| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. উজ্ঝানসঞ্ঞিসুত্তৰণ্ণনা
5. Ujjhānasaññisuttavaṇṇanā
৩৫. পঞ্চমে উজ্ঝানসঞ্ঞিকাতি উজ্ঝানসঞ্ঞী দেৰলোকো নাম পাটিযেক্কো নত্থি, ইমা পন দেৰতা তথাগতস্স চতুপচ্চযপরিভোগং নিস্সায উজ্ঝাযমানা আগতা। তাসং কির এৰং অহোসি – ‘‘সমণো গোতমো ভিক্খূনং পংসুকূলচীৰর-পিণ্ডিযালোপ-রুক্খমূলসেনাসনপূতিমুত্তভেসজ্জেহি সন্তোসস্সেৰ পরিযন্তকারিতং ৰণ্ণেতি, সযং পন পত্তুণ্ণদুকূল খোমাদীনি পণীতচীৰরানি ধারেতি, রাজারহং উত্তমং ভোজনং ভুঞ্জতি, দেৰৰিমানকপ্পায গন্ধকুটিযা ৰরসযনে সযতি, সপ্পিনৰনীতাদীনি ভেসজ্জানি পটিসেৰতি, দিৰসং মহাজনস্স ধম্মং দেসেতি, ৰচনমস্স অঞ্ঞতো গচ্ছতি, কিরিযা অঞ্ঞতো’’তি উজ্ঝাযমানা আগমিংসু। তেন তাসং ধম্মসঙ্গাহকত্থেরেহি ‘‘উজ্ঝানসঞ্ঞিকা’’তি নামং গহিতং।
35. Pañcame ujjhānasaññikāti ujjhānasaññī devaloko nāma pāṭiyekko natthi, imā pana devatā tathāgatassa catupaccayaparibhogaṃ nissāya ujjhāyamānā āgatā. Tāsaṃ kira evaṃ ahosi – ‘‘samaṇo gotamo bhikkhūnaṃ paṃsukūlacīvara-piṇḍiyālopa-rukkhamūlasenāsanapūtimuttabhesajjehi santosasseva pariyantakāritaṃ vaṇṇeti, sayaṃ pana pattuṇṇadukūla khomādīni paṇītacīvarāni dhāreti, rājārahaṃ uttamaṃ bhojanaṃ bhuñjati, devavimānakappāya gandhakuṭiyā varasayane sayati, sappinavanītādīni bhesajjāni paṭisevati, divasaṃ mahājanassa dhammaṃ deseti, vacanamassa aññato gacchati, kiriyā aññato’’ti ujjhāyamānā āgamiṃsu. Tena tāsaṃ dhammasaṅgāhakattherehi ‘‘ujjhānasaññikā’’ti nāmaṃ gahitaṃ.
অঞ্ঞথা সন্তন্তি অঞ্ঞেনাকারেন ভূতং। নিকচ্চাতি নিকতিযা ৰঞ্চনায, ৰঞ্চেত্ৰাতি অত্থো। কিতৰস্সেৰাতি কিতৰো ৰুচ্চতি সাকুণিকো। সো হি অগুম্বোৰ সমানো সাখপণ্ণাদিপটিচ্ছাদনেন গুম্বৰণ্ণং দস্সেত্ৰা উপগতে মোরতিত্তিরাদযো সকুণে মারেত্ৰা দারভরণং করোতি। ইতি তস্স কিতৰস্স ইমায ৰঞ্চনায এৰং ৰঞ্চেত্ৰা সকুণমংসভোজনং ৰিয কুহকস্সাপি পংসুকূলেন অত্তানং পটিচ্ছাদেত্ৰা কথাছেকতায মহাজনং ৰঞ্চেত্ৰা খাদমানস্স ৰিচরতো। ভুত্তং থেয্যেন তস্স তন্তি সব্বোপি তস্স চতুপচ্চযপরিভোগো থেয্যেন পরিভুত্তো নাম হোতীতি দেৰতা ভগৰন্তং সন্ধায ৰদতি। পরিজানন্তি পণ্ডিতাতি অযং কারকো ৰা অকারকো ৰাতি পণ্ডিতা জানন্তি। ইতি তা দেৰতা ‘‘তথাগতাপি মযমেৰ পণ্ডিতা’’তি মঞ্ঞমানা এৰমাহংসু।
