| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ဥက္ခိတ္တာသိကသုတ္တံ
8. Ukkhittāsikasuttaṃ
၁၀၃. ‘‘ဆ, ဘိက္ခဝေ, အာနိသံသေ သမ္ပသ္သမာနေန အလမေဝ ဘိက္ခုနာ သဗ္ဗသင္ခာရေသု အနောဓိံ ကရိတ္ဝာ ဒုက္ခသညံ ဥပဋ္ဌာပေတုံ။ ကတမေ ဆ? ‘သဗ္ဗသင္ခာရေသု စ မေ နိဗ္ဗိဒသညာ ပစ္စုပဋ္ဌိတာ ဘဝိသ္သတိ, သေယ္ယထာပိ ဥက္ခိတ္တာသိကေ ဝဓကေ။ သဗ္ဗလောကာ စ မေ မနော ဝုဋ္ဌဟိသ္သတိ, နိဗ္ဗာနေ စ သန္တဒသ္သာဝီ ဘဝိသ္သာမိ, အနုသယာ စ မေ သမုဂ္ဃာတံ ဂစ္ဆိသ္သန္တိ 1, ကိစ္စကာရီ စ ဘဝိသ္သာမိ, သတ္ထာ စ မေ ပရိစိဏ္ဏော ဘဝိသ္သတိ မေတ္တာဝတာယာ’တိ။ ဣမေ ခော, ဘိက္ခဝေ, ဆ အာနိသံသေ သမ္ပသ္သမာနေန အလမေဝ ဘိက္ခုနာ သဗ္ဗသင္ခာရေသု အနောဓိံ ကရိတ္ဝာ ဒုက္ခသညံ ဥပဋ္ဌာပေတု’’န္တိ။ အဋ္ဌမံ။
103. ‘‘Cha, bhikkhave, ānisaṃse sampassamānena alameva bhikkhunā sabbasaṅkhāresu anodhiṃ karitvā dukkhasaññaṃ upaṭṭhāpetuṃ. Katame cha? ‘Sabbasaṅkhāresu ca me nibbidasaññā paccupaṭṭhitā bhavissati, seyyathāpi ukkhittāsike vadhake. Sabbalokā ca me mano vuṭṭhahissati, nibbāne ca santadassāvī bhavissāmi, anusayā ca me samugghātaṃ gacchissanti 2, kiccakārī ca bhavissāmi, satthā ca me pariciṇṇo bhavissati mettāvatāyā’ti. Ime kho, bhikkhave, cha ānisaṃse sampassamānena alameva bhikkhunā sabbasaṅkhāresu anodhiṃ karitvā dukkhasaññaṃ upaṭṭhāpetu’’nti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ဥက္ခိတ္တာသိကသုတ္တဝဏ္ဏနာ • 8. Ukkhittāsikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၁. ပာတုဘာဝသုတ္တာဒိဝဏ္ဏနာ • 1-11. Pātubhāvasuttādivaṇṇanā
