| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੫. ਉਜ੍ਝਾਨਸਞ੍ਞਿਸੁਤ੍ਤવਣ੍ਣਨਾ
5. Ujjhānasaññisuttavaṇṇanā
੩੫. ਪਞ੍ਚਮੇ ਉਜ੍ਝਾਨਸਞ੍ਞਿਕਾਤਿ ਉਜ੍ਝਾਨਸਞ੍ਞੀ ਦੇવਲੋਕੋ ਨਾਮ ਪਾਟਿਯੇਕ੍ਕੋ ਨਤ੍ਥਿ, ਇਮਾ ਪਨ ਦੇવਤਾ ਤਥਾਗਤਸ੍ਸ ਚਤੁਪਚ੍ਚਯਪਰਿਭੋਗਂ ਨਿਸ੍ਸਾਯ ਉਜ੍ਝਾਯਮਾਨਾ ਆਗਤਾ। ਤਾਸਂ ਕਿਰ ਏવਂ ਅਹੋਸਿ – ‘‘ਸਮਣੋ ਗੋਤਮੋ ਭਿਕ੍ਖੂਨਂ ਪਂਸੁਕੂਲਚੀવਰ-ਪਿਣ੍ਡਿਯਾਲੋਪ-ਰੁਕ੍ਖਮੂਲਸੇਨਾਸਨਪੂਤਿਮੁਤ੍ਤਭੇਸਜ੍ਜੇਹਿ ਸਨ੍ਤੋਸਸ੍ਸੇવ ਪਰਿਯਨ੍ਤਕਾਰਿਤਂ વਣ੍ਣੇਤਿ, ਸਯਂ ਪਨ ਪਤ੍ਤੁਣ੍ਣਦੁਕੂਲ ਖੋਮਾਦੀਨਿ ਪਣੀਤਚੀવਰਾਨਿ ਧਾਰੇਤਿ, ਰਾਜਾਰਹਂ ਉਤ੍ਤਮਂ ਭੋਜਨਂ ਭੁਞ੍ਜਤਿ, ਦੇવવਿਮਾਨਕਪ੍ਪਾਯ ਗਨ੍ਧਕੁਟਿਯਾ વਰਸਯਨੇ ਸਯਤਿ, ਸਪ੍ਪਿਨવਨੀਤਾਦੀਨਿ ਭੇਸਜ੍ਜਾਨਿ ਪਟਿਸੇવਤਿ, ਦਿવਸਂ ਮਹਾਜਨਸ੍ਸ ਧਮ੍ਮਂ ਦੇਸੇਤਿ, વਚਨਮਸ੍ਸ ਅਞ੍ਞਤੋ ਗਚ੍ਛਤਿ, ਕਿਰਿਯਾ ਅਞ੍ਞਤੋ’’ਤਿ ਉਜ੍ਝਾਯਮਾਨਾ ਆਗਮਿਂਸੁ। ਤੇਨ ਤਾਸਂ ਧਮ੍ਮਸਙ੍ਗਾਹਕਤ੍ਥੇਰੇਹਿ ‘‘ਉਜ੍ਝਾਨਸਞ੍ਞਿਕਾ’’ਤਿ ਨਾਮਂ ਗਹਿਤਂ।
35. Pañcame ujjhānasaññikāti ujjhānasaññī devaloko nāma pāṭiyekko natthi, imā pana devatā tathāgatassa catupaccayaparibhogaṃ nissāya ujjhāyamānā āgatā. Tāsaṃ kira evaṃ ahosi – ‘‘samaṇo gotamo bhikkhūnaṃ paṃsukūlacīvara-piṇḍiyālopa-rukkhamūlasenāsanapūtimuttabhesajjehi santosasseva pariyantakāritaṃ vaṇṇeti, sayaṃ pana pattuṇṇadukūla khomādīni paṇītacīvarāni dhāreti, rājārahaṃ uttamaṃ bhojanaṃ bhuñjati, devavimānakappāya gandhakuṭiyā varasayane sayati, sappinavanītādīni bhesajjāni paṭisevati, divasaṃ mahājanassa dhammaṃ deseti, vacanamassa aññato gacchati, kiriyā aññato’’ti ujjhāyamānā āgamiṃsu. Tena tāsaṃ dhammasaṅgāhakattherehi ‘‘ujjhānasaññikā’’ti nāmaṃ gahitaṃ.
