| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
অধিকরণভেদং
Adhikaraṇabhedaṃ
উক্কোটনভেদাদিৰণ্ণনা
Ukkoṭanabhedādivaṇṇanā
৩৪০. অধিকরণভেদে ইমে দস উক্কোটাতি অধিকরণানং উক্কোটেত্ৰা পুন অধিকরণউক্কোটেন সমথানং উক্কোটং দস্সেতুং ‘‘ৰিৰাদাধিকরণং উক্কোটেন্তো কতি সমথে উক্কোটেতী’’তিআদিমাহ। তত্থ ৰিৰাদাধিকরণং উক্কোটেন্তো দ্ৰে সমথে উক্কোটেতীতি সম্মুখাৰিনযঞ্চ যেভুয্যসিকঞ্চ ইমে দ্ৰে উক্কোটেতি, পটিসেধেতি; পটিক্কোসতীতি অত্থো। অনুৰাদাধিকরণং উক্কোটেন্তো চত্তারোতি সম্মুখাৰিনযং, সতিৰিনযং, অমূল়্হৰিনযং, তস্সপাপিযসিকন্তি ইমে চত্তারো সমথে উক্কোটেতি। আপত্তাধিকরণং উক্কোটেন্তো তযোতি সম্মুখাৰিনযং, পটিঞ্ঞাতকরণং, তিণৰত্থারকন্তি ইমে তযো সমথে উক্কোটেতি। কিচ্চাধিকরণং উক্কোটেন্তো একন্তি সম্মুখাৰিনযং ইমং একং সমথং উক্কোটেতি।
340. Adhikaraṇabhede ime dasa ukkoṭāti adhikaraṇānaṃ ukkoṭetvā puna adhikaraṇaukkoṭena samathānaṃ ukkoṭaṃ dassetuṃ ‘‘vivādādhikaraṇaṃ ukkoṭento kati samathe ukkoṭetī’’tiādimāha. Tattha vivādādhikaraṇaṃ ukkoṭento dve samathe ukkoṭetīti sammukhāvinayañca yebhuyyasikañca ime dve ukkoṭeti, paṭisedheti; paṭikkosatīti attho. Anuvādādhikaraṇaṃ ukkoṭento cattāroti sammukhāvinayaṃ, sativinayaṃ, amūḷhavinayaṃ, tassapāpiyasikanti ime cattāro samathe ukkoṭeti. Āpattādhikaraṇaṃ ukkoṭento tayoti sammukhāvinayaṃ, paṭiññātakaraṇaṃ, tiṇavatthārakanti ime tayo samathe ukkoṭeti. Kiccādhikaraṇaṃ ukkoṭento ekanti sammukhāvinayaṃ imaṃ ekaṃ samathaṃ ukkoṭeti.
৩৪১. কতি উক্কোটাতিআদিপুচ্ছানং ৰিস্সজ্জনে পন দ্ৰাদসসু উক্কোটেসু অকতং কম্মন্তিআদযো তাৰ তযো উক্কোটা ৰিসেসতো দুতিযে অনুৰাদাধিকরণে লব্ভন্তি। অনিহতং কম্মন্তিআদযো তযো পঠমে ৰিৰাদাধিকরণে লব্ভন্তি। অৰিনিচ্ছিতন্তিআদযো তযো ততিযে আপত্তাধিকরণে লব্ভন্তি। অৰূপসন্তন্তিআদযো তযো চতুত্থে কিচ্চাধিকরণে লব্ভন্তি; অপিচ দ্ৰাদসাপি চ একেকস্মিং অধিকরণে লব্ভন্তিযেৰ।
341.Kati ukkoṭātiādipucchānaṃ vissajjane pana dvādasasu ukkoṭesu akataṃ kammantiādayo tāva tayo ukkoṭā visesato dutiye anuvādādhikaraṇe labbhanti. Anihataṃ kammantiādayo tayo paṭhame vivādādhikaraṇe labbhanti. Avinicchitantiādayo tayo tatiye āpattādhikaraṇe labbhanti. Avūpasantantiādayo tayo catutthe kiccādhikaraṇe labbhanti; apica dvādasāpi ca ekekasmiṃ adhikaraṇe labbhantiyeva.
