| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. உக்³க³ஹஸுத்தவண்ணனா
3. Uggahasuttavaṇṇanā
33. ததியே ப⁴த்³தி³யேதி ப⁴த்³தி³யனக³ரே. ஜாதியாவனேதி ஸயங்ஜாதே அரோபிதே ஹிமவந்தேன ஸத்³தி⁴ங் ஏகாப³த்³தே⁴ வனஸண்டே³, தங் நக³ரங் உபனிஸ்ஸாய தஸ்மிங் வனே விஹரதீதி அத்தோ². அத்தசதுத்தோ²தி அத்தனா சதுத்தோ². கஸ்மா பனேஸ ப⁴க³வந்தங் அத்தசதுத்த²ங்யேவ நிமந்தேஸி? கே³ஹே கிரஸ்ஸ மங்க³லங் மஹந்தங், தத்த² மஹந்தேன ஸங்விதா⁴னேன ப³ஹூ மனுஸ்ஸா ஸன்னிபதிஸ்ஸந்தி. தே பி⁴க்கு²ஸங்க⁴ங் பரிவிஸந்தேன து³ஸ்ஸங்க³ஹா ப⁴விஸ்ஸந்தீதி அத்தசதுத்த²ங்யேவ நிமந்தேஸி. அபி சஸ்ஸ ஏவம்பி அஹோஸி – ‘‘த³ஹரகுமாரிகாயோ மஹாபி⁴க்கு²ஸங்க⁴மஜ்ஜே² ஸத்த²ரி ஓவத³ந்தே ஓலீனமனா ஓவாத³ங் க³ஹேதுங் ந ஸக்குணெய்யு’’ந்தி. இமினாபி காரணேன அத்தசதுத்த²மேவ நிமந்தேஸி. ஓவத³து தாஸங், ப⁴ந்தேதி, ப⁴ந்தே ப⁴க³வா, ஏதாஸங் ஓவத³து, ஏதா ஓவத³தூதி அத்தோ². உபயோக³த்த²ஸ்மிஞ்ஹி ஏதங் ஸாமிவசனங். யங் தாஸந்தி யங் ஓவாதா³னுஸாஸனங் ஏதாஸங். ஏவஞ்ச பன வத்வா ஸோ ஸெட்டி² ‘‘இமா மம ஸந்திகே ஓவாத³ங் க³ண்ஹமானா ஹராயெய்யு’’ந்தி ப⁴க³வந்தங் வந்தி³த்வா பக்காமி.
33. Tatiye bhaddiyeti bhaddiyanagare. Jātiyāvaneti sayaṃjāte aropite himavantena saddhiṃ ekābaddhe vanasaṇḍe, taṃ nagaraṃ upanissāya tasmiṃ vane viharatīti attho. Attacatutthoti attanā catuttho. Kasmā panesa bhagavantaṃ attacatutthaṃyeva nimantesi? Gehe kirassa maṅgalaṃ mahantaṃ, tattha mahantena saṃvidhānena bahū manussā sannipatissanti. Te bhikkhusaṅghaṃ parivisantena dussaṅgahā bhavissantīti attacatutthaṃyeva nimantesi. Api cassa evampi ahosi – ‘‘daharakumārikāyo mahābhikkhusaṅghamajjhe satthari ovadante olīnamanā ovādaṃ gahetuṃ na sakkuṇeyyu’’nti. Imināpi kāraṇena attacatutthameva nimantesi. Ovadatu tāsaṃ, bhanteti, bhante bhagavā, etāsaṃ ovadatu, etā ovadatūti attho. Upayogatthasmiñhi etaṃ sāmivacanaṃ. Yaṃ tāsanti yaṃ ovādānusāsanaṃ etāsaṃ. Evañca pana vatvā so seṭṭhi ‘‘imā mama santike ovādaṃ gaṇhamānā harāyeyyu’’nti bhagavantaṃ vanditvā pakkāmi.
