| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. உக்கோடனஸுத்தவண்ணனா
5. Ukkoṭanasuttavaṇṇanā
1165. உக்கோடனாதீ³ஸு உக்கோடனந்தி ஸாமிகே அஸ்ஸாமிகே காதுங் லஞ்ஜக்³க³ஹணங். வஞ்சனந்தி தேஹி தேஹி உபாயேஹி பரேஸங் வஞ்சனங். தத்ரித³மேகங்வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹெத்வா ஆக³ச்ச²தி. தமேகோ து⁴த்தோ ‘‘கிங், போ⁴, மிகோ³ அக்³க⁴தி, கிங் மிக³போதகோ’’தி?, ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி ச வுத்தே கஹாபணங் த³த்வா, மிக³போதகங் க³ஹெத்வா தோ²கங் க³ந்த்வா நிவத்தோ ‘‘ந மே, போ⁴, மிக³போதகேன அத்தோ², மிக³ங் மே தே³ஹீ’’தி ஆஹ. தேன ஹி த்³வே கஹாபணே தே³ஹீதி. நனு, போ⁴, மயா பட²மங் ஏகோ கஹாபணோ தி³ன்னோதி. ஆம தி³ன்னோதி. இமம்பி மிக³போதகங் க³ண்ஹ, ஏவங் ஸோ ச கஹாபணோ, அயஞ்ச கஹாபணக்³க⁴னகோ மிக³போதகோதி த்³வே கஹாபணா ப⁴விஸ்ஸந்தீதி. ஸோ ‘‘காரணங் வத³தீ’’தி ஸல்லக்கெ²த்வா மிக³போதகங் க³ஹெத்வா மிக³ங் அதா³ஸீதி.
1165.Ukkoṭanādīsu ukkoṭananti sāmike assāmike kātuṃ lañjaggahaṇaṃ. Vañcananti tehi tehi upāyehi paresaṃ vañcanaṃ. Tatridamekaṃvatthu – eko kira luddako migañca migapotakañca gahetvā āgacchati. Tameko dhutto ‘‘kiṃ, bho, migo agghati, kiṃ migapotako’’ti?, Āha. ‘‘Migo dve kahāpaṇe, migapotako eka’’nti ca vutte kahāpaṇaṃ datvā, migapotakaṃ gahetvā thokaṃ gantvā nivatto ‘‘na me, bho, migapotakena attho, migaṃ me dehī’’ti āha. Tena hi dve kahāpaṇe dehīti. Nanu, bho, mayā paṭhamaṃ eko kahāpaṇo dinnoti. Āma dinnoti. Imampi migapotakaṃ gaṇha, evaṃ so ca kahāpaṇo, ayañca kahāpaṇagghanako migapotakoti dve kahāpaṇā bhavissantīti. So ‘‘kāraṇaṃ vadatī’’ti sallakkhetvā migapotakaṃ gahetvā migaṃ adāsīti.
நிகதீதி யோக³வஸேன வா மாயாவஸேன வா அபாமங்க³ங் பாமங்க³ந்தி அமணிங் மணிந்தி, அஸுவண்ணங் ஸுவண்ணந்தி கத்வா பதிரூபகேன வஞ்சனங். ஸாசியோகோ³தி குடிலயோகோ³. ஏதேஸங்யேவ உக்கோடனாதீ³னமேதங் நாமங். தஸ்மா உக்கோடனஸாசியோகா³ வஞ்சனஸாசியோகா³ நிகதிஸாசியோகா³தி ஏவமெத்த² அத்தோ² த³ட்ட²ப்³போ³. கேசி அஞ்ஞங் த³ஸ்ஸெத்வா அஞ்ஞஸ்ஸ பரிவத்தனங் ஸாசியோகோ³தி வத³ந்தி. தங் பன வஞ்சனேனேவ ஸங்க³ஹிதங்.
Nikatīti yogavasena vā māyāvasena vā apāmaṅgaṃ pāmaṅganti amaṇiṃ maṇinti, asuvaṇṇaṃ suvaṇṇanti katvā patirūpakena vañcanaṃ. Sāciyogoti kuṭilayogo. Etesaṃyeva ukkoṭanādīnametaṃ nāmaṃ. Tasmā ukkoṭanasāciyogā vañcanasāciyogā nikatisāciyogāti evamettha attho daṭṭhabbo. Keci aññaṃ dassetvā aññassa parivattanaṃ sāciyogoti vadanti. Taṃ pana vañcaneneva saṅgahitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. உக்கோடனஸுத்தங் • 5. Ukkoṭanasuttaṃ
