| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. உஜ்ஜயஸுத்தவண்ணனா
9. Ujjayasuttavaṇṇanā
39. நவமே அனுகுலயஞ்ஞந்தி அனுகுலங் குலானுக்கமங் உபாதா³ய தா³தப்³ப³தா³னங். தேனாஹ ‘‘அம்ஹாகங்…பே॰… குலானுகுலவஸேன யஜிதப்³ப³’’ந்தி. வங்ஸபரம்பராய பச்சா² து³க்³க³தபுரிஸேஹி பதா³தப்³ப³தா³னங். ஏவரூபங் குலங் ஸீலவந்தே உத்³தி³ஸ்ஸ நிப³த்³த⁴தா³னங், தஸ்மிங் குலே த³லித்³தா³னிபி ந உபச்சி²ந்த³ந்தி. தத்ரித³ங் வத்து² – அனாத²பிண்டி³கஸ்ஸ க⁴ரே பஞ்ச ஸலாகப⁴த்தஸதானி தீ³யிங்ஸு. த³ந்தமயஸலாகானங் பஞ்சஸதானி அஹேஸுங். அத² தங் குலங் அனுக்கமேன தா³லித்³தி³யேன அபி⁴பூ⁴தங். ஏகா தஸ்மிங் குலே தா³ரிகா ஏகஸலாகதோ உத்³த⁴ங் தா³துங் நாஸக்கி². ஸாபி பச்சா² ஸாதவாஹனங் ரட்ட²ங் க³ந்த்வா க²லங் ஸோதெ⁴த்வா லத்³த⁴த⁴ஞ்ஞேன தங் ஸலாகங் அதா³ஸி. ஏகோ தே²ரோ ரஞ்ஞோ ஆரோசேஸி. ராஜா தங் ஆனெத்வா அக்³க³மஹேஸிட்டா²னே ட²பேஸி. ஸா ததோ பட்டா²ய புன பஞ்சபி ஸலாகஸதானி பவத்தேஸி.
39. Navame anukulayaññanti anukulaṃ kulānukkamaṃ upādāya dātabbadānaṃ. Tenāha ‘‘amhākaṃ…pe… kulānukulavasena yajitabba’’nti. Vaṃsaparamparāya pacchā duggatapurisehi padātabbadānaṃ. Evarūpaṃ kulaṃ sīlavante uddissa nibaddhadānaṃ, tasmiṃ kule daliddānipi na upacchindanti. Tatridaṃ vatthu – anāthapiṇḍikassa ghare pañca salākabhattasatāni dīyiṃsu. Dantamayasalākānaṃ pañcasatāni ahesuṃ. Atha taṃ kulaṃ anukkamena dāliddiyena abhibhūtaṃ. Ekā tasmiṃ kule dārikā ekasalākato uddhaṃ dātuṃ nāsakkhi. Sāpi pacchā sātavāhanaṃ raṭṭhaṃ gantvā khalaṃ sodhetvā laddhadhaññena taṃ salākaṃ adāsi. Eko thero rañño ārocesi. Rājā taṃ ānetvā aggamahesiṭṭhāne ṭhapesi. Sā tato paṭṭhāya puna pañcapi salākasatāni pavattesi.