Aññathā santanti aññenākārena bhūtaṃ. Nikaccāti nikatiyā vañcanāya, vañcetvāti attho. Kitavassevāti kitavo vuccati sākuṇiko. So hi agumbova samāno sākhapaṇṇādipaṭicchādanena gumbavaṇṇaṃ dassetvā upagate moratittirādayo sakuṇe māretvā dārabharaṇaṃ karoti. Iti tassa kitavassa imāya vañcanāya evaṃ vañcetvā sakuṇamaṃsabhojanaṃ viya kuhakassāpi paṃsukūlena attānaṃ paṭicchādetvā kathāchekatāya mahājanaṃ vañcetvā khādamānassa vicarato. Bhuttaṃ theyyena tassa tanti sabbopi tassa catupaccayaparibhogo theyyena paribhutto nāma hotīti devatā bhagavantaṃ sandhāya vadati. Parijānanti paṇḍitāti ayaṃ kārako vā akārako vāti paṇḍitā jānanti. Iti tā devatā ‘‘tathāgatāpi mayameva paṇḍitā’’ti maññamānā evamāhaṃsu.
অথ ভগৰা নযিদন্তিআদিমাহ। তত্থ যাযং পটিপদা দল়্হাতি অযং ধম্মানুধম্মপটিপদা দল়্হা থিরা। যায পটিপদায ধীরা পণ্ডিতা আরম্মণূপনিজ্ঝানেন লক্খণূপনিজ্ঝানেন চাতি দ্ৰীহি ঝানেহি ঝাযিনো মারবন্ধনা পমুচ্চন্তি, তং পটিপদং ভাসিতমত্তেন ৰা সৰনমত্তেন ৰা ওক্কমিতুং পটিপজ্জিতুং ন সক্কাতি অত্থো। ন ৰে ধীরা পকুব্বন্তীতি ধীরা পণ্ডিতা ৰিদিত্ৰা লোকপরিযাযং সঙ্খারলোকস্স উদযব্বযং ঞত্ৰা চতুসচ্চধম্মঞ্চ অঞ্ঞায কিলেসনিব্বানেন নিব্বুতা লোকে ৰিসত্তিকং তিণ্ণা এৰং ন কুব্বন্তি, মযং এৰরূপানি ন কথেমাতি অত্থো।
Atha bhagavā nayidantiādimāha. Tattha yāyaṃ paṭipadā daḷhāti ayaṃ dhammānudhammapaṭipadā daḷhā thirā. Yāya paṭipadāya dhīrā paṇḍitā ārammaṇūpanijjhānena lakkhaṇūpanijjhānena cāti dvīhi jhānehi jhāyino mārabandhanā pamuccanti, taṃ paṭipadaṃ bhāsitamattena vā savanamattena vā okkamituṃ paṭipajjituṃ na sakkāti attho. Na ve dhīrā pakubbantīti dhīrā paṇḍitā viditvā lokapariyāyaṃ saṅkhāralokassa udayabbayaṃ ñatvā catusaccadhammañca aññāya kilesanibbānena nibbutā loke visattikaṃ tiṇṇā evaṃ na kubbanti, mayaṃ evarūpāni na kathemāti attho.
