| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
အဓိကရဏဘေဒံ
Adhikaraṇabhedaṃ
ဥက္ကောဋနဘေဒာဒိဝဏ္ဏနာ
Ukkoṭanabhedādivaṇṇanā
၃၄၀. အဓိကရဏဘေဒေ ဧဝမတ္ထော ဝေဒိတဗ္ဗောတိ ယောဇနာ။ ဒသ္သေတုံ အာဟာတိ သမ္ဗန္ဓော။ ဒ္ဝေ သမထေတိ ဧတ္ထ ဒ္ဝိန္နံ သမထာနံ သရူပံ ဒသ္သေန္တော အာဟ ‘‘သမ္မုခာဝိနယဉ္စ ယေဘုယ္ယသိကဉ္စာ’’တိ။ ‘‘ပဋိသေဓေတီ’’တိ ဣမိနာ ဥက္ကောဋေတီတိ ဧတ္ထ ကုဋဓာတုယာ ဆေဒနတ္ထံ အတ္ထတော ဒသ္သေတိ။ ဆေဒနံ နာမ အတ္ထတော သမထပဋိသေဓနန္တိ အတ္ထော။
340. Adhikaraṇabhede evamattho veditabboti yojanā. Dassetuṃ āhāti sambandho. Dve samatheti ettha dvinnaṃ samathānaṃ sarūpaṃ dassento āha ‘‘sammukhāvinayañca yebhuyyasikañcā’’ti. ‘‘Paṭisedhetī’’ti iminā ukkoṭetīti ettha kuṭadhātuyā chedanatthaṃ atthato dasseti. Chedanaṃ nāma atthato samathapaṭisedhananti attho.
၃၄၁. ဒ္ဝာဒသသု ဥက္ကောဋေသူတိ နိဒ္ဓာရဏေ ဘုမ္မံ။ အကတံ ကမ္မန္တိအာဒယောတိ ဧတ္ထ အာဒိသဒ္ဒေန ‘‘ဒုက္ကဋံ ကမ္မံ, ပုန ကာတဗ္ဗံ ကမ္မ’’န္တိ ဒ္ဝေ ဥက္ကောဋာ သင္ဂဟေတဗ္ဗာ။ အနိဟတံ ကမ္မန္တိအာဒယောတိ ဧတ္ထ အာဒိသဒ္ဒေန ‘‘ဒုန္နိဟတံ, ပုန နိဟနိတဗ္ဗ’’န္တိ ဒ္ဝေ ဥက္ကောဋာ သင္ဂဟေတဗ္ဗာ။ အဝိနိစ္ဆိတန္တိအာဒယောတိ ဧတ္ထ အာဒိသဒ္ဒေန ‘‘ဒုဝိနိစ္ဆိတံ, ပုန ဝိနိစ္ဆိတဗ္ဗ’’န္တိ ဒ္ဝေ ဥက္ကောဋာ သင္ဂဟေတဗ္ဗာ။ အဝူပသန္တန္တိအာဒယောတိ ဧတ္ထ အာဒိသဒ္ဒေန ‘‘ဒုဝူပသန္တံ, ပုန ဝူပသမေတဗ္ဗ’’န္တိ ဒ္ဝေ ဥက္ကောဋာ သင္ဂဟေတဗ္ဗာ။ အပိစာတိ သာမညတော ပန။
341. Dvādasasu ukkoṭesūti niddhāraṇe bhummaṃ. Akataṃ kammantiādayoti ettha ādisaddena ‘‘dukkaṭaṃ kammaṃ, puna kātabbaṃ kamma’’nti dve ukkoṭā saṅgahetabbā. Anihataṃ kammantiādayoti ettha ādisaddena ‘‘dunnihataṃ, puna nihanitabba’’nti dve ukkoṭā saṅgahetabbā. Avinicchitantiādayoti ettha ādisaddena ‘‘duvinicchitaṃ, puna vinicchitabba’’nti dve ukkoṭā saṅgahetabbā. Avūpasantantiādayoti ettha ādisaddena ‘‘duvūpasantaṃ, puna vūpasametabba’’nti dve ukkoṭā saṅgahetabbā. Apicāti sāmaññato pana.