তত্থজাতকং অধিকরণং উক্কোটেতীতি যস্মিং ৰিহারে ‘‘ময্হং ইমিনা পত্তো গহিতো, চীৰরং গহিত’’ন্তিআদিনা নযেন পত্তচীৰরাদীনং অত্থায অধিকরণং উপ্পন্নং হোতি, তস্মিংযেৰ চ নং ৰিহারে আৰাসিকা সন্নিপতিত্ৰা ‘‘অলং আৰুসো’’তি অত্তপচ্চত্থিকে সঞ্ঞাপেত্ৰা পাল়িমুত্তকৰিনিচ্ছযেনেৰ ৰূপসমেন্তি, ইদং তত্থজাতকং অধিকরণং নাম। যেনাপি ৰিনিচ্ছযেন সমিতং, সোপি একো সমথোযেৰ। ইমং উক্কোটেন্তস্সাপি পাচিত্তিযং।
Tatthajātakaṃ adhikaraṇaṃ ukkoṭetīti yasmiṃ vihāre ‘‘mayhaṃ iminā patto gahito, cīvaraṃ gahita’’ntiādinā nayena pattacīvarādīnaṃ atthāya adhikaraṇaṃ uppannaṃ hoti, tasmiṃyeva ca naṃ vihāre āvāsikā sannipatitvā ‘‘alaṃ āvuso’’ti attapaccatthike saññāpetvā pāḷimuttakavinicchayeneva vūpasamenti, idaṃ tatthajātakaṃ adhikaraṇaṃ nāma. Yenāpi vinicchayena samitaṃ, sopi eko samathoyeva. Imaṃ ukkoṭentassāpi pācittiyaṃ.
তত্থজাতকং ৰূপসন্তন্তি সচে পন তং অধিকরণং নেৰাসিকা ৰূপসমেতুং ন সক্কোন্তি, অথঞ্ঞো ৰিনযধরো আগন্ত্ৰা ‘‘কিং আৰুসো ইমস্মিং ৰিহারে উপোসথো ৰা পৰারণা ৰা ঠিতা’’তি পুচ্ছতি, তেহি চ তস্মিং কারণে কথিতে তং অধিকরণং খন্ধকতো চ পরিৰারতো চ সুত্তেন ৰিনিচ্ছিনিত্ৰা ৰূপসমেতি, ইদং তত্থজাতকং ৰূপসন্তং নাম অধিকরণং। এতং উক্কোটেন্তস্সাপি পাচিত্তিযমেৰ।
Tatthajātakaṃ vūpasantanti sace pana taṃ adhikaraṇaṃ nevāsikā vūpasametuṃ na sakkonti, athañño vinayadharo āgantvā ‘‘kiṃ āvuso imasmiṃ vihāre uposatho vā pavāraṇā vā ṭhitā’’ti pucchati, tehi ca tasmiṃ kāraṇe kathite taṃ adhikaraṇaṃ khandhakato ca parivārato ca suttena vinicchinitvā vūpasameti, idaṃ tatthajātakaṃ vūpasantaṃ nāma adhikaraṇaṃ. Etaṃ ukkoṭentassāpi pācittiyameva.
অন্তরামগ্গেতি তে অত্তপচ্চত্থিকা ‘‘ন মযং এতস্স ৰিনিচ্ছযে তিট্ঠাম, নাযং ৰিনযে কুসলো, অসুকস্মিং নাম গামে ৰিনযধরা থেরা ৰসন্তি, তত্থ গন্ত্ৰা ৰিনিচ্ছিনিস্সামা’’তি গচ্ছন্তা অন্তরামগ্গেযেৰ কারণং সল্লক্খেত্ৰা অঞ্ঞমঞ্ঞং ৰা সঞ্ঞাপেন্তি, অঞ্ঞে ৰা তে ভিক্খূ নিজ্ঝাপেন্তি, ইদম্পি ৰূপসন্তমেৰ হোতি। এৰং ৰূপসন্তং অন্তরামগ্গে অধিকরণং উক্কোটেতি যো, তস্সাপি পাচিত্তিযমেৰ।
Antarāmaggeti te attapaccatthikā ‘‘na mayaṃ etassa vinicchaye tiṭṭhāma, nāyaṃ vinaye kusalo, asukasmiṃ nāma gāme vinayadharā therā vasanti, tattha gantvā vinicchinissāmā’’ti gacchantā antarāmaggeyeva kāraṇaṃ sallakkhetvā aññamaññaṃ vā saññāpenti, aññe vā te bhikkhū nijjhāpenti, idampi vūpasantameva hoti. Evaṃ vūpasantaṃ antarāmagge adhikaraṇaṃ ukkoṭeti yo, tassāpi pācittiyameva.