পথৰিযং পতিট্ঠহিত্ৰাতি ‘‘অযুত্তং অম্হেহি কতং, অকারকমেৰ মযং কারকৰাদেন সমুদাচরিম্হা’’তি লজ্জমানা মহাব্রহ্মনি ৰিয ভগৰতি গারৰং পচ্চুপট্ঠপেত্ৰা অগ্গিক্খন্ধং ৰিয ভগৰন্তং দুরাসদং কত্ৰা পস্সমানা আকাসতো ওতরিত্ৰা ভূমিযং ঠত্ৰাতি অত্থো। অচ্চযোতি অপরাধো। নো, ভন্তে, অচ্চাগমাতি অম্হে অতিক্কম্ম অভিভৰিত্ৰা পৰত্তো। আসাদেতব্বন্তি ঘট্টযিতব্বং। তা কির দেৰতা ভগৰন্তং কাযেন ৰাচাযাতি দ্ৰীহিপি ঘট্টযিংসু। তথাগতং অৰন্দিত্ৰা আকাসে পতিট্ঠমানা কাযেন ঘট্টযিংসু, কিতৰোপমং আহরিত্ৰা নানপ্পকারকং অসব্ভিৰাদং ৰদমানা ৰাচায ঘট্টযিংসু। তস্মা আসাদেতব্বং অমঞ্ঞিম্হাতি আহংসু। পটিগ্গণ্হাতূতি খমতু। আযতিং সংৰরাযাতি অনাগতে সংৰরণত্থায, পুন এৰরূপস্স অপরাধস্স দোসস্স অকরণত্থায।
Pathaviyaṃ patiṭṭhahitvāti ‘‘ayuttaṃ amhehi kataṃ, akārakameva mayaṃ kārakavādena samudācarimhā’’ti lajjamānā mahābrahmani viya bhagavati gāravaṃ paccupaṭṭhapetvā aggikkhandhaṃ viya bhagavantaṃ durāsadaṃ katvā passamānā ākāsato otaritvā bhūmiyaṃ ṭhatvāti attho. Accayoti aparādho. No, bhante, accāgamāti amhe atikkamma abhibhavitvā pavatto. Āsādetabbanti ghaṭṭayitabbaṃ. Tā kira devatā bhagavantaṃ kāyena vācāyāti dvīhipi ghaṭṭayiṃsu. Tathāgataṃ avanditvā ākāse patiṭṭhamānā kāyena ghaṭṭayiṃsu, kitavopamaṃ āharitvā nānappakārakaṃ asabbhivādaṃ vadamānā vācāya ghaṭṭayiṃsu. Tasmā āsādetabbaṃ amaññimhāti āhaṃsu. Paṭiggaṇhātūti khamatu. Āyatiṃ saṃvarāyāti anāgate saṃvaraṇatthāya, puna evarūpassa aparādhassa dosassa akaraṇatthāya.
সিতং পাত্ৰাকাসীতি অগ্গদন্তে দস্সেন্তো পহট্ঠাকারং দস্সেসি। কস্মা? তা কির দেৰতা ন সভাৰেন খমাপেন্তি, লোকিযমহাজনঞ্চ সদেৰকে লোকে অগ্গপুগ্গলং তথাগতঞ্চ একসদিসং করোন্তি। অথ ভগৰা ‘‘পরতো কথায উপ্পন্নায বুদ্ধবলং দীপেত্ৰা পচ্ছা খমিস্সামী’’তি সিতং পাত্ৰাকাসি। ভিয্যোসো মত্তাযাতি অতিরেকপ্পমাণেন। ইমং গাথং অভাসীতি কুপিতো এস অম্হাকন্তি মঞ্ঞমানা অভাসি।
Sitaṃpātvākāsīti aggadante dassento pahaṭṭhākāraṃ dassesi. Kasmā? Tā kira devatā na sabhāvena khamāpenti, lokiyamahājanañca sadevake loke aggapuggalaṃ tathāgatañca ekasadisaṃ karonti. Atha bhagavā ‘‘parato kathāya uppannāya buddhabalaṃ dīpetvā pacchā khamissāmī’’ti sitaṃ pātvākāsi. Bhiyyoso mattāyāti atirekappamāṇena. Imaṃ gāthaṃ abhāsīti kupito esa amhākanti maññamānā abhāsi.
