| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
10. உக்³க³த்தே²ரகா³தா²வண்ணனா
10. Uggattheragāthāvaṇṇanā
யங் மயா பகதங் கம்மந்தி ஆயஸ்மதோ உக்³க³த்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி கரொந்தோ இதோ ஏகதிங்ஸே கப்பே ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஏகதி³வஸங் ஸிகி²ங் ப⁴க³வந்தங் பஸ்ஸித்வா பஸன்னமானஸோ கேதகபுப்பே²ஹி பூஜங் அகாஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரங் ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ கோஸலரட்டே² உக்³க³னிக³மே ஸெட்டி²புத்தோ ஹுத்வா நிப்³ப³த்தி, உக்³கோ³த்வேவஸ்ஸ நாமங் அஹோஸி. ஸோ விஞ்ஞுதங் பத்தோ ப⁴க³வதி தஸ்மிங் நிக³மே ப⁴த்³தா³ராமே விஹரந்தே விஹாரங் க³ந்த்வா ஸத்து² ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மங் கரொந்தோ நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 1.14.10-16) –
Yaṃ mayā pakataṃ kammanti āyasmato uggattherassa gāthā. Kā uppatti? Ayampi purimabuddhesu katādhikāro tattha tattha bhave puññāni karonto ito ekatiṃse kappe sikhissa bhagavato kāle kulagehe nibbattitvā viññutaṃ patto ekadivasaṃ sikhiṃ bhagavantaṃ passitvā pasannamānaso ketakapupphehi pūjaṃ akāsi. So tena puññakammena devaloke nibbattitvā aparāparaṃ sugatīsuyeva saṃsaranto imasmiṃ buddhuppāde kosalaraṭṭhe ugganigame seṭṭhiputto hutvā nibbatti, uggotvevassa nāmaṃ ahosi. So viññutaṃ patto bhagavati tasmiṃ nigame bhaddārāme viharante vihāraṃ gantvā satthu santike dhammaṃ sutvā paṭiladdhasaddho pabbajitvā vipassanāya kammaṃ karonto nacirasseva arahattaṃ pāpuṇi. Tena vuttaṃ apadāne (apa. thera 1.14.10-16) –
‘‘வினதானதி³யா தீரே, பிலக்கு² ப²லிதோ அஹு;
‘‘Vinatānadiyā tīre, pilakkhu phalito ahu;
தாஹங் ருக்க²ங் க³வேஸந்தோ, அத்³த³ஸங் லோகனாயகங்.
Tāhaṃ rukkhaṃ gavesanto, addasaṃ lokanāyakaṃ.
‘‘கேதகங் புப்பி²தங் தி³ஸ்வா, வண்டே செ²த்வானஹங் ததா³;
‘‘Ketakaṃ pupphitaṃ disvā, vaṇṭe chetvānahaṃ tadā;
பு³த்³த⁴ஸ்ஸ அபி⁴ரோபேஸிங், ஸிகி²னோ லோகப³ந்து⁴னோ.
Buddhassa abhiropesiṃ, sikhino lokabandhuno.
‘‘யேன ஞாணேன பத்தோஸி, அச்சுதங் அமதங் பத³ங்;
‘‘Yena ñāṇena pattosi, accutaṃ amataṃ padaṃ;
தங் ஞாணங் அபி⁴பூஜேமி, பு³த்³த⁴ஸெட்ட² மஹாமுனி.
Taṃ ñāṇaṃ abhipūjemi, buddhaseṭṭha mahāmuni.
‘‘ஞாணம்ஹி பூஜங் கத்வான, பிலக்கு²மத்³த³ஸங் அஹங்;
‘‘Ñāṇamhi pūjaṃ katvāna, pilakkhumaddasaṃ ahaṃ;
படிலத்³தொ⁴ம்ஹி தங் பஞ்ஞங், ஞாணபூஜாயித³ங் ப²லங்.
Paṭiladdhomhi taṃ paññaṃ, ñāṇapūjāyidaṃ phalaṃ.
‘‘ஏகதிங்ஸே இதோ கப்பே, யங் புப்ப²மபி⁴ரோபயிங்;
‘‘Ekatiṃse ito kappe, yaṃ pupphamabhiropayiṃ;
து³க்³க³திங் நாபி⁴ஜானாமி, ஞாணபூஜாயித³ங் ப²லங்.
Duggatiṃ nābhijānāmi, ñāṇapūjāyidaṃ phalaṃ.
