| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
7. உஜ்ஜயத்தே²ரகா³தா²வண்ணனா
7. Ujjayattheragāthāvaṇṇanā
நமோ தே பு³த்³த⁴ வீரத்தூ²தி ஆயஸ்மதோ உஜ்ஜயத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி கரொந்தோ இதோ த்³வானவுதே கப்பே திஸ்ஸங் ப⁴க³வந்தங் பஸ்ஸித்வா பஸன்னமானஸோ கணிகாரபுப்பே²ஹி பூஜங் அகாஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரங் புஞ்ஞானி கத்வா தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ராஜக³ஹே அஞ்ஞதரஸ்ஸ ஸொத்தியப்³ராஹ்மணஸ்ஸ புத்தோ ஹுத்வா நிப்³ப³த்தி, உஜ்ஜயோதிஸ்ஸ நாமங் அஹோஸி. ஸோ வயப்பத்தோ திண்ணங் வேதா³னங் பாரகூ³ ஹுத்வா தத்த² ஸாரங் அபஸ்ஸந்தோ உபனிஸ்ஸயஸம்பத்தியா சோதி³யமானோ வேளுவனங் க³ந்த்வா ஸத்து² ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா சரியானுகூலங் கம்மட்டா²னங் க³ஹெத்வா அரஞ்ஞே விஹரந்தோ விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 1.21.1-4) –
Namote buddha vīratthūti āyasmato ujjayattherassa gāthā. Kā uppatti? Ayampi purimabuddhesu katādhikāro tattha tattha bhave puññāni karonto ito dvānavute kappe tissaṃ bhagavantaṃ passitvā pasannamānaso kaṇikārapupphehi pūjaṃ akāsi. So tena puññakammena devaloke nibbattitvā aparāparaṃ puññāni katvā devamanussesu saṃsaranto imasmiṃ buddhuppāde rājagahe aññatarassa sottiyabrāhmaṇassa putto hutvā nibbatti, ujjayotissa nāmaṃ ahosi. So vayappatto tiṇṇaṃ vedānaṃ pāragū hutvā tattha sāraṃ apassanto upanissayasampattiyā codiyamāno veḷuvanaṃ gantvā satthu santike dhammaṃ sutvā paṭiladdhasaddho pabbajitvā cariyānukūlaṃ kammaṭṭhānaṃ gahetvā araññe viharanto vipassanaṃ vaḍḍhetvā nacirasseva arahattaṃ pāpuṇi. Tena vuttaṃ apadāne (apa. thera 1.21.1-4) –
‘‘கணிகாரங் புப்பி²தங் தி³ஸ்வா, ஓசினித்வானஹங் ததா³;
‘‘Kaṇikāraṃ pupphitaṃ disvā, ocinitvānahaṃ tadā;
திஸ்ஸஸ்ஸ அபி⁴ரோபேஸிங், ஓக⁴திண்ணஸ்ஸ தாதி³னோ.
Tissassa abhiropesiṃ, oghatiṇṇassa tādino.
‘‘த்³வேனவுதே இதோ கப்பே, யங் புப்ப²மபி⁴ரோபயிங்;
‘‘Dvenavute ito kappe, yaṃ pupphamabhiropayiṃ;
து³க்³க³திங் நாபி⁴ஜானாமி, பு³த்³த⁴பூஜாயித³ங் ப²லங்.
Duggatiṃ nābhijānāmi, buddhapūjāyidaṃ phalaṃ.
‘‘பஞ்சதிங்ஸே இதோ கப்பே, அருணபாணீதி விஸ்ஸுதோ;
‘‘Pañcatiṃse ito kappe, aruṇapāṇīti vissuto;
ஸத்தரதனஸம்பன்னோ, சக்கவத்தீ மஹப்³ப³லோ.
Sattaratanasampanno, cakkavattī mahabbalo.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா ஸத்து² ஸந்திகங் க³ந்த்வா வந்தி³த்வா ஏகமந்தங் நிஸீதி³த்வா ப⁴க³வதோ தோ²மனாகாரேன அஞ்ஞங் ப்³யாகரொந்தோ ‘‘நமோ தே பு³த்³த⁴ வீரத்தூ²’’தி கா³த²ங் அபா⁴ஸி.
