| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
165. уг̇г̇ахид̇абадиг̇г̇ахан̣аа
165. Uggahitapaṭiggahaṇā
275. д̇зна ко бана самаязна самб̣ахулаа бхигкуу гаасийсу вассам̣вудтаа рааж̇аг̇ахам̣ г̇ажчанд̇аа бхаг̇аванд̇ам̣ д̣̇ассанааяа анд̇араамаг̇г̇з на лабхим̣су луукасса ваа бан̣ийд̇асса ваа бхож̇анасса яаавад̣̇ад̇т̇ам̣ баарибуурим̣; б̣ахун̃жа палакаад̣̇анийяам̣ ахоси; габбияагаараго жа на ахоси. ат̇а ко д̇з бхигкуу гиланд̇аруубаа язна рааж̇аг̇ахам̣ взл̣уванам̣ галанд̣̇аганиваабо, язна бхаг̇аваа д̇знубасан̇гамим̣су, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇им̣су. аажин̣н̣ам̣ ко банзд̇ам̣ б̣уд̣̇д̇хаанам̣ бхаг̇аванд̇аанам̣ ааг̇анд̇угзхи бхигкуухи сад̣̇д̇хим̣ бадисаммод̣̇ид̇ум̣. ат̇а ко бхаг̇аваа д̇з бхигкуу зд̇ад̣̇авожа – ‘‘гажжи , бхигкавз, каманийяам̣, гажжи яаабанийяам̣, гажжид̇т̇а аббагиламат̇зна ад̣̇д̇хаанам̣ ааг̇ад̇аа; гуд̇о жа д̇умхз, бхигкавз, ааг̇ажчат̇аа’’д̇и? ‘‘каманийяам̣ бхаг̇аваа, яаабанийяам̣ бхаг̇аваа. ид̇ха маяам̣, бханд̇з, гаасийсу вассам̣вудтаа рааж̇аг̇ахам̣ ааг̇ажчанд̇аа бхаг̇аванд̇ам̣ д̣̇ассанааяа анд̇араамаг̇г̇з на лабхимхаа луукасса ваа бан̣ийд̇асса ваа бхож̇анасса яаавад̣̇ад̇т̇ам̣ баарибуурим̣; б̣ахун̃жа палакаад̣̇анийяам̣ ахоси; габбияагаараго жа на ахоси; д̇зна маяам̣ гиланд̇аруубаа ад̣̇д̇хаанам̣ ааг̇ад̇аа’’д̇и. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, яад̇т̇а палакаад̣̇анийяам̣ бассад̇и, габбияагаараго жа на ход̇и, саамам̣ г̇ахзд̇ваа, харид̇ваа, габбияагаарагз бассид̇ваа, бхуумияам̣ нигкибид̇ваа, бадиг̇г̇ахаабзд̇ваа барибхун̃ж̇ид̇ум̣. ануж̇аанаами, бхигкавз, уг̇г̇ахид̇ам̣ бадиг̇г̇ахид̇у’’нд̇и.
275. Tena kho pana samayena sambahulā bhikkhū kāsīsu vassaṃvuṭṭhā rājagahaṃ gacchantā bhagavantaṃ dassanāya antarāmagge na labhiṃsu lūkhassa vā paṇītassa vā bhojanassa yāvadatthaṃ pāripūriṃ; bahuñca phalakhādanīyaṃ ahosi; kappiyakārako ca na ahosi. Atha kho te bhikkhū kilantarūpā yena rājagahaṃ veḷuvanaṃ kalandakanivāpo, yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci , bhikkhave, khamanīyaṃ, kacci yāpanīyaṃ, kaccittha appakilamathena addhānaṃ āgatā; kuto ca tumhe, bhikkhave, āgacchathā’’ti? ‘‘Khamanīyaṃ bhagavā, yāpanīyaṃ bhagavā. Idha mayaṃ, bhante, kāsīsu vassaṃvuṭṭhā rājagahaṃ āgacchantā bhagavantaṃ dassanāya antarāmagge na labhimhā lūkhassa vā paṇītassa vā bhojanassa yāvadatthaṃ pāripūriṃ; bahuñca phalakhādanīyaṃ ahosi; kappiyakārako ca na ahosi; tena mayaṃ kilantarūpā addhānaṃ āgatā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yattha phalakhādanīyaṃ passati, kappiyakārako ca na hoti, sāmaṃ gahetvā, haritvā, kappiyakārake passitvā, bhūmiyaṃ nikkhipitvā, paṭiggahāpetvā paribhuñjituṃ. Anujānāmi, bhikkhave, uggahitaṃ paṭiggahitu’’nti.
