| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৩. পারিচ্ছত্তকৰগ্গো
3. Pāricchattakavaggo
১. উল়ারৰিমানৰণ্ণনা
1. Uḷāravimānavaṇṇanā
পারিচ্ছত্তকৰগ্গে উল়ারো তে যসো ৰণ্ণোতি উল়ারৰিমানং। তস্স কা উপ্পত্তি? ভগৰা রাজগহে ৰিহরতি ৰেল়ুৰনে কলন্দকনিৰাপে। তেন সমযেন রাজগহে আযস্মতো মহামোগ্গল্লানস্স উপট্ঠাককুলে একা দারিকা দানজ্ঝাসযা দানসংৰিভাগরতা অহোসি। সা যং তস্মিং গেহে পুরেভত্তং খাদনীযভোজনীযং উপ্পজ্জতি, তত্থ অত্তনা লদ্ধপটিৰীসতো উপড্ঢং দেতি, উপড্ঢং অত্তনা পরিভুঞ্জতি, অদত্ৰা পন ন ভুঞ্জতি, দক্খিণেয্যে অপস্সন্তীপি ঠপেত্ৰা দিট্ঠকালে দেতি, যাচকানম্পি দেতিযেৰ। অথস্সা মাতা ‘‘মম ধীতা দানজ্ঝাসযা দানসংৰিভাগরতা’’তি হট্ঠতুট্ঠা তস্সা দিগুণং ভাগং দেতি। দেন্তী চ একস্মিং ভাগে তায সংৰিভাগে কতে পুন অপরং দেতি, সা ততোপি সংৰিভাগং করোতিযেৰ।
Pāricchattakavagge uḷāro te yaso vaṇṇoti uḷāravimānaṃ. Tassa kā uppatti? Bhagavā rājagahe viharati veḷuvane kalandakanivāpe. Tena samayena rājagahe āyasmato mahāmoggallānassa upaṭṭhākakule ekā dārikā dānajjhāsayā dānasaṃvibhāgaratā ahosi. Sā yaṃ tasmiṃ gehe purebhattaṃ khādanīyabhojanīyaṃ uppajjati, tattha attanā laddhapaṭivīsato upaḍḍhaṃ deti, upaḍḍhaṃ attanā paribhuñjati, adatvā pana na bhuñjati, dakkhiṇeyye apassantīpi ṭhapetvā diṭṭhakāle deti, yācakānampi detiyeva. Athassā mātā ‘‘mama dhītā dānajjhāsayā dānasaṃvibhāgaratā’’ti haṭṭhatuṭṭhā tassā diguṇaṃ bhāgaṃ deti. Dentī ca ekasmiṃ bhāge tāya saṃvibhāge kate puna aparaṃ deti, sā tatopi saṃvibhāgaṃ karotiyeva.
এৰং গচ্ছন্তে কালে তং ৰযপ্পত্তং মাতাপিতরো তস্মিংযেৰ নগরে অঞ্ঞতরস্মিং কুলে কুমারস্স অদংসু। তং পন কুলং মিচ্ছাদিট্ঠিকং হোতি অস্সদ্ধং অপ্পসন্নং । অথাযস্মা মহামোগ্গল্লানো রাজগহে সপদানং পিণ্ডায চরমানো তস্সা দারিকায সসুরস্স গেহদ্ৰারে অট্ঠাসি। তং দিস্ৰা সা দারিকা পসন্নচিত্তা ‘‘পৰিসথ ভন্তে’’তি পৰেসেত্ৰা ৰন্দিত্ৰা সস্সুযা ঠপিতং পূৰং তং অপস্সন্তী ‘‘তস্সা কথেত্ৰা অনুমোদাপেস্সামী’’তি ৰিস্সাসেন গহেত্ৰা থেরস্স অদাসি, থেরো অনুমোদনং কত্ৰা পক্কামি। দারিকা ‘‘তুম্হেহি ঠপিতং পূৰং মহামোগ্গল্লানত্থেরস্স অদাসি’’ন্তি সস্সুযা কথেসি। সা তং সুত্ৰা ‘‘কিন্নামিদং পাগব্ভিযং, অযং মম সন্তকং অনাপুচ্ছিত্ৰাৰ সমণস্স অদাসী’’তি তং কটতটাযমানা কোধাভিভূতা