| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৭. উজ্জযত্থেরগাথাৰণ্ণনা
7. Ujjayattheragāthāvaṇṇanā
নমো তে বুদ্ধ ৰীরত্থূতি আযস্মতো উজ্জযত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ইতো দ্ৰানৰুতে কপ্পে তিস্সং ভগৰন্তং পস্সিত্ৰা পসন্নমানসো কণিকারপুপ্ফেহি পূজং অকাসি। সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে অঞ্ঞতরস্স সোত্তিযব্রাহ্মণস্স পুত্তো হুত্ৰা নিব্বত্তি, উজ্জযোতিস্স নামং অহোসি। সো ৰযপ্পত্তো তিণ্ণং ৰেদানং পারগূ হুত্ৰা তত্থ সারং অপস্সন্তো উপনিস্সযসম্পত্তিযা চোদিযমানো ৰেল়ুৰনং গন্ত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা চরিযানুকূলং কম্মট্ঠানং গহেত্ৰা অরঞ্ঞে ৰিহরন্তো ৰিপস্সনং ৰড্ঢেত্ৰা নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ১.২১.১-৪) –
Namote buddha vīratthūti āyasmato ujjayattherassa gāthā. Kā uppatti? Ayampi purimabuddhesu katādhikāro tattha tattha bhave puññāni karonto ito dvānavute kappe tissaṃ bhagavantaṃ passitvā pasannamānaso kaṇikārapupphehi pūjaṃ akāsi. So tena puññakammena devaloke nibbattitvā aparāparaṃ puññāni katvā devamanussesu saṃsaranto imasmiṃ buddhuppāde rājagahe aññatarassa sottiyabrāhmaṇassa putto hutvā nibbatti, ujjayotissa nāmaṃ ahosi. So vayappatto tiṇṇaṃ vedānaṃ pāragū hutvā tattha sāraṃ apassanto upanissayasampattiyā codiyamāno veḷuvanaṃ gantvā satthu santike dhammaṃ sutvā paṭiladdhasaddho pabbajitvā cariyānukūlaṃ kammaṭṭhānaṃ gahetvā araññe viharanto vipassanaṃ vaḍḍhetvā nacirasseva arahattaṃ pāpuṇi. Tena vuttaṃ apadāne (apa. thera 1.21.1-4) –
‘‘কণিকারং পুপ্ফিতং দিস্ৰা, ওচিনিত্ৰানহং তদা।
‘‘Kaṇikāraṃ pupphitaṃ disvā, ocinitvānahaṃ tadā;
তিস্সস্স অভিরোপেসিং, ওঘতিণ্ণস্স তাদিনো॥
Tissassa abhiropesiṃ, oghatiṇṇassa tādino.
‘‘দ্ৰেনৰুতে ইতো কপ্পে, যং পুপ্ফমভিরোপযিং।
‘‘Dvenavute ito kappe, yaṃ pupphamabhiropayiṃ;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘পঞ্চতিংসে ইতো কপ্পে, অরুণপাণীতি ৰিস্সুতো।
‘‘Pañcatiṃse ito kappe, aruṇapāṇīti vissuto;
সত্তরতনসম্পন্নো, চক্কৰত্তী মহব্বলো॥
Sattaratanasampanno, cakkavattī mahabbalo.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা সত্থু সন্তিকং গন্ত্ৰা ৰন্দিত্ৰা একমন্তং নিসীদিত্ৰা ভগৰতো থোমনাকারেন অঞ্ঞং ব্যাকরোন্তো ‘‘নমো তে বুদ্ধ ৰীরত্থূ’’তি গাথং অভাসি।
Arahattaṃ pana patvā satthu santikaṃ gantvā vanditvā ekamantaṃ nisīditvā bhagavato thomanākārena aññaṃ byākaronto ‘‘namo te buddha vīratthū’’ti gāthaṃ abhāsi.
৪৭. তত্থ নমোতি পণামকিত্তনং। তেতি পণামকিরিযায সম্পদানকিত্তনং, তুয্হন্তি অত্থো। বুদ্ধ ৰীরাতি চ ভগৰতো আলপনং। ভগৰা হি যথা অভিঞ্ঞেয্যাদিভেদস্স অত্থস্স অভিঞ্ঞেয্যাদিভেদেন সযম্ভূঞাণেন অনৰসেসতো বুদ্ধত্তা ‘‘বুদ্ধো’’তি ৰুচ্চতি। এৰং পঞ্চন্নম্পি মারানং অভিপ্পমদ্দনৰসেন পদহন্তেন মহতা ৰীরিযেন সমন্নাগতত্তা ‘‘ৰীরো’’তি ৰুচ্চতি। অত্থূতি হোতু, তস্স ‘‘নমো’’তি ইমিনা সম্বন্ধো। ৰিপ্পমুত্তোসি সব্বধীতি সব্বেহি কিলেসেহি সব্বস্মিঞ্চ সঙ্খারগতে ৰিপ্পমুত্তো ৰিসংযুত্তো অসি ভৰসি, ন তযা কিঞ্চি অৰিপ্পমুত্তং নাম অত্থি, যতোহং তুয্হাপদানে ৰিহরং, ৰিহরামি অনাসৰোতি তুয্হং তৰ অপদানে ওৰাদে গতমগ্গে পটিপত্তিচরিযায ৰিহরং যথাসত্তি যথাবলং পটিপজ্জন্তো কামাসৰাদীনং চতুন্নম্পি আসৰানং সুপ্পহীনত্তা অনাসৰো ৰিহরামি, তাদিসস্স নমো তে বুদ্ধ-ৰীরত্থূতি।
47. Tattha namoti paṇāmakittanaṃ. Teti paṇāmakiriyāya sampadānakittanaṃ, tuyhanti attho. Buddha vīrāti ca bhagavato ālapanaṃ. Bhagavā hi yathā abhiññeyyādibhedassa atthassa abhiññeyyādibhedena sayambhūñāṇena anavasesato buddhattā ‘‘buddho’’ti vuccati. Evaṃ pañcannampi mārānaṃ abhippamaddanavasena padahantena mahatā vīriyena samannāgatattā ‘‘vīro’’ti vuccati. Atthūti hotu, tassa ‘‘namo’’ti iminā sambandho. Vippamuttosi sabbadhīti sabbehi kilesehi sabbasmiñca saṅkhāragate vippamutto visaṃyutto asi bhavasi, na tayā kiñci avippamuttaṃ nāma atthi, yatohaṃ tuyhāpadāne viharaṃ, viharāmi anāsavoti tuyhaṃ tava apadāne ovāde gatamagge paṭipatticariyāya viharaṃ yathāsatti yathābalaṃ paṭipajjanto kāmāsavādīnaṃ catunnampi āsavānaṃ suppahīnattā anāsavo viharāmi, tādisassa namo te buddha-vīratthūti.
উজ্জযত্থেরগাথাৰণ্ণনা নিট্ঠিতা।
Ujjayattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৭. উজ্জযত্থেরগাথা • 7. Ujjayattheragāthā