ப⁴த்தூதி ஸாமிகஸ்ஸ. அனுகம்பங் உபாதா³யாதி அனுத்³த³யங் படிச்ச. புப்³பு³ட்டா²யினியோதி ஸப்³ப³பட²மங் உட்டா²னஸீலா. பச்சா²னிபாதினியோதி ஸப்³ப³பச்சா² நிபஜ்ஜனஸீலா. இத்தி²யா ஹி பட²மதரங் பு⁴ஞ்ஜித்வா ஸயனங் ஆருய்ஹ நிபஜ்ஜிதுங் ந வட்டதி, ஸப்³பே³ பன கே³ஹபரிஜனே போ⁴ஜெத்வா உபகரணப⁴ண்ட³ங் ஸங்விதா⁴ய கோ³ரூபாதீ³னி ஆக³தானாக³தானி ஞத்வா ஸ்வே கத்தப்³ப³கம்மங் விசாரெத்வா குஞ்சிகாமுத்³தி³கங் ஹத்தே² கத்வா ஸசே போ⁴ஜனங் அத்தி², பு⁴ஞ்ஜித்வா, நோ சே அத்தி², அஞ்ஞங் பசாபெத்வா ஸப்³பே³ ஸந்தப்பெத்வா பச்சா² நிபஜ்ஜிதுங் வட்டதி. நிபன்னாயபி யாவ ஸூரியுக்³க³மனா நித்³தா³யிதுங் ந வட்டதி, ஸப்³ப³பட²மங் பன உட்டா²ய தா³ஸகம்மகரே பக்கோஸாபெத்வா ‘‘இத³ஞ்சித³ஞ்ச கம்மங் கரோதா²’’தி கம்மந்தங் விசாரெத்வா தே⁴னுயோ து³ஹாபெத்வா ஸப்³ப³ங் கே³ஹே கத்தப்³ப³கிச்சங் அத்தனோ பச்சக்க²ங்யேவ காதுங் வட்டதி . ஏதமத்த²ங் ஸந்தா⁴ய ‘‘புப்³பு³ட்டா²யினியோ பச்சா²னிபாதினியோ’’தி ஆஹ. ‘‘கிங்காரபடிஸ்ஸாவினியோதி கிங் கரோம கிங் கரோமா’’தி முக²ங் ஓலோகெத்வா விசரணஸீலா. மனாபசாரினியோதி மனாபங்யேவ கிரியங் கரணஸீலா. பியவாதி³னியோதி பியமேவ வசனங் வாத³னஸீலா. பூஜெஸ்ஸாமாதி சதுபச்சயபூஜாய பூஜயிஸ்ஸாம.
Bhattūti sāmikassa. Anukampaṃ upādāyāti anuddayaṃ paṭicca. Pubbuṭṭhāyiniyoti sabbapaṭhamaṃ uṭṭhānasīlā. Pacchānipātiniyoti sabbapacchā nipajjanasīlā. Itthiyā hi paṭhamataraṃ bhuñjitvā sayanaṃ āruyha nipajjituṃ na vaṭṭati, sabbe pana gehaparijane bhojetvā upakaraṇabhaṇḍaṃ saṃvidhāya gorūpādīni āgatānāgatāni ñatvā sve kattabbakammaṃ vicāretvā kuñcikāmuddikaṃ hatthe katvā sace bhojanaṃ atthi, bhuñjitvā, no ce atthi, aññaṃ pacāpetvā sabbe santappetvā pacchā nipajjituṃ vaṭṭati. Nipannāyapi yāva sūriyuggamanā niddāyituṃ na vaṭṭati, sabbapaṭhamaṃ pana uṭṭhāya dāsakammakare pakkosāpetvā ‘‘idañcidañca kammaṃ karothā’’ti kammantaṃ vicāretvā dhenuyo duhāpetvā sabbaṃ gehe kattabbakiccaṃ attano paccakkhaṃyeva kātuṃ vaṭṭati . Etamatthaṃ sandhāya ‘‘pubbuṭṭhāyiniyo pacchānipātiniyo’’ti āha. ‘‘Kiṃkārapaṭissāviniyoti kiṃ karoma kiṃ karomā’’ti mukhaṃ oloketvā vicaraṇasīlā. Manāpacāriniyoti manāpaṃyeva kiriyaṃ karaṇasīlā. Piyavādiniyoti piyameva vacanaṃ vādanasīlā. Pūjessāmāti catupaccayapūjāya pūjayissāma.
