| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. உஜ்ஜா²பனகஸிக்கா²பத³வண்ணனா
3. Ujjhāpanakasikkhāpadavaṇṇanā
103. ததியே தா⁴துபாடே² ஜே²-ஸத்³தோ³ சிந்தாயங் படி²தோதி ஆஹ ‘‘லாமகதோ வா சிந்தாபெந்தீ’’திஆதி³. அயமேவ ச அனேகத்த²த்தா தா⁴தூனங் ஓலோகனத்தோ²பி ஹோதீதி த³ட்ட²ப்³ப³ங். ‘‘அக்க²ராய வாசேதீ’’திஆதீ³ஸு (பாசி॰ 46) விய ‘‘ச²ந்தா³யா’’தி லிங்க³விபல்லாஸவஸேன வுத்தந்தி ஆஹ ‘‘ச²ந்தே³னா’’தி.
103. Tatiye dhātupāṭhe jhe-saddo cintāyaṃ paṭhitoti āha ‘‘lāmakato vā cintāpentī’’tiādi. Ayameva ca anekatthattā dhātūnaṃ olokanatthopi hotīti daṭṭhabbaṃ. ‘‘Akkharāya vācetī’’tiādīsu (pāci. 46) viya ‘‘chandāyā’’ti liṅgavipallāsavasena vuttanti āha ‘‘chandenā’’ti.
105. யேன வசனேனாதி யேன ‘‘ச²ந்தா³ய இத்த²ன்னாமோ இத³ங் நாம கரோதீ’’திஆதி³வசனேன. யேன ச கி²ய்யந்தீதி யேன ‘‘ச²ந்தா³ய இத்த²ன்னாமோ’’திஆதி³வசனேன தத்த² தத்த² பி⁴க்கூ²னங் ஸவனூபசாரே ட²த்வா அவண்ணங் பகாஸெந்தி.
105.Yena vacanenāti yena ‘‘chandāya itthannāmo idaṃ nāma karotī’’tiādivacanena. Yena ca khiyyantīti yena ‘‘chandāya itthannāmo’’tiādivacanena tattha tattha bhikkhūnaṃ savanūpacāre ṭhatvā avaṇṇaṃ pakāsenti.
106. அஞ்ஞங் அனுபஸம்பன்னங் உஜ்ஜா²பேதீதி அஞ்ஞேன அனுபஸம்பன்னேன உஜ்ஜா²பேதி. தஸ்ஸ வா தங் ஸந்திகே கி²ய்யதீதி தஸ்ஸ அனுபஸம்பன்னஸ்ஸ ஸந்திகே தங் ஸங்கே⁴ன ஸம்மதங் உபஸம்பன்னங் கி²ய்யதி, அவண்ணங் வத³ந்தோ வா பகாஸேதி. அனுபஸம்பன்னங் ஸங்கே⁴ன ஸம்மதந்தி எத்த² ஸம்மதபுப்³போ³ ஸம்மதோதி வுத்தோ. தேனாஹ ‘‘கிஞ்சாபீ’’திஆதி³. யஸ்மா உஜ்ஜா²பனங் கி²ய்யனஞ்ச முஸாவாத³வஸேனேவ பவத்தங், தஸ்மா ஆதி³கம்மிகஸ்ஸ அனாபத்தீதி பாசித்தியட்டா²னே து³க்கடட்டா²னே ச இமினாவ அனாபத்தித³ஸ்ஸனத்த²ங் வுத்தந்தி க³ஹேதப்³ப³ங். ஏவஞ்ச கத்வா உஜ்ஜா²பெந்தஸ்ஸ கி²ய்யந்தஸ்ஸ ச ஏகக்க²ணே த்³வே த்³வே ஆபத்தியோ ஹொந்தீதி ஆபன்னங். அத² வா ஈதி³ஸங் ஸிக்கா²பத³ங் முஸாவாத³தோ பட²மங் பஞ்ஞத்தந்தி க³ஹேதப்³ப³ங். ஸேஸமெத்த² உத்தானமேவ. த⁴ம்மகம்மேன ஸம்மததா, உபஸம்பன்னதா, அக³திக³மனாபா⁴வோ , தஸ்ஸ அவண்ணகாமதா, யஸ்ஸ ஸந்திகே வத³தி, தஸ்ஸ உபஸம்பன்னதா, உஜ்ஜா²பனங் வா கி²ய்யனங் வாதி இமானி பனெத்த² ச² அங்கா³னி.
106.Aññaṃ anupasampannaṃ ujjhāpetīti aññena anupasampannena ujjhāpeti. Tassa vā taṃ santike khiyyatīti tassa anupasampannassa santike taṃ saṅghena sammataṃ upasampannaṃ khiyyati, avaṇṇaṃ vadanto vā pakāseti. Anupasampannaṃ saṅghena sammatanti ettha sammatapubbo sammatoti vutto. Tenāha ‘‘kiñcāpī’’tiādi. Yasmā ujjhāpanaṃ khiyyanañca musāvādavaseneva pavattaṃ, tasmā ādikammikassa anāpattīti pācittiyaṭṭhāne dukkaṭaṭṭhāne ca imināva anāpattidassanatthaṃ vuttanti gahetabbaṃ. Evañca katvā ujjhāpentassa khiyyantassa ca ekakkhaṇe dve dve āpattiyo hontīti āpannaṃ. Atha vā īdisaṃ sikkhāpadaṃ musāvādato paṭhamaṃ paññattanti gahetabbaṃ. Sesamettha uttānameva. Dhammakammena sammatatā, upasampannatā, agatigamanābhāvo , tassa avaṇṇakāmatā, yassa santike vadati, tassa upasampannatā, ujjhāpanaṃ vā khiyyanaṃ vāti imāni panettha cha aṅgāni.
உஜ்ஜா²பனகஸிக்கா²பத³வண்ணனா நிட்டி²தா.
Ujjhāpanakasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. உஜ்ஜா²பனகஸிக்கா²பத³வண்ணனா • 3. Ujjhāpanakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. உஜ்ஜா²பனகஸிக்கா²பத³ங் • 3. Ujjhāpanakasikkhāpadaṃ
