| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. உஜ்ஜா²பனகஸிக்கா²பத³வண்ணனா
3. Ujjhāpanakasikkhāpadavaṇṇanā
103. ததியஸிக்கா²பதே³ – த³ப்³ப³ங் மல்லபுத்தங் பி⁴க்கூ² உஜ்ஜா²பெந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா தங் ஆயஸ்மந்தங் தேஹி பி⁴க்கூ²ஹி அவஜானாபெந்தி, அவஞ்ஞாய ஓலோகாபெந்தி, லாமகதோ வா சிந்தாபெந்தீ’’தி அத்தோ². லக்க²ணங் பனெத்த² ஸத்³த³ஸத்தா²னுஸாரேன வேதி³தப்³ப³ங். ஒஜ்ஜா²பெந்தீதிபி பாடோ². அயமேவத்தோ² . ச²ந்தா³யாதி ச²ந்தே³ன பக்க²பாதேன; அத்தனோ அத்தனோ ஸந்தி³ட்ட²ஸம்ப⁴த்தானங் பணீதானி பஞ்ஞபேதீதி அதி⁴ப்பாயோ. கி²ய்யந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா பகாஸெந்தி.
103. Tatiyasikkhāpade – dabbaṃ mallaputtaṃ bhikkhū ujjhāpentīti ‘‘chandāya dabbo mallaputto’’tiādīni vadantā taṃ āyasmantaṃ tehi bhikkhūhi avajānāpenti, avaññāya olokāpenti, lāmakato vā cintāpentī’’ti attho. Lakkhaṇaṃ panettha saddasatthānusārena veditabbaṃ. Ojjhāpentītipi pāṭho. Ayamevattho . Chandāyāti chandena pakkhapātena; attano attano sandiṭṭhasambhattānaṃ paṇītāni paññapetīti adhippāyo. Khiyyantīti ‘‘chandāya dabbo mallaputto’’tiādīni vadantā pakāsenti.
105. உஜ்ஜா²பனகே கி²ய்யனகே பாசித்தியந்தி எத்த² யேன வசனேன உஜ்ஜா²பெந்தி, தங் உஜ்ஜா²பனகங். யேன ச கி²ய்யந்தி தங் கி²ய்யனகங். தஸ்மிங் உஜ்ஜா²பனகே கி²ய்யனகே. பாசித்தியந்தி வத்து²த்³வயே பாசித்தியத்³வயங் வுத்தங்.
105.Ujjhāpanake khiyyanake pācittiyanti ettha yena vacanena ujjhāpenti, taṃ ujjhāpanakaṃ. Yena ca khiyyanti taṃ khiyyanakaṃ. Tasmiṃ ujjhāpanake khiyyanake. Pācittiyanti vatthudvaye pācittiyadvayaṃ vuttaṃ.
106. உஜ்ஜா²பனகங் நாம உபஸம்பன்னங் ஸங்கே⁴ன ஸம்மதங் ஸேனாஸனபஞ்ஞாபகங் வா…பே॰… அப்பமத்தகவிஸ்ஸஜ்ஜனகங் வாதி ஏதேஸங் பதா³னங் ‘‘மங்குகத்துகாமோ’’தி இமினா ஸம்ப³ந்தோ⁴. அவண்ணங் கத்துகாமோ அயஸங் கத்துகாமோதி இமேஸங் பன வஸேன உபஸம்பன்னந்திஆதீ³ஸு ‘‘உபஸம்பன்னஸ்ஸா’’தி ஏவங் விப⁴த்திவிபரிணாமோ காதப்³போ³. உஜ்ஜா²பேதி வா கி²ய்யதி வா ஆபத்தி பாசித்தியஸ்ஸாதி எத்த² பன யஸ்மா ‘‘கி²ய்யனகங் நாமா’’தி ஏவங் மாதிகாபத³ங் உத்³த⁴ரித்வாபி ‘‘உஜ்ஜா²பனகங் நாமா’’தி இமஸ்ஸ பத³ஸ்ஸ வுத்தவிப⁴ங்கோ³யேவ வத்தப்³போ³ ஹோதி, அஞ்ஞவாத³கஸிக்கா²பதே³ விய அஞ்ஞோ விஸேஸோ நத்தி², தஸ்மா தங் விஸுங் அனுத்³த⁴ரித்வா அவிப⁴ஜித்வா நிக³மனமேவ ஏகதோ கதந்தி வேதி³தப்³ப³ங். த⁴ம்மகம்மே த⁴ம்மகம்மஸஞ்ஞீதிஆதீ³ஸு யங் தஸ்ஸ உபஸம்பன்னஸ்ஸ ஸம்முதிகம்மங் கதங் தஞ்சே த⁴ம்மகம்மங் ஹோதி, ஸோ ச பி⁴க்கு² தஸ்மிங் த⁴ம்மகம்மஸஞ்ஞீ உஜ்ஜா²பனகஞ்ச கி²ய்யனகஞ்ச கரோதி, அத²ஸ்ஸ தஸ்மிங் உஜ்ஜா²பனகே ச கி²ய்யனகே ச ஆபத்தி பாசித்தியஸ்ஸாதி இமினா நயேன அத்தோ² வேதி³தப்³போ³.
