| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অধিকরণভেদং
Adhikaraṇabhedaṃ
উক্কোটনভেদাদিৰণ্ণনা
Ukkoṭanabhedādivaṇṇanā
৩৪০. অধিকরণভেদে এৰমত্থো ৰেদিতব্বোতি যোজনা। দস্সেতুং আহাতি সম্বন্ধো। দ্ৰে সমথেতি এত্থ দ্ৰিন্নং সমথানং সরূপং দস্সেন্তো আহ ‘‘সম্মুখাৰিনযঞ্চ যেভুয্যসিকঞ্চা’’তি। ‘‘পটিসেধেতী’’তি ইমিনা উক্কোটেতীতি এত্থ কুটধাতুযা ছেদনত্থং অত্থতো দস্সেতি। ছেদনং নাম অত্থতো সমথপটিসেধনন্তি অত্থো।
340. Adhikaraṇabhede evamattho veditabboti yojanā. Dassetuṃ āhāti sambandho. Dve samatheti ettha dvinnaṃ samathānaṃ sarūpaṃ dassento āha ‘‘sammukhāvinayañca yebhuyyasikañcā’’ti. ‘‘Paṭisedhetī’’ti iminā ukkoṭetīti ettha kuṭadhātuyā chedanatthaṃ atthato dasseti. Chedanaṃ nāma atthato samathapaṭisedhananti attho.
৩৪১. দ্ৰাদসসু উক্কোটেসূতি নিদ্ধারণে ভুম্মং। অকতং কম্মন্তিআদযোতি এত্থ আদিসদ্দেন ‘‘দুক্কটং কম্মং, পুন কাতব্বং কম্ম’’ন্তি দ্ৰে উক্কোটা সঙ্গহেতব্বা। অনিহতং কম্মন্তিআদযোতি এত্থ আদিসদ্দেন ‘‘দুন্নিহতং, পুন নিহনিতব্ব’’ন্তি দ্ৰে উক্কোটা সঙ্গহেতব্বা। অৰিনিচ্ছিতন্তিআদযোতি এত্থ আদিসদ্দেন ‘‘দুৰিনিচ্ছিতং, পুন ৰিনিচ্ছিতব্ব’’ন্তি দ্ৰে উক্কোটা সঙ্গহেতব্বা। অৰূপসন্তন্তিআদযোতি এত্থ আদিসদ্দেন ‘‘দুৰূপসন্তং, পুন ৰূপসমেতব্ব’’ন্তি দ্ৰে উক্কোটা সঙ্গহেতব্বা। অপিচাতি সামঞ্ঞতো পন।
341. Dvādasasu ukkoṭesūti niddhāraṇe bhummaṃ. Akataṃ kammantiādayoti ettha ādisaddena ‘‘dukkaṭaṃ kammaṃ, puna kātabbaṃ kamma’’nti dve ukkoṭā saṅgahetabbā. Anihataṃ kammantiādayoti ettha ādisaddena ‘‘dunnihataṃ, puna nihanitabba’’nti dve ukkoṭā saṅgahetabbā. Avinicchitantiādayoti ettha ādisaddena ‘‘duvinicchitaṃ, puna vinicchitabba’’nti dve ukkoṭā saṅgahetabbā. Avūpasantantiādayoti ettha ādisaddena ‘‘duvūpasantaṃ, puna vūpasametabba’’nti dve ukkoṭā saṅgahetabbā. Apicāti sāmaññato pana.
