| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
அதி⁴கரணபே⁴தோ³
Adhikaraṇabhedo
1. உக்கோடனபே⁴தா³தி³
1. Ukkoṭanabhedādi
340. 1 சத்தாரி அதி⁴கரணானி. விவாதா³தி⁴கரணங், அனுவாதா³தி⁴கரணங், ஆபத்தாதி⁴கரணங், கிச்சாதி⁴கரணங் – இமானி சத்தாரி அதி⁴கரணானி.
340.2 Cattāri adhikaraṇāni. Vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ – imāni cattāri adhikaraṇāni.
இமேஸங் சதுன்னங் அதி⁴கரணானங் கதி உக்கோடா? இமேஸங் சதுன்னங் அதி⁴கரணானங் த³ஸ உக்கோடா. விவாதா³தி⁴கரணஸ்ஸ த்³வே உக்கோடா, அனுவாதா³தி⁴கரணஸ்ஸ சத்தாரோ உக்கோடா, ஆபத்தாதி⁴கரணஸ்ஸ தயோ உக்கோடா, கிச்சாதி⁴கரணஸ்ஸ ஏகோ உக்கோடோ – இமேஸங் சதுன்னங் அதி⁴கரணானங் இமே த³ஸ உக்கோடா.
Imesaṃ catunnaṃ adhikaraṇānaṃ kati ukkoṭā? Imesaṃ catunnaṃ adhikaraṇānaṃ dasa ukkoṭā. Vivādādhikaraṇassa dve ukkoṭā, anuvādādhikaraṇassa cattāro ukkoṭā, āpattādhikaraṇassa tayo ukkoṭā, kiccādhikaraṇassa eko ukkoṭo – imesaṃ catunnaṃ adhikaraṇānaṃ ime dasa ukkoṭā.
விவாதா³தி⁴கரணங் உக்கோடெந்தோ கதி ஸமதே² உக்கோடேதி? அனுவாதா³தி⁴கரணங் உக்கோடெந்தோ கதி ஸமதே² உக்கோடேதி? ஆபத்தாதி⁴கரணங் உக்கோடெந்தோ கதி ஸமதே² உக்கோடேதி? கிச்சாதி⁴கரணங் உக்கோடெந்தோ கதி ஸமதே² உக்கோடேதி?
Vivādādhikaraṇaṃ ukkoṭento kati samathe ukkoṭeti? Anuvādādhikaraṇaṃ ukkoṭento kati samathe ukkoṭeti? Āpattādhikaraṇaṃ ukkoṭento kati samathe ukkoṭeti? Kiccādhikaraṇaṃ ukkoṭento kati samathe ukkoṭeti?
விவாதா³தி⁴கரணங் உக்கோடெந்தோ த்³வே ஸமதே² உக்கோடேதி. அனுவாதா³தி⁴கரணங் உக்கோடெந்தோ சத்தாரோ ஸமதே² உக்கோடேதி. ஆபத்தாதி⁴கரணங் உக்கோடெந்தோ தயோ ஸமதே² உக்கோடேதி. கிச்சாதி⁴கரணங் உக்கோடெந்தோ ஏகங் ஸமத²ங் உக்கோடேதி.
Vivādādhikaraṇaṃ ukkoṭento dve samathe ukkoṭeti. Anuvādādhikaraṇaṃ ukkoṭento cattāro samathe ukkoṭeti. Āpattādhikaraṇaṃ ukkoṭento tayo samathe ukkoṭeti. Kiccādhikaraṇaṃ ukkoṭento ekaṃ samathaṃ ukkoṭeti.
341. கதி உக்கோடா? கதிஹாகாரேஹி உக்கோடனங் பஸவதி? கதிஹங்கே³ஹி ஸமன்னாக³தோ புக்³க³லோ அதி⁴கரணங் உக்கோடேதி? கதி புக்³க³லா அதி⁴கரணங் உக்கோடெந்தா ஆபத்திங் ஆபஜ்ஜந்தி?
341. Kati ukkoṭā? Katihākārehi ukkoṭanaṃ pasavati? Katihaṅgehi samannāgato puggalo adhikaraṇaṃ ukkoṭeti? Kati puggalā adhikaraṇaṃ ukkoṭentā āpattiṃ āpajjanti?
த்³வாத³ஸ உக்கோடா. த³ஸஹாகாரேஹி உக்கோடனங் பஸவதி. சதூஹங்கே³ஹி ஸமன்னாக³தோ புக்³க³லோ அதி⁴கரணங் உக்கோடேதி. சத்தாரோ புக்³க³லா அதி⁴கரணங் உக்கோடெந்தா ஆபத்திங் ஆபஜ்ஜந்தி?
Dvādasa ukkoṭā. Dasahākārehi ukkoṭanaṃ pasavati. Catūhaṅgehi samannāgato puggalo adhikaraṇaṃ ukkoṭeti. Cattāro puggalā adhikaraṇaṃ ukkoṭentā āpattiṃ āpajjanti?
கதமே த்³வாத³ஸ உக்கோடா? அகதங் கம்மங், து³க்கடங் கம்மங், புன காதப்³ப³ங் கம்மங், அனிஹதங், து³ன்னிஹதங், புன நிஹனிதப்³ப³ங், அவினிச்சி²தங், து³வினிச்சி²தங், புன வினிச்சி²தப்³ப³ங், அவூபஸந்தங், து³வூபஸந்தங், புன வூபஸமேதப்³ப³ந்தி – இமே த்³வாத³ஸ உக்கோடா.