অন্তরামগ্গে ৰূপসন্তন্তি ন হেৰ খো পন অঞ্ঞমঞ্ঞং সঞ্ঞত্তিযা ৰা সভাগভিক্খুনিজ্ঝাপনেন ৰা ৰূপসন্তং হোতি; অপিচ খো পটিপথং আগচ্ছন্তো একো ৰিনযধরো দিস্ৰা ‘‘কত্থ আৰুসো গচ্ছথা’’তি পুচ্ছিত্ৰা ‘‘অসুকং নাম গামং, ইমিনা নাম কারণেনা’’তি ৰুত্তে ‘‘অলং, আৰুসো, কিং তত্থ গতেনা’’তি তত্থেৰ ধম্মেন ৰিনযেন তং অধিকরণং ৰূপসমেতি, ইদং অন্তরামগ্গে ৰূপসন্তং নাম। এতং উক্কোটেন্তস্সাপি পাচিত্তিযমেৰ।
Antarāmagge vūpasantanti na heva kho pana aññamaññaṃ saññattiyā vā sabhāgabhikkhunijjhāpanena vā vūpasantaṃ hoti; apica kho paṭipathaṃ āgacchanto eko vinayadharo disvā ‘‘kattha āvuso gacchathā’’ti pucchitvā ‘‘asukaṃ nāma gāmaṃ, iminā nāma kāraṇenā’’ti vutte ‘‘alaṃ, āvuso, kiṃ tattha gatenā’’ti tattheva dhammena vinayena taṃ adhikaraṇaṃ vūpasameti, idaṃ antarāmagge vūpasantaṃ nāma. Etaṃ ukkoṭentassāpi pācittiyameva.
তত্থ গতন্তি সচে পন ‘‘অলং, আৰুসো, কিং তত্থ গতেনা’’তি ৰুচ্চমানাপি ‘‘মযং তত্থেৰ গন্ত্ৰা ৰিনিচ্ছযং পাপেস্সামা’’তি ৰিনযধরস্স ৰচনং অনাদিযিত্ৰা গচ্ছন্তিযেৰ, গন্ত্ৰা সভাগানং ভিক্খূনং এতমত্থং আরোচেন্তি। সভাগা ভিক্খূ ‘‘অলং, আৰুসো, সঙ্ঘসন্নিপাতং নাম গরুক’’ন্তি তত্থেৰ নিসীদাপেত্ৰা ৰিনিচ্ছিনিত্ৰা সঞ্ঞাপেন্তি, ইদম্পি ৰূপসন্তমেৰ হোতি। এৰং ৰূপসন্তং তত্থ গতং অধিকরণং উক্কোটেতি যো, তস্সাপি পাচিত্তিযমেৰ।
Tattha gatanti sace pana ‘‘alaṃ, āvuso, kiṃ tattha gatenā’’ti vuccamānāpi ‘‘mayaṃ tattheva gantvā vinicchayaṃ pāpessāmā’’ti vinayadharassa vacanaṃ anādiyitvā gacchantiyeva, gantvā sabhāgānaṃ bhikkhūnaṃ etamatthaṃ ārocenti. Sabhāgā bhikkhū ‘‘alaṃ, āvuso, saṅghasannipātaṃ nāma garuka’’nti tattheva nisīdāpetvā vinicchinitvā saññāpenti, idampi vūpasantameva hoti. Evaṃ vūpasantaṃ tattha gataṃ adhikaraṇaṃ ukkoṭeti yo, tassāpi pācittiyameva.
তত্থ গতং ৰূপসন্তন্তি ন হেৰ খো পন সভাগভিক্খূনং সঞ্ঞত্তিযা ৰূপসন্তং হোতি; অপিচ খো সঙ্ঘং সন্নিপাতেত্ৰা আরোচিতং সঙ্ঘমজ্ঝে ৰিনযধরা ৰূপসমেন্তি, ইদং তত্থ গতং ৰূপসন্তং নাম। এতং উক্কোটেন্তস্সাপি পাচিত্তিযমেৰ।
Tatthagataṃ vūpasantanti na heva kho pana sabhāgabhikkhūnaṃ saññattiyā vūpasantaṃ hoti; apica kho saṅghaṃ sannipātetvā ārocitaṃ saṅghamajjhe vinayadharā vūpasamenti, idaṃ tattha gataṃ vūpasantaṃ nāma. Etaṃ ukkoṭentassāpi pācittiyameva.
