| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. উজ্ঝানসঞ্ঞিসুত্তৰণ্ণনা
5. Ujjhānasaññisuttavaṇṇanā
৩৫. উজ্ঝানৰসেন পৰত্তা সঞ্ঞা এতেসং অত্থি, উজ্ঝানৰসেন ৰা সঞ্জানন্তীতি উজ্ঝানসঞ্ঞী। কারযেতি কতানং পরিযন্তং কারযেতি অত্থো। পরিযন্তকারিতন্তি পরিচ্ছিন্নকারিতং পরিমিতৰচনন্তি অত্থো। পংসুকূলাদিপটিপক্খনযেন পত্তুণ্ণদুকুলাদি ৰুত্তং। নামং গহিতন্তি এতেন ‘‘উজ্ঝানসঞ্ঞিকা’’তি এত্থ ক-সদ্দো সঞ্ঞাযন্তি দস্সেতি।
35. Ujjhānavasena pavattā saññā etesaṃ atthi, ujjhānavasena vā sañjānantīti ujjhānasaññī. Kārayeti katānaṃ pariyantaṃ kārayeti attho. Pariyantakāritanti paricchinnakāritaṃ parimitavacananti attho. Paṃsukūlādipaṭipakkhanayena pattuṇṇadukulādi vuttaṃ. Nāmaṃ gahitanti etena ‘‘ujjhānasaññikā’’ti ettha ka-saddo saññāyanti dasseti.
অঞ্ঞেনাকারেন ভূতন্তি অত্তনা পৰেদিযমানাকারতো অঞ্ঞেন অসুদ্ধেন আকারেন ৰিজ্জমানং উপলব্ভমানং অত্তানং। ৰঞ্চেত্ৰাতি পলম্ভেত্ৰা। তস্স কুহকস্স। তং চতুন্নং পচ্চযানং পরিভুঞ্জনং। পরিজানন্তীতি তস্স পটিপত্তিং পরিচ্ছিজ্জ জানন্তি। কারকোতি সম্মাপটিপত্তিযা কত্তা, সম্মাপটিপজ্জিতাতি অত্থো।
Aññenākārena bhūtanti attanā pavediyamānākārato aññena asuddhena ākārena vijjamānaṃ upalabbhamānaṃ attānaṃ. Vañcetvāti palambhetvā. Tassa kuhakassa. Taṃ catunnaṃ paccayānaṃ paribhuñjanaṃ. Parijānantīti tassa paṭipattiṃ paricchijja jānanti. Kārakoti sammāpaṭipattiyā kattā, sammāpaṭipajjitāti attho.
ইদন্তি লিঙ্গৰিপল্লাসেন ৰুত্তং, অযন্তি অত্থো। ধম্মানুধম্মপটিপদাতি নিব্বানধম্মস্স অনুচ্ছৰিকতায অনুধম্মভূতা পটিপদা। পটিপক্খৰিধমনে অসিথিলতায দল়্হা। ভাসিতমত্তেন চ সৰনমত্তেন চাতি এত্থ চ-সদ্দো ৰিসেসনিৰত্তিঅত্থো। তেন ভাসিতস্স সুতস্স চ সম্মাপটিপত্তিৰিসেসং নিৰত্তেতি। লোকপরিযাযন্তি লোকস্স পরিৰিধমনং উপ্পাদনিরোধৰসেন সঙ্খারানং পরাৰুত্তিং। তেনাহ ‘‘সঙ্খারলোকস্স উদযব্বয’’ন্তি। স্ৰাযমত্থো সচ্চপটিৰেধেনেৰ হোতীতি আহ ‘‘চতুসচ্চধম্মঞ্চ অঞ্ঞাযা’’তি । এৰং ন কুব্বন্তীতি অত্তনি ৰিজ্জমানম্পি গুণং অনাৰীকরোন্তো ‘‘যথা তুম্হে ৰদথ, এৰং ন কুব্বন্তী’’তি অৰিজ্জমানতং ব্যাকরোতীতি অত্থো।
Idanti liṅgavipallāsena vuttaṃ, ayanti attho. Dhammānudhammapaṭipadāti nibbānadhammassa anucchavikatāya anudhammabhūtā paṭipadā. Paṭipakkhavidhamane asithilatāya daḷhā. Bhāsitamattena ca savanamattena cāti ettha ca-saddo visesanivattiattho. Tena bhāsitassa sutassa ca sammāpaṭipattivisesaṃ nivatteti. Lokapariyāyanti lokassa parividhamanaṃ uppādanirodhavasena saṅkhārānaṃ parāvuttiṃ. Tenāha ‘‘saṅkhāralokassa udayabbaya’’nti. Svāyamattho saccapaṭivedheneva hotīti āha ‘‘catusaccadhammañca aññāyā’’ti . Evaṃ na kubbantīti attani vijjamānampi guṇaṃ anāvīkaronto ‘‘yathā tumhe vadatha, evaṃ na kubbantī’’ti avijjamānataṃ byākarotīti attho.
অকারকমেৰাতি দোসং অকারকমেৰ। অচ্চযস্স পটিগ্গণ্হনং নাম অধিৰাসনং, এৰং সো দেসকেন দেসিযমানো ততো ৰিগতো নাম হোতি। তেনাহ ‘‘পটিগ্গণ্হাতূতি খমতূ’’তি।
Akārakamevāti dosaṃ akārakameva. Accayassa paṭiggaṇhanaṃ nāma adhivāsanaṃ, evaṃ so desakena desiyamāno tato vigato nāma hoti. Tenāha ‘‘paṭiggaṇhātūti khamatū’’ti.