ਅਞ੍ਞਥਾ ਸਨ੍ਤਨ੍ਤਿ ਅਞ੍ਞੇਨਾਕਾਰੇਨ ਭੂਤਂ। ਨਿਕਚ੍ਚਾਤਿ ਨਿਕਤਿਯਾ વਞ੍ਚਨਾਯ, વਞ੍ਚੇਤ੍વਾਤਿ ਅਤ੍ਥੋ। ਕਿਤવਸ੍ਸੇવਾਤਿ ਕਿਤવੋ વੁਚ੍ਚਤਿ ਸਾਕੁਣਿਕੋ। ਸੋ ਹਿ ਅਗੁਮ੍ਬੋવ ਸਮਾਨੋ ਸਾਖਪਣ੍ਣਾਦਿਪਟਿਚ੍ਛਾਦਨੇਨ ਗੁਮ੍ਬવਣ੍ਣਂ ਦਸ੍ਸੇਤ੍વਾ ਉਪਗਤੇ ਮੋਰਤਿਤ੍ਤਿਰਾਦਯੋ ਸਕੁਣੇ ਮਾਰੇਤ੍વਾ ਦਾਰਭਰਣਂ ਕਰੋਤਿ। ਇਤਿ ਤਸ੍ਸ ਕਿਤવਸ੍ਸ ਇਮਾਯ વਞ੍ਚਨਾਯ ਏવਂ વਞ੍ਚੇਤ੍વਾ ਸਕੁਣਮਂਸਭੋਜਨਂ વਿਯ ਕੁਹਕਸ੍ਸਾਪਿ ਪਂਸੁਕੂਲੇਨ ਅਤ੍ਤਾਨਂ ਪਟਿਚ੍ਛਾਦੇਤ੍વਾ ਕਥਾਛੇਕਤਾਯ ਮਹਾਜਨਂ વਞ੍ਚੇਤ੍વਾ ਖਾਦਮਾਨਸ੍ਸ વਿਚਰਤੋ। ਭੁਤ੍ਤਂ ਥੇਯ੍ਯੇਨ ਤਸ੍ਸ ਤਨ੍ਤਿ ਸਬ੍ਬੋਪਿ ਤਸ੍ਸ ਚਤੁਪਚ੍ਚਯਪਰਿਭੋਗੋ ਥੇਯ੍ਯੇਨ ਪਰਿਭੁਤ੍ਤੋ ਨਾਮ ਹੋਤੀਤਿ ਦੇવਤਾ ਭਗવਨ੍ਤਂ ਸਨ੍ਧਾਯ વਦਤਿ। ਪਰਿਜਾਨਨ੍ਤਿ ਪਣ੍ਡਿਤਾਤਿ ਅਯਂ ਕਾਰਕੋ વਾ ਅਕਾਰਕੋ વਾਤਿ ਪਣ੍ਡਿਤਾ ਜਾਨਨ੍ਤਿ। ਇਤਿ ਤਾ ਦੇવਤਾ ‘‘ਤਥਾਗਤਾਪਿ ਮਯਮੇવ ਪਣ੍ਡਿਤਾ’’ਤਿ ਮਞ੍ਞਮਾਨਾ ਏવਮਾਹਂਸੁ।
Aññathā santanti aññenākārena bhūtaṃ. Nikaccāti nikatiyā vañcanāya, vañcetvāti attho. Kitavassevāti kitavo vuccati sākuṇiko. So hi agumbova samāno sākhapaṇṇādipaṭicchādanena gumbavaṇṇaṃ dassetvā upagate moratittirādayo sakuṇe māretvā dārabharaṇaṃ karoti. Iti tassa kitavassa imāya vañcanāya evaṃ vañcetvā sakuṇamaṃsabhojanaṃ viya kuhakassāpi paṃsukūlena attānaṃ paṭicchādetvā kathāchekatāya mahājanaṃ vañcetvā khādamānassa vicarato. Bhuttaṃ theyyena tassa tanti sabbopi tassa catupaccayaparibhogo theyyena paribhutto nāma hotīti devatā bhagavantaṃ sandhāya vadati. Parijānanti paṇḍitāti ayaṃ kārako vā akārako vāti paṇḍitā jānanti. Iti tā devatā ‘‘tathāgatāpi mayameva paṇḍitā’’ti maññamānā evamāhaṃsu.
