| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
3. උජ්‌ඣාපනකසික්‌ඛාපදවණ්‌ණනා
3. Ujjhāpanakasikkhāpadavaṇṇanā
103. තතියෙ ධාතුපාඨෙ ඣෙ-සද්‌දො චින්‌තායං පඨිතොති ආහ ‘‘ලාමකතො වා චින්‌තාපෙන්‌තී’’තිආදි. අයමෙව ච අනෙකත්‌ථත්‌තා ධාතූනං ඔලොකනත්‌ථොපි හොතීති දට්‌ඨබ්‌බං. ‘‘අක්‌ඛරාය වාචෙතී’’තිආදීසු (පාචි. 46) විය ‘‘ඡන්‌දායා’’ති ලිඞ්‌ගවිපල්‌ලාසවසෙන වුත්‌තන්‌ති ආහ ‘‘ඡන්‌දෙනා’’ති.
103. Tatiye dhātupāṭhe jhe-saddo cintāyaṃ paṭhitoti āha ‘‘lāmakato vā cintāpentī’’tiādi. Ayameva ca anekatthattā dhātūnaṃ olokanatthopi hotīti daṭṭhabbaṃ. ‘‘Akkharāya vācetī’’tiādīsu (pāci. 46) viya ‘‘chandāyā’’ti liṅgavipallāsavasena vuttanti āha ‘‘chandenā’’ti.
105. යෙන වචනෙනාති යෙන ‘‘ඡන්‌දාය ඉත්‌ථන්‌නාමො ඉදං නාම කරොතී’’තිආදිවචනෙන. යෙන ච ඛිය්‍යන්‌තීති යෙන ‘‘ඡන්‌දාය ඉත්‌ථන්‌නාමො’’තිආදිවචනෙන තත්‌ථ තත්‌ථ භික්‌ඛූනං සවනූපචාරෙ ඨත්‌වා අවණ්‌ණං පකාසෙන්‌ති.
105.Yena vacanenāti yena ‘‘chandāya itthannāmo idaṃ nāma karotī’’tiādivacanena. Yena ca khiyyantīti yena ‘‘chandāya itthannāmo’’tiādivacanena tattha tattha bhikkhūnaṃ savanūpacāre ṭhatvā avaṇṇaṃ pakāsenti.
106. අඤ්‌ඤං අනුපසම්‌පන්‌නං උජ්‌ඣාපෙතීති අඤ්‌ඤෙන අනුපසම්‌පන්‌නෙන උජ්‌ඣාපෙති. තස්‌ස වා තං සන්‌තිකෙ ඛිය්‍යතීති තස්‌ස අනුපසම්‌පන්‌නස්‌ස සන්‌තිකෙ තං සඞ්‌ඝෙන සම්‌මතං උපසම්‌පන්‌නං ඛිය්‍යති, අවණ්‌ණං වදන්‌තො වා පකාසෙති. අනුපසම්‌පන්‌නං සඞ්‌ඝෙන සම්‌මතන්‌ති එත්‌ථ සම්‌මතපුබ්‌බො සම්‌මතොති වුත්‌තො. තෙනාහ ‘‘කිඤ්‌චාපී’’තිආදි. යස්‌මා උජ්‌ඣාපනං ඛිය්‍යනඤ්‌ච මුසාවාදවසෙනෙව පවත්‌තං, තස්‌මා ආදිකම්‌මිකස්‌ස අනාපත්‌තීති පාචිත්‌තියට්‌ඨානෙ දුක්‌කටට්‌ඨානෙ ච ඉමිනාව අනාපත්‌තිදස්‌සනත්‌ථං වුත්‌තන්‌ති ගහෙතබ්‌බං. එවඤ්‌ච කත්‌වා උජ්‌ඣාපෙන්‌තස්‌ස ඛිය්‍යන්‌තස්‌ස ච එකක්‌ඛණෙ ද්‌වෙ ද්‌වෙ ආපත්‌තියො හොන්‌තීති ආපන්‌නං. අථ වා ඊදිසං සික්‌ඛාපදං මුසාවාදතො පඨමං පඤ්‌ඤත්‌තන්‌ති ගහෙතබ්‌බං. සෙසමෙත්‌ථ උත්‌තානමෙව. ධම්‌මකම්‌මෙන සම්‌මතතා, උපසම්‌පන්‌නතා, අගතිගමනාභාවො , තස්‌ස අවණ්‌ණකාමතා, යස්‌ස සන්‌තිකෙ වදති, තස්‌ස උපසම්‌පන්‌නතා, උජ්‌ඣාපනං වා ඛිය්‍යනං වාති ඉමානි පනෙත්‌ථ ඡ අඞ්‌ගානි.
106.Aññaṃ anupasampannaṃ ujjhāpetīti aññena anupasampannena ujjhāpeti. Tassa vā taṃ santike khiyyatīti tassa anupasampannassa santike taṃ saṅghena sammataṃ upasampannaṃ khiyyati, avaṇṇaṃ vadanto vā pakāseti. Anupasampannaṃ saṅghena sammatanti ettha sammatapubbo sammatoti vutto. Tenāha ‘‘kiñcāpī’’tiādi. Yasmā ujjhāpanaṃ khiyyanañca musāvādavaseneva pavattaṃ, tasmā ādikammikassa anāpattīti pācittiyaṭṭhāne dukkaṭaṭṭhāne ca imināva anāpattidassanatthaṃ vuttanti gahetabbaṃ. Evañca katvā ujjhāpentassa khiyyantassa ca ekakkhaṇe dve dve āpattiyo hontīti āpannaṃ. Atha vā īdisaṃ sikkhāpadaṃ musāvādato paṭhamaṃ paññattanti gahetabbaṃ. Sesamettha uttānameva. Dhammakammena sammatatā, upasampannatā, agatigamanābhāvo , tassa avaṇṇakāmatā, yassa santike vadati, tassa upasampannatā, ujjhāpanaṃ vā khiyyanaṃ vāti imāni panettha cha aṅgāni.
උජ්‌ඣාපනකසික්‌ඛාපදවණ්‌ණනා නිට්‌ඨිතා.
Ujjhāpanakasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 2. භූතගාමවග්‌ගො • 2. Bhūtagāmavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 3. උජ්‌ඣාපනකසික්‌ඛාපදවණ්‌ණනා • 3. Ujjhāpanakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. උජ්‌ඣාපනකසික්‌ඛාපදවණ්‌ණනා • 3. Ujjhāpanakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 3. උජ්‌ඣාපනකසික්‌ඛාපදවණ්‌ණනා • 3. Ujjhāpanakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. උජ්‌ඣාපනකසික්‌ඛාපදං • 3. Ujjhāpanakasikkhāpadaṃ