அப்³பா⁴க³தேதி அத்தனோ ஸந்திகங் ஆக³தே. ஆஸனோத³கேன படிபூஜெஸ்ஸாமாதி ஆஸனேன ச பாத³தோ⁴வனஉத³கேன ச பூஜயிஸ்ஸாம. எத்த² ச மாதாபிதூனங் தே³வஸிகங் ஸக்காரோ காதப்³போ³. ஸமணப்³ராஹ்மணானங் பன அப்³பா⁴க³தானங் ஆஸனங் த³த்வா பாத³தோ⁴வனஞ்ச தா³தப்³ப³ங், ஸக்காரோ ச காதப்³போ³.
Abbhāgateti attano santikaṃ āgate. Āsanodakena paṭipūjessāmāti āsanena ca pādadhovanaudakena ca pūjayissāma. Ettha ca mātāpitūnaṃ devasikaṃ sakkāro kātabbo. Samaṇabrāhmaṇānaṃ pana abbhāgatānaṃ āsanaṃ datvā pādadhovanañca dātabbaṃ, sakkāro ca kātabbo.
உண்ணாதி ஏளகலோமங். தத்த² த³க்கா² ப⁴விஸ்ஸாமாதி ஏளகலோமானங் விஜடனதோ⁴வனரஜனவேணிகரணாதீ³ஸு கப்பாஸஸ்ஸ ச வட்டனபிஸனபோ²டனகந்தனாதீ³ஸு சே²கா ப⁴விஸ்ஸாம. தத்ருபாயாயாதி தஸ்மிங் உண்ணாகப்பாஸஸங்விதா⁴னே உபாயபூ⁴தாய ‘‘இமஸ்மிங் காலே இத³ங் நாம காதுங் வட்டதீ’’தி ஏவங் பவத்தாய வீமங்ஸாய ஸமன்னாக³தா. அலங் காதுங் அலங் ஸங்விதா⁴துந்தி அத்தனா காதும்பி பரேஹி காராபேதும்பி யுத்தா சேவ ஸமத்தா² ச ப⁴விஸ்ஸாமாதி அத்தோ².
Uṇṇāti eḷakalomaṃ. Tattha dakkhā bhavissāmāti eḷakalomānaṃ vijaṭanadhovanarajanaveṇikaraṇādīsu kappāsassa ca vaṭṭanapisanaphoṭanakantanādīsu chekā bhavissāma. Tatrupāyāyāti tasmiṃ uṇṇākappāsasaṃvidhāne upāyabhūtāya ‘‘imasmiṃ kāle idaṃ nāma kātuṃ vaṭṭatī’’ti evaṃ pavattāya vīmaṃsāya samannāgatā. Alaṃ kātuṃ alaṃ saṃvidhātunti attanā kātumpi parehi kārāpetumpi yuttā ceva samatthā ca bhavissāmāti attho.
கதஞ்ச கததோ ஜானிஸ்ஸாம, அகதஞ்ச அகததோதி ஸகலதி³வஸங் இத³ங் நாம கம்மங் கத்வா ஆக³தானங், உபட்³ட⁴தி³வஸங் இத³ங் நாம கம்மங் கத்வா ஆக³தானங், நிக்கம்மானங் கே³ஹே நிஸின்னானங் இத³ங் நாம தா³துஞ்ச ஏவஞ்ச காதுங் வட்டதீதி ஏவங் ஜானிஸ்ஸாம. கி³லானகானஞ்ச ப³லாப³லந்தி ஸசே ஹி கி³லானகாலே தேஸங் பே⁴ஸஜ்ஜபோ⁴ஜனாதீ³னி த³த்வா ரோக³ங் பா²ஸுங் ந கரொந்தி, ‘‘இமே அரோக³காலே அம்ஹே யங் இச்ச²ந்தி, தங் காரெந்தி. கி³லானகாலே அத்தி² பா⁴வம்பி நோ ந ஜானந்தீ’’தி விரத்தரூபா பச்சா² கிச்சானி ந கரொந்தி, து³க்கடானி வா கரொந்தி. தஸ்மா நேஸங் ப³லாப³லங் ஞத்வா தா³தப்³ப³ஞ்ச காதப்³ப³ஞ்ச ஜானிஸ்ஸாமாதி ஏவங் தும்ஹேஹி ஸிக்கி²தப்³ப³ந்தி த³ஸ்ஸேதி. கா²த³னீயங் போ⁴ஜனீயஞ்சஸ்ஸாதி கா²த³னீயஞ்ச போ⁴ஜனீயஞ்ச அஸ்ஸ அந்தோஜனஸ்ஸ. பச்சங்ஸேனாதி படிலபி⁴தப்³பே³ன அங்ஸேன, அத்தனோ அத்தனோ லத்³த⁴ப்³ப³கொட்டா²ஸானுரூபேனாதி அத்தோ². ஸங்விப⁴ஜிஸ்ஸாமாதி த³ஸ்ஸாம. ஸம்பாதெ³ஸ்ஸாமாதி ஸம்பாத³யிஸ்ஸாம.