ਅਥ ਭਗવਾ ਨਯਿਦਨ੍ਤਿਆਦਿਮਾਹ। ਤਤ੍ਥ ਯਾਯਂ ਪਟਿਪਦਾ ਦਲ਼੍ਹਾਤਿ ਅਯਂ ਧਮ੍ਮਾਨੁਧਮ੍ਮਪਟਿਪਦਾ ਦਲ਼੍ਹਾ ਥਿਰਾ। ਯਾਯ ਪਟਿਪਦਾਯ ਧੀਰਾ ਪਣ੍ਡਿਤਾ ਆਰਮ੍ਮਣੂਪਨਿਜ੍ਝਾਨੇਨ ਲਕ੍ਖਣੂਪਨਿਜ੍ਝਾਨੇਨ ਚਾਤਿ ਦ੍વੀਹਿ ਝਾਨੇਹਿ ਝਾਯਿਨੋ ਮਾਰਬਨ੍ਧਨਾ ਪਮੁਚ੍ਚਨ੍ਤਿ, ਤਂ ਪਟਿਪਦਂ ਭਾਸਿਤਮਤ੍ਤੇਨ વਾ ਸવਨਮਤ੍ਤੇਨ વਾ ਓਕ੍ਕਮਿਤੁਂ ਪਟਿਪਜ੍ਜਿਤੁਂ ਨ ਸਕ੍ਕਾਤਿ ਅਤ੍ਥੋ। ਨ વੇ ਧੀਰਾ ਪਕੁਬ੍ਬਨ੍ਤੀਤਿ ਧੀਰਾ ਪਣ੍ਡਿਤਾ વਿਦਿਤ੍વਾ ਲੋਕਪਰਿਯਾਯਂ ਸਙ੍ਖਾਰਲੋਕਸ੍ਸ ਉਦਯਬ੍ਬਯਂ ਞਤ੍વਾ ਚਤੁਸਚ੍ਚਧਮ੍ਮਞ੍ਚ ਅਞ੍ਞਾਯ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ ਲੋਕੇ વਿਸਤ੍ਤਿਕਂ ਤਿਣ੍ਣਾ ਏવਂ ਨ ਕੁਬ੍ਬਨ੍ਤਿ, ਮਯਂ ਏવਰੂਪਾਨਿ ਨ ਕਥੇਮਾਤਿ ਅਤ੍ਥੋ।
Atha bhagavā nayidantiādimāha. Tattha yāyaṃ paṭipadā daḷhāti ayaṃ dhammānudhammapaṭipadā daḷhā thirā. Yāya paṭipadāya dhīrā paṇḍitā ārammaṇūpanijjhānena lakkhaṇūpanijjhānena cāti dvīhi jhānehi jhāyino mārabandhanā pamuccanti, taṃ paṭipadaṃ bhāsitamattena vā savanamattena vā okkamituṃ paṭipajjituṃ na sakkāti attho. Na ve dhīrā pakubbantīti dhīrā paṇḍitā viditvā lokapariyāyaṃ saṅkhāralokassa udayabbayaṃ ñatvā catusaccadhammañca aññāya kilesanibbānena nibbutā loke visattikaṃ tiṇṇā evaṃ na kubbanti, mayaṃ evarūpāni na kathemāti attho.
