| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
3. உஜ்ஜா²பனகஸிக்கா²பத³ங்
3. Ujjhāpanakasikkhāpadaṃ
103. ததியே பி⁴க்கூ² உஜ்ஜா²பெந்தீதி எத்த² ‘‘பி⁴க்கூ²’’தி காரிதகம்மத்தா கரணத்தே² உபயோக³வசனந்தி ஆஹ ‘‘தேஹி பி⁴க்கூ²ஹீ’’தி. ஓகாரவிபரீதோ உகாரோதி ச ஜே²ஸத்³தோ³ ஞாணத்தோ²தி ச த³ஸ்ஸெந்தோ ஆஹ ‘‘அவஜானாபெந்தீ’’தி. ‘‘தங் ஆயஸ்மந்த’’ந்தி பத³ங் ‘‘அவஜானாபெந்தீ’’தி பதே³ தா⁴துகம்மங். அனேகத்த²த்தா தா⁴தூனங் ஜே²ஸத்³தோ³ ஓலோகனத்தோ² ச சிந்தனத்தோ² ச ஹோதி, தேனாஹ ‘‘ஓலோகாபெந்தீ’’திஆதி³. எத்தா²தி ‘‘பி⁴க்கூ² உஜ்ஜா²பெந்தீ’’தி பதே³. ச²ந்தா³யாதி ச²ந்த³த்த²ங். யேஸங் ஸேனாஸனானி ச பஞ்ஞபேதி, ப⁴த்தானி ச உத்³தி³ஸதி, தேஸங் அத்தனி பேமத்த²ந்தி அத்தோ². அட்ட²கதா²யங் பன ‘‘ச²ந்தா³யாதி ச²ந்தே³னா’’தி வுத்தங். இமினா லிங்க³விபல்லாஸனயோ வுத்தோ. பரேஸங் அத்தனோ பேமேனாதி அத்தோ². பக்க²பாதேனாதி அத்தனோ பக்கே² பாதாபனேன.
103. Tatiye bhikkhū ujjhāpentīti ettha ‘‘bhikkhū’’ti kāritakammattā karaṇatthe upayogavacananti āha ‘‘tehi bhikkhūhī’’ti. Okāraviparīto ukāroti ca jhesaddo ñāṇatthoti ca dassento āha ‘‘avajānāpentī’’ti. ‘‘Taṃ āyasmanta’’nti padaṃ ‘‘avajānāpentī’’ti pade dhātukammaṃ. Anekatthattā dhātūnaṃ jhesaddo olokanattho ca cintanattho ca hoti, tenāha ‘‘olokāpentī’’tiādi. Etthāti ‘‘bhikkhū ujjhāpentī’’ti pade. Chandāyāti chandatthaṃ. Yesaṃ senāsanāni ca paññapeti, bhattāni ca uddisati, tesaṃ attani pematthanti attho. Aṭṭhakathāyaṃ pana ‘‘chandāyāti chandenā’’ti vuttaṃ. Iminā liṅgavipallāsanayo vutto. Paresaṃ attano pemenāti attho. Pakkhapātenāti attano pakkhe pātāpanena.
105. உஜ்ஜா²பெந்தி அனேனாதி உஜ்ஜா²பனகங். கி²ய்யந்தி அனேனாதி கி²ய்யனகந்தி த³ஸ்ஸெந்தோ ஆஹ ‘‘யேன வசனேனா’’திஆதி³.
105. Ujjhāpenti anenāti ujjhāpanakaṃ. Khiyyanti anenāti khiyyanakanti dassento āha ‘‘yena vacanenā’’tiādi.
106. உபஸம்பன்னங் ஸங்கே⁴ன ஸம்மதங் மங்குகத்துகாமோதி ஸம்ப³ந்த⁴ங் த³ஸ்ஸெந்தோ ஆஹ ‘‘உபஸம்பன்னங் ஸங்கே⁴ன ஸம்மத’’ந்திஆதி³. ஸம்ப³ஜ்ஜ²னங் ஸம்ப³ந்தோ⁴, காதப்³போ³தி யோஜனா. உபஸம்பன்னஸ்ஸ ஸங்கே⁴ன ஸம்மதஸ்ஸ அவண்ணங் கத்துகாமோ அயஸங் கத்துகாமோதி விப⁴த்திவிபரிணாமேன ஸம்ப³ந்த⁴ங் த³ஸ்ஸெந்தோ ஆஹ ‘‘விப⁴த்திவிபரிணாமோ காதப்³போ³’’தி. ‘‘வஸேனா’’தி பத³ங் விப⁴த்திவிபரிணாமோ காதப்³போ³’’தி பதே³ விஸேஸனங். யஸ்மா விஸேஸோ நத்தி², தஸ்மா கதந்தி யோஜனா. தந்தி ‘‘கி²ய்யனக’’ந்தி பத³ங். ஸோ ச பி⁴க்கூ²தி உஜ்ஜா²பனகோ ச கி²ய்யனகோ ச ஸோ ச பி⁴க்கு². அதா²தி தஸ்மா உஜ்ஜா²பனககி²ய்யனககரத்தா. அஸ்ஸாதி பி⁴க்கு²னோ. அஸ்ஸாதி ப⁴வெய்ய.
