊྛཱཔེཏི, ‘‘ཨེཏྟཀེ བྷཱུམིབྷཱགེ སསྶཾ ཀཏཾ, ཨེཏྟཀཾ གཎྷཐཱ’’ཏི ཀསྶཀེ ཝདནྟེ པམཱཎགཎྷནཏྠཾ དཎྜརཛྫུབྷི མིནཏི, ཁལེ ཋཏྭཱ རཀྑཎཱདཱིནི ཀརོཏི, ཏསྶེཝ ཨཀཔྤིཡནྟི།
287-9. Idāni taṃyeva akappiyaṃ dassetuṃ ‘‘avatvā’’tiādi vuttaṃ. Tassattho (pārā. aṭṭha. 2.238-239) – yo pana ‘‘kasa, vappa’’ iccādikaṃ avatvā ‘‘ettikāya bhūmiyā ettako bhāgo deyyo’’ti bhūmiṃ vā patiṭṭhāpeti, ‘‘ettake bhūmibhāge sassaṃ kataṃ, ettakaṃ gaṇhathā’’ti kassake vadante pamāṇagaṇhanatthaṃ daṇḍarajjubhi minati, khale ṭhatvā rakkhaṇādīni karoti, tasseva akappiyanti.
༢༩༠. བྷཎྜཱགཱརིཀསཱིསེན པིཏུསནྟཀམྤི སཙེ པཊིསཱམེཡྻ, པཱཙིཏྟིཡནྟི ཨཏྠོ།
290. Bhaṇḍāgārikasīsena pitusantakampi sace paṭisāmeyya, pācittiyanti attho.
༢༩༡-༢. པིཏཱུནནྟི མཱཏཱཔིཏཱུནཾ། སཱཊཀཱདིཀཔྤིཡཾ ཝཏྠུཾ། ‘‘པཊིསཱམེཏྭཱ དེཧཱི’’ཏི ཝུཏྟེཏི སམྦནྡྷོ། པཱཏེཏྭཱན གཏེ ཡསྨཱ ཨཛ྄ཛྷཱརཱམསིཀྑཱཔདཝསེན (པཱཙི॰ ༥༠༥-༥༠༦) པལིབོདྷོ, ཏསྨཱ གོཔིཏུཾ ལབྦྷནྟི ཨཏྠོ།
291-2.Pitūnanti mātāpitūnaṃ. Sāṭakādikappiyaṃ vatthuṃ. ‘‘Paṭisāmetvā dehī’’ti vutteti sambandho. Pātetvāna gate yasmā ajjhārāmasikkhāpadavasena (pāci. 505-506) palibodho, tasmā gopituṃ labbhanti attho.
༢༩༣-༤. སཀཾ ཝཱསིཨཱདིཔརིཀྑཱརནྟི ཨཏྠོ། ཨིདཾ ཋཱནཾ གུཏྟནྟི དསྶེཏབྦཾ། ‘‘ཨེཏྠ ཋཔེཐཱ’’ཏི པན ན ཝཏྟབྦཾ།
293-4.Sakaṃ vāsiādiparikkhāranti attho. Idaṃ ṭhānaṃ guttanti dassetabbaṃ. ‘‘Ettha ṭhapethā’’ti pana na vattabbaṃ.
༢༩༥. ཨེཏྠ ‘‘ཨཉྙོ ཀོཙི ན པཝིསཏི, བྷིཀྑཱུཧི ཝཱ སཱམཎེརེཧི ཝཱ གཧིཏཾ བྷཝིསྶཏཱི’’ཏི སངྐནྟཱིཏི ཨཏྠོ། ཝཏྠུམྷཱིཏི ཨལངྐཱརཱདིཝཏྠུམྷཱིཏི ཨཏྠོ། ཏཱདིསེཏི ཡཱདིསེ ཝཏྠུམྷི ནཊྛེ ཨཱསངྐཱ ཧོཏི, ཏཱདིསེ ཝཏྠུམྷི ནཊྛེཏི སམྦནྡྷོ།
295. Ettha ‘‘añño koci na pavisati, bhikkhūhi vā sāmaṇerehi vā gahitaṃ bhavissatī’’ti saṅkantīti attho. Vatthumhīti alaṅkārādivatthumhīti attho. Tādiseti yādise vatthumhi naṭṭhe āsaṅkā hoti, tādise vatthumhi naṭṭheti sambandho.
