| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. உஜ்ஜயஸுத்தவண்ணனா
9. Ujjayasuttavaṇṇanā
39. நவமே ஸங்கா⁴தங் ஆபஜ்ஜந்தீதி வத⁴ங் மரணங் ஆபஜ்ஜந்தி. நிச்சதா³னந்தி ஸலாகப⁴த்தங். அனுகுலயஞ்ஞந்தி அம்ஹாகங் பிதூஹி பிதாமஹேஹி தி³ன்னத்தா ஏவங் குலானுகுலவஸேன யஜிதப்³ப³ங், தா³தப்³ப³ந்தி அத்தோ². அஸ்ஸமேத⁴ந்திஆதீ³ஸு அஸ்ஸமெத்த² மேத⁴ந்தீதி அஸ்ஸமேதோ⁴, த்³வீஹி பரியஞ்ஞேஹி யஜிதப்³ப³ஸ்ஸ ஏகவீஸதியூபஸ்ஸ ட²பெத்வா பூ⁴மிஞ்ச புரிஸே ச அவஸேஸஸப்³ப³விப⁴வத³க்கி²ணஸ்ஸ யஞ்ஞஸ்ஸேதங் அதி⁴வசனங். புரிஸமெத்த² மேத⁴ந்தீதி புரிஸமேதோ⁴, சதூஹி பரியஞ்ஞேஹி யஜிதப்³ப³ஸ்ஸ ஸத்³தி⁴ங் பூ⁴மியா அஸ்ஸமேதே⁴ வுத்தவிப⁴வத³க்கி²ணஸ்ஸ யஞ்ஞஸ்ஸேதங் அதி⁴வசனங். ஸம்மமெத்த² பாஸந்தீதி ஸம்மாபாஸோ, தி³வஸே தி³வஸே ஸம்மங் கி²பித்வா தஸ்ஸ பதிதோகாஸே வேதி³ங் கத்வா ஸங்ஹாரிமேஹி யூபாதீ³ஹி ஸரஸ்ஸதினதி³யா நிமுக்³கோ³காஸதோ பபு⁴தி படிலோமங் க³ச்ச²ந்தேன யஜிதப்³ப³ஸ்ஸ ஸப்³ப³யாக³ஸ்ஸேதங் அதி⁴வசனங். வாஜமெத்த² பிவந்தீதி வாஜபெய்யங், ஏகேன பரியஞ்ஞேன ஸத்தரஸஹி பஸூஹி யஜிதப்³ப³ஸ்ஸ பே³லுவயூபஸ்ஸ ஸத்தரஸகத³க்கி²ணஸ்ஸ யஞ்ஞஸ்ஸேதங் அதி⁴வசனங். நத்தி² எத்த² அக்³க³ளாதி நிரக்³க³ளோ. நவஹி பரியஞ்ஞேஹி யஜிதப்³ப³ஸ்ஸ ஸத்³தி⁴ங் பூ⁴மியா புரிஸேஹி ச அஸ்ஸமேதே⁴ வுத்தவிப⁴வத³க்கி²ணஸ்ஸ ஸப்³ப³மேத⁴பரியாயனாமஸ்ஸ அஸ்ஸமேத⁴விகப்பஸ்ஸேதங் அதி⁴வசனங். மஹாரம்பா⁴தி மஹாகிச்சா மஹாகரணீயா. அபிச பாணாதிபாதஸமாரம்ப⁴ஸ்ஸ மஹந்ததாயபி மஹாரம்பா⁴யேவ. ந தே ஹொந்தி மஹப்ப²லாதி எத்த² நிரவஸேஸத்தே² ஸாவஸேஸரூபனங் கதங். தஸ்மா இட்ட²ப²லேன நிப்ப²லாவ ஹொந்தீதி அத்தோ². இத³ஞ்ச பாணாதிபாதஸமாரம்ப⁴மேவ ஸந்தா⁴ய வுத்தங். யங் பன தத்த² அந்தரந்தரா தா³னங் தி³ய்யதி, தங் இமினா ஸமாரம்பே⁴ன உபஹதத்தா மஹப்ப²லங் ந ஹோதி, மந்த³ப²லங் ஹோதீதி அத்தோ². ஹஞ்ஞரேதி ஹஞ்ஞந்தி. யஜந்தி அனுகுலங் ஸதா³தி யே அஞ்ஞே அனுகுலங் யஜந்தி, புப்³ப³புரிஸேஹி யிட்ட²த்தா பச்சி²மபுரிஸாபி யஜந்தீதி அத்தோ². ஸெய்யோ ஹோதீதி விஸேஸோவ ஹோதி. ந பாபியோதி பாபங் கிஞ்சி ந ஹோதி.
39. Navame saṅghātaṃ āpajjantīti vadhaṃ maraṇaṃ āpajjanti. Niccadānanti salākabhattaṃ. Anukulayaññanti amhākaṃ pitūhi pitāmahehi dinnattā evaṃ kulānukulavasena yajitabbaṃ, dātabbanti attho. Assamedhantiādīsu assamettha medhantīti assamedho, dvīhi pariyaññehi yajitabbassa ekavīsatiyūpassa ṭhapetvā bhūmiñca purise ca avasesasabbavibhavadakkhiṇassa yaññassetaṃ adhivacanaṃ. Purisamettha medhantīti purisamedho, catūhi pariyaññehi yajitabbassa saddhiṃ bhūmiyā assamedhe vuttavibhavadakkhiṇassa yaññassetaṃ adhivacanaṃ. Sammamettha pāsantīti sammāpāso, divase divase sammaṃ khipitvā tassa patitokāse vediṃ katvā saṃhārimehi yūpādīhi sarassatinadiyā nimuggokāsato pabhuti paṭilomaṃ gacchantena yajitabbassa sabbayāgassetaṃ adhivacanaṃ. Vājamettha pivantīti vājapeyyaṃ, ekena pariyaññena sattarasahi pasūhi yajitabbassa beluvayūpassa sattarasakadakkhiṇassa yaññassetaṃ adhivacanaṃ. Natthi ettha aggaḷāti niraggaḷo. Navahi pariyaññehi yajitabbassa saddhiṃ bhūmiyā purisehi ca assamedhe vuttavibhavadakkhiṇassa sabbamedhapariyāyanāmassa assamedhavikappassetaṃ adhivacanaṃ. Mahārambhāti mahākiccā mahākaraṇīyā. Apica pāṇātipātasamārambhassa mahantatāyapi mahārambhāyeva. Na te honti mahapphalāti ettha niravasesatthe sāvasesarūpanaṃ kataṃ. Tasmā iṭṭhaphalena nipphalāva hontīti attho. Idañca pāṇātipātasamārambhameva sandhāya vuttaṃ. Yaṃ pana tattha antarantarā dānaṃ diyyati, taṃ iminā samārambhena upahatattā mahapphalaṃ na hoti, mandaphalaṃ hotīti attho. Haññareti haññanti. Yajanti anukulaṃ sadāti ye aññe anukulaṃ yajanti, pubbapurisehi yiṭṭhattā pacchimapurisāpi yajantīti attho. Seyyo hotīti visesova hoti. Na pāpiyoti pāpaṃ kiñci na hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. உஜ்ஜயஸுத்தங் • 9. Ujjayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. உஜ்ஜயஸுத்தவண்ணனா • 9. Ujjayasuttavaṇṇanā