সতিৰিনযন্তি খীণাসৰস্স দিন্নং সতিৰিনযং উক্কোটেতি, পাচিত্তিযমেৰ। উম্মত্তকস্স দিন্নে অমূল়্হৰিনযে পাপুস্সন্নস্স দিন্নায তস্সপাপিযসিকাযপি এসেৰ নযো।
Sativinayanti khīṇāsavassa dinnaṃ sativinayaṃ ukkoṭeti, pācittiyameva. Ummattakassa dinne amūḷhavinaye pāpussannassa dinnāya tassapāpiyasikāyapi eseva nayo.
তিণৰত্থারকং উক্কোটেতীতি সঙ্ঘেন তিণৰত্থারকসমথেন ৰূপসমিতে অধিকরণে ‘‘আপত্তি নাম একং ভিক্খুং উপসঙ্কমিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা দেসিযমানা ৰুট্ঠাতি, যং পনেতং নিদ্দাযন্তস্সাপি আপত্তিৰুট্ঠানং নাম, এতং ময্হং ন খমতী’’তি এৰং ৰদন্তোপি তিণৰত্থারকং উক্কোটেতি নাম, তস্সাপি পাচিত্তিযমেৰ।
Tiṇavatthārakaṃukkoṭetīti saṅghena tiṇavatthārakasamathena vūpasamite adhikaraṇe ‘‘āpatti nāma ekaṃ bhikkhuṃ upasaṅkamitvā ukkuṭikaṃ nisīditvā añjaliṃ paggahetvā desiyamānā vuṭṭhāti, yaṃ panetaṃ niddāyantassāpi āpattivuṭṭhānaṃ nāma, etaṃ mayhaṃ na khamatī’’ti evaṃ vadantopi tiṇavatthārakaṃ ukkoṭeti nāma, tassāpi pācittiyameva.
ছন্দাগতিং গচ্ছন্তো অধিকরণং উক্কোটেতীতি ৰিনযধরো হুত্ৰা অত্তনো উপজ্ঝাযাদীনং অত্থায ‘‘অধম্মং ধম্মো’’তিআদীনি দীপেত্ৰা পুব্বে ৰিনিচ্ছিতং অধিকরণং দ্ৰাদসসু উক্কোটেসু যেন কেনচি উক্কোটেন্তো ছন্দাগতিং গচ্ছন্তো অধিকরণং উক্কোটেতি নাম। দ্ৰীসু পন অত্তপচ্চত্থিকেসু একস্মিং ‘‘অনত্থং মে অচরী’’তিআদিনা নযেন সমুপ্পন্নাঘাতো, তস্স পরাজযং আরোপনত্থং ‘‘অধম্মং ধম্মো’’তিআদীনি দীপেত্ৰা পুব্বে ৰিনিচ্ছিতং অধিকরণং দ্ৰাদসসু উক্কোটেসু যেন কেনচি উক্কোটেন্তো দোসাগতিং গচ্ছন্তো অধিকরণং উক্কোটেতি নাম। মন্দো পন মোমূহো মোমূহত্তা এৰ ‘‘অধম্মং ধম্মো’’তিআদীনি দীপেত্ৰা ৰুত্তনযেনেৰ উক্কোটেন্তো মোহাগতিং গচ্ছন্তো অধিকরণং উক্কোটেতি নাম। সচে পন দ্ৰীসু অত্তপচ্চত্থিকেসু একো ৰিসমানি কাযকম্মাদীনি গহনমিচ্ছাদিট্ঠিং বলৰন্তে চ পক্খন্তরিযে অভিঞ্ঞাতে ভিক্খূ নিস্সিতত্তা ৰিসমনিস্সিতো গহননিস্সিতো বলৰনিস্সিতো চ হোতি, তস্স ভযেন ‘‘অযং মে জীৰিতন্তরাযং ৰা ব্রহ্মচরিযন্তরাযং ৰা করেয্যা’’তি ‘‘অধম্মং ধম্মো’’তিআদীনি দীপেত্ৰা ৰুত্তনযেনেৰ উক্কোটেন্তো ভযাগতিং গচ্ছন্তো অধিকরণং উক্কোটেতি নাম।
Chandāgatiṃ gacchanto adhikaraṇaṃ ukkoṭetīti vinayadharo hutvā attano upajjhāyādīnaṃ atthāya ‘‘adhammaṃ dhammo’’tiādīni dīpetvā pubbe vinicchitaṃ adhikaraṇaṃ dvādasasu ukkoṭesu yena kenaci ukkoṭento chandāgatiṃ gacchanto adhikaraṇaṃ ukkoṭeti nāma. Dvīsu pana attapaccatthikesu ekasmiṃ ‘‘anatthaṃ me acarī’’tiādinā nayena