ਪਥવਿਯਂ ਪਤਿਟ੍ਠਹਿਤ੍વਾਤਿ ‘‘ਅਯੁਤ੍ਤਂ ਅਮ੍ਹੇਹਿ ਕਤਂ, ਅਕਾਰਕਮੇવ ਮਯਂ ਕਾਰਕવਾਦੇਨ ਸਮੁਦਾਚਰਿਮ੍ਹਾ’’ਤਿ ਲਜ੍ਜਮਾਨਾ ਮਹਾਬ੍ਰਹ੍ਮਨਿ વਿਯ ਭਗવਤਿ ਗਾਰવਂ ਪਚ੍ਚੁਪਟ੍ਠਪੇਤ੍વਾ ਅਗ੍ਗਿਕ੍ਖਨ੍ਧਂ વਿਯ ਭਗવਨ੍ਤਂ ਦੁਰਾਸਦਂ ਕਤ੍વਾ ਪਸ੍ਸਮਾਨਾ ਆਕਾਸਤੋ ਓਤਰਿਤ੍વਾ ਭੂਮਿਯਂ ਠਤ੍વਾਤਿ ਅਤ੍ਥੋ। ਅਚ੍ਚਯੋਤਿ ਅਪਰਾਧੋ। ਨੋ, ਭਨ੍ਤੇ, ਅਚ੍ਚਾਗਮਾਤਿ ਅਮ੍ਹੇ ਅਤਿਕ੍ਕਮ੍ਮ ਅਭਿਭવਿਤ੍વਾ ਪવਤ੍ਤੋ। ਆਸਾਦੇਤਬ੍ਬਨ੍ਤਿ ਘਟ੍ਟਯਿਤਬ੍ਬਂ। ਤਾ ਕਿਰ ਦੇવਤਾ ਭਗવਨ੍ਤਂ ਕਾਯੇਨ વਾਚਾਯਾਤਿ ਦ੍વੀਹਿਪਿ ਘਟ੍ਟਯਿਂਸੁ। ਤਥਾਗਤਂ ਅવਨ੍ਦਿਤ੍વਾ ਆਕਾਸੇ ਪਤਿਟ੍ਠਮਾਨਾ ਕਾਯੇਨ ਘਟ੍ਟਯਿਂਸੁ, ਕਿਤવੋਪਮਂ ਆਹਰਿਤ੍વਾ ਨਾਨਪ੍ਪਕਾਰਕਂ ਅਸਬ੍ਭਿવਾਦਂ વਦਮਾਨਾ વਾਚਾਯ ਘਟ੍ਟਯਿਂਸੁ। ਤਸ੍ਮਾ ਆਸਾਦੇਤਬ੍ਬਂ ਅਮਞ੍ਞਿਮ੍ਹਾਤਿ ਆਹਂਸੁ। ਪਟਿਗ੍ਗਣ੍ਹਾਤੂਤਿ ਖਮਤੁ। ਆਯਤਿਂ ਸਂવਰਾਯਾਤਿ ਅਨਾਗਤੇ ਸਂવਰਣਤ੍ਥਾਯ, ਪੁਨ ਏવਰੂਪਸ੍ਸ ਅਪਰਾਧਸ੍ਸ ਦੋਸਸ੍ਸ ਅਕਰਣਤ੍ਥਾਯ।
Pathaviyaṃ patiṭṭhahitvāti ‘‘ayuttaṃ amhehi kataṃ, akārakameva mayaṃ kārakavādena samudācarimhā’’ti lajjamānā mahābrahmani viya bhagavati gāravaṃ paccupaṭṭhapetvā aggikkhandhaṃ viya bhagavantaṃ durāsadaṃ katvā passamānā ākāsato otaritvā bhūmiyaṃ ṭhatvāti attho. Accayoti aparādho. No, bhante, accāgamāti amhe atikkamma abhibhavitvā pavatto. Āsādetabbanti ghaṭṭayitabbaṃ. Tā kira devatā bhagavantaṃ kāyena vācāyāti dvīhipi ghaṭṭayiṃsu. Tathāgataṃ avanditvā ākāse patiṭṭhamānā kāyena ghaṭṭayiṃsu, kitavopamaṃ āharitvā nānappakārakaṃ asabbhivādaṃ vadamānā vācāya ghaṭṭayiṃsu. Tasmā āsādetabbaṃ amaññimhāti āhaṃsu. Paṭiggaṇhātūti khamatu. Āyatiṃ saṃvarāyāti anāgate saṃvaraṇatthāya, puna evarūpassa aparādhassa dosassa akaraṇatthāya.