Katame dvādasa ukkoṭā? Akataṃ kammaṃ, dukkaṭaṃ kammaṃ, puna kātabbaṃ kammaṃ, anihataṃ, dunnihataṃ, puna nihanitabbaṃ, avinicchitaṃ, duvinicchitaṃ, puna vinicchitabbaṃ, avūpasantaṃ, duvūpasantaṃ, puna vūpasametabbanti – ime dvādasa ukkoṭā.
கதமேஹி த³ஸஹாகாரேஹி உக்கோடனங் பஸவதி? தத்த² ஜாதகங் அதி⁴கரணங் உக்கோடேதி, தத்த² ஜாதகங் வூபஸந்தங் அதி⁴கரணங் உக்கோடேதி, அந்தராமக்³கே³ அதி⁴கரணங் உக்கோடேதி, அந்தராமக்³கே³ வூபஸந்தங் அதி⁴கரணங் உக்கோடேதி, தத்த² க³தங் அதி⁴கரணங் உக்கோடேதி, தத்த² க³தங் வூபஸந்தங் அதி⁴கரணங் உக்கோடேதி, ஸதிவினயங் உக்கோடேதி, அமூள்ஹவினயங் உக்கோடேதி, தஸ்ஸபாபியஸிகங் உக்கோடேதி, திணவத்தா²ரகங் உக்கோடேதி – இமேஹி த³ஸஹாகாரேஹி உக்கோடனங் பஸவதி.
Katamehi dasahākārehi ukkoṭanaṃ pasavati? Tattha jātakaṃ adhikaraṇaṃ ukkoṭeti, tattha jātakaṃ vūpasantaṃ adhikaraṇaṃ ukkoṭeti, antarāmagge adhikaraṇaṃ ukkoṭeti, antarāmagge vūpasantaṃ adhikaraṇaṃ ukkoṭeti, tattha gataṃ adhikaraṇaṃ ukkoṭeti, tattha gataṃ vūpasantaṃ adhikaraṇaṃ ukkoṭeti, sativinayaṃ ukkoṭeti, amūḷhavinayaṃ ukkoṭeti, tassapāpiyasikaṃ ukkoṭeti, tiṇavatthārakaṃ ukkoṭeti – imehi dasahākārehi ukkoṭanaṃ pasavati.
கதமேஹி சதூஹங்கே³ஹி ஸமன்னாக³தோ புக்³க³லோ அதி⁴கரணங் உக்கோடேதி? ச²ந்தா³க³திங் க³ச்ச²ந்தோ அதி⁴கரணங் உக்கோடேதி, தோ³ஸாக³திங் க³ச்ச²ந்தோ அதி⁴கரணங் உக்கோடேதி, மோஹாக³திங் க³ச்ச²ந்தோ அதி⁴கரணங் உக்கோடேதி, ப⁴யாக³திங் க³ச்ச²ந்தோ அதி⁴கரணங் உக்கோடேதி – இமேஹி சதூஹங்கே³ஹி ஸமன்னாக³தோ புக்³க³லோ அதி⁴கரணங் உக்கோடேதி.
Katamehi catūhaṅgehi samannāgato puggalo adhikaraṇaṃ ukkoṭeti? Chandāgatiṃ gacchanto adhikaraṇaṃ ukkoṭeti, dosāgatiṃ gacchanto adhikaraṇaṃ ukkoṭeti, mohāgatiṃ gacchanto adhikaraṇaṃ ukkoṭeti, bhayāgatiṃ gacchanto adhikaraṇaṃ ukkoṭeti – imehi catūhaṅgehi samannāgato puggalo adhikaraṇaṃ ukkoṭeti.
கதமே சத்தாரோ புக்³க³லா அதி⁴கரணங் உக்கோடெந்தா ஆபத்திங் ஆபஜ்ஜந்தி? தத³ஹுபஸம்பன்னோ உக்கோடேதி உக்கோடனகங் பாசித்தியங், ஆக³ந்துகோ உக்கோடேதி உக்கோடனகங் பாசித்தியங், காரகோ உக்கோடேதி உக்கோடனகங் பாசித்தியங், ச²ந்த³தா³யகோ உக்கோடேதி உக்கோடனகங் பாசித்தியங் – இமே சத்தாரோ புக்³க³லா அதி⁴கரணங் உக்கோடெந்தா ஆபத்திங் ஆபஜ்ஜந்தி.
Katame cattāro puggalā adhikaraṇaṃ ukkoṭentā āpattiṃ āpajjanti? Tadahupasampanno ukkoṭeti ukkoṭanakaṃ pācittiyaṃ, āgantuko ukkoṭeti ukkoṭanakaṃ pācittiyaṃ, kārako ukkoṭeti ukkoṭanakaṃ pācittiyaṃ, chandadāyako ukkoṭeti ukkoṭanakaṃ pācittiyaṃ – ime cattāro puggalā adhikaraṇaṃ ukkoṭentā āpattiṃ āpajjanti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / உக்கோடனபே⁴தா³தி³வண்ணனா • Ukkoṭanabhedādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணபே⁴த³வண்ணனா • Adhikaraṇabhedavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உக்கோடனபே⁴தா³தி³வண்ணனா • Ukkoṭanabhedādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உக்கோடனபே⁴தா³தி³கதா²வண்ணனா • Ukkoṭanabhedādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / உக்கோடனபே⁴தா³தி³வண்ணனா • Ukkoṭanabhedādivaṇṇanā
