| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. உலூகங்க³பஞ்ஹோ
5. Ulūkaṅgapañho
5. ‘‘ப⁴ந்தே நாக³ஸேன, ‘உலூகஸ்ஸ த்³வே அங்கா³னி க³ஹேதப்³பா³னீ’தி யங் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, உலூகோ காகேஹி படிவிருத்³தோ⁴, ரத்திங் காகஸங்க⁴ங் க³ந்த்வா ப³ஹூபி காகே ஹனதி, ஏவமேவ கோ², மஹாராஜ, யோகி³னா யோகா³வசரேன அஞ்ஞாணேன படிவிருத்³தோ⁴ காதப்³போ³, ஏகேன ரஹோ நிஸீதி³த்வா அஞ்ஞாணங் ஸம்பமத்³தி³தப்³ப³ங், மூலதோ சி²ந்தி