যুত্তাযুত্তং অচিন্তেন্তী পুরতো ঠিতং মুসলখণ্ডং গহেত্ৰা অংসকূটে পহরি। সা সুখুমালতায পরিক্খীণাযুকতায চ তেনেৰ পহারেন বলৰদুক্খাভিভূতা হুত্ৰা কতিপাহেনেৰ কালং কত্ৰা তাৰতিংসেসু নিব্বত্তি। তস্সা সতিপি অঞ্ঞস্মিং সুচরিতকম্মে থেরস্স কতদানমেৰ সাতিসযং হুত্ৰা উপট্ঠাসি। তং আযস্মা মহামোগ্গল্লানো হেট্ঠা ৰুত্তনযেনেৰ গন্ত্ৰা –
Evaṃ gacchante kāle taṃ vayappattaṃ mātāpitaro tasmiṃyeva nagare aññatarasmiṃ kule kumārassa adaṃsu. Taṃ pana kulaṃ micchādiṭṭhikaṃ hoti assaddhaṃ appasannaṃ . Athāyasmā mahāmoggallāno rājagahe sapadānaṃ piṇḍāya caramāno tassā dārikāya sasurassa gehadvāre aṭṭhāsi. Taṃ disvā sā dārikā pasannacittā ‘‘pavisatha bhante’’ti pavesetvā vanditvā sassuyā ṭhapitaṃ pūvaṃ taṃ apassantī ‘‘tassā kathetvā anumodāpessāmī’’ti vissāsena gahetvā therassa adāsi, thero anumodanaṃ katvā pakkāmi. Dārikā ‘‘tumhehi ṭhapitaṃ pūvaṃ mahāmoggallānattherassa adāsi’’nti sassuyā kathesi. Sā taṃ sutvā ‘‘kinnāmidaṃ pāgabbhiyaṃ, ayaṃ mama santakaṃ anāpucchitvāva samaṇassa adāsī’’ti taṃ kaṭataṭāyamānā kodhābhibhūtā yuttāyuttaṃ acintentī purato ṭhitaṃ musalakhaṇḍaṃ gahetvā aṃsakūṭe pahari. Sā sukhumālatāya parikkhīṇāyukatāya ca teneva pahārena balavadukkhābhibhūtā hutvā katipāheneva kālaṃ katvā tāvatiṃsesu nibbatti. Tassā satipi aññasmiṃ sucaritakamme therassa katadānameva sātisayaṃ hutvā upaṭṭhāsi. Taṃ āyasmā mahāmoggallāno heṭṭhā vuttanayeneva gantvā –
২৮৬.
286.
‘‘উল়ারো তে যসো ৰণ্ণো, সব্বা ওভাসতে দিসা।
‘‘Uḷāro te yaso vaṇṇo, sabbā obhāsate disā;
নারিযো নচ্চন্তি গাযন্তি, দেৰপুত্তা অলঙ্কতা॥
Nāriyo naccanti gāyanti, devaputtā alaṅkatā.
২৮৭.
287.
‘‘মোদেন্তি পরিৰারেন্তি, তৰ পূজায দেৰতে।
‘‘Modenti parivārenti, tava pūjāya devate;
সোৰণ্ণানি ৰিমানানি, তৰিমানি সুদস্সনে॥
Sovaṇṇāni vimānāni, tavimāni sudassane.
২৮৮.
288.
‘‘তুৰংসি ইস্সরা তেসং, সব্বকামসমিদ্ধিনী।
‘‘Tuvaṃsi issarā tesaṃ, sabbakāmasamiddhinī;
অভিজাতা মহন্তাসি, দেৰকাযে পমোদসি।
Abhijātā mahantāsi, devakāye pamodasi;
দেৰতে পুচ্ছিতাচিক্খ, কিস্স কম্মস্সিদং ফল’’ন্তি॥ –
Devate pucchitācikkha, kissa kammassidaṃ phala’’nti. –
তীহি গাথাহি পুচ্ছি।
Tīhi gāthāhi pucchi.