তত্থ জাতকন্তি এত্থ তসদ্দস্স ৰিসযং দস্সেন্তো আহ ‘‘যস্মিংৰিহারে’’তি। যস্মিংৰিহারে উপ্পন্নং হোতীতি সম্বন্ধো। অঞ্ঞমঞ্ঞস্স অত্তেসু, অত্তানং ৰা পটিপক্খং অত্থযন্তি ইচ্ছন্তীতি অত্তপচ্চত্থিকা। পাল়িমুত্তকৰিনিচ্ছযেনেৰাতি পাল়িযং আগতেহি সমথেহি মুত্তকেন ধম্মদেসনামত্তৰিনিচ্ছযেনেৰ। ইদন্তি অধিকরণং। যেনাপি ৰিনিচ্ছযেনাতি পাল়িমুত্তকেন যেনাপি ৰিনিচ্ছযেন।
Tattha jātakanti ettha tasaddassa visayaṃ dassento āha ‘‘yasmiṃvihāre’’ti. Yasmiṃvihāre uppannaṃ hotīti sambandho. Aññamaññassa attesu, attānaṃ vā paṭipakkhaṃ atthayanti icchantīti attapaccatthikā. Pāḷimuttakavinicchayenevāti pāḷiyaṃ āgatehi samathehi muttakena dhammadesanāmattavinicchayeneva. Idanti adhikaraṇaṃ. Yenāpi vinicchayenāti pāḷimuttakena yenāpi vinicchayena.
অঞ্ঞোতি নেৰাসিকেহি অঞ্ঞো ৰিনযধরো পুচ্ছতীতি সম্বন্ধো। তেহি চাতি নেৰাসিকেহি চ।
Aññoti nevāsikehi añño vinayadharo pucchatīti sambandho. Tehi cāti nevāsikehi ca.
এতস্সাতি ৰিনযধরস্স। অযন্তি ৰিনযধরো। তত্থাতি তং গামং। অঞ্ঞমঞ্ঞং ৰা সঞ্ঞাপেন্তীতি অত্তপচ্চত্থিকা অঞ্ঞমঞ্ঞং ৰা সঞ্ঞাপেন্তি। তে ভিক্খূতি তে অত্তপচ্চত্থিকা ভিক্খূ। নিজ্ঝাপেন্তীতি সঞ্ঞাপেন্তি। উক্কোটেতি যোতি যো উক্কোটেতি। এতেতি অত্তপচ্চত্থিকে ভিক্খূ, দিস্ৰাতি সম্বন্ধো। তত্থাতি গামং। তত্থেৰাতি অন্তরামগ্গে এৰ।
Etassāti vinayadharassa. Ayanti vinayadharo. Tatthāti taṃ gāmaṃ. Aññamaññaṃ vā saññāpentīti attapaccatthikā aññamaññaṃ vā saññāpenti. Te bhikkhūti te attapaccatthikā bhikkhū. Nijjhāpentīti saññāpenti. Ukkoṭeti yoti yo ukkoṭeti. Eteti attapaccatthike bhikkhū, disvāti sambandho. Tatthāti gāmaṃ. Tatthevāti antarāmagge eva.
তত্থেৰাতি গামমেৰ। তত্থেৰাতি তস্মিংযেৰ ঠানে। তত্থ গতন্তি তং গামং গতং।
Tatthevāti gāmameva. Tatthevāti tasmiṃyeva ṭhāne. Tattha gatanti taṃ gāmaṃ gataṃ.
‘‘এসেৰ নযো’’তি ইমিনা পাচিত্তিযমেৰ অতিদিসতি।
‘‘Eseva nayo’’ti iminā pācittiyameva atidisati.
সঙ্ঘেন…পে॰… অধিকরণে ৰদন্তোপীতি সম্বন্ধো। যং পনেতং আপত্তিৰুট্ঠানং নাম হোতীতি যোজনা। এতন্তি আপত্তিৰুট্ঠানং। ৰদন্তোপীতি পিসদ্দো ন কেৰলং তিণৰত্থারকং উক্কোটেন্তোযেৰ উক্কোটেতি নাম, অথ খো ৰদন্তোপীতি দস্সেতি।
Saṅghena…pe… adhikaraṇe vadantopīti sambandho. Yaṃ panetaṃ āpattivuṭṭhānaṃ nāma hotīti yojanā. Etanti āpattivuṭṭhānaṃ. Vadantopīti pisaddo na kevalaṃ tiṇavatthārakaṃ ukkoṭentoyeva ukkoṭeti nāma, atha kho vadantopīti dasseti.
