| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. උක්‌කචෙලසුත්‌තං
4. Ukkacelasuttaṃ
380. එකං සමයං භගවා වජ්‌ජීසු විහරති උක්‌කචෙලායං ගඞ්‌ගාය නදියා තීරෙ මහතා භික්‌ඛුසඞ්‌ඝෙන සද්‌ධිං අචිරපරිනිබ්‌බුතෙසු සාරිපුත්‌තමොග්‌ගල්‌ලානෙසු. තෙන ඛො පන සමයෙන භගවා භික්‌ඛුසඞ්‌ඝපරිවුතො අජ්‌ඣොකාසෙ නිසින්‌නො හොති.
380. Ekaṃ samayaṃ bhagavā vajjīsu viharati ukkacelāyaṃ gaṅgāya nadiyā tīre mahatā bhikkhusaṅghena saddhiṃ aciraparinibbutesu sāriputtamoggallānesu. Tena kho pana samayena bhagavā bhikkhusaṅghaparivuto ajjhokāse nisinno hoti.
අථ ඛො භගවා තුණ්‌හීභූතං භික්‌ඛුසඞ්‌ඝං අනුවිලොකෙත්‌වා භික්‌ඛූ ආමන්‌තෙසි – ‘‘අපි ම්‍යායං, භික්‌ඛවෙ, පරිසා සුඤ්‌ඤා විය ඛායති පරිනිබ්‌බුතෙසු සාරිපුත්‌තමොග්‌ගල්‌ලානෙසු. අසුඤ්‌ඤා මෙ, භික්‌ඛවෙ, පරිසා හොති , අනපෙක්‌ඛා තස්‌සං දිසායං හොති, යස්‌සං දිසායං සාරිපුත්‌තමොග්‌ගල්‌ලානා විහරන්‌ති. යෙ හි තෙ, භික්‌ඛවෙ, අහෙසුං අතීතමද්‌ධානං අරහන්‌තො සම්‌මාසම්‌බුද්‌ධා, තෙසම්‌පි භගවන්‌තානං එතප්‌පරමංයෙව සාවකයුගං 1 අහොසි – සෙය්‍යථාපි මය්‌හං සාරිපුත්‌තමොග්‌ගල්‌ලානා. යෙපි තෙ, භික්‌ඛවෙ, භවිස්‌සන්‌ති අනාගතමද්‌ධානං අරහන්‌තො සම්‌මාසම්‌බුද්‌ධා, තෙසම්‌පි භගවන්‌තානං එතප්‌පරමංයෙව සාවකයුගං භවිස්‌සති – සෙය්‍යථාපි මය්‌හං සාරිපුත්‌තමොග්‌ගල්‌ලානා. අච්‌ඡරියං, භික්‌ඛවෙ, සාවකානං! අබ්‌භුතං, භික්‌ඛවෙ, සාවකානං! සත්‌ථු ච නාම සාසනකරා භවිස්‌සන්‌ති ඔවාදප්‌පටිකරා, චතුන්‌නඤ්‌ච පරිසානං පියා භවිස්‌සන්‌ති මනාපා ගරුභාවනීයා ච! අච්‌ඡරියං, භික්‌ඛවෙ, තථාගතස්‌ස, අබ්‌භුතං, භික්‌ඛවෙ, තථාගතස්‌ස! එවරූපෙපි නාම සාවකයුගෙ පරිනිබ්‌බුතෙ නත්‌ථි තථාගතස්‌ස සොකො වා පරිදෙවො වා! තං කුතෙත්‌ථ, භික්‌ඛවෙ, ලබ්‌භා! යං තං ජාතං භූතං සඞ්‌ඛතං පලොකධම්‌මං, තං වත මා පලුජ්‌ජීති – නෙතං ඨානං විජ්‌ජති. සෙය්‍යථාපි, භික්‌ඛවෙ, මහතො රුක්‌ඛස්‌ස තිට්‌ඨතො සාරවතො යෙ මහන්‌තතරා ඛන්‌ධා තෙ පලුජ්‌ජෙය්‍යුං; එවමෙව ඛො, භික්‌ඛවෙ, මහතො භික්‌ඛුසඞ්‌ඝස්‌ස තිට්‌ඨතො සාරවතො සාරිපුත්‌තමොග්‌ගල්‌ලානා පරිනිබ්‌බුතා. තං කුතෙත්‌ථ, භික්‌ඛවෙ, ලබ්‌භා! යං තං ජාතං භූතං සඞ්‌ඛතං පලොකධම්‌මං, තං වත මා පලුජ්‌ජීති – නෙතං ඨානං විජ්‌ජති. තස්‌මාතිහ, භික්‌ඛවෙ, අත්‌තදීපා විහරථ අත්‌තසරණා අනඤ්‌ඤසරණා, ධම්‌මදීපා ධම්‌මසරණා අනඤ්‌ඤසරණා.