ন পটিগণ্হতীতি ন খমতি নাধিৰাসেতি। কোপন্তরোতি অব্ভন্তরে উপ্পন্নকোপো। দোসগরূতি দোসং গরুং কত্ৰা আদায ৰিহরন্তো। স ৰেরং পটিমুঞ্চতীতি সো এৰরূপো গণ্ঠিকং পটিমুঞ্চন্তো ৰিয তং ৰেরং অত্তনি পটিমুঞ্চতি ঠপেতি, ন পটিনিস্সজ্জতীতি অত্থো। অচ্চযো চে ন ৰিজ্জেথাতি সচে অচ্চাযিককম্মং ন ভৰেয্য। নো চিধাপগতং সিযাতি যদি অপরাধো নাম ন ভাৰেয্য। কেনীধ কুসলো সিযাতি যদি ৰেরানি ন সম্মেয্যুং, কেন কারণেন কুসলো ভৰেয্য।
Na paṭigaṇhatīti na khamati nādhivāseti. Kopantaroti abbhantare uppannakopo. Dosagarūti dosaṃ garuṃ katvā ādāya viharanto. Sa veraṃ paṭimuñcatīti so evarūpo gaṇṭhikaṃ paṭimuñcanto viya taṃ veraṃ attani paṭimuñcati ṭhapeti, na paṭinissajjatīti attho. Accayo ce na vijjethāti sace accāyikakammaṃ na bhaveyya. No cidhāpagataṃ siyāti yadi aparādho nāma na bhāveyya. Kenīdha kusalo siyāti yadi verāni na sammeyyuṃ, kena kāraṇena kusalo bhaveyya.
কস্সচ্চযাতি গাথায কস্স অতিক্কমো নত্থি? কস্স অপরাধো নত্থি? কো সম্মোহং নাপজ্জতি? কো নিচ্চমেৰ পণ্ডিতো নামাতি অত্থো? ইমং কির গাথং ভণাপনত্থং ভগৰতো সিতপাতুকম্মং। তস্মা ইদানি দেৰতানং বুদ্ধবলং দীপেত্ৰা খমিস্সামীতি তথাগতস্স বুদ্ধস্সাতিআদিমাহ। তত্থ তথাগতস্সাতি তথা আগতোতি এৰমাদীহি কারণেহি তথাগতস্স। বুদ্ধস্সাতি চতুন্নং সচ্চানং বুদ্ধত্তাদীহি কারণেহি ৰিমোক্খন্তিকপণ্ণত্তিৰসেন এৰং লদ্ধনামস্স। অচ্চযং দেসযন্তীনন্তি যং ৰুত্তং তুম্হেহি ‘‘অচ্চযং দেসযন্তীনং…পে॰… স ৰেরং পটিমুঞ্চতী’’তি, তং সাধু ৰুত্তং, অহং পন তং ৰেরং নাভিনন্দামি ন পত্থযামীতি অত্থো। পটিগ্গণ্হামি ৰোচ্চযন্তি তুম্হাকং অপরাধং খমামীতি। পঞ্চমং।
Kassaccayāti gāthāya kassa atikkamo natthi? Kassa aparādho natthi? Ko sammohaṃ nāpajjati? Ko niccameva paṇḍito nāmāti attho? Imaṃ kira gāthaṃ bhaṇāpanatthaṃ bhagavato sitapātukammaṃ. Tasmā idāni devatānaṃ buddhabalaṃ dīpetvā khamissāmīti tathāgatassa buddhassātiādimāha. Tattha tathāgatassāti tathā āgatoti evamādīhi kāraṇehi tathāgatassa. Buddhassāti catunnaṃ saccānaṃ buddhattādīhi kāraṇehi vimokkhantikapaṇṇattivasena evaṃ laddhanāmassa. Accayaṃ desayantīnanti yaṃ vuttaṃ tumhehi ‘‘accayaṃ desayantīnaṃ…pe… sa veraṃ paṭimuñcatī’’ti, taṃ sādhu vuttaṃ, ahaṃ pana taṃ veraṃ nābhinandāmi na patthayāmīti attho. Paṭiggaṇhāmi voccayanti tumhākaṃ aparādhaṃ khamāmīti. Pañcamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. উজ্ঝানসঞ্ঞিসুত্তং • 5. Ujjhānasaññisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. উজ্ঝানসঞ্ঞিসুত্তৰণ্ণনা • 5. Ujjhānasaññisuttavaṇṇanā