সভাৰেনাতি সভাৰতো। একসদিসন্তি পরেসং চিত্তাচারং জানন্তম্পি অজানন্তেহি সহ একসদিসং করোন্তা। পরতোতি পচ্ছা। কথায উপ্পন্নাযাতি ‘‘কস্সচ্চযা ন ৰিজ্জন্তী’’তিআদিকথায পৰত্তমানায ‘‘তথাগতস্স বুদ্ধস্সা’’তিআদিনা বুদ্ধবলং বুদ্ধানুভাৰং দীপেত্ৰা। খমিস্সামীতি অচ্চযদেসনং পটিগ্গণ্হিস্সামি। তপ্পটিগ্গহো হি ইধ খমনন্তি অধিপ্পেতং, সত্থা পন সব্বকালং খমো এৰ।
Sabhāvenāti sabhāvato. Ekasadisanti paresaṃ cittācāraṃ jānantampi ajānantehi saha ekasadisaṃ karontā. Paratoti pacchā. Kathāya uppannāyāti ‘‘kassaccayā na vijjantī’’tiādikathāya pavattamānāya ‘‘tathāgatassa buddhassā’’tiādinā buddhabalaṃ buddhānubhāvaṃ dīpetvā. Khamissāmīti accayadesanaṃ paṭiggaṇhissāmi. Tappaṭiggaho hi idha khamananti adhippetaṃ, satthā pana sabbakālaṃ khamo eva.
কোপো অন্তরে চিত্তে এতস্সাতি কোপন্তরো। দোসো গরু গরুকাতব্বো অস্সাতি দোসগরু। ‘‘পটিমুচ্চতী’’তি ৰা পাঠো, অযমেৰ অত্থো। অচ্চাযিককম্মন্তি সহসা অনুপধারেত্ৰা কিরিযা। নো চিধাতি নো চে ইধ। ইধাতি নিপাতমত্তং। অপগতং অপনীতং। দোসো নো চে সিযা, তেন পরিযাযেন যদি অপরাধো নাম ন ভৰেয্যাতি। ন সম্মেয্যুং ন ৰূপসমেয্যুং। কুসলোতি অনৰজ্জো।
Kopo antare citte etassāti kopantaro. Doso garu garukātabbo assāti dosagaru. ‘‘Paṭimuccatī’’ti vā pāṭho, ayameva attho. Accāyikakammanti sahasā anupadhāretvā kiriyā. No cidhāti no ce idha. Idhāti nipātamattaṃ. Apagataṃ apanītaṃ. Doso no ce siyā, tena pariyāyena yadi aparādho nāma na bhaveyyāti. Na sammeyyuṃ na vūpasameyyuṃ. Kusaloti anavajjo.
ধীরো সতোতি পদদ্ৰযেন ৰট্টছিন্দং আহ। কো নিচ্চমেৰ পণ্ডিতো নামাতি অত্থোতি ‘‘কস্সচ্চযা’’তিআদিকায পুচ্ছাগাথায অত্থো। দীঘমজ্ঝিমসংৰণ্ণনাসু তথাগত-সদ্দো ৰিত্থারতো সংৰণ্ণিতোতি আহ ‘‘এৰমাদীহি কারণেহি তথাগতস্সা’’তি। বুদ্ধত্তাদীহীতি আদি-সদ্দেন ‘‘বোধেতা পজাযা’’তিআদিনা (মহানি॰ ১৯২; চূল়নি॰ পারাযনত্থুতিগাথানিদ্দেস ৯৭) নিদ্দেসে আগতকারণানি সঙ্গয্হন্তি। ৰিমোক্খং ৰুচ্চতি অরিযমগ্গো, তস্স অন্তো অগ্গফলং, তত্থ ভৰা পণ্ণত্তি, তস্সা ৰসেন। এৰং বুদ্ধবলং দীপেতি। ইদানি খিত্তং সঙ্খেপেন সংহরাপিতং হোতীতি দস্সেতি।
Dhīro satoti padadvayena vaṭṭachindaṃ āha. Ko niccameva paṇḍito nāmāti atthoti ‘‘kassaccayā’’tiādikāya pucchāgāthāya attho. Dīghamajjhimasaṃvaṇṇanāsu tathāgata-saddo vitthārato saṃvaṇṇitoti āha ‘‘evamādīhi kāraṇehi tathāgatassā’’ti. Buddhattādīhīti ādi-saddena ‘‘bodhetā pajāyā’’tiādinā (mahāni. 192; cūḷani. pārāyanatthutigāthāniddesa 97) niddese āgatakāraṇāni saṅgayhanti. Vimokkhaṃ vuccati ariyamaggo, tassa anto aggaphalaṃ, tattha bhavā paṇṇatti, tassā vasena. Evaṃ buddhabalaṃ dīpeti. Idāni khittaṃ saṅkhepena saṃharāpitaṃ hotīti dasseti.
উজ্ঝানসঞ্ঞিসুত্তৰণ্ণনা নিট্ঠিতা।
Ujjhānasaññisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. উজ্ঝানসঞ্ঞিসুত্তং • 5. Ujjhānasaññisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. উজ্ঝানসঞ্ঞিসুত্তৰণ্ণনা • 5. Ujjhānasaññisuttavaṇṇanā