ਸਿਤਂ ਪਾਤ੍વਾਕਾਸੀਤਿ ਅਗ੍ਗਦਨ੍ਤੇ ਦਸ੍ਸੇਨ੍ਤੋ ਪਹਟ੍ਠਾਕਾਰਂ ਦਸ੍ਸੇਸਿ। ਕਸ੍ਮਾ? ਤਾ ਕਿਰ ਦੇવਤਾ ਨ ਸਭਾવੇਨ ਖਮਾਪੇਨ੍ਤਿ, ਲੋਕਿਯਮਹਾਜਨਞ੍ਚ ਸਦੇવਕੇ ਲੋਕੇ ਅਗ੍ਗਪੁਗ੍ਗਲਂ ਤਥਾਗਤਞ੍ਚ ਏਕਸਦਿਸਂ ਕਰੋਨ੍ਤਿ। ਅਥ ਭਗવਾ ‘‘ਪਰਤੋ ਕਥਾਯ ਉਪ੍ਪਨ੍ਨਾਯ ਬੁਦ੍ਧਬਲਂ ਦੀਪੇਤ੍વਾ ਪਚ੍ਛਾ ਖਮਿਸ੍ਸਾਮੀ’’ਤਿ ਸਿਤਂ ਪਾਤ੍વਾਕਾਸਿ। ਭਿਯ੍ਯੋਸੋ ਮਤ੍ਤਾਯਾਤਿ ਅਤਿਰੇਕਪ੍ਪਮਾਣੇਨ। ਇਮਂ ਗਾਥਂ ਅਭਾਸੀਤਿ ਕੁਪਿਤੋ ਏਸ ਅਮ੍ਹਾਕਨ੍ਤਿ ਮਞ੍ਞਮਾਨਾ ਅਭਾਸਿ।
Sitaṃpātvākāsīti aggadante dassento pahaṭṭhākāraṃ dassesi. Kasmā? Tā kira devatā na sabhāvena khamāpenti, lokiyamahājanañca sadevake loke aggapuggalaṃ tathāgatañca ekasadisaṃ karonti. Atha bhagavā ‘‘parato kathāya uppannāya buddhabalaṃ dīpetvā pacchā khamissāmī’’ti sitaṃ pātvākāsi. Bhiyyoso mattāyāti atirekappamāṇena. Imaṃ gāthaṃ abhāsīti kupito esa amhākanti maññamānā abhāsi.
ਨ ਪਟਿਗਣ੍ਹਤੀਤਿ ਨ ਖਮਤਿ ਨਾਧਿવਾਸੇਤਿ। ਕੋਪਨ੍ਤਰੋਤਿ ਅਬ੍ਭਨ੍ਤਰੇ ਉਪ੍ਪਨ੍ਨਕੋਪੋ। ਦੋਸਗਰੂਤਿ ਦੋਸਂ ਗਰੁਂ ਕਤ੍વਾ ਆਦਾਯ વਿਹਰਨ੍ਤੋ। ਸ વੇਰਂ ਪਟਿਮੁਞ੍ਚਤੀਤਿ ਸੋ ਏવਰੂਪੋ ਗਣ੍ਠਿਕਂ ਪਟਿਮੁਞ੍ਚਨ੍ਤੋ વਿਯ ਤਂ વੇਰਂ ਅਤ੍ਤਨਿ ਪਟਿਮੁਞ੍ਚਤਿ ਠਪੇਤਿ, ਨ ਪਟਿਨਿਸ੍ਸਜ੍ਜਤੀਤਿ ਅਤ੍ਥੋ। ਅਚ੍ਚਯੋ ਚੇ ਨ વਿਜ੍ਜੇਥਾਤਿ ਸਚੇ ਅਚ੍ਚਾਯਿਕਕਮ੍ਮਂ ਨ ਭવੇਯ੍ਯ। ਨੋ ਚਿਧਾਪਗਤਂ ਸਿਯਾਤਿ ਯਦਿ ਅਪਰਾਧੋ ਨਾਮ ਨ ਭਾવੇਯ੍ਯ। ਕੇਨੀਧ ਕੁਸਲੋ ਸਿਯਾਤਿ ਯਦਿ વੇਰਾਨਿ ਨ ਸਮ੍ਮੇਯ੍ਯੁਂ, ਕੇਨ ਕਾਰਣੇਨ ਕੁਸਲੋ ਭવੇਯ੍ਯ।
Na paṭigaṇhatīti na khamati nādhivāseti. Kopantaroti abbhantare uppannakopo. Dosagarūti dosaṃ garuṃ katvā ādāya viharanto. Sa veraṃ paṭimuñcatīti so evarūpo gaṇṭhikaṃ paṭimuñcanto viya taṃ veraṃ attani paṭimuñcati ṭhapeti, na paṭinissajjatīti attho. Accayo ce na vijjethāti sace accāyikakammaṃ na bhaveyya. No cidhāpagataṃ siyāti yadi aparādho nāma na bhāveyya. Kenīdha kusalo siyāti yadi verāni na sammeyyuṃ, kena kāraṇena kusalo bhaveyya.