அஸ்ஸமேத⁴ந்திஆதீ³ஸு போராணகராஜகாலே கிர ஸஸ்ஸமேத⁴ங், புரிஸமேத⁴ங், ஸம்மாபாஸங், வாசாபெய்யந்தி சத்தாரி ஸங்க³ஹவத்தூ²னி அஹேஸுங், யேஹி ராஜானோ லோகங் ஸங்க³ண்ஹிங்ஸு. தத்த² நிப்ப²ன்னஸஸ்ஸதோ த³ஸமபா⁴க³க்³க³ஹணங் ஸஸ்ஸமேத⁴ங் நாம, ஸஸ்ஸஸம்பாத³னே மேதா⁴விதாதி அத்தோ². மஹாயோதா⁴னங் ச²மாஸிகப⁴த்தவேதனானுப்பதா³னங் புரிஸமேத⁴ங் நாம, புரிஸஸங்க³ண்ஹனே மேதா⁴விதாதி அத்தோ². த³லித்³த³மனுஸ்ஸானங் ஹத்தே² லேக²ங் க³ஹெத்வா தீணி வஸ்ஸானி வினா வட்³டி⁴யா ஸஹஸ்ஸத்³விஸஹஸ்ஸமத்தத⁴னானுப்பதா³னங் ஸம்மாபாஸங் நாம. தஞ்ஹி ஸம்மா மனுஸ்ஸே பாஸேதி ஹத³யே ப³ந்தி⁴த்வா விய ட²பேதி, தஸ்மா ஸம்மாபாஸந்தி வுச்சதி. ‘‘தாத, மாதுலா’’திஆதி³னா பன ஸண்ஹவாசாப⁴ணனங் வாசாபெய்யங் நாம, பெய்யவஜ்ஜங் பியவசனதாதி அத்தோ². ஏவங் சதூஹி வத்தூ²ஹி ஸங்க³ஹிதங் ரட்ட²ங் இத்³த⁴ஞ்சேவ ஹோதி பீ²தஞ்ச பஹூதஅன்னபானங் கே²மங் நிரப்³பு³த³ங், மனுஸ்ஸா முதா³ மோத³னா உரே புத்தே நச்செந்தா அபாருதக⁴ரத்³வாரா விஹரந்தி. இத³ங் க⁴ரத்³வாரேஸு அக்³க³ளானங் அபா⁴வதோ நிரக்³க³ளந்தி வுச்சதி. அயங் போராணிகா பவேணீ. அபரபா⁴கே³ பன ஓக்காகராஜகாலே ப்³ராஹ்மணா இமானி சத்தாரி ஸங்க³ஹவத்தூ²னி இமஞ்ச ரட்ட²ஸம்பத்திங் பரிவத்தெந்தா உம்மூலங் கத்வா அஸ்ஸமேத⁴ங் புரிஸமேத⁴ந்திஆதி³கே பஞ்ச யஞ்ஞே நாம அகங்ஸு. வுத்தஞ்ஹேதங் ப⁴க³வதா ப்³ராஹ்மணத⁴ம்மியஸுத்தே –
Assamedhantiādīsu porāṇakarājakāle kira sassamedhaṃ, purisamedhaṃ, sammāpāsaṃ, vācāpeyyanti cattāri saṅgahavatthūni ahesuṃ, yehi rājāno lokaṃ saṅgaṇhiṃsu. Tattha nipphannasassato dasamabhāgaggahaṇaṃ sassamedhaṃ nāma, sassasampādane medhāvitāti attho. Mahāyodhānaṃ chamāsikabhattavetanānuppadānaṃ purisamedhaṃ nāma, purisasaṅgaṇhane medhāvitāti attho. Daliddamanussānaṃ hatthe lekhaṃ gahetvā tīṇi vassāni vinā vaḍḍhiyā sahassadvisahassamattadhanānuppadānaṃ sammāpāsaṃ nāma. Tañhi sammā manusse pāseti hadaye bandhitvā viya ṭhapeti, tasmā sammāpāsanti vuccati. ‘‘Tāta, mātulā’’tiādinā pana saṇhavācābhaṇanaṃ vācāpeyyaṃ nāma, peyyavajjaṃ piyavacanatāti attho. Evaṃ catūhi vatthūhi saṅgahitaṃ raṭṭhaṃ iddhañceva hoti phītañca pahūtaannapānaṃ khemaṃ nirabbudaṃ, manussā mudā modanā ure putte naccentā apārutagharadvārā viharanti. Idaṃ gharadvāresu aggaḷānaṃ abhāvato niraggaḷanti vuccati. Ayaṃ porāṇikā paveṇī. Aparabhāge pana okkākarājakāle brāhmaṇā imāni cattāri saṅgahavatthūni imañca raṭṭhasampattiṃ parivattentā ummūlaṃ katvā assamedhaṃ purisamedhantiādike pañca yaññe nāma akaṃsu. Vuttañhetaṃ bhagavatā brāhmaṇadhammiyasutte –
