| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. உக்கசேலஸுத்தங்
4. Ukkacelasuttaṃ
380. ஏகங் ஸமயங் ப⁴க³வா வஜ்ஜீஸு விஹரதி உக்கசேலாயங் க³ங்கா³ய நதி³யா தீரே மஹதா பி⁴க்கு²ஸங்கே⁴ன ஸத்³தி⁴ங் அசிரபரினிப்³பு³தேஸு ஸாரிபுத்தமொக்³க³ல்லானேஸு. தேன கோ² பன ஸமயேன ப⁴க³வா பி⁴க்கு²ஸங்க⁴பரிவுதோ அஜ்ஜோ²காஸே நிஸின்னோ ஹோதி.
380. Ekaṃ samayaṃ bhagavā vajjīsu viharati ukkacelāyaṃ gaṅgāya nadiyā tīre mahatā bhikkhusaṅghena saddhiṃ aciraparinibbutesu sāriputtamoggallānesu. Tena kho pana samayena bhagavā bhikkhusaṅghaparivuto ajjhokāse nisinno hoti.
அத² கோ² ப⁴க³வா துண்ஹீபூ⁴தங் பி⁴க்கு²ஸங்க⁴ங் அனுவிலோகெத்வா பி⁴க்கூ² ஆமந்தேஸி – ‘‘அபி ம்யாயங், பி⁴க்க²வே, பரிஸா ஸுஞ்ஞா விய கா²யதி பரினிப்³பு³தேஸு ஸாரிபுத்தமொக்³க³ல்லானேஸு. அஸுஞ்ஞா மே, பி⁴க்க²வே, பரிஸா ஹோதி , அனபெக்கா² தஸ்ஸங் தி³ஸாயங் ஹோதி, யஸ்ஸங் தி³ஸாயங் ஸாரிபுத்தமொக்³க³ல்லானா விஹரந்தி. யே ஹி தே, பி⁴க்க²வே, அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, தேஸம்பி ப⁴க³வந்தானங் ஏதப்பரமங்யேவ ஸாவகயுக³ங் 1 அஹோஸி – ஸெய்யதா²பி மய்ஹங் ஸாரிபுத்தமொக்³க³ல்லானா. யேபி தே, பி⁴க்க²வே, ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴, தேஸம்பி ப⁴க³வந்தானங் ஏதப்பரமங்யேவ ஸாவகயுக³ங் ப⁴விஸ்ஸதி – ஸெய்யதா²பி மய்ஹங் ஸாரிபுத்தமொக்³க³ல்லானா. அச்ச²ரியங், பி⁴க்க²வே, ஸாவகானங்! அப்³பு⁴தங், பி⁴க்க²வே, ஸாவகானங்! ஸத்து² ச நாம ஸாஸனகரா ப⁴விஸ்ஸந்தி ஓவாத³ப்படிகரா, சதுன்னஞ்ச பரிஸானங் பியா ப⁴விஸ்ஸந்தி மனாபா க³ருபா⁴வனீயா ச! அச்ச²ரியங், பி⁴க்க²வே, ததா²க³தஸ்ஸ, அப்³பு⁴தங், பி⁴க்க²வே, ததா²க³தஸ்ஸ! ஏவரூபேபி நாம ஸாவகயுகே³ பரினிப்³பு³தே நத்தி² ததா²க³தஸ்ஸ ஸோகோ வா பரிதே³வோ வா! தங் குதெத்த², பி⁴க்க²வே, லப்³பா⁴! யங் தங் ஜாதங் பூ⁴தங் ஸங்க²தங் பலோகத⁴ம்மங், தங் வத மா பலுஜ்ஜீதி – நேதங் டா²னங் விஜ்ஜதி. ஸெய்யதா²பி, பி⁴க்க²வே, மஹதோ ருக்க²ஸ்ஸ திட்ட²தோ ஸாரவதோ யே மஹந்ததரா க²ந்தா⁴ தே பலுஜ்ஜெய்யுங்; ஏவமேவ கோ², பி⁴க்க²வே, மஹதோ பி⁴க்கு²ஸங்க⁴ஸ்ஸ திட்ட²தோ ஸாரவதோ ஸாரிபுத்தமொக்³க³ல்லானா பரினிப்³பு³தா. தங் குதெத்த², பி⁴க்க²வே, லப்³பா⁴! யங் தங் ஜாதங் பூ⁴தங் ஸங்க²தங் பலோகத⁴ம்மங், தங் வத மா பலுஜ்ஜீதி – நேதங் டா²னங் விஜ்ஜதி. தஸ்மாதிஹ, பி⁴க்க²வே, அத்ததீ³பா விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா.