samuppannāghāto, tassa parājayaṃ āropanatthaṃ ‘‘adhammaṃ dhammo’’tiādīni dīpetvā pubbe vinicchitaṃ adhikaraṇaṃ dvādasasu ukkoṭesu yena kenaci ukkoṭento dosāgatiṃ gacchanto adhikaraṇaṃ ukkoṭeti nāma. Mando pana momūho momūhattā eva ‘‘adhammaṃ dhammo’’tiādīni dīpetvā vuttanayeneva ukkoṭento mohāgatiṃ gacchanto adhikaraṇaṃ ukkoṭeti nāma. Sace pana dvīsu attapaccatthikesu eko visamāni kāyakammādīni gahanamicchādiṭṭhiṃ balavante ca pakkhantariye abhiññāte bhikkhū nissitattā visamanissito gahananissito balavanissito ca hoti, tassa bhayena ‘‘ayaṃ me jīvitantarāyaṃ vā brahmacariyantarāyaṃ vā kareyyā’’ti ‘‘adhammaṃ dhammo’’tiādīni dīpetvā vuttanayeneva ukkoṭento bhayāgatiṃ gacchanto adhikaraṇaṃ ukkoṭeti nāma.
তদহুপসম্পন্নোতি একো সামণেরো ব্যত্তো হোতি বহুস্সুতো, সো ৰিনিচ্ছযে পরাজযং পত্ৰা মঙ্কুভূতে ভিক্খূ দিস্ৰা পুচ্ছতি ‘‘কস্মা মঙ্কুভূতাত্থা’’তি? তে তস্স তং অধিকরণং আরোচেন্তি। সো তে এৰং ৰদেতি ‘‘হোতু, ভন্তে, মং উপসম্পাদেথ, অহং তং অধিকরণং ৰূপসমেস্সামী’’তি । তে তং উপসম্পাদেন্তি। সো দুতিযদিৰসে ভেরিং পহরিত্ৰা সঙ্ঘং সন্নিপাতেতি। ততো ভিক্খূহি ‘‘কেন সঙ্ঘো সন্নিপাতিতো’’তি ৰুত্তে ‘‘মযা’’তি ৰদতি। ‘‘কস্মা সন্নিপাতিতো’’তি? ‘‘হিয্যো অধিকরণং দুব্বিনিচ্ছিতং, তমহং ৰিনিচ্ছিনিস্সামী’’তি। ‘‘ত্ৰং পন হিয্যো কুহিং গতো’’তি? ‘‘অনুপসম্পন্নোম্হি, ভন্তে, অজ্জ পন উপসম্পন্নোম্হী’’তি। সো ৰত্তব্বো ‘‘ইদং আৰুসো তুম্হাদিসানং ভগৰতা সিক্খাপদং পঞ্ঞত্তং, ‘তদহুপসম্পন্নো উক্কোটেতি, উক্কোটনকং পাচিত্তিয’ন্তি, গচ্ছ আপত্তিং দেসেহী’’তি। আগন্তুকেপি এসেৰ নযো।
Tadahupasampannoti eko sāmaṇero byatto hoti bahussuto, so vinicchaye parājayaṃ patvā maṅkubhūte bhikkhū disvā pucchati ‘‘kasmā maṅkubhūtātthā’’ti? Te tassa taṃ adhikaraṇaṃ ārocenti. So te evaṃ vadeti ‘‘hotu, bhante, maṃ upasampādetha, ahaṃ taṃ adhikaraṇaṃ vūpasamessāmī’’ti . Te taṃ upasampādenti. So dutiyadivase bheriṃ paharitvā saṅghaṃ sannipāteti. Tato bhikkhūhi ‘‘kena saṅgho sannipātito’’ti vutte ‘‘mayā’’ti vadati. ‘‘Kasmā sannipātito’’ti? ‘‘Hiyyo adhikaraṇaṃ dubbinicchitaṃ, tamahaṃ vinicchinissāmī’’ti. ‘‘Tvaṃ pana hiyyo kuhiṃ gato’’ti? ‘‘Anupasampannomhi, bhante, ajja pana upasampannomhī’’ti. So vattabbo ‘‘idaṃ āvuso tumhādisānaṃ bhagavatā sikkhāpadaṃ paññattaṃ, ‘tadahupasampanno ukkoṭeti, ukkoṭanakaṃ pācittiya’nti, gaccha āpattiṃ desehī’’ti. Āgantukepi eseva nayo.