‘‘தேஸங் ஆஸி விபல்லாஸோ, தி³ஸ்வான அணுதோ அணுங்…பே॰…;
‘‘Tesaṃ āsi vipallāso, disvāna aṇuto aṇuṃ…pe…;
தே தத்த² மந்தே க³ந்தெ²த்வா, ஓக்காகங் தது³பாக³மு’’ந்தி. (ஸு॰ நி॰ 301-304);
Te tattha mante ganthetvā, okkākaṃ tadupāgamu’’nti. (su. ni. 301-304);
இதா³னி தேஹி பரிவத்தெத்வா ட²பிதமத்த²ங் த³ஸ்ஸெந்தோ ‘‘அஸ்ஸமேத⁴’’ந்திஆதி³மாஹ. தத்த² மேத⁴ந்தீதி வதெ⁴ந்தி. த்³வீஹி பரியஞ்ஞேஹீதி மஹாயஞ்ஞஸ்ஸ புப்³ப³பா⁴கே³ பச்சா² ச பவத்தேதப்³பே³ஹி த்³வீஹி பரிவாரயஞ்ஞேஹி. ஸத்தனவுதிபஞ்சபஸுஸதகா⁴தபி⁴ங்ஸனஸ்ஸாதி ஸத்தனவுதாதி⁴கானங் பஞ்சன்னங் பஸுஸதானங் மாரணேன பே⁴ரவஸ்ஸ பாபபீ⁴ருகானங் ப⁴யாவஹஸ்ஸ. ததா² ஹி வத³ந்தி –
Idāni tehi parivattetvā ṭhapitamatthaṃ dassento ‘‘assamedha’’ntiādimāha. Tattha medhantīti vadhenti. Dvīhi pariyaññehīti mahāyaññassa pubbabhāge pacchā ca pavattetabbehi dvīhi parivārayaññehi. Sattanavutipañcapasusataghātabhiṃsanassāti sattanavutādhikānaṃ pañcannaṃ pasusatānaṃ māraṇena bheravassa pāpabhīrukānaṃ bhayāvahassa. Tathā hi vadanti –
‘‘ச²ஸதானி நியுஜ்ஜந்தி, பஸூனங் மஜ்ஜி²மே ஹனி;
‘‘Chasatāni niyujjanti, pasūnaṃ majjhime hani;
அஸ்ஸமேத⁴ஸ்ஸ யஞ்ஞஸ்ஸ, ஊனானி பஸூஹி தீஹீ’’தி. (ஸங்॰ நி॰ டீ॰ 1.1.120);
Assamedhassa yaññassa, ūnāni pasūhi tīhī’’ti. (saṃ. ni. ṭī. 1.1.120);
ஸம்மந்தி யுக³ச்சி²த்³தே³ பக்கி²பிதப்³ப³த³ண்ட³கங். பாஸந்தீதி கி²பந்தி. ஸங்ஹாரிமேஹீதி ஸகடேஹி வஹிதப்³பே³ஹி. புப்³பே³ கிர ஏகோ ராஜா ஸம்மாபாஸங் யஜந்தோ ஸரஸ்ஸதினதி³தீரே பத²வியா விவரே தி³ன்னே நிமுக்³கோ³யேவ அஹோஸி, அந்த⁴பா³லப்³ராஹ்மணா க³தானுக³திக³தா ‘‘அயங் தஸ்ஸ ஸக்³க³க³மனமக்³கோ³’’தி ஸஞ்ஞாய தத்த² ஸம்மாபாஸயஞ்ஞங் பட்ட²பெந்தி. தேன வுத்தங் ‘‘நிமுக்³கோ³காஸதோ பபு⁴தீ’’தி. அயூபோ அப்பகதி³வஸோ யாகோ³, ஸயூபோ ப³ஹுதி³வஸங் நெய்யோ ஸத்ரயாகோ³தி. மந்தபதா³பி⁴ஸங்க²தானங் ஸப்பிமதூ⁴னங் வாஜமிதி ஸமஞ்ஞா. ஹிரஞ்ஞஸுவண்ணகோ³மஹிங்ஸாதி³ ஸத்தரஸகத³க்கி²ணஸ்ஸ. ஸாரக³ப்³ப⁴கொட்டா²கா³ராதீ³ஸு நத்தி² எத்த² அக்³க³ளந்தி நிரக்³க³ளோ. தத்த² கிர யஞ்ஞே அத்தனோ ஸாபதெய்யங் அனவஸேஸதோ அனிகூ³ஹித்வா நிய்யாதீயதி.
