| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
অধিকরণভেদৰণ্ণনা
Adhikaraṇabhedavaṇṇanā
উক্কোটনভেদাদিৰণ্ণনা
Ukkoṭanabhedādivaṇṇanā
৩৪০. অধিকরণউক্কোটেন সমথানং উক্কোটং দস্সেতুন্তি অধিকরণানি সত্তহি সমথেহি সম্মন্তি, তানি উক্কোটেন্তো সত্ত সমথে উক্কোটেতি নামাতি অধিপ্পাযো। পসৰতীতি সম্ভৰতি। ‘‘অনুৰাদাধিকরণে লব্ভন্তী’তিআদীনি ‘ধম্মো অধম্মো’তিআদীনং সমানত্তা তেসু ৰিসেসতো লব্ভন্তী’’তি ৰুত্তং। অনিহতন্তি সুত্তাদিনা। অৰিনিচ্ছিতন্তি ‘‘আপত্তিঅনাপত্তী’’তিআদিনা। ‘‘তত্থ জাতকং অধিকরণং উক্কোটেতি…পে॰… তিণৰত্থারকং উক্কোটেতী’’তি দসেৰ ৰুত্তা। ‘‘সম্মুখাৰিনযপটিঞ্ঞাতকরণযেভুয্যসিকা অৰুত্তত্তা উক্কোটেতুং ন সক্কা, কম্মৰাচাপি তেসং নত্থি। তস্মা তে উক্কোটেতুং ন সক্কাতি ৰদন্তী’’তি লিখিতং। পাল়িমুত্তকৰিনিচ্ছযেনেৰাতি ৰিনযলক্খণং ৰিনা কেৰলং ধম্মদেসনামত্তৰসেনেৰাতি অত্থো। খন্ধকতো ৰা পরিৰারতো ৰা আনীতসুত্তেন। নিজ্ঝাপেন্তি দস্সেন্তি। পুব্বে ধম্মৰিনযেন ৰিনিচ্ছিতং অধিকরণং উপজ্ঝাযাদীনং অত্থায ‘‘অধম্মং ধম্মো’’তিআদীনি দীপেত্ৰাতি অত্থো। ৰিসমানি কাযকম্মাদীনি নিস্সিতত্তা ৰিসমনিস্সিতো। এৰং সেসেসু।
340.Adhikaraṇaukkoṭenasamathānaṃ ukkoṭaṃ dassetunti adhikaraṇāni sattahi samathehi sammanti, tāni ukkoṭento satta samathe ukkoṭeti nāmāti adhippāyo. Pasavatīti sambhavati. ‘‘Anuvādādhikaraṇe labbhantī’tiādīni ‘dhammo adhammo’tiādīnaṃ samānattā tesu visesato labbhantī’’ti vuttaṃ. Anihatanti suttādinā. Avinicchitanti ‘‘āpattianāpattī’’tiādinā. ‘‘Tattha jātakaṃ adhikaraṇaṃ ukkoṭeti…pe… tiṇavatthārakaṃ ukkoṭetī’’ti daseva vuttā. ‘‘Sammukhāvinayapaṭiññātakaraṇayebhuyyasikā avuttattā ukkoṭetuṃ na sakkā, kammavācāpi tesaṃ natthi. Tasmā te ukkoṭetuṃ na sakkāti vadantī’’ti likhitaṃ. Pāḷimuttakavinicchayenevāti vinayalakkhaṇaṃ vinā kevalaṃ dhammadesanāmattavasenevāti attho. Khandhakato vā parivārato vā ānītasuttena. Nijjhāpenti dassenti. Pubbe dhammavinayena vinicchitaṃ adhikaraṇaṃ upajjhāyādīnaṃ atthāya ‘‘adhammaṃ dhammo’’tiādīni dīpetvāti attho. Visamāni kāyakammādīni nissitattā visamanissito. Evaṃ sesesu.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. উক্কোটনভেদাদি • 1. Ukkoṭanabhedādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / উক্কোটনভেদাদিৰণ্ণনা • Ukkoṭanabhedādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / উক্কোটনভেদাদিৰণ্ণনা • Ukkoṭanabhedādivaṇṇanā