ছন্দাগতিং গচ্ছন্তোতিআদীসু অগতিগমনাকারং দস্সেন্তো আহ ‘‘ৰিনযধরো হুত্ৰা’’তিআদি। অত্থায উক্কোটেন্তোতি সম্বন্ধো। তস্সাতি অনত্থং চরন্তস্স। মন্দো পন উক্কোটেতি নামাতি সম্বন্ধো। একো বলৰনিস্সিতো চ হোতীতি সম্বন্ধো। গহনমিচ্ছাদিট্ঠিন্তি গহনসদিসং মিচ্ছাদিট্ঠিং পৰনসদিসং মিচ্ছাদিট্ঠিন্তি অত্থো। বলৰন্তে চাতি এত্থ চসদ্দো সব্বকম্মেসু যোজেতব্বো। নিস্সিতত্তাতি একস্স নিস্সিতত্তা। বলৰনিস্সিতো চাতি এত্থাপি চ সদ্দো সব্বকত্তূসু যোজেতব্বো। তস্সাতি ৰিসমাদিনিস্সিতস্স।
Chandāgatiṃ gacchantotiādīsu agatigamanākāraṃ dassento āha ‘‘vinayadharo hutvā’’tiādi. Atthāya ukkoṭentoti sambandho. Tassāti anatthaṃ carantassa. Mando pana ukkoṭeti nāmāti sambandho. Eko balavanissito ca hotīti sambandho. Gahanamicchādiṭṭhinti gahanasadisaṃ micchādiṭṭhiṃ pavanasadisaṃ micchādiṭṭhinti attho. Balavante cāti ettha casaddo sabbakammesu yojetabbo. Nissitattāti ekassa nissitattā. Balavanissito cāti etthāpi ca saddo sabbakattūsu yojetabbo. Tassāti visamādinissitassa.
সোতি সামণেরো। মঙ্কুভূতাত্থাতি মঙ্কূ হুত্ৰা ভূতা, মঙ্কুং ৰা পত্তা অত্থ ভৰথাতি অত্থো। তেতি পরাজযভিক্খূ। তস্সাতি সামণেরস্স। সোতি সামণেরো। তেতি পরাজযভিক্খূ। তন্তি সামণেরং। সোতি দহরো। ততোতি সন্নিপাতকারণা। হিয্যোতি অনন্তরাতীতাহে। ইতীতি এৰং ৰদেতি। সোতি দহরো। ইদং সিক্খাপদং পঞ্ঞত্তন্তি যোজনা। গচ্ছাতি গচ্ছাহি। ইতীতি এৰং ৰত্তব্বোতি যোজনা।
Soti sāmaṇero. Maṅkubhūtātthāti maṅkū hutvā bhūtā, maṅkuṃ vā pattā attha bhavathāti attho. Teti parājayabhikkhū. Tassāti sāmaṇerassa. Soti sāmaṇero. Teti parājayabhikkhū. Tanti sāmaṇeraṃ. Soti daharo. Tatoti sannipātakāraṇā. Hiyyoti anantarātītāhe. Itīti evaṃ vadeti. Soti daharo. Idaṃ sikkhāpadaṃ paññattanti yojanā. Gacchāti gacchāhi. Itīti evaṃ vattabboti yojanā.
সঙ্ঘেন সদ্ধিং অধিকরণং ৰিনিচ্ছিনিত্ৰা পরিৰেণগতং একং ভিক্খুন্তি যোজনা। কিস্সাতি কেন কারণেন। এৰং ইমিনাকারেন ৰিনিচ্ছিতব্বং ননূতি যোজনা। সোতি ৰিনিচ্ছযকারকো ভিক্খু। ছন্দদাযকো সুৰিঞ্ঞেয্যোযেৰ।
Saṅghena saddhiṃ adhikaraṇaṃ vinicchinitvā pariveṇagataṃ ekaṃ bhikkhunti yojanā. Kissāti kena kāraṇena. Evaṃ iminākārena vinicchitabbaṃ nanūti yojanā. Soti vinicchayakārako bhikkhu. Chandadāyako suviññeyyoyeva.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. উক্কোটনভেদাদি • 1. Ukkoṭanabhedādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / উক্কোটনভেদাদিৰণ্ণনা • Ukkoṭanabhedādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উক্কোটনভেদাদিৰণ্ণনা • Ukkoṭanabhedādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উক্কোটনভেদাদিকথাৰণ্ণনা • Ukkoṭanabhedādikathāvaṇṇanā