276. д̇зна ко бана самаязна ан̃н̃ад̇арасса б̣раахман̣асса наваа жа д̇илаа наван̃жа мад̇ху уббаннаа хонд̇и. ат̇а ко д̇асса б̣раахман̣асса зд̇ад̣̇ахоси – ‘‘яам̣нуунаахам̣ навз жа д̇илз наван̃жа мад̇хум̣ б̣уд̣̇д̇хаббамукасса бхигкусан̇гхасса д̣̇ад̣̇зяяа’’нд̇и. ат̇а ко со б̣раахман̣о язна бхаг̇аваа д̇знубасан̇гами, убасан̇гамид̇ваа бхаг̇авад̇аа сад̣̇д̇хим̣ бадисаммод̣̇и, саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ адтааси. згаманд̇ам̣ тид̇о ко со б̣раахман̣о бхаг̇аванд̇ам̣ зд̇ад̣̇авожа – ‘‘ад̇хиваасзд̇у мз бхавам̣ г̇од̇амо сваад̇анааяа бхад̇д̇ам̣, сад̣̇д̇хим̣ бхигкусан̇гхзнаа’’д̇и. ад̇хиваасзси бхаг̇аваа д̇ун̣хийбхаавзна . ат̇а ко со б̣раахман̣о бхаг̇авад̇о ад̇хиваасанам̣ вид̣̇ид̇ваа баггаами. ат̇а ко со б̣раахман̣о д̇ассаа рад̇д̇ияаа ажжаязна бан̣ийд̇ам̣ каад̣̇анийяам̣ бхож̇анийяам̣ бадияаад̣̇аабзд̇ваа бхаг̇авад̇о гаалам̣ аарожаабзси – ‘‘гаало, бхо г̇од̇ама, нидтид̇ам̣ бхад̇д̇а’’нд̇и. ат̇а ко бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа язна д̇асса б̣раахман̣асса нивзсанам̣ д̇знубасан̇гами, убасан̇гамид̇ваа бан̃н̃ад̇д̇з аасанз нисийд̣̇и, сад̣̇д̇хим̣ бхигкусан̇гхзна. ат̇а ко со б̣раахман̣о б̣уд̣̇д̇хаббамукам̣ бхигкусан̇гхам̣ бан̣ийд̇зна каад̣̇анийязна бхож̇анийязна сахад̇т̇аа санд̇аббзд̇ваа самбаваарзд̇ваа бхаг̇аванд̇ам̣ бхуд̇д̇аавим̣ онийд̇абад̇д̇абаан̣им̣ згаманд̇ам̣ нисийд̣̇и. згаманд̇ам̣ нисиннам̣ ко д̇ам̣ б̣раахман̣ам̣ бхаг̇аваа д̇хаммияаа гат̇ааяа санд̣̇ассзд̇ваа, самаад̣̇абзд̇ваа, самуд̇д̇зж̇зд̇ваа, самбахам̣сзд̇ваа удтааяаасанаа баггаами.
276. Tena kho pana samayena aññatarassa brāhmaṇassa navā ca tilā navañca madhu uppannā honti. Atha kho tassa brāhmaṇassa etadahosi – ‘‘yaṃnūnāhaṃ nave ca tile navañca madhuṃ buddhappamukhassa bhikkhusaṅghassa dadeyya’’nti. Atha kho so brāhmaṇo yena bhagavā tenupasaṅkami, upasaṅkamitvā bhagavatā saddhiṃ paṭisammodi, sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsi. Ekamantaṃ ṭhito kho so brāhmaṇo bhagavantaṃ etadavoca – ‘‘adhivāsetu me bhavaṃ gotamo svātanāya bhattaṃ, saddhiṃ bhikkhusaṅghenā’’ti. Adhivāsesi bhagavā tuṇhībhāvena . Atha kho so brāhmaṇo bhagavato adhivāsanaṃ viditvā pakkāmi. Atha kho so brāhmaṇo tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bho gotama, niṭṭhitaṃ bhatta’’nti. Atha kho bhagavā pubbaṇhasamayaṃ nivāsetvā pattacīvaramādāya yena tassa brāhmaṇassa nivesanaṃ tenupasaṅkami, upasaṅkamitvā paññatte āsane nisīdi, saddhiṃ bhikkhusaṅghena. Atha kho so brāhmaṇo buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinnaṃ kho taṃ brāhmaṇaṃ bhagavā dhammiyā kathāya sandassetvā, samādapetvā, samuttejetvā, sampahaṃsetvā uṭṭhāyāsanā pakkāmi.