တတ္ထ ဇာတကန္တိ ဧတ္ထ တသဒ္ဒသ္သ ဝိသယံ ဒသ္သေန္တော အာဟ ‘‘ယသ္မိံဝိဟာရေ’’တိ။ ယသ္မိံဝိဟာရေ ဥပ္ပန္နံ ဟောတီတိ သမ္ဗန္ဓော။ အညမညသ္သ အတ္တေသု, အတ္တာနံ ဝာ ပဋိပက္ခံ အတ္ထယန္တိ ဣစ္ဆန္တီတိ အတ္တပစ္စတ္ထိကာ။ ပာဠိမုတ္တကဝိနိစ္ဆယေနေဝာတိ ပာဠိယံ အာဂတေဟိ သမထေဟိ မုတ္တကေန ဓမ္မဒေသနာမတ္တဝိနိစ္ဆယေနေဝ။ ဣဒန္တိ အဓိကရဏံ။ ယေနာပိ ဝိနိစ္ဆယေနာတိ ပာဠိမုတ္တကေန ယေနာပိ ဝိနိစ္ဆယေန။
Tattha jātakanti ettha tasaddassa visayaṃ dassento āha ‘‘yasmiṃvihāre’’ti. Yasmiṃvihāre uppannaṃ hotīti sambandho. Aññamaññassa attesu, attānaṃ vā paṭipakkhaṃ atthayanti icchantīti attapaccatthikā. Pāḷimuttakavinicchayenevāti pāḷiyaṃ āgatehi samathehi muttakena dhammadesanāmattavinicchayeneva. Idanti adhikaraṇaṃ. Yenāpi vinicchayenāti pāḷimuttakena yenāpi vinicchayena.
အညောတိ နေဝာသိကေဟိ အညော ဝိနယဓရော ပုစ္ဆတီတိ သမ္ဗန္ဓော။ တေဟိ စာတိ နေဝာသိကေဟိ စ။
Aññoti nevāsikehi añño vinayadharo pucchatīti sambandho. Tehi cāti nevāsikehi ca.
ဧတသ္သာတိ ဝိနယဓရသ္သ။ အယန္တိ ဝိနယဓရော။ တတ္ထာတိ တံ ဂာမံ။ အညမညံ ဝာ သညာပေန္တီတိ အတ္တပစ္စတ္ထိကာ အညမညံ ဝာ သညာပေန္တိ။ တေ ဘိက္ခူတိ တေ အတ္တပစ္စတ္ထိကာ ဘိက္ခူ။ နိဇ္ဈာပေန္တီတိ သညာပေန္တိ။ ဥက္ကောဋေတိ ယောတိ ယော ဥက္ကောဋေတိ။ ဧတေတိ အတ္တပစ္စတ္ထိကေ ဘိက္ခူ, ဒိသ္ဝာတိ သမ္ဗန္ဓော။ တတ္ထာတိ ဂာမံ။ တတ္ထေဝာတိ အန္တရာမဂ္ဂေ ဧဝ။
Etassāti vinayadharassa. Ayanti vinayadharo. Tatthāti taṃ gāmaṃ. Aññamaññaṃ vā saññāpentīti attapaccatthikā aññamaññaṃ vā saññāpenti. Te bhikkhūti te attapaccatthikā bhikkhū. Nijjhāpentīti saññāpenti. Ukkoṭeti yoti yo ukkoṭeti. Eteti attapaccatthike bhikkhū, disvāti sambandho. Tatthāti gāmaṃ. Tatthevāti antarāmagge eva.
တတ္ထေဝာတိ ဂာမမေဝ။ တတ္ထေဝာတိ တသ္မိံယေဝ ဌာနေ။ တတ္ထ ဂတန္တိ တံ ဂာမံ ဂတံ။
Tatthevāti gāmameva. Tatthevāti tasmiṃyeva ṭhāne. Tattha gatanti taṃ gāmaṃ gataṃ.
‘‘ဧသေဝ နယော’’တိ ဣမိနာ ပာစိတ္တိယမေဝ အတိဒိသတိ။
‘‘Eseva nayo’’ti iminā pācittiyameva atidisati.
သင္ဃေန။ပေ.။ အဓိကရဏေ ဝဒန္တောပီတိ သမ္ဗန္ဓော။ ယံ ပနေတံ အာပတ္တိဝုဋ္ဌာနံ နာမ ဟောတီတိ ယောဇနာ။ ဧတန္တိ အာပတ္တိဝုဋ္ဌာနံ။ ဝဒန္တောပီတိ ပိသဒ္ဒော န ကေဝလံ တိဏဝတ္ထာရကံ ဥက္ကောဋေန္တောယေဝ ဥက္ကောဋေတိ နာမ, အထ ခော ဝဒန္တောပီတိ ဒသ္သေတိ။
Saṅghena…pe… adhikaraṇe vadantopīti sambandho. Yaṃ panetaṃ āpattivuṭṭhānaṃ nāma hotīti yojanā. Etanti āpattivuṭṭhānaṃ. Vadantopīti pisaddo na kevalaṃ tiṇavatthārakaṃ ukkoṭentoyeva ukkoṭeti nāma, atha kho vadantopīti dasseti.
