| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৩. উজ্ঝাপনকসিক্খাপদৰণ্ণনা
3. Ujjhāpanakasikkhāpadavaṇṇanā
যেন ৰচনেনাতি ‘‘ছন্দায ইত্থন্নামো ইদং নাম করোতী’’তিআদিকেন যেন ৰচনেন। তেনাহ ‘‘ছন্দাযা’’তিআদি। তত্থ ছন্দাযাতি ছন্দেন পক্খপাতেন। ‘‘অক্খরায ৰাচেতী’’তিআদীসু (পাচি॰ ৪৬) ৰিয লিঙ্গৰিপল্লাসো এস। ইদং নাম করোতীতি অত্তনো সন্দিট্ঠসম্ভত্তানং পণীতং সেনাসনং ৰা পঞ্ঞপেতি, ভত্তাদিকং ৰাতি অধিপ্পাযো। সেনাসনপঞ্ঞাপকাদিভেদন্তি এত্থ আদিসদ্দেন ভত্তুদ্দেসকযাগুভাজকফলভাজকাদীনং গহণং। অনেকত্থত্তা ধাতূনং ঝে-সদ্দো ওলোকনত্থোপি হোতীতি আহ ‘‘অৰঞ্ঞায ওলোকাপেন্তী’’তি। চিন্তনত্থোযেৰ ৰা গহেতব্বোতি আহ ‘‘লামকতো ৰা চিন্তাপেন্তী’’তি। তথেৰ ৰদন্তাতি ‘‘ছন্দায ইত্থন্নামো ইদং নাম করোতী’’তিআদীনি ৰদন্তা। ৰুত্তন্তি পাল়িযং ৰুত্তং। ‘‘খিয্যনকে’’তি (পাচি॰ অট্ঠ॰ ১০৫) অযমেত্থ অনুপঞ্ঞত্তি।
Yenavacanenāti ‘‘chandāya itthannāmo idaṃ nāma karotī’’tiādikena yena vacanena. Tenāha ‘‘chandāyā’’tiādi. Tattha chandāyāti chandena pakkhapātena. ‘‘Akkharāya vācetī’’tiādīsu (pāci. 46) viya liṅgavipallāso esa. Idaṃ nāma karotīti attano sandiṭṭhasambhattānaṃ paṇītaṃ senāsanaṃ vā paññapeti, bhattādikaṃ vāti adhippāyo. Senāsanapaññāpakādibhedanti ettha ādisaddena bhattuddesakayāgubhājakaphalabhājakādīnaṃ gahaṇaṃ. Anekatthattā dhātūnaṃ jhe-saddo olokanatthopi hotīti āha ‘‘avaññāya olokāpentī’’ti. Cintanatthoyeva vā gahetabboti āha ‘‘lāmakato vā cintāpentī’’ti. Tatheva vadantāti ‘‘chandāya itthannāmo idaṃ nāma karotī’’tiādīni vadantā. Vuttanti pāḷiyaṃ vuttaṃ. ‘‘Khiyyanake’’ti (pāci. aṭṭha. 105) ayamettha anupaññatti.
অসম্মতস্সাতি সঙ্ঘেন কম্মৰাচায অসম্মতস্স। কেৰলং ‘‘তৰেসো ভারো’’তি সঙ্ঘেন আরোপিতভারস্স, ভিক্খূনং ৰা ফাসুৰিহারত্থায সযমেৰ ভারং ৰহন্তস্স, যত্র ৰা দ্ৰে তযো ভিক্খূ ৰিহরন্তি, তত্র তাদিসং কম্মং করোন্তস্সাতি অধিপ্পাযো। যস্স কস্সচীতি উপসম্পন্নস্স ৰা অনুপসম্পন্নস্স ৰা যস্স কস্সচি। অনুপসম্পন্নস্স পন সম্মতস্স ৰা অসম্মতস্স ৰাতি এত্থ পন (পাচি॰ অট্ঠ॰ ১০৬) কিঞ্চাপি অনুপসম্পন্নস্স তেরস সম্মতিযো দাতুং ন ৰট্টন্তি, তথাপি যো উপসম্পন্নকালে লদ্ধসম্মুতিকো পচ্ছা অনুপসম্পন্নভাৰে ঠিতো, তং সন্ধায ‘‘সম্মতস্স ৰা’’তি ৰুত্তং। যস্স পন ব্যত্তস্স সামণেরস্স কেৰলং সঙ্ঘেন ৰা সম্মতেন ৰা ভিক্খুনা ‘‘ত্ৰং ইদং কম্মং করোহী’’তি ভারো কতো, তং সন্ধায ‘‘অসম্মতস্স ৰা’’তি ৰুত্তং। যস্মা উজ্ঝাপনঞ্চ খিয্যনঞ্চ মুসাৰাদৰসেন পৰত্তং, তস্মা আদিকম্মিকস্স ইমিনাৰ অনাপত্তি, মুসাৰাদেন পন আপত্তিযেৰাতি গহেতব্বং।
Asammatassāti saṅghena kammavācāya asammatassa. Kevalaṃ ‘‘taveso bhāro’’ti saṅghena āropitabhārassa, bhikkhūnaṃ vā phāsuvihāratthāya sayameva bhāraṃ vahantassa, yatra vā dve tayo bhikkhū viharanti, tatra tādisaṃ kammaṃ karontassāti adhippāyo. Yassa kassacīti upasampannassa vā anupasampannassa vā yassa kassaci. Anupasampannassa pana sammatassa vā asammatassavāti ettha pana (pāci. aṭṭha. 106) kiñcāpi anupasampannassa terasa sammatiyo dātuṃ na vaṭṭanti, tathāpi yo upasampannakāle laddhasammutiko pacchā anupasampannabhāve ṭhito, taṃ sandhāya ‘‘sammatassa vā’’ti vuttaṃ. Yassa pana byattassa sāmaṇerassa kevalaṃ saṅghena vā sammatena vā bhikkhunā ‘‘tvaṃ idaṃ kammaṃ karohī’’ti bhāro kato, taṃ sandhāya ‘‘asammatassa vā’’ti vuttaṃ. Yasmā ujjhāpanañca khiyyanañca musāvādavasena pavattaṃ, tasmā ādikammikassa imināva anāpatti, musāvādena pana āpattiyevāti gahetabbaṃ.
উজ্ঝাপনকসিক্খাপদৰণ্ণনা নিট্ঠিতা।
Ujjhāpanakasikkhāpadavaṇṇanā niṭṭhitā.