ат̇а ко д̇асса б̣раахман̣асса ажирабагганд̇асса бхаг̇авад̇о зд̇ад̣̇ахоси – ‘‘язсам̣ ко маяаа ад̇т̇ааяа б̣уд̣̇д̇хаббамуко бхигкусан̇гхо ниманд̇ид̇о, ‘навз жа д̇илз наван̃жа мад̇хум̣ д̣̇ассаамий’д̇и , д̇з маяаа бамудтаа д̣̇аад̇ум̣. яам̣нуунаахам̣ навз жа д̇илз наван̃жа мад̇хум̣ голамб̣зхи жа гхадзхи жа аараамам̣ хараабзяяа’’нд̇и. ат̇а ко со б̣раахман̣о навз жа д̇илз наван̃жа мад̇хум̣ голамб̣зхи жа гхадзхи жа аараамам̣ хараабзд̇ваа язна бхаг̇аваа д̇знубасан̇гами, убасан̇гамид̇ваа згаманд̇ам̣ адтааси. згаманд̇ам̣ тид̇о ко со б̣раахман̣о бхаг̇аванд̇ам̣ зд̇ад̣̇авожа – ‘‘язсам̣ ко маяаа, бхо г̇од̇ама, ад̇т̇ааяа б̣уд̣̇д̇хаббамуко бхигкусан̇гхо ниманд̇ид̇о, ‘навз жа д̇илз наван̃жа мад̇хум̣ д̣̇ассаамий’д̇и, д̇з маяаа бамудтаа д̣̇аад̇ум̣. бадиг̇г̇ан̣хаад̇у мз бхавам̣ г̇од̇амо навз жа д̇илз наван̃жа мад̇ху’’нд̇и. д̇зна хи, б̣раахман̣а, бхигкуунам̣ д̣̇зхийд̇и . д̇зна ко бана самаязна бхигкуу д̣̇уб̣бхигкз аббамад̇д̇агзби баваарзнд̇и, бадисан̇кааби бадигкибанд̇и, саб̣б̣о жа сан̇гхо баваарид̇о ход̇и. бхигкуу гуггужжааяанд̇аа на бадиг̇г̇ан̣ханд̇и. бадиг̇г̇ан̣хат̇а, бхигкавз, барибхун̃ж̇ат̇а. ануж̇аанаами, бхигкавз, д̇ад̇о нийхадам̣ бхуд̇д̇аавинаа баваарид̇зна анад̇ирид̇д̇ам̣ барибхун̃ж̇ид̇унд̇и.
Atha kho tassa brāhmaṇassa acirapakkantassa bhagavato etadahosi – ‘‘yesaṃ kho mayā atthāya buddhappamukho bhikkhusaṅgho nimantito, ‘nave ca tile navañca madhuṃ dassāmī’ti , te mayā pamuṭṭhā dātuṃ. Yaṃnūnāhaṃ nave ca tile navañca madhuṃ kolambehi ca ghaṭehi ca ārāmaṃ harāpeyya’’nti. Atha kho so brāhmaṇo nave ca tile navañca madhuṃ kolambehi ca ghaṭehi ca ārāmaṃ harāpetvā yena bhagavā tenupasaṅkami, upasaṅkamitvā ekamantaṃ aṭṭhāsi. Ekamantaṃ ṭhito kho so brāhmaṇo bhagavantaṃ etadavoca – ‘‘yesaṃ kho mayā, bho gotama, atthāya buddhappamukho bhikkhusaṅgho nimantito, ‘nave ca tile navañca madhuṃ dassāmī’ti, te mayā pamuṭṭhā dātuṃ. Paṭiggaṇhātu me bhavaṃ gotamo nave ca tile navañca madhu’’nti. Tena hi, brāhmaṇa, bhikkhūnaṃ dehīti . Tena kho pana samayena bhikkhū dubbhikkhe appamattakepi pavārenti, paṭisaṅkhāpi paṭikkhipanti, sabbo ca saṅgho pavārito hoti. Bhikkhū kukkuccāyantā na paṭiggaṇhanti. Paṭiggaṇhatha, bhikkhave, paribhuñjatha. Anujānāmi, bhikkhave, tato nīhaṭaṃ bhuttāvinā pavāritena anatirittaṃ paribhuñjitunti.
уг̇г̇ахид̇абадиг̇г̇ахан̣аа нидтид̇аа.
Uggahitapaṭiggahaṇā niṭṭhitā.
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / г̇ул̣аад̣̇иануж̇аананагат̇аа • Guḷādianujānanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / г̇ул̣аад̣̇иануж̇аананагат̇ааван̣н̣анаа • Guḷādianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / г̇ул̣аад̣̇иануж̇аананагат̇ааван̣н̣анаа • Guḷādianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / г̇ул̣аад̣̇иануж̇аананагат̇ааван̣н̣анаа • Guḷādianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 163. г̇ул̣аад̣̇иануж̇аананагат̇аа • 163. Guḷādianujānanakathā