ဆန္ဒာဂတိံ ဂစ္ဆန္တောတိအာဒီသု အဂတိဂမနာကာရံ ဒသ္သေန္တော အာဟ ‘‘ဝိနယဓရော ဟုတ္ဝာ’’တိအာဒိ။ အတ္ထာယ ဥက္ကောဋေန္တောတိ သမ္ဗန္ဓော။ တသ္သာတိ အနတ္ထံ စရန္တသ္သ။ မန္ဒော ပန ဥက္ကောဋေတိ နာမာတိ သမ္ဗန္ဓော။ ဧကော ဗလဝနိသ္သိတော စ ဟောတီတိ သမ္ဗန္ဓော။ ဂဟနမိစ္ဆာဒိဋ္ဌိန္တိ ဂဟနသဒိသံ မိစ္ဆာဒိဋ္ဌိံ ပဝနသဒိသံ မိစ္ဆာဒိဋ္ဌိန္တိ အတ္ထော။ ဗလဝန္တေ စာတိ ဧတ္ထ စသဒ္ဒော သဗ္ဗကမ္မေသု ယောဇေတဗ္ဗော။ နိသ္သိတတ္တာတိ ဧကသ္သ နိသ္သိတတ္တာ။ ဗလဝနိသ္သိတော စာတိ ဧတ္ထာပိ စ သဒ္ဒော သဗ္ဗကတ္တူသု ယောဇေတဗ္ဗော။ တသ္သာတိ ဝိသမာဒိနိသ္သိတသ္သ။
Chandāgatiṃ gacchantotiādīsu agatigamanākāraṃ dassento āha ‘‘vinayadharo hutvā’’tiādi. Atthāya ukkoṭentoti sambandho. Tassāti anatthaṃ carantassa. Mando pana ukkoṭeti nāmāti sambandho. Eko balavanissito ca hotīti sambandho. Gahanamicchādiṭṭhinti gahanasadisaṃ micchādiṭṭhiṃ pavanasadisaṃ micchādiṭṭhinti attho. Balavante cāti ettha casaddo sabbakammesu yojetabbo. Nissitattāti ekassa nissitattā. Balavanissito cāti etthāpi ca saddo sabbakattūsu yojetabbo. Tassāti visamādinissitassa.
သောတိ သာမဏေရော။ မင္ကုဘူတာတ္ထာတိ မင္ကူ ဟုတ္ဝာ ဘူတာ, မင္ကုံ ဝာ ပတ္တာ အတ္ထ ဘဝထာတိ အတ္ထော။ တေတိ ပရာဇယဘိက္ခူ။ တသ္သာတိ သာမဏေရသ္သ။ သောတိ သာမဏေရော။ တေတိ ပရာဇယဘိက္ခူ။ တန္တိ သာမဏေရံ။ သောတိ ဒဟရော။ တတောတိ သန္နိပာတကာရဏာ။ ဟိယ္ယောတိ အနန္တရာတီတာဟေ။ ဣတီတိ ဧဝံ ဝဒေတိ။ သောတိ ဒဟရော။ ဣဒံ သိက္ခာပဒံ ပညတ္တန္တိ ယောဇနာ။ ဂစ္ဆာတိ ဂစ္ဆာဟိ။ ဣတီတိ ဧဝံ ဝတ္တဗ္ဗောတိ ယောဇနာ။
Soti sāmaṇero. Maṅkubhūtātthāti maṅkū hutvā bhūtā, maṅkuṃ vā pattā attha bhavathāti attho. Teti parājayabhikkhū. Tassāti sāmaṇerassa. Soti sāmaṇero. Teti parājayabhikkhū. Tanti sāmaṇeraṃ. Soti daharo. Tatoti sannipātakāraṇā. Hiyyoti anantarātītāhe. Itīti evaṃ vadeti. Soti daharo. Idaṃ sikkhāpadaṃ paññattanti yojanā. Gacchāti gacchāhi. Itīti evaṃ vattabboti yojanā.
သင္ဃေန သဒ္ဓိံ အဓိကရဏံ ဝိနိစ္ဆိနိတ္ဝာ ပရိဝေဏဂတံ ဧကံ ဘိက္ခုန္တိ ယောဇနာ။ ကိသ္သာတိ ကေန ကာရဏေန။ ဧဝံ ဣမိနာကာရေန ဝိနိစ္ဆိတဗ္ဗံ နနူတိ ယောဇနာ။ သောတိ ဝိနိစ္ဆယကာရကော ဘိက္ခု။ ဆန္ဒဒာယကော သုဝိညေယ္ယောယေဝ။
Saṅghena saddhiṃ adhikaraṇaṃ vinicchinitvā pariveṇagataṃ ekaṃ bhikkhunti yojanā. Kissāti kena kāraṇena. Evaṃ iminākārena vinicchitabbaṃ nanūti yojanā. Soti vinicchayakārako bhikkhu. Chandadāyako suviññeyyoyeva.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၁. ဥက္ကောဋနဘေဒာဒိ • 1. Ukkoṭanabhedādi
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဥက္ကောဋနဘေဒာဒိဝဏ္ဏနာ • Ukkoṭanabhedādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဓိကရဏဘေဒဝဏ္ဏနာ • Adhikaraṇabhedavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဥက္ကောဋနဘေဒာဒိဝဏ္ဏနာ • Ukkoṭanabhedādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဥက္ကောဋနဘေဒာဒိကထာဝဏ္ဏနာ • Ukkoṭanabhedādikathāvaṇṇanā