Sammanti yugacchidde pakkhipitabbadaṇḍakaṃ. Pāsantīti khipanti. Saṃhārimehīti sakaṭehi vahitabbehi. Pubbe kira eko rājā sammāpāsaṃ yajanto sarassatinaditīre pathaviyā vivare dinne nimuggoyeva ahosi, andhabālabrāhmaṇā gatānugatigatā ‘‘ayaṃ tassa saggagamanamaggo’’ti saññāya tattha sammāpāsayaññaṃ paṭṭhapenti. Tena vuttaṃ ‘‘nimuggokāsato pabhutī’’ti. Ayūpo appakadivaso yāgo, sayūpo bahudivasaṃ neyyo satrayāgoti. Mantapadābhisaṅkhatānaṃ sappimadhūnaṃ vājamiti samaññā. Hiraññasuvaṇṇagomahiṃsādi sattarasakadakkhiṇassa. Sāragabbhakoṭṭhāgārādīsu natthi ettha aggaḷanti niraggaḷo. Tattha kira yaññe attano sāpateyyaṃ anavasesato anigūhitvā niyyātīyati.
மஹாரம்பா⁴தி ப³ஹுபஸுகா⁴தகம்மா. அட்ட²கதா²யங் பன ‘‘விவிதா⁴ யத்த² ஹஞ்ஞரே’’தி வக்க²மானத்தா ‘‘மஹாகிச்சா மஹாகரணீயா’’தி பட²மோ அத்த²விகப்போ வுத்தோ. து³தியோ பன அத்த²விகப்போ ‘‘மஹாரம்பா⁴தி பபஞ்சவஸேன அஜேளகா’’திஆதி³ வுத்தந்தி அதி⁴ப்பாயேன ‘‘அபிசா’’திஆதி³னா ஆரத்³தோ⁴. நிராரம்பா⁴தி எத்தா²பி வுத்தனயேன அத்தோ² வேதி³தப்³போ³. நனு ச பாணாதிபாதாதி³அகுஸலகம்மஸ்ஸ அப்பமத்தகம்பி ப²லங் நுபலப்³ப⁴தி, தஸ்மா தஸ்ஸ நிப்ப²லபா⁴வங் அவத்வா ‘‘ந தே ஹொந்தி மஹப்ப²லா’’தி கஸ்மா வுத்தந்தி ஆஹ ‘‘நிரவஸேஸத்தே²’’திஆதி³. அனுக³தங் குலந்தி அனுகுலங், குலானுக³தந்தி அத்தோ². யே நிச்சப⁴த்தாதி³ங் புப்³ப³புரிஸேஹி பட்ட²பிதங் அபராபரங் அனுபச்சி²ந்த³ந்தா மனுஸ்ஸா த³த³ந்தி, தே அனுகுலங் யஜந்தி நாம. தேனேவாஹ ‘‘யே அஞ்ஞே அனுகுலங் யஜந்தீ’’திஆதி³.
Mahārambhāti bahupasughātakammā. Aṭṭhakathāyaṃ pana ‘‘vividhā yattha haññare’’ti vakkhamānattā ‘‘mahākiccā mahākaraṇīyā’’ti paṭhamo atthavikappo vutto. Dutiyo pana atthavikappo ‘‘mahārambhāti papañcavasena ajeḷakā’’tiādi vuttanti adhippāyena ‘‘apicā’’tiādinā āraddho. Nirārambhāti etthāpi vuttanayena attho veditabbo. Nanu ca pāṇātipātādiakusalakammassa appamattakampi phalaṃ nupalabbhati, tasmā tassa nipphalabhāvaṃ avatvā ‘‘na te honti mahapphalā’’ti kasmā vuttanti āha ‘‘niravasesatthe’’tiādi. Anugataṃ kulanti anukulaṃ, kulānugatanti attho. Ye niccabhattādiṃ pubbapurisehi paṭṭhapitaṃ aparāparaṃ anupacchindantā manussā dadanti, te anukulaṃ yajanti nāma. Tenevāha ‘‘ye aññe anukulaṃ yajantī’’tiādi.
உஜ்ஜயஸுத்தவண்ணனா நிட்டி²தா.
Ujjayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. உஜ்ஜயஸுத்தங் • 9. Ujjayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. உஜ்ஜயஸுத்தவண்ணனா • 9. Ujjayasuttavaṇṇanā
