| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
9. உக்கி²த்தஸம்போ⁴க³ஸிக்கா²பத³வண்ணனா
9. Ukkhittasambhogasikkhāpadavaṇṇanā
அகதானுத⁴ம்மேனாதி உக்கி²பித்வா அனோஸாரிதேன. தேனாஹ ‘‘அனுத⁴ம்மோ வுச்சதீ’’திஆதி³. எத்த² அனுத⁴ம்மோதி ஓஸாரணா வுச்சதீதி ஸம்ப³ந்தோ⁴. உக்கே²பனீயகம்மஸ்ஸானுரூபோ, பச்சா² கத்தப்³போ³ வா த⁴ம்மோதி அனுத⁴ம்மோ. அனுலோமவத்தங் தி³ஸ்வாதி ‘‘ந உபஸம்பாதே³தப்³ப³ங், ந நிஸ்ஸயோ தா³தப்³போ³’’திஆதி³கங் (சூளவ॰ 70) அட்டா²ரஸவித⁴ங் வத்தங் தி³ஸ்வா, ஏதேஸு அட்டா²ரஸஸு அனுலோமவத்தேஸு வத்தந்தங் தி³ஸ்வாதி அதி⁴ப்பாயோ. ஆமிஸஸம்போ⁴க³ங் வா த⁴ம்மஸம்போ⁴க³ங் வாதி எத்த² யங் கிஞ்சி ஆமிஸஸ்ஸ தா³னங், படிக்³க³ஹணஞ்ச ஆமிஸஸம்போ⁴கோ³. த⁴ம்மஸ்ஸ உத்³தி³ஸனங், உத்³தி³ஸாபனஞ்ச த⁴ம்மஸம்போ⁴கோ³. ஸங்வஸெய்யாதி ‘‘உபோஸத²ங் வா பவாரணங் வா ஸங்க⁴கம்மங் வா’’தி (பாசி॰ 425) ஏவங் பத³பா⁴ஜனியங் வுத்தங் திவித⁴ங் ஸங்வாஸங் கரெய்ய. யஸ்மா பனெத்த² உபோஸத²பவாரணாபி ஸங்கே⁴ஹியேவ காதப்³ப³த்தா ஸங்க⁴கம்மானியேவ ஹொந்தி, தஸ்மா ‘‘உபோஸதா²தி³கங் ஸங்க⁴கம்மங் கரெய்யா’’தி வுத்தங். பயோகே³ பயோகே³தி தா³னே தா³னே, க³ஹணே க³ஹணே சாதி அத்தோ².
Akatānudhammenāti ukkhipitvā anosāritena. Tenāha ‘‘anudhammo vuccatī’’tiādi. Ettha anudhammoti osāraṇā vuccatīti sambandho. Ukkhepanīyakammassānurūpo, pacchā kattabbo vā dhammoti anudhammo. Anulomavattaṃ disvāti ‘‘na upasampādetabbaṃ, na nissayo dātabbo’’tiādikaṃ (cūḷava. 70) aṭṭhārasavidhaṃ vattaṃ disvā, etesu aṭṭhārasasu anulomavattesu vattantaṃ disvāti adhippāyo. Āmisasambhogaṃ vā dhammasambhogaṃ vāti ettha yaṃ kiñci āmisassa dānaṃ, paṭiggahaṇañca āmisasambhogo. Dhammassa uddisanaṃ, uddisāpanañca dhammasambhogo. Saṃvaseyyāti ‘‘uposathaṃ vā pavāraṇaṃ vā saṅghakammaṃ vā’’ti (pāci. 425) evaṃ padabhājaniyaṃ vuttaṃ tividhaṃ saṃvāsaṃ kareyya. Yasmā panettha uposathapavāraṇāpi saṅghehiyeva kātabbattā saṅghakammāniyeva honti, tasmā ‘‘uposathādikaṃ saṅghakammaṃ kareyyā’’ti vuttaṃ. Payoge payogeti dāne dāne, gahaṇe gahaṇe cāti attho.
பண்ணத்திங் அஜானந்தேன அரஹதாபி கிரியாப்³யாகதசித்தேன ஆபஜ்ஜிதப்³ப³த்தா ‘‘திசித்த’’ந்தி வுத்தங்.
Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ.
உக்கி²த்தஸம்போ⁴க³ஸிக்கா²பத³வண்ணனா நிட்டி²தா.
Ukkhittasambhogasikkhāpadavaṇṇanā niṭṭhitā.