২৮৬. তত্থ যসোতি পরিৰারো। ৰণ্ণোতি ৰণ্ণনিভা সরীরোভাসো। ‘‘উল়ারো’’তি পন ৰিসেসেত্ৰা ৰুত্তত্তা তস্সা দেৰতায পরিৰারসম্পত্তি চ ৰণ্ণসম্পত্তি চ ৰুত্তা হোতি। তাসু ‘‘উল়ারো তে ৰণ্ণো’’তি সঙ্খেপতো ৰুত্তং ৰণ্ণসম্পত্তিং ৰিসযৰসেন ৰিত্থারতো দস্সেতুং ‘‘সব্বা ওভাসতে দিসা’’তি ৰত্ৰা ‘‘উল়ারো তে যসো’’তি ৰুত্তং পরিৰারসম্পত্তিং ৰত্থুৰসেন ৰিত্থারতো দস্সেতুং ‘‘নারিযো নচ্চন্তী’’তিআদি ৰুত্তং। তত্থ সব্বা ওভাসতে দিসাতি সব্বাসু দিসাসু ৰিজ্জোততে, সব্বা ৰা দিসা ওভাসযতে, ৰিজ্জোতযতীতি অত্থো। ‘‘ওভাসতে’’তি পদস্স ‘‘ওভাসন্তে’’তি কেচি ৰচনৰিপল্লাসেন অত্থং ৰদন্তি, তেহি ‘‘ৰণ্ণেনা’’তি ৰিভত্তি ৰিপরিণামেতব্বা। ৰণ্ণেনাতি চ হেতুম্হি করণৰচনং, ৰণ্ণেন হেতুভূতেনাতি অত্থো। ‘‘সব্বা দিসা’’তি চ জাতিৰসেন দিসাসামঞ্ঞে অপেক্খিতে ৰচনৰিপল্লাসেনপি পযোজনং নত্থি। নারিযোতি এত্থাপি ‘‘অলঙ্কতা’’তি পদং আনেত্ৰা সম্বন্ধিতব্বং। দেৰপুত্তাতি এত্থ চ-সদ্দো লুত্তনিদ্দিট্ঠো। তেন নারিযো দেৰপুত্তা চাতি সমুচ্চযো ৰেদিতব্বো।
286. Tattha yasoti parivāro. Vaṇṇoti vaṇṇanibhā sarīrobhāso. ‘‘Uḷāro’’ti pana visesetvā vuttattā tassā devatāya parivārasampatti ca vaṇṇasampatti ca vuttā hoti. Tāsu ‘‘uḷāro te vaṇṇo’’ti saṅkhepato vuttaṃ vaṇṇasampattiṃ visayavasena vitthārato dassetuṃ ‘‘sabbā obhāsate disā’’ti vatvā ‘‘uḷāro te yaso’’ti vuttaṃ parivārasampattiṃ vatthuvasena vitthārato dassetuṃ ‘‘nāriyo naccantī’’tiādi vuttaṃ. Tattha sabbā obhāsate disāti sabbāsu disāsu vijjotate, sabbā vā disā obhāsayate, vijjotayatīti attho. ‘‘Obhāsate’’ti padassa ‘‘obhāsante’’ti keci vacanavipallāsena atthaṃ vadanti, tehi ‘‘vaṇṇenā’’ti vibhatti vipariṇāmetabbā. Vaṇṇenāti ca hetumhi karaṇavacanaṃ, vaṇṇena hetubhūtenāti attho. ‘‘Sabbā disā’’ti ca jātivasena disāsāmaññe apekkhite vacanavipallāsenapi payojanaṃ natthi. Nāriyoti etthāpi ‘‘alaṅkatā’’ti padaṃ ānetvā sambandhitabbaṃ. Devaputtāti ettha ca-saddo luttaniddiṭṭho. Tena nāriyo devaputtā cāti samuccayo veditabbo.