106.Ujjhāpanakaṃ nāma upasampannaṃ saṅghena sammataṃ senāsanapaññāpakaṃ vā…pe… appamattakavissajjanakaṃ vāti etesaṃ padānaṃ ‘‘maṅkukattukāmo’’ti iminā sambandho. Avaṇṇaṃ kattukāmo ayasaṃ kattukāmoti imesaṃ pana vasena upasampannantiādīsu ‘‘upasampannassā’’ti evaṃ vibhattivipariṇāmo kātabbo. Ujjhāpeti vā khiyyati vā āpatti pācittiyassāti ettha pana yasmā ‘‘khiyyanakaṃ nāmā’’ti evaṃ mātikāpadaṃ uddharitvāpi ‘‘ujjhāpanakaṃ nāmā’’ti imassa padassa vuttavibhaṅgoyeva vattabbo hoti, aññavādakasikkhāpade viya añño viseso natthi, tasmā taṃ visuṃ anuddharitvā avibhajitvā nigamanameva ekato katanti veditabbaṃ. Dhammakamme dhammakammasaññītiādīsu yaṃ tassa upasampannassa sammutikammaṃ kataṃ tañce dhammakammaṃ hoti, so ca bhikkhu tasmiṃ dhammakammasaññī ujjhāpanakañca khiyyanakañca karoti, athassa tasmiṃ ujjhāpanake ca khiyyanake ca āpatti pācittiyassāti iminā nayena attho veditabbo.
அனுபஸம்பன்னங் உஜ்ஜா²பேதி வா கி²ய்யதி வாதி எத்த² உபஸம்பன்னங் ஸங்கே⁴ன ஸம்மதங் அஞ்ஞங் அனுபஸம்பன்னங் உஜ்ஜா²பேதி அவஜானாபேதி, தஸ்ஸ வா தங் ஸந்திகே கி²ய்யதீதி அத்தோ². உபஸம்பன்னங் ஸங்கே⁴ன அஸம்மதந்தி கம்மவாசாய அஸம்மதங் கேவலங் ‘‘தவேஸோ பா⁴ரோ’’தி ஸங்கே⁴ன ஆரோபிதபா⁴ரங் பி⁴க்கூ²னங் வா பா²ஸுவிஹாரத்தா²ய ஸயமேவ தங் பா⁴ரங் வஹந்தங், யத்ர வா த்³வே தயோ பி⁴க்கூ² விஹரந்தி, தத்ர வா தாதி³ஸங் கம்மங் கரொந்தந்தி அதி⁴ப்பாயோ. அனுபஸம்பன்னங் ஸங்கே⁴ன ஸம்மதங் வா அஸம்மதங் வாதி எத்த² பன கிஞ்சாபி அனுபஸம்பன்னஸ்ஸ தேரஸ ஸம்முதியோ தா³துங் ந வட்டந்தி. அத² கோ² உபஸம்பன்னகாலே லத்³த⁴ஸம்முதிகோ பச்சா² அனுபஸம்பன்னபா⁴வே டி²தோ, தங் ஸந்தா⁴ய ‘‘ஸங்கே⁴ன ஸம்மதங் வா’’தி வுத்தங். யஸ்ஸ பன ப்³யத்தஸ்ஸ ஸாமணேரஸ்ஸ கேவலங் ஸங்கே⁴ன வா ஸம்மதேன வா பி⁴க்கு²னா ‘‘த்வங் இத³ங் கம்மங் கரோஹீ’’தி பா⁴ரோ கதோ, தாதி³ஸங் ஸந்தா⁴ய ‘‘அஸம்மதங் வா’’தி வுத்தங். ஸேஸமெத்த² உத்தானமேவாதி.
Anupasampannaṃujjhāpeti vā khiyyati vāti ettha upasampannaṃ saṅghena sammataṃ aññaṃ anupasampannaṃ ujjhāpeti avajānāpeti, tassa vā taṃ santike khiyyatīti attho. Upasampannaṃ saṅghena asammatanti kammavācāya asammataṃ kevalaṃ ‘‘taveso bhāro’’ti saṅghena āropitabhāraṃ bhikkhūnaṃ vā phāsuvihāratthāya sayameva taṃ bhāraṃ vahantaṃ, yatra vā dve tayo bhikkhū viharanti, tatra vā tādisaṃ kammaṃ karontanti adhippāyo. Anupasampannaṃ saṅghena sammataṃ vā asammataṃ vāti ettha pana kiñcāpi anupasampannassa terasa sammutiyo dātuṃ na vaṭṭanti. Atha kho upasampannakāle laddhasammutiko pacchā anupasampannabhāve ṭhito, taṃ sandhāya ‘‘saṅghena sammataṃ vā’’ti vuttaṃ. Yassa pana byattassa sāmaṇerassa kevalaṃ saṅghena vā sammatena vā bhikkhunā ‘‘tvaṃ idaṃ kammaṃ karohī’’ti bhāro kato, tādisaṃ sandhāya ‘‘asammataṃ vā’’ti vuttaṃ. Sesamettha uttānamevāti.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
உஜ்ஜா²பனகஸிக்கா²பத³ங் ததியங்.
Ujjhāpanakasikkhāpadaṃ tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. உஜ்ஜா²பனகஸிக்கா²பத³ங் • 3. Ujjhāpanakasikkhāpadaṃ
