| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༩. ཨུཀྑིཏྟསམྦྷོགསིཀྑཱཔདཝཎྞནཱ
9. Ukkhittasambhogasikkhāpadavaṇṇanā
༤༢༤. ནཝམེ པཡོགགཎནཱཡཱཏི དཱནགྒཧཎཔྤཡོགགཎནཱཡ། སཾཝཱསེ ཀམྨཔརིཡོསཱནཝསེན, སཧསེཡྻཱཡ ཨེཀསྨིཾ ནིཔནྣེ ཨིཏརསྶ ནིཔཛྫནཔཡོགཝསེན ཨཱཔཏྟིཔརིཙྪེདོ ཝེདིཏབྦོ། ཨེཏྠ ཙ པདབྷཱཛནེ ‘‘ཨེཀཙྪནྣེ’’ཏི ཨཝིསེསེན ཝུཏྟཏྟཱ ནཱནཱུཔཙཱརེཔི ཨེཀཙྪནྣེ ནིཔཛྫནྟསྶ ཨཱཔཏྟི། ཏེནེཝ མཱཏིཀཱཊྛཀཐཱཡཾ (ཀངྑཱ॰ ཨཊྛ॰ ཨུཀྑིཏྟསམྦྷོགསིཀྑཱཔདཝཎྞནཱ) ཝུཏྟཾ ‘‘སཧ ཝཱ སེཡྻཾ ཀཔྤེཡྻཱཏི ནཱནཱུཔཙཱརེཔི ཨེཀཙྪནྣེ ནིཔཛྫེཡྻཱ’’ཏི། པཎྞཏྟིཾ ཨཛཱནནྟེན ཨརཧཏཱཔི ཀིརིཡཱབྱཱཀཏཙིཏྟེན ཨཱཔཛྫིཏབྦཏྟཱ ‘‘ཏིཙིཏྟ’’ནྟི ཝུཏྟཾ། ཡཾ པན ཀེནཙི ཝུཏྟཾ ‘‘ཏིཙིཏྟནྟི ཨེཏྠ ཝིཔཱཀཱབྱཱཀཏཙིཏྟེན སཧ ཝཱ སེཡྻཾ ཀཔྤེཡྻཱཏི ཨེཝམཏྠོ དཊྛབྦོ, ཨཉྙཐཱ སཙིཏྟཀཏྟཱ སིཀྑཱཔདསྶ ཀིརིཡཱབྱཱཀཏཾ སནྡྷཱཡ ན ཡུཛྫཏཱི’’ཏི, ཏཾ ན གཧེཏབྦཾ། ན ཧི སཙིཏྟཀསིཀྑཱཔདཝཱིཏིཀྐམོ ཨརཧཏོ ན སམྦྷཝཏི། ཏེནེཝ པཐཝཱིཁཎནཱདཱིསུ སཙིཏྟཀསིཀྑཱཔདེསུ ཏིཙིཏྟམེཝ ཝུཏྟཾ། སེསམེཏྠ ཨུཏྟཱནམེཝ། ཨཀཏཱནུདྷམྨཏཱ, ཛཱནནཱ, སམྦྷོགཱདིཀརཎནྟི ཨིམཱནི པནེཏྠ ཏཱིཎི ཨངྒཱནི།
424. Navame payogagaṇanāyāti dānaggahaṇappayogagaṇanāya. Saṃvāse kammapariyosānavasena, sahaseyyāya ekasmiṃ nipanne itarassa nipajjanapayogavasena āpattiparicchedo veditabbo. Ettha ca padabhājane ‘‘ekacchanne’’ti avisesena vuttattā nānūpacārepi ekacchanne nipajjantassa āpatti. Teneva mātikāṭṭhakathāyaṃ (kaṅkhā. aṭṭha. ukkhittasambhogasikkhāpadavaṇṇanā) vuttaṃ ‘‘saha vā seyyaṃ kappeyyāti nānūpacārepi ekacchanne nipajjeyyā’’ti. Paṇṇattiṃ ajānantena arahatāpi kiriyābyākatacittena āpajjitabbattā ‘‘ticitta’’nti vuttaṃ. Yaṃ pana kenaci vuttaṃ ‘‘ticittanti ettha vipākābyākatacittena saha vā seyyaṃ kappeyyāti evamattho daṭṭhabbo, aññathā sacittakattā sikkhāpadassa kiriyābyākataṃ sandhāya na yujjatī’’ti, taṃ na gahetabbaṃ. Na hi sacittakasikkhāpadavītikkamo arahato na sambhavati. Teneva pathavīkhaṇanādīsu sacittakasikkhāpadesu ticittameva vuttaṃ. Sesamettha uttānameva. Akatānudhammatā, jānanā, sambhogādikaraṇanti imāni panettha tīṇi aṅgāni.
ཨུཀྑིཏྟསམྦྷོགསིཀྑཱཔདཝཎྞནཱ ནིཊྛིཏཱ།
Ukkhittasambhogasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༧. སཔྤཱཎཀཝགྒོ • 7. Sappāṇakavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༩. ཨུཀྑིཏྟསམྦྷོགསིཀྑཱཔདཝཎྞནཱ • 9. Ukkhittasambhogasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༩. ཨུཀྑིཏྟསམྦྷོགསིཀྑཱཔདཝཎྞནཱ • 9. Ukkhittasambhogasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. ཨུཀྑིཏྟསམྦྷོགསིཀྑཱཔདཾ • 9. Ukkhittasambhogasikkhāpadaṃ
