| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ဥက္ခိတ္တသမ္ဘောဂသိက္ခာပဒဝဏ္ဏနာ
9. Ukkhittasambhogasikkhāpadavaṇṇanā
အကတာနုဓမ္မေနာတိ ဥက္ခိပိတ္ဝာ အနောသာရိတေန။ တေနာဟ ‘‘အနုဓမ္မော ဝုစ္စတီ’’တိအာဒိ။ ဧတ္ထ အနုဓမ္မောတိ ဩသာရဏာ ဝုစ္စတီတိ သမ္ဗန္ဓော။ ဥက္ခေပနီယကမ္မသ္သာနုရူပော, ပစ္ဆာ ကတ္တဗ္ဗော ဝာ ဓမ္မောတိ အနုဓမ္မော။ အနုလောမဝတ္တံ ဒိသ္ဝာတိ ‘‘န ဥပသမ္ပာဒေတဗ္ဗံ, န နိသ္သယော ဒာတဗ္ဗော’’တိအာဒိကံ (စူဠဝ. ၇၀) အဋ္ဌာရသဝိဓံ ဝတ္တံ ဒိသ္ဝာ, ဧတေသု အဋ္ဌာရသသု အနုလောမဝတ္တေသု ဝတ္တန္တံ ဒိသ္ဝာတိ အဓိပ္ပာယော။ အာမိသသမ္ဘောဂံ ဝာ ဓမ္မသမ္ဘောဂံ ဝာတိ ဧတ္ထ ယံ ကိဉ္စိ အာမိသသ္သ ဒာနံ, ပဋိဂ္ဂဟဏဉ္စ အာမိသသမ္ဘောဂော။ ဓမ္မသ္သ ဥဒ္ဒိသနံ, ဥဒ္ဒိသာပနဉ္စ ဓမ္မသမ္ဘောဂော။ သံဝသေယ္ယာတိ ‘‘ဥပောသထံ ဝာ ပဝာရဏံ ဝာ သင္ဃကမ္မံ ဝာ’’တိ (ပာစိ. ၄၂၅) ဧဝံ ပဒဘာဇနိယံ ဝုတ္တံ တိဝိဓံ သံဝာသံ ကရေယ္ယ။ ယသ္မာ ပနေတ္ထ ဥပောသထပဝာရဏာပိ သင္ဃေဟိယေဝ ကာတဗ္ဗတ္တာ သင္ဃကမ္မာနိယေဝ ဟောန္တိ, တသ္မာ ‘‘ဥပောသထာဒိကံ သင္ဃကမ္မံ ကရေယ္ယာ’’တိ ဝုတ္တံ။ ပယောဂေ ပယောဂေတိ ဒာနေ ဒာနေ, ဂဟဏေ ဂဟဏေ စာတိ အတ္ထော။
Akatānudhammenāti ukkhipitvā anosāritena. Tenāha ‘‘anudhammo vuccatī’’tiādi. Ettha anudhammoti osāraṇā vuccatīti sambandho. Ukkhepanīyakammassānurūpo, pacchā kattabbo vā dhammoti anudhammo. Anulomavattaṃ disvāti ‘‘na upasampādetabbaṃ, na nissayo dātabbo’’tiādikaṃ (cūḷava. 70) aṭṭhārasavidhaṃ vattaṃ disvā, etesu aṭṭhārasasu anulomavattesu vattantaṃ disvāti adhippāyo. Āmisasambhogaṃ vā dhammasambhogaṃ vāti ettha yaṃ kiñci āmisassa dānaṃ, paṭiggahaṇañca āmisasambhogo. Dhammassa uddisanaṃ, uddisāpanañca dhammasambhogo. Saṃvaseyyāti ‘‘uposathaṃ vā pavāraṇaṃ vā saṅghakammaṃ vā’’ti (pāci. 425) evaṃ padabhājaniyaṃ vuttaṃ tividhaṃ saṃvāsaṃ kareyya. Yasmā panettha uposathapavāraṇāpi saṅghehiyeva kātabbattā saṅghakammāniyeva honti, tasmā ‘‘uposathādikaṃ saṅghakammaṃ kareyyā’’ti vuttaṃ. Payoge payogeti dāne dāne, gahaṇe gahaṇe cāti attho.
ပဏ္ဏတ္တိံ အဇာနန္တေန အရဟတာပိ ကိရိယာဗ္ယာကတစိတ္တေန အာပဇ္ဇိတဗ္ဗတ္တာ ‘‘တိစိတ္တ’’န္တိ ဝုတ္တံ။
Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ.
ဥက္ခိတ္တသမ္ဘောဂသိက္ခာပဒဝဏ္ဏနာ နိဋ္ဌိတာ။
Ukkhittasambhogasikkhāpadavaṇṇanā niṭṭhitā.
