| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৭. উক্খিত্তানুৰত্তিকাসিক্খাপদৰণ্ণনা
7. Ukkhittānuvattikāsikkhāpadavaṇṇanā
সত্থুসাসনেনাতি ঞত্তিসম্পদায চেৰ অনুস্সাৰনসম্পদায চ। ইধ পন চোদনাসারণাপুব্বকমেৰ ঞত্তিঅনুস্সাৰনং সত্থুসাসনন্তি আহ ‘‘ইধাপী’’তিআদি। করণন্তি ঞত্তিট্ঠপনঞ্চেৰ অনুস্সাৰনাৰচনঞ্চ। অনাদরন্তি পুগ্গলে চেৰ ধম্মে চ আদরৰিরহিতং। তেনাহ ‘‘যেনা’’তিআদি। তত্থ পরিযাপন্নগণে ৰাতি তস্মিং সঙ্ঘে পরিযাপন্নে সম্বহুলপুগ্গলসঙ্খাতে গণে ৰা। ‘‘সম্মাৰত্তনায অৰত্তমানন্তি অত্থো’’তি ইমিনা অধিপ্পাযত্থো ৰুত্তো। এককম্মাদিকেতি এককম্মএকুদ্দেসসমসিক্খাতায। সহ অযনভাৰেনাতি সহ ৰত্তনভাৰেন। সমানো সংৰাসো এতেসন্তি সমানসংৰাসকা।
Satthusāsanenāti ñattisampadāya ceva anussāvanasampadāya ca. Idha pana codanāsāraṇāpubbakameva ñattianussāvanaṃ satthusāsananti āha ‘‘idhāpī’’tiādi. Karaṇanti ñattiṭṭhapanañceva anussāvanāvacanañca. Anādaranti puggale ceva dhamme ca ādaravirahitaṃ. Tenāha ‘‘yenā’’tiādi. Tattha pariyāpannagaṇe vāti tasmiṃ saṅghe pariyāpanne sambahulapuggalasaṅkhāte gaṇe vā. ‘‘Sammāvattanāya avattamānanti attho’’ti iminā adhippāyattho vutto. Ekakammādiketi ekakammaekuddesasamasikkhātāya. Saha ayanabhāvenāti saha vattanabhāvena. Samāno saṃvāso etesanti samānasaṃvāsakā.
ইদানি যেন সংৰাসেন তে ‘‘সমানসংৰাসকা’’তি (পাচি॰ অট্ঠ॰ ৬৬৯) ৰুত্তা, সো সংৰাসো তস্স উক্খিত্তকস্স তেহি সদ্ধিং নত্থি, যেহি চ সদ্ধিং তস্স সো সংৰাসো নত্থি, ন তেন তে ভিক্খূ অত্তনো সহাযা কতা হোন্তি, তস্মা সো অকতসহাযো নামাতি ইমমত্থং দস্সেতুং ‘‘যস্স পনা’’তিআদি ৰুত্তং। এৰং পদৰণ্ণনং কত্ৰা ইদানি অত্থমত্তং দস্সেতুং ‘‘সমানসংৰাসকভাৰং অনুপগতন্তি অত্থো’’তি ৰুত্তং। কিং তং অনুৰত্তনন্তি কস্সচি আসঙ্কা সিযাতি তং সরূপতো দস্সেন্তো ‘‘যংদিট্ঠিকো সো হোতী’’তিআদিমাহ। তত্থ সোতি যো উক্খিত্তকো, সো।
Idāni yena saṃvāsena te ‘‘samānasaṃvāsakā’’ti (pāci. aṭṭha. 669) vuttā, so saṃvāso tassa ukkhittakassa tehi saddhiṃ natthi, yehi ca saddhiṃ tassa so saṃvāso natthi, na tena te bhikkhū attano sahāyā katā honti, tasmā so akatasahāyo nāmāti imamatthaṃ dassetuṃ ‘‘yassa panā’’tiādi vuttaṃ. Evaṃ padavaṇṇanaṃ katvā idāni atthamattaṃ dassetuṃ ‘‘samānasaṃvāsakabhāvaṃ anupagatanti attho’’ti vuttaṃ. Kiṃ taṃ anuvattananti kassaci āsaṅkā siyāti taṃ sarūpato dassento ‘‘yaṃdiṭṭhiko so hotī’’tiādimāha. Tattha soti yo ukkhittako, so.
উক্খিত্তানুৰত্তিকাসিক্খাপদৰণ্ণনা নিট্ঠিতা।
Ukkhittānuvattikāsikkhāpadavaṇṇanā niṭṭhitā.