Katañca katato jānissāma, akatañca akatatoti sakaladivasaṃ idaṃ nāma kammaṃ katvā āgatānaṃ, upaḍḍhadivasaṃ idaṃ nāma kammaṃ katvā āgatānaṃ, nikkammānaṃ gehe nisinnānaṃ idaṃ nāma dātuñca evañca kātuṃ vaṭṭatīti evaṃ jānissāma. Gilānakānañca balābalanti sace hi gilānakāle tesaṃ bhesajjabhojanādīni datvā rogaṃ phāsuṃ na karonti, ‘‘ime arogakāle amhe yaṃ icchanti, taṃ kārenti. Gilānakāle atthi bhāvampi no na jānantī’’ti virattarūpā pacchā kiccāni na karonti, dukkaṭāni vā karonti. Tasmā nesaṃ balābalaṃ ñatvā dātabbañca kātabbañca jānissāmāti evaṃ tumhehi sikkhitabbanti dasseti. Khādanīyaṃ bhojanīyañcassāti khādanīyañca bhojanīyañca assa antojanassa. Paccaṃsenāti paṭilabhitabbena aṃsena, attano attano laddhabbakoṭṭhāsānurūpenāti attho. Saṃvibhajissāmāti dassāma. Sampādessāmāti sampādayissāma.
அது⁴த்தீதி புரிஸது⁴த்தஸுராது⁴த்ததாவஸேன அது⁴த்தியோ. அதே²னீதி அதே²னியோ அசோரியோ. அஸொண்டீ³தி ஸுராஸொண்ட³தாதி³வஸேன அஸொண்டி³யோ.
Adhuttīti purisadhuttasurādhuttatāvasena adhuttiyo. Athenīti atheniyo acoriyo. Asoṇḍīti surāsoṇḍatādivasena asoṇḍiyo.
ஏவங் ஸுத்தந்தங் நிட்ட²பெத்வா இதா³னி கா³தா²ஹி கூடங் க³ண்ஹந்தோ யோ நங் ப⁴ரதி ஸப்³ப³தா³திஆதி³மாஹ. தத்த² ப⁴ரதீதி போஸதி படிஜக்³க³தி. ஸப்³ப³காமஹரந்தி ஸப்³ப³காமத³த³ங். ஸொத்தீ²தி ஸுஇத்தீ². ஏவங் வத்ததீதி எத்தகங் வத்தங் பூரெத்வா வத்ததி. மனாபா நாம தே தே³வாதி நிம்மானரதீ தே³வா. தே ஹி இச்சி²திச்சி²தங் ரூபங் மாபெத்வா அபி⁴ரமணதோ நிம்மானரதீதி ச மனாபாதி ச வுச்சந்தீதி.
Evaṃ suttantaṃ niṭṭhapetvā idāni gāthāhi kūṭaṃ gaṇhanto yo naṃ bharati sabbadātiādimāha. Tattha bharatīti posati paṭijaggati. Sabbakāmaharanti sabbakāmadadaṃ. Sotthīti suitthī. Evaṃ vattatīti ettakaṃ vattaṃ pūretvā vattati. Manāpā nāma te devāti nimmānaratī devā. Te hi icchiticchitaṃ rūpaṃ māpetvā abhiramaṇato nimmānaratīti ca manāpāti ca vuccantīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. உக்³க³ஹஸுத்தங் • 3. Uggahasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. உக்³க³ஹஸுத்தவண்ணனா • 3. Uggahasuttavaṇṇanā