কারকোতি একং সঙ্ঘেন সদ্ধিং অধিকরণং ৰিনিচ্ছিনিত্ৰা পরিৰেণগতং পরাজিতা ভিক্খূ ৰদন্তি ‘‘কিস্স, ভন্তে, তুম্হেহি এৰং ৰিনিচ্ছিতং অধিকরণং, ননু এৰং ৰিনিচ্ছিনিতব্ব’’ন্তি। সো ‘‘কস্মা পঠমংযেৰ এৰং ন ৰদিত্থা’’তি তং অধিকরণং উক্কোটেতি। এৰং যো কারকো উক্কোটেতি, তস্সাপি উক্কোটনকং পাচিত্তিযং। ছন্দদাযকোতি একো অধিকরণৰিনিচ্ছযে ছন্দং দত্ৰা সভাগে ভিক্খূ পরাজযং পত্ৰা আগতে মঙ্কুভূতে দিস্ৰা ‘‘স্ৰে দানি অহং ৰিনিচ্ছিনিস্সামী’’তি সঙ্ঘং সন্নিপাতেত্ৰা ‘‘কস্মা সন্নিপাতেসী’’তি ৰুত্তে ‘‘হিয্যো অধিকরণং দুব্বিনিচ্ছিতং, তমহং অজ্জ ৰিনিচ্ছিনিস্সামী’’তি। ‘‘হিয্যো পন ত্ৰং কত্থ গতো’’তি। ‘‘ছন্দং দত্ৰা নিসিন্নোম্হী’’তি। সো ৰত্তব্বো ‘‘ইদং আৰুসো তুম্হাদিসানং ভগৰতা সিক্খাপদং পঞ্ঞত্তং, ‘ছন্দদাযকো উক্কোটেতি, উক্কোটনকং পাচিত্তিয’ন্তি, গচ্ছ আপত্তিং দেসেহী’’তি।
Kārakoti ekaṃ saṅghena saddhiṃ adhikaraṇaṃ vinicchinitvā pariveṇagataṃ parājitā bhikkhū vadanti ‘‘kissa, bhante, tumhehi evaṃ vinicchitaṃ adhikaraṇaṃ, nanu evaṃ vinicchinitabba’’nti. So ‘‘kasmā paṭhamaṃyeva evaṃ na vaditthā’’ti taṃ adhikaraṇaṃ ukkoṭeti. Evaṃ yo kārako ukkoṭeti, tassāpi ukkoṭanakaṃ pācittiyaṃ. Chandadāyakoti eko adhikaraṇavinicchaye chandaṃ datvā sabhāge bhikkhū parājayaṃ patvā āgate maṅkubhūte disvā ‘‘sve dāni ahaṃ vinicchinissāmī’’ti saṅghaṃ sannipātetvā ‘‘kasmā sannipātesī’’ti vutte ‘‘hiyyo adhikaraṇaṃ dubbinicchitaṃ, tamahaṃ ajja vinicchinissāmī’’ti. ‘‘Hiyyo pana tvaṃ kattha gato’’ti. ‘‘Chandaṃ datvā nisinnomhī’’ti. So vattabbo ‘‘idaṃ āvuso tumhādisānaṃ bhagavatā sikkhāpadaṃ paññattaṃ, ‘chandadāyako ukkoṭeti, ukkoṭanakaṃ pācittiya’nti, gaccha āpattiṃ desehī’’ti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. উক্কোটনভেদাদি • 1. Ukkoṭanabhedādi
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উক্কোটনভেদাদিৰণ্ণনা • Ukkoṭanabhedādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উক্কোটনভেদাদিকথাৰণ্ণনা • Ukkoṭanabhedādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / উক্কোটনভেদাদিৰণ্ণনা • Ukkoṭanabhedādivaṇṇanā