༢༩༦. ཨིདཱནི ཨསངྐིཏབྦཊྛཱནཾ དསྶེཏུཾ ‘‘ཝིཧཱརཱཝསཐསྶནྟོ’’ཏིཨཱདིམཱཧ། ཝིཧཱརསྶ ཙ གྷརསྶ ཙཱཏི ཨཏྠོ། རཏནནྟི དསཝིདྷཾ རཏནཾ། རཏྣསམྨཏནྟི སཱཊཀཝེཋནཱདིཀཾ། གཧེཏྭཱནཱཏི ཀཔྤིཡཀཱརཀེ ཨསཏི ཨཏྟནཱཔི གཧེཏྭཱན ནིཀྑིཔེཡྻཱཏི ཨཏྠོ། མགྒེརཉྙེཔཱིཏི མགྒེཔི ཨརཉྙེཔི། ཏཱདིསེཏི ‘‘བྷིཀྑཱུཧི གཧིཏཾ བྷཝིསྶཏཱི’’ཏི ཨཱསངྐིཏབྦཊྛཱནེ། པཏིརཱུཔཾ ཀརཱིཡཏཱིཏི མགྒེ ཝཱ ཨརཉྙེ ཝཱ ཏཱདིསཾ བྷཎྜཾ པསྶིཏྭཱ མགྒཱ ཨོཀྐམྨ ནིསཱིདིཏབྦཾ, སཱམིཀེསུ ཨཱགཏེསུ ཏཾ ཋཱནཾ ཨཱཙིཀྑིཏབྦཾ། སཙེ སཱམིཀེ ན པསྶཏི, རཏནསམྨཏཾ པཾསུཀཱུལཾ གཧེཏབྦཾ། རཏནཉྩེ ཧོཏི, ཏུཎྷཱིབྷཱུཏེན གནྟབྦནྟི ཨཏྠོ། ཨཡཾ མགྒཱརཉྙཀེསུ པཊིཔཏྟི། ཝིཧཱརཱཝསཐཱནཾ པན ཨནྟོ ཏཱདིསཾ དིསྭཱ བྷཎྜཀཾ མུཉྩིཏྭཱ ‘‘ཨེཏྠ ཨེཏྟཀཱ ཀཧཱཔཎཱ’’ཏིཨཱདིནཱ ནཡེན རཱུཔེན ཝཱ ལཉྪནཱཡ ཝཱ པིལོཏིཀཱཡ ཝཱ སཉྙཱཎཾ ཀཏྭཱ ནིཀྑིཔིཏབྦཾ, ཏཏོ པཀྐམནྟེན པཏིརཱུཔཱནཾ བྷིཀྑཱུནཾ ཨཱཙིཀྑིཏབྦཾ། ཨུགྒཧཝིནིཙྪཡོ།
296. Idāni asaṅkitabbaṭṭhānaṃ dassetuṃ ‘‘vihārāvasathassanto’’tiādimāha. Vihārassa ca gharassa cāti attho. Ratananti dasavidhaṃ ratanaṃ. Ratnasammatanti sāṭakaveṭhanādikaṃ. Gahetvānāti kappiyakārake asati attanāpi gahetvāna nikkhipeyyāti attho. Maggeraññepīti maggepi araññepi. Tādiseti ‘‘bhikkhūhi gahitaṃ bhavissatī’’ti āsaṅkitabbaṭṭhāne. Patirūpaṃ karīyatīti magge vā araññe vā tādisaṃ bhaṇḍaṃ passitvā maggā okkamma nisīditabbaṃ, sāmikesu āgatesu taṃ ṭhānaṃ ācikkhitabbaṃ. Sace sāmike na passati, ratanasammataṃ paṃsukūlaṃ gahetabbaṃ. Ratanañce hoti, tuṇhībhūtena gantabbanti attho. Ayaṃ maggāraññakesu paṭipatti. Vihārāvasathānaṃ pana anto tādisaṃ disvā bhaṇḍakaṃ muñcitvā ‘‘ettha ettakā kahāpaṇā’’tiādinā nayena rūpena vā lañchanāya vā pilotikāya vā saññāṇaṃ katvā nikkhipitabbaṃ, tato pakkamantena patirūpānaṃ bhikkhūnaṃ ācikkhitabbaṃ. Uggahavinicchayo.
ཨུགྒཧནིདྡེསཝཎྞནཱ ནིཊྛིཏཱ།
Uggahaniddesavaṇṇanā niṭṭhitā.