Atha kho bhagavā tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘api myāyaṃ, bhikkhave, parisā suññā viya khāyati parinibbutesu sāriputtamoggallānesu. Asuññā me, bhikkhave, parisā hoti , anapekkhā tassaṃ disāyaṃ hoti, yassaṃ disāyaṃ sāriputtamoggallānā viharanti. Ye hi te, bhikkhave, ahesuṃ atītamaddhānaṃ arahanto sammāsambuddhā, tesampi bhagavantānaṃ etapparamaṃyeva sāvakayugaṃ 2 ahosi – seyyathāpi mayhaṃ sāriputtamoggallānā. Yepi te, bhikkhave, bhavissanti anāgatamaddhānaṃ arahanto sammāsambuddhā, tesampi bhagavantānaṃ etapparamaṃyeva sāvakayugaṃ bhavissati – seyyathāpi mayhaṃ sāriputtamoggallānā. Acchariyaṃ, bhikkhave, sāvakānaṃ! Abbhutaṃ, bhikkhave, sāvakānaṃ! Satthu ca nāma sāsanakarā bhavissanti ovādappaṭikarā, catunnañca parisānaṃ piyā bhavissanti manāpā garubhāvanīyā ca! Acchariyaṃ, bhikkhave, tathāgatassa, abbhutaṃ, bhikkhave, tathāgatassa! Evarūpepi nāma sāvakayuge parinibbute natthi tathāgatassa soko vā paridevo vā! Taṃ kutettha, bhikkhave, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjīti – netaṃ ṭhānaṃ vijjati. Seyyathāpi, bhikkhave, mahato rukkhassa tiṭṭhato sāravato ye mahantatarā khandhā te palujjeyyuṃ; evameva kho, bhikkhave, mahato bhikkhusaṅghassa tiṭṭhato sāravato sāriputtamoggallānā parinibbutā. Taṃ kutettha, bhikkhave, labbhā! Yaṃ taṃ jātaṃ bhūtaṃ saṅkhataṃ palokadhammaṃ, taṃ vata mā palujjīti – netaṃ ṭhānaṃ vijjati. Tasmātiha, bhikkhave, attadīpā viharatha attasaraṇā anaññasaraṇā, dhammadīpā dhammasaraṇā anaññasaraṇā.
‘‘කථඤ්‌ච, භික්‌ඛවෙ, භික්‌ඛු අත්‌තදීපො විහරති අත්‌තසරණො අනඤ්‌ඤසරණො, ධම්‌මදීපො ධම්‌මසරණො අනඤ්‌ඤසරණො? ඉධ, භික්‌ඛවෙ, භික්‌ඛු කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. එවං ඛො, භික්‌ඛවෙ, භික්‌ඛු අත්‌තදීපො විහරති අත්‌තසරණො අනඤ්‌ඤසරණො, ධම්‌මදීපො ධම්‌මසරණො අනඤ්‌ඤසරණො. යෙ හි කෙචි, භික්‌ඛවෙ, එතරහි වා මමච්‌චයෙ වා අත්‌තදීපා විහරිස්‌සන්‌ති අත්‌තසරණා අනඤ්‌ඤසරණා, ධම්‌මදීපා ධම්‌මසරණා අනඤ්‌ඤසරණා; තමතග්‌ගෙ මෙතෙ, භික්‌ඛවෙ, භික්‌ඛූ භවිස්‌සන්‌ති යෙ කෙචි සික්‌ඛාකාමා’’ති. චතුත්‌ථං.
‘‘Kathañca, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo. Ye hi keci, bhikkhave, etarahi vā mamaccaye vā attadīpā viharissanti attasaraṇā anaññasaraṇā, dhammadīpā dhammasaraṇā anaññasaraṇā; tamatagge mete, bhikkhave, bhikkhū bhavissanti ye keci sikkhākāmā’’ti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-5. උක්‌කචෙලසුත්‌තාදිවණ්‌ණනා • 4-5. Ukkacelasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4-5. උක්‌කචෙලසුත්‌තාදිවණ්‌ණනා • 4-5. Ukkacelasuttādivaṇṇanā
