| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๗. อุกฺขิตฺตานุวตฺติกาสิกฺขาปทวณฺณนา
7. Ukkhittānuvattikāsikkhāpadavaṇṇanā
สตฺถุสาสเนนาติ ญตฺติสมฺปทาย เจว อนุสฺสาวนสมฺปทาย จฯ อิธ ปน โจทนาสารณาปุพฺพกเมว ญตฺติอนุสฺสาวนํ สตฺถุสาสนนฺติ อาห ‘‘อิธาปี’’ติอาทิฯ กรณนฺติ ญตฺติฎฺฐปนเญฺจว อนุสฺสาวนาวจนญฺจฯ อนาทรนฺติ ปุคฺคเล เจว ธเมฺม จ อาทรวิรหิตํฯ เตนาห ‘‘เยนา’’ติอาทิฯ ตตฺถ ปริยาปนฺนคเณ วาติ ตสฺมิํ สเงฺฆ ปริยาปเนฺน สมฺพหุลปุคฺคลสงฺขาเต คเณ วาฯ ‘‘สมฺมาวตฺตนาย อวตฺตมานนฺติ อโตฺถ’’ติ อิมินา อธิปฺปายโตฺถ วุโตฺตฯ เอกกมฺมาทิเกติ เอกกมฺมเอกุเทฺทสสมสิกฺขาตายฯ สห อยนภาเวนาติ สห วตฺตนภาเวนฯ สมาโน สํวาโส เอเตสนฺติ สมานสํวาสกาฯ
Satthusāsanenāti ñattisampadāya ceva anussāvanasampadāya ca. Idha pana codanāsāraṇāpubbakameva ñattianussāvanaṃ satthusāsananti āha ‘‘idhāpī’’tiādi. Karaṇanti ñattiṭṭhapanañceva anussāvanāvacanañca. Anādaranti puggale ceva dhamme ca ādaravirahitaṃ. Tenāha ‘‘yenā’’tiādi. Tattha pariyāpannagaṇe vāti tasmiṃ saṅghe pariyāpanne sambahulapuggalasaṅkhāte gaṇe vā. ‘‘Sammāvattanāya avattamānanti attho’’ti iminā adhippāyattho vutto. Ekakammādiketi ekakammaekuddesasamasikkhātāya. Saha ayanabhāvenāti saha vattanabhāvena. Samāno saṃvāso etesanti samānasaṃvāsakā.
อิทานิ เยน สํวาเสน เต ‘‘สมานสํวาสกา’’ติ (ปาจิ. อฎฺฐ. ๖๖๙) วุตฺตา, โส สํวาโส ตสฺส อุกฺขิตฺตกสฺส เตหิ สทฺธิํ นตฺถิ, เยหิ จ สทฺธิํ ตสฺส โส สํวาโส นตฺถิ, น เตน เต ภิกฺขู อตฺตโน สหายา กตา โหนฺติ, ตสฺมา โส อกตสหาโย นามาติ อิมมตฺถํ ทเสฺสตุํ ‘‘ยสฺส ปนา’’ติอาทิ วุตฺตํฯ เอวํ ปทวณฺณนํ กตฺวา อิทานิ อตฺถมตฺตํ ทเสฺสตุํ ‘‘สมานสํวาสกภาวํ อนุปคตนฺติ อโตฺถ’’ติ วุตฺตํฯ กิํ ตํ อนุวตฺตนนฺติ กสฺสจิ อาสงฺกา สิยาติ ตํ สรูปโต ทเสฺสโนฺต ‘‘ยํทิฎฺฐิโก โส โหตี’’ติอาทิมาหฯ ตตฺถ โสติ โย อุกฺขิตฺตโก, โสฯ
Idāni yena saṃvāsena te ‘‘samānasaṃvāsakā’’ti (pāci. aṭṭha. 669) vuttā, so saṃvāso tassa ukkhittakassa tehi saddhiṃ natthi, yehi ca saddhiṃ tassa so saṃvāso natthi, na tena te bhikkhū attano sahāyā katā honti, tasmā so akatasahāyo nāmāti imamatthaṃ dassetuṃ ‘‘yassa panā’’tiādi vuttaṃ. Evaṃ padavaṇṇanaṃ katvā idāni atthamattaṃ dassetuṃ ‘‘samānasaṃvāsakabhāvaṃ anupagatanti attho’’ti vuttaṃ. Kiṃ taṃ anuvattananti kassaci āsaṅkā siyāti taṃ sarūpato dassento ‘‘yaṃdiṭṭhiko so hotī’’tiādimāha. Tattha soti yo ukkhittako, so.
อุกฺขิตฺตานุวตฺติกาสิกฺขาปทวณฺณนา นิฎฺฐิตาฯ
Ukkhittānuvattikāsikkhāpadavaṇṇanā niṭṭhitā.