ਕਸ੍ਸਚ੍ਚਯਾਤਿ ਗਾਥਾਯ ਕਸ੍ਸ ਅਤਿਕ੍ਕਮੋ ਨਤ੍ਥਿ? ਕਸ੍ਸ ਅਪਰਾਧੋ ਨਤ੍ਥਿ? ਕੋ ਸਮ੍ਮੋਹਂ ਨਾਪਜ੍ਜਤਿ? ਕੋ ਨਿਚ੍ਚਮੇવ ਪਣ੍ਡਿਤੋ ਨਾਮਾਤਿ ਅਤ੍ਥੋ? ਇਮਂ ਕਿਰ ਗਾਥਂ ਭਣਾਪਨਤ੍ਥਂ ਭਗવਤੋ ਸਿਤਪਾਤੁਕਮ੍ਮਂ। ਤਸ੍ਮਾ ਇਦਾਨਿ ਦੇવਤਾਨਂ ਬੁਦ੍ਧਬਲਂ ਦੀਪੇਤ੍વਾ ਖਮਿਸ੍ਸਾਮੀਤਿ ਤਥਾਗਤਸ੍ਸ ਬੁਦ੍ਧਸ੍ਸਾਤਿਆਦਿਮਾਹ। ਤਤ੍ਥ ਤਥਾਗਤਸ੍ਸਾਤਿ ਤਥਾ ਆਗਤੋਤਿ ਏવਮਾਦੀਹਿ ਕਾਰਣੇਹਿ ਤਥਾਗਤਸ੍ਸ। ਬੁਦ੍ਧਸ੍ਸਾਤਿ ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾਦੀਹਿ ਕਾਰਣੇਹਿ વਿਮੋਕ੍ਖਨ੍ਤਿਕਪਣ੍ਣਤ੍ਤਿવਸੇਨ ਏવਂ ਲਦ੍ਧਨਾਮਸ੍ਸ। ਅਚ੍ਚਯਂ ਦੇਸਯਨ੍ਤੀਨਨ੍ਤਿ ਯਂ વੁਤ੍ਤਂ ਤੁਮ੍ਹੇਹਿ ‘‘ਅਚ੍ਚਯਂ ਦੇਸਯਨ੍ਤੀਨਂ…ਪੇ॰… ਸ વੇਰਂ ਪਟਿਮੁਞ੍ਚਤੀ’’ਤਿ, ਤਂ ਸਾਧੁ વੁਤ੍ਤਂ, ਅਹਂ ਪਨ ਤਂ વੇਰਂ ਨਾਭਿਨਨ੍ਦਾਮਿ ਨ ਪਤ੍ਥਯਾਮੀਤਿ ਅਤ੍ਥੋ। ਪਟਿਗ੍ਗਣ੍ਹਾਮਿ વੋਚ੍ਚਯਨ੍ਤਿ ਤੁਮ੍ਹਾਕਂ ਅਪਰਾਧਂ ਖਮਾਮੀਤਿ। ਪਞ੍ਚਮਂ।
Kassaccayāti gāthāya kassa atikkamo natthi? Kassa aparādho natthi? Ko sammohaṃ nāpajjati? Ko niccameva paṇḍito nāmāti attho? Imaṃ kira gāthaṃ bhaṇāpanatthaṃ bhagavato sitapātukammaṃ. Tasmā idāni devatānaṃ buddhabalaṃ dīpetvā khamissāmīti tathāgatassa buddhassātiādimāha. Tattha tathāgatassāti tathā āgatoti evamādīhi kāraṇehi tathāgatassa. Buddhassāti catunnaṃ saccānaṃ buddhattādīhi kāraṇehi vimokkhantikapaṇṇattivasena evaṃ laddhanāmassa. Accayaṃ desayantīnanti yaṃ vuttaṃ tumhehi ‘‘accayaṃ desayantīnaṃ…pe… sa veraṃ paṭimuñcatī’’ti, taṃ sādhu vuttaṃ, ahaṃ pana taṃ veraṃ nābhinandāmi na patthayāmīti attho. Paṭiggaṇhāmi voccayanti tumhākaṃ aparādhaṃ khamāmīti. Pañcamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਉਜ੍ਝਾਨਸਞ੍ਞਿਸੁਤ੍ਤਂ • 5. Ujjhānasaññisuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੫. ਉਜ੍ਝਾਨਸਞ੍ਞਿਸੁਤ੍ਤવਣ੍ਣਨਾ • 5. Ujjhānasaññisuttavaṇṇanā
