| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
७. उक्खित्तानुवत्तिकासिक्खापदवण्णना
7. Ukkhittānuvattikāsikkhāpadavaṇṇanā
सत्थुसासनेनाति ञत्तिसम्पदाय चेव अनुस्सावनसम्पदाय च। इध पन चोदनासारणापुब्बकमेव ञत्तिअनुस्सावनं सत्थुसासनन्ति आह ‘‘इधापी’’तिआदि। करणन्ति ञत्तिट्ठपनञ्चेव अनुस्सावनावचनञ्च। अनादरन्ति पुग्गले चेव धम्मे च आदरविरहितं। तेनाह ‘‘येना’’तिआदि। तत्थ परियापन्नगणे वाति तस्मिं सङ्घे परियापन्ने सम्बहुलपुग्गलसङ्खाते गणे वा। ‘‘सम्मावत्तनाय अवत्तमानन्ति अत्थो’’ति इमिना अधिप्पायत्थो वुत्तो। एककम्मादिकेति एककम्मएकुद्देससमसिक्खाताय। सह अयनभावेनाति सह वत्तनभावेन। समानो संवासो एतेसन्ति समानसंवासका।
Satthusāsanenāti ñattisampadāya ceva anussāvanasampadāya ca. Idha pana codanāsāraṇāpubbakameva ñattianussāvanaṃ satthusāsananti āha ‘‘idhāpī’’tiādi. Karaṇanti ñattiṭṭhapanañceva anussāvanāvacanañca. Anādaranti puggale ceva dhamme ca ādaravirahitaṃ. Tenāha ‘‘yenā’’tiādi. Tattha pariyāpannagaṇe vāti tasmiṃ saṅghe pariyāpanne sambahulapuggalasaṅkhāte gaṇe vā. ‘‘Sammāvattanāya avattamānanti attho’’ti iminā adhippāyattho vutto. Ekakammādiketi ekakammaekuddesasamasikkhātāya. Saha ayanabhāvenāti saha vattanabhāvena. Samāno saṃvāso etesanti samānasaṃvāsakā.
इदानि येन संवासेन ते ‘‘समानसंवासका’’ति (पाचि॰ अट्ठ॰ ६६९) वुत्ता, सो संवासो तस्स उक्खित्तकस्स तेहि सद्धिं नत्थि, येहि च सद्धिं तस्स सो संवासो नत्थि, न तेन ते भिक्खू अत्तनो सहाया कता होन्ति, तस्मा सो अकतसहायो नामाति इममत्थं दस्सेतुं ‘‘यस्स पना’’तिआदि वुत्तं। एवं पदवण्णनं कत्वा इदानि अत्थमत्तं दस्सेतुं ‘‘समानसंवासकभावं अनुपगतन्ति अत्थो’’ति वुत्तं। किं तं अनुवत्तनन्ति कस्सचि आसङ्का सियाति तं सरूपतो दस्सेन्तो ‘‘यंदिट्ठिको सो होती’’तिआदिमाह। तत्थ सोति यो उक्खित्तको, सो।
Idāni yena saṃvāsena te ‘‘samānasaṃvāsakā’’ti (pāci. aṭṭha. 669) vuttā, so saṃvāso tassa ukkhittakassa tehi saddhiṃ natthi, yehi ca saddhiṃ tassa so saṃvāso natthi, na tena te bhikkhū attano sahāyā katā honti, tasmā so akatasahāyo nāmāti imamatthaṃ dassetuṃ ‘‘yassa panā’’tiādi vuttaṃ. Evaṃ padavaṇṇanaṃ katvā idāni atthamattaṃ dassetuṃ ‘‘samānasaṃvāsakabhāvaṃ anupagatanti attho’’ti vuttaṃ. Kiṃ taṃ anuvattananti kassaci āsaṅkā siyāti taṃ sarūpato dassento ‘‘yaṃdiṭṭhiko so hotī’’tiādimāha. Tattha soti yo ukkhittako, so.
उक्खित्तानुवत्तिकासिक्खापदवण्णना निट्ठिता।
Ukkhittānuvattikāsikkhāpadavaṇṇanā niṭṭhitā.