২৮৭. মোদেন্তীতি পমোদযন্তি। পূজাযাতি পূজনত্থং পূজানিমিত্তং ৰা, নচ্চন্তি গাযন্তীতি যোজনা। তৰিমানীতি তৰ ইমানি।
287.Modentīti pamodayanti. Pūjāyāti pūjanatthaṃ pūjānimittaṃ vā, naccanti gāyantīti yojanā. Tavimānīti tava imāni.
২৮৮. সব্বকামসমিদ্ধিনীতি সব্বেহি পঞ্চহি কামগুণেহি, সব্বেহি ৰা তযা কামিতেহি ইচ্ছিতেহি ৰত্থূহি সমিদ্ধা। অভিজাতাতি সুজাতা। মহন্তাসীতি মহতী মহানুভাৰা অসি। দেৰকাযে পমোদসীতি ইমস্মিং দেৰনিকাযে দিব্বসম্পত্তিহেতুকেন পরমেন পমোদনেন পমোদসি।
288.Sabbakāmasamiddhinīti sabbehi pañcahi kāmaguṇehi, sabbehi vā tayā kāmitehi icchitehi vatthūhi samiddhā. Abhijātāti sujātā. Mahantāsīti mahatī mahānubhāvā asi. Devakāye pamodasīti imasmiṃ devanikāye dibbasampattihetukena paramena pamodanena pamodasi.
এৰং থেরেন পুচ্ছিতা সা দেৰতা তমত্থং ৰিস্সজ্জেসি –
Evaṃ therena pucchitā sā devatā tamatthaṃ vissajjesi –
২৮৯.
289.
‘‘অহং মনুস্সেসু মনুস্সভূতা, পুরিমায জাতিযা মনুস্সলোকে।
‘‘Ahaṃ manussesu manussabhūtā, purimāya jātiyā manussaloke;
দুস্সীলকুলে সুণিসা অহোসিং, অস্সদ্ধেসু কদরিযেসু অহং॥
Dussīlakule suṇisā ahosiṃ, assaddhesu kadariyesu ahaṃ.
২৯০.
290.
‘‘সদ্ধা সীলেন সম্পন্না, সংৰিভাগরতা সদা।
‘‘Saddhā sīlena sampannā, saṃvibhāgaratā sadā;
পিণ্ডায চরমানস্স, অপূৰং তে অদাসহং॥
Piṇḍāya caramānassa, apūvaṃ te adāsahaṃ.
২৯১.
291.
‘‘তদাহং সস্সুযাচিক্খিং, ‘সমণো আগতো ইধ।
‘‘Tadāhaṃ sassuyācikkhiṃ, ‘samaṇo āgato idha;
তস্স অদাসহং পূৰং, পসন্না সেহি পাণিভি’॥
Tassa adāsahaṃ pūvaṃ, pasannā sehi pāṇibhi’.
২৯২.
292.
‘‘ইতিস্সা সস্সু পরিভাসি, অৰিনীতাসি ত্ৰং ৰধু।
‘‘Itissā sassu paribhāsi, avinītāsi tvaṃ vadhu;
ন মং সম্পুচ্ছিতুং ইচ্ছি, ‘সমণস্স দদামহং’॥
Na maṃ sampucchituṃ icchi, ‘samaṇassa dadāmahaṃ’.
২৯৩.
293.
‘‘ততো মে সস্সু কুপিতা, পহাসি মুসলেন মং।
‘‘Tato me sassu kupitā, pahāsi musalena maṃ;
কূটঙ্গচ্ছি অৰধি মং, নাসক্খিং জীৰিতুং চিরং॥
Kūṭaṅgacchi avadhi maṃ, nāsakkhiṃ jīvituṃ ciraṃ.
২৯৪.
294.
