| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. உக்கி²த்தானுவத்திகாஸிக்கா²பத³வண்ணனா
7. Ukkhittānuvattikāsikkhāpadavaṇṇanā
ஸத்து²ஸாஸனேனாதி ஞத்திஸம்பதா³ய சேவ அனுஸ்ஸாவனஸம்பதா³ய ச. இத⁴ பன சோத³னாஸாரணாபுப்³ப³கமேவ ஞத்திஅனுஸ்ஸாவனங் ஸத்து²ஸாஸனந்தி ஆஹ ‘‘இதா⁴பீ’’திஆதி³. கரணந்தி ஞத்திட்ட²பனஞ்சேவ அனுஸ்ஸாவனாவசனஞ்ச. அனாத³ரந்தி புக்³க³லே சேவ த⁴ம்மே ச ஆத³ரவிரஹிதங். தேனாஹ ‘‘யேனா’’திஆதி³. தத்த² பரியாபன்னக³ணே வாதி தஸ்மிங் ஸங்கே⁴ பரியாபன்னே ஸம்ப³ஹுலபுக்³க³லஸங்கா²தே க³ணே வா. ‘‘ஸம்மாவத்தனாய அவத்தமானந்தி அத்தோ²’’தி இமினா அதி⁴ப்பாயத்தோ² வுத்தோ. ஏககம்மாதி³கேதி ஏககம்மஏகுத்³தே³ஸஸமஸிக்கா²தாய. ஸஹ அயனபா⁴வேனாதி ஸஹ வத்தனபா⁴வேன. ஸமானோ ஸங்வாஸோ ஏதேஸந்தி ஸமானஸங்வாஸகா.
Satthusāsanenāti ñattisampadāya ceva anussāvanasampadāya ca. Idha pana codanāsāraṇāpubbakameva ñattianussāvanaṃ satthusāsananti āha ‘‘idhāpī’’tiādi. Karaṇanti ñattiṭṭhapanañceva anussāvanāvacanañca. Anādaranti puggale ceva dhamme ca ādaravirahitaṃ. Tenāha ‘‘yenā’’tiādi. Tattha pariyāpannagaṇe vāti tasmiṃ saṅghe pariyāpanne sambahulapuggalasaṅkhāte gaṇe vā. ‘‘Sammāvattanāya avattamānanti attho’’ti iminā adhippāyattho vutto. Ekakammādiketi ekakammaekuddesasamasikkhātāya. Saha ayanabhāvenāti saha vattanabhāvena. Samāno saṃvāso etesanti samānasaṃvāsakā.
இதா³னி யேன ஸங்வாஸேன தே ‘‘ஸமானஸங்வாஸகா’’தி (பாசி॰ அட்ட²॰ 669) வுத்தா, ஸோ ஸங்வாஸோ தஸ்ஸ உக்கி²த்தகஸ்ஸ தேஹி ஸத்³தி⁴ங் நத்தி², யேஹி ச ஸத்³தி⁴ங் தஸ்ஸ ஸோ ஸங்வாஸோ நத்தி², ந தேன தே பி⁴க்கூ² அத்தனோ ஸஹாயா கதா ஹொந்தி, தஸ்மா ஸோ அகதஸஹாயோ நாமாதி இமமத்த²ங் த³ஸ்ஸேதுங் ‘‘யஸ்ஸ பனா’’திஆதி³ வுத்தங். ஏவங் பத³வண்ணனங் கத்வா இதா³னி அத்த²மத்தங் த³ஸ்ஸேதுங் ‘‘ஸமானஸங்வாஸகபா⁴வங் அனுபக³தந்தி அத்தோ²’’தி வுத்தங். கிங் தங் அனுவத்தனந்தி கஸ்ஸசி ஆஸங்கா ஸியாதி தங் ஸரூபதோ த³ஸ்ஸெந்தோ ‘‘யங்தி³ட்டி²கோ ஸோ ஹோதீ’’திஆதி³மாஹ. தத்த² ஸோதி யோ உக்கி²த்தகோ, ஸோ.
Idāni yena saṃvāsena te ‘‘samānasaṃvāsakā’’ti (pāci. aṭṭha. 669) vuttā, so saṃvāso tassa ukkhittakassa tehi saddhiṃ natthi, yehi ca saddhiṃ tassa so saṃvāso natthi, na tena te bhikkhū attano sahāyā katā honti, tasmā so akatasahāyo nāmāti imamatthaṃ dassetuṃ ‘‘yassa panā’’tiādi vuttaṃ. Evaṃ padavaṇṇanaṃ katvā idāni atthamattaṃ dassetuṃ ‘‘samānasaṃvāsakabhāvaṃ anupagatanti attho’’ti vuttaṃ. Kiṃ taṃ anuvattananti kassaci āsaṅkā siyāti taṃ sarūpato dassento ‘‘yaṃdiṭṭhiko so hotī’’tiādimāha. Tattha soti yo ukkhittako, so.
உக்கி²த்தானுவத்திகாஸிக்கா²பத³வண்ணனா நிட்டி²தா.
Ukkhittānuvattikāsikkhāpadavaṇṇanā niṭṭhitā.