‘‘இதோ தேரஸகப்பம்ஹி, த்³வாத³ஸாஸுங் ப²லுக்³க³தா;
‘‘Ito terasakappamhi, dvādasāsuṃ phaluggatā;
ஸத்தரதனஸம்பன்னா, சக்கவத்தீ மஹப்³ப³லா.
Sattaratanasampannā, cakkavattī mahabbalā.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா அத்தனோ வட்டூபச்சே²த³தீ³பனேன அஞ்ஞங் ப்³யாகரொந்தோ –
Arahattaṃ pana patvā attano vaṭṭūpacchedadīpanena aññaṃ byākaronto –
80.
80.
‘‘யங் மயா பகதங் கம்மங், அப்பங் வா யதி³ வா ப³ஹுங்;
‘‘Yaṃ mayā pakataṃ kammaṃ, appaṃ vā yadi vā bahuṃ;
ஸப்³ப³மேதங் பரிக்கீ²ணங், நத்தி² தா³னி புனப்³ப⁴வோ’’தி. – கா³த²ங் அபா⁴ஸி;
Sabbametaṃ parikkhīṇaṃ, natthi dāni punabbhavo’’ti. – gāthaṃ abhāsi;
தத்த² யங் மயா பகதங் கம்மந்தி யங் கம்மங் தீஹி கம்மத்³வாரேஹி, ச²ஹி உப்பத்தித்³வாரேஹி, அட்ட²ஹி அஸங்வரத்³வாரேஹி , அட்ட²ஹி ச ஸங்வரத்³வாரேஹி பாபாதி³வஸேன தா³னாதி³வஸேன சாதி அனேகேஹி பகாரேஹி அனாதி³மதி ஸங்ஸாரே யங் மயா கதங் உபசிதங் அபி⁴னிப்³ப³த்திதங் விபாககம்மங். அப்பங் வா யதி³ வா ப³ஹுந்தி தஞ்ச வத்து²சேதனாபயோக³கிலேஸாதீ³னங் து³ப்³ப³லபா⁴வேன அப்பங் வா, தேஸங் ப³லவபா⁴வேன அபி⁴ண்ஹபவத்தியா ச ப³ஹுங் வா. ஸப்³ப³மேதங் பரிக்கீ²ணந்தி ஸப்³ப³மேவ சேதங் கம்மங் கம்மக்க²யகரஸ்ஸ அக்³க³மக்³க³ஸ்ஸ அதி⁴க³தத்தா பரிக்க²யங் க³தங், கிலேஸவட்டப்பஹானேன ஹி கம்மவட்டங் பஹீனமேவ ஹோதி விபாகவட்டஸ்ஸ அனுப்பாத³னதோ. தேனாஹ ‘‘நத்தி² தா³னி புனப்³ப⁴வோ’’தி. ஆயதிங் புனப்³ப⁴வாபி⁴னிப்³ப³த்தி மய்ஹங் நத்தீ²தி அத்தோ². ‘‘ஸப்³ப³ம்பேத’’ந்திபி பாடோ², ஸப்³ப³ம்பி ஏதந்தி பத³விபா⁴கோ³.
Tattha yaṃ mayā pakataṃ kammanti yaṃ kammaṃ tīhi kammadvārehi, chahi uppattidvārehi, aṭṭhahi asaṃvaradvārehi , aṭṭhahi ca saṃvaradvārehi pāpādivasena dānādivasena cāti anekehi pakārehi anādimati saṃsāre yaṃ mayā kataṃ upacitaṃ abhinibbattitaṃ vipākakammaṃ. Appaṃ vā yadi vābahunti tañca vatthucetanāpayogakilesādīnaṃ dubbalabhāvena appaṃ vā, tesaṃ balavabhāvena abhiṇhapavattiyā ca bahuṃ vā. Sabbametaṃ parikkhīṇanti sabbameva cetaṃ kammaṃ kammakkhayakarassa aggamaggassa adhigatattā parikkhayaṃ gataṃ, kilesavaṭṭappahānena hi kammavaṭṭaṃ pahīnameva hoti vipākavaṭṭassa anuppādanato. Tenāha ‘‘natthi dāni punabbhavo’’ti. Āyatiṃ punabbhavābhinibbatti mayhaṃ natthīti attho. ‘‘Sabbampeta’’ntipi pāṭho, sabbampi etanti padavibhāgo.
உக்³க³த்தே²ரகா³தா²வண்ணனா நிட்டி²தா.
Uggattheragāthāvaṇṇanā niṭṭhitā.
அட்ட²மவக்³க³வண்ணனா நிட்டி²தா.
Aṭṭhamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 10. உக்³க³த்தே²ரகா³தா² • 10. Uggattheragāthā