‘‘অহং কাযস্স ভেদা, ৰিপ্পমুত্তা ততো চুতা।
‘‘Ahaṃ kāyassa bhedā, vippamuttā tato cutā;
দেৰানং তাৰতিংসানং, উপপন্না সহব্যতং॥
Devānaṃ tāvatiṃsānaṃ, upapannā sahabyataṃ.
২৯৫.
295.
‘‘তেন মেতাদিসো ৰণ্ণো…পে॰…
‘‘Tena metādiso vaṇṇo…pe…
ৰণ্ণো চ মে সব্বদিসা পভাসতী’’তি॥
Vaṇṇo ca me sabbadisā pabhāsatī’’ti.
২৮৯. তত্থ অস্সদ্ধেসূতি রতনত্তযসদ্ধায কম্মফলসদ্ধায চ অভাৰেন অস্সদ্ধেসু, থদ্ধমচ্ছরিযতায কদরিযেসু সস্সুআদীসু অহং সদ্ধা সীলেন সম্পন্না অহোসিন্তি যোজনা।
289. Tattha assaddhesūti ratanattayasaddhāya kammaphalasaddhāya ca abhāvena assaddhesu, thaddhamacchariyatāya kadariyesu sassuādīsu ahaṃ saddhā sīlena sampannā ahosinti yojanā.
২৯০-১. অপূৰন্তি কপল্লপূৰং। তেতি নিপাতমত্তং। সস্সুযা আচিক্খিং গহিতভাৰঞাপনত্থঞ্চ অনুমোদনত্থঞ্চাতি অধিপ্পাযো।
290-1.Apūvanti kapallapūvaṃ. Teti nipātamattaṃ. Sassuyā ācikkhiṃ gahitabhāvañāpanatthañca anumodanatthañcāti adhippāyo.
২৯২. ইতিস্সাতি এত্থ অস্সাতি নিপাতমত্তং। সমণস্স দদামহন্তি অহং সমণস্স অপূৰং দদামীতি। যস্মা ন মং সম্পুচ্ছিতুং ইচ্ছি, তস্মা ত্ৰং ৰধু অৰিনীতাসীতি সস্সু পরিভাসীতি যোজনা।
292.Itissāti ettha assāti nipātamattaṃ. Samaṇassa dadāmahanti ahaṃ samaṇassa apūvaṃ dadāmīti. Yasmā na maṃ sampucchituṃ icchi, tasmā tvaṃ vadhu avinītāsīti sassu paribhāsīti yojanā.
২৯৩. পহাসীতি পহরি। কূটঙ্গচ্ছি অৰধি মন্তি এত্থ কূটন্তি অংসকূটং ৰুত্তং পুরিমপদলোপেন, কূটমেৰ অঙ্গন্তি কূটঙ্গং, তং ছিন্দতীতি কূটঙ্গচ্ছি। এৰং কোধাভিভূতা হুত্ৰা মং অৰধি, মম অংসকূটং ছিন্দি, তেনেৰ উপক্কমেন মতত্তা মং মারেসীতি অত্থো। তেনাহ ‘‘নাসক্খিং জীৰিতুং চির’’ন্তি।
293.Pahāsīti pahari. Kūṭaṅgacchi avadhi manti ettha kūṭanti aṃsakūṭaṃ vuttaṃ purimapadalopena, kūṭameva aṅganti kūṭaṅgaṃ, taṃ chindatīti kūṭaṅgacchi. Evaṃ kodhābhibhūtā hutvā maṃ avadhi, mama aṃsakūṭaṃ chindi, teneva upakkamena matattā maṃ māresīti attho. Tenāha ‘‘nāsakkhiṃ jīvituṃ cira’’nti.
২৯৪. ৰিপ্পমুত্তাতি ততো দুক্খতো সুট্ঠু মুত্তা। সেসং ৰুত্তনযমেৰ।
294.Vippamuttāti tato dukkhato suṭṭhu muttā. Sesaṃ vuttanayameva.
উল়ারৰিমানৰণ্ণনা নিট্ঠিতা।
Uḷāravimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ১. উল়ারৰিমানৰত্থু • 1. Uḷāravimānavatthu