Atha kho bhagavā tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘api myāyaṃ, bhikkhave, parisā suññā viya khāyati parinibbutesu sāriputtamoggallānesu. Asuññā me, bhikkhave, parisā hoti , anapekkhā tassaṃ disāyaṃ hoti, yassaṃ disāyaṃ sāriputtamoggallānā viharanti. Ye hi te, bhikkhave, ahesuṃ atītamaddhānaṃ arahanto sammāsambuddhā, tesampi bhagavantānaṃ etapparamaṃyeva sāvakayugaṃ 2 ahosi – seyyathāpi mayhaṃ sāriputtamoggallānā. Yepi te, bhikkhave, bhavissanti anāgatamaddhānaṃ arahanto sammāsambuddhā, tesampi bhagavantānaṃ etapparamaṃyeva sāvakayugaṃ bhavissati – seyyathāpi mayhaṃ sāriputtamoggallānā. Acchariyaṃ, bhikkhave, sāvakānaṃ! Abbhutaṃ, bhikkhave, sāvakānaṃ! Satthu ca nāma sāsanakarā bhavissanti ovādappaṭikarā, catunnañca parisānaṃ piyā bhavissanti manāpā garubhāvanīyā ca! Acchariyaṃ, bhikkhave, tathāgatassa, abbhutaṃ, bhikkhave, tathāgatassa! Evarūpepi nāma sāvakayuge parinibbute natthi tathāgatassa soko vā paridevo vā! Taṃ kutettha, bhikkhave, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjīti – netaṃ ṭhānaṃ vijjati. Seyyathāpi, bhikkhave, mahato rukkhassa tiṭṭhato sāravato ye mahantatarā khandhā te palujjeyyuṃ; evameva kho, bhikkhave, mahato bhikkhusaṅghassa tiṭṭhato sāravato sāriputtamoggallānā parinibbutā. Taṃ kutettha, bhikkhave, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjīti – netaṃ ṭhānaṃ vijjati. Tasmātiha, bhikkhave, attadīpā viharatha attasaraṇā anaññasaraṇā, dhammadīpā dhammasaraṇā anaññasaraṇā.
‘‘கத²ஞ்ச, பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ. யே ஹி கேசி, பி⁴க்க²வே, ஏதரஹி வா மமச்சயே வா அத்ததீ³பா விஹரிஸ்ஸந்தி அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா; தமதக்³கே³ மேதே, பி⁴க்க²வே, பி⁴க்கூ² ப⁴விஸ்ஸந்தி யே கேசி ஸிக்கா²காமா’’தி. சதுத்த²ங்.
‘‘Kathañca, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo. Ye hi keci, bhikkhave, etarahi vā mamaccaye vā attadīpā viharissanti attasaraṇā anaññasaraṇā, dhammadīpā dhammasaraṇā anaññasaraṇā; tamatagge mete, bhikkhave, bhikkhū bhavissanti ye keci sikkhākāmā’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-5. உக்கசேலஸுத்தாதி³வண்ணனா • 4-5. Ukkacelasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-5. உக்கசேலஸுத்தாதி³வண்ணனா • 4-5. Ukkacelasuttādivaṇṇanā