Arahattaṃ pana patvā satthu santikaṃ gantvā vanditvā ekamantaṃ nisīditvā bhagavato thomanākārena aññaṃ byākaronto ‘‘namo te buddha vīratthū’’ti gāthaṃ abhāsi.
47. தத்த² நமோதி பணாமகித்தனங். தேதி பணாமகிரியாய ஸம்பதா³னகித்தனங், துய்ஹந்தி அத்தோ². பு³த்³த⁴ வீராதி ச ப⁴க³வதோ ஆலபனங். ப⁴க³வா ஹி யதா² அபி⁴ஞ்ஞெய்யாதி³பே⁴த³ஸ்ஸ அத்த²ஸ்ஸ அபி⁴ஞ்ஞெய்யாதி³பே⁴தே³ன ஸயம்பூ⁴ஞாணேன அனவஸேஸதோ பு³த்³த⁴த்தா ‘‘பு³த்³தோ⁴’’தி வுச்சதி. ஏவங் பஞ்சன்னம்பி மாரானங் அபி⁴ப்பமத்³த³னவஸேன பத³ஹந்தேன மஹதா வீரியேன ஸமன்னாக³தத்தா ‘‘வீரோ’’தி வுச்சதி. அத்தூ²தி ஹோது, தஸ்ஸ ‘‘நமோ’’தி இமினா ஸம்ப³ந்தோ⁴. விப்பமுத்தோஸி ஸப்³ப³தீ⁴தி ஸப்³பே³ஹி கிலேஸேஹி ஸப்³ப³ஸ்மிஞ்ச ஸங்கா²ரக³தே விப்பமுத்தோ விஸங்யுத்தோ அஸி ப⁴வஸி, ந தயா கிஞ்சி அவிப்பமுத்தங் நாம அத்தி², யதோஹங் துய்ஹாபதா³னே விஹரங், விஹராமி அனாஸவோதி துய்ஹங் தவ அபதா³னே ஓவாதே³ க³தமக்³கே³ படிபத்திசரியாய விஹரங் யதா²ஸத்தி யதா²ப³லங் படிபஜ்ஜந்தோ காமாஸவாதீ³னங் சதுன்னம்பி ஆஸவானங் ஸுப்பஹீனத்தா அனாஸவோ விஹராமி, தாதி³ஸஸ்ஸ நமோ தே பு³த்³த⁴-வீரத்தூ²தி.
47. Tattha namoti paṇāmakittanaṃ. Teti paṇāmakiriyāya sampadānakittanaṃ, tuyhanti attho. Buddha vīrāti ca bhagavato ālapanaṃ. Bhagavā hi yathā abhiññeyyādibhedassa atthassa abhiññeyyādibhedena sayambhūñāṇena anavasesato buddhattā ‘‘buddho’’ti vuccati. Evaṃ pañcannampi mārānaṃ abhippamaddanavasena padahantena mahatā vīriyena samannāgatattā ‘‘vīro’’ti vuccati. Atthūti hotu, tassa ‘‘namo’’ti iminā sambandho. Vippamuttosi sabbadhīti sabbehi kilesehi sabbasmiñca saṅkhāragate vippamutto visaṃyutto asi bhavasi, na tayā kiñci avippamuttaṃ nāma atthi, yatohaṃ tuyhāpadāne viharaṃ, viharāmi anāsavoti tuyhaṃ tava apadāne ovāde gatamagge paṭipatticariyāya viharaṃ yathāsatti yathābalaṃ paṭipajjanto kāmāsavādīnaṃ catunnampi āsavānaṃ suppahīnattā anāsavo viharāmi, tādisassa namo te buddha-vīratthūti.
உஜ்ஜயத்தே²ரகா³தா²வண்ணனா நிட்டி²தா.
Ujjayattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 7. உஜ்ஜயத்தே²ரகா³தா² • 7. Ujjayattheragāthā