106. Upasampannaṃ saṅghena sammataṃ maṅkukattukāmoti sambandhaṃ dassento āha ‘‘upasampannaṃ saṅghena sammata’’ntiādi. Sambajjhanaṃ sambandho, kātabboti yojanā. Upasampannassa saṅghena sammatassa avaṇṇaṃ kattukāmo ayasaṃ kattukāmoti vibhattivipariṇāmena sambandhaṃ dassento āha ‘‘vibhattivipariṇāmo kātabbo’’ti. ‘‘Vasenā’’ti padaṃ vibhattivipariṇāmo kātabbo’’ti pade visesanaṃ. Yasmā viseso natthi, tasmā katanti yojanā. Tanti ‘‘khiyyanaka’’nti padaṃ. So ca bhikkhūti ujjhāpanako ca khiyyanako ca so ca bhikkhu. Athāti tasmā ujjhāpanakakhiyyanakakarattā. Assāti bhikkhuno. Assāti bhaveyya.
‘‘உபஸம்பன்ன’’ந்தி பத³ங் ‘‘உஜ்ஜா²பேதீ’’தி பதே³ தா⁴துகம்மங் ‘‘அனுபஸம்பன்ன’’ந்தி பத³ங் காரிதகம்மங், ‘‘அனுபஸம்பன்ன’’ந்தி பத³ங் ‘‘உஜ்ஜா²பேதீ’’தி காரிதகிரியங் அபெக்கி²த்வா கம்மங் ஹோதி. ‘‘கி²ய்யதீ’’தி ஸுத்³த⁴கிரியாய அபெக்கா²ய விப⁴த்திவிபல்லாஸோ ஹோதீதி ஆஹ ‘‘தஸ்ஸ வா’’திஆதி³. தஸ்ஸாதி அனுபஸம்பன்னஸ்ஸ ஸந்திகேதி ஸம்ப³ந்தோ⁴. தந்தி ஸங்கே⁴ன ஸம்மதங் உபஸம்பன்னங். ‘‘ஸங்கே⁴ன அஸம்மத’’ந்தி எத்த² ந அபலோகனகம்மேன அஸம்மதங், கம்மவாசாய பன அஸம்மதந்தி ஆஹ ‘‘கம்மவாசாயா’’திஆதி³. த்³வே தயோ ஹுத்வா கம்மவாசாய ஸம்மனிதுமஸக்குணெய்யத்தா அஸம்மதந்தி ச த³ஸ்ஸெந்தோ ஆஹ ‘‘யத்ரா’’திஆதி³. யத்ராதி யஸ்மிங் விஹாரே. ‘‘அனுபஸம்பன்னங் ஸங்கே⁴ன ஸம்மத’’ந்தி எத்த² அனுபஸம்பன்னஸ்ஸ ஸம்முதியோ தா³துமஸக்குணெய்யத்தா புப்³ப³வோஹாரவஸேன ஸம்மதந்தி வுத்தந்தி த³ஸ்ஸெந்தோ ஆஹ ‘‘கிஞ்சாபீ’’திஆதி³. தந்தி அனுபஸம்பன்னபா⁴வே டி²தங். ப்³யத்தஸ்ஸாதி வியத்தஸ்ஸ. ஸங்கே⁴ன வா கதோதி யோஜனாதி. ததியங்.
‘‘Upasampanna’’nti padaṃ ‘‘ujjhāpetī’’ti pade dhātukammaṃ ‘‘anupasampanna’’nti padaṃ kāritakammaṃ, ‘‘anupasampanna’’nti padaṃ ‘‘ujjhāpetī’’ti kāritakiriyaṃ apekkhitvā kammaṃ hoti. ‘‘Khiyyatī’’ti suddhakiriyāya apekkhāya vibhattivipallāso hotīti āha ‘‘tassa vā’’tiādi. Tassāti anupasampannassa santiketi sambandho. Tanti saṅghena sammataṃ upasampannaṃ. ‘‘Saṅghena asammata’’nti ettha na apalokanakammena asammataṃ, kammavācāya pana asammatanti āha ‘‘kammavācāyā’’tiādi. Dve tayo hutvā kammavācāya sammanitumasakkuṇeyyattā asammatanti ca dassento āha ‘‘yatrā’’tiādi. Yatrāti yasmiṃ vihāre. ‘‘Anupasampannaṃ saṅghena sammata’’nti ettha anupasampannassa sammutiyo dātumasakkuṇeyyattā pubbavohāravasena sammatanti vuttanti dassento āha ‘‘kiñcāpī’’tiādi. Tanti anupasampannabhāve ṭhitaṃ. Byattassāti viyattassa. Saṅghena vā katoti yojanāti. Tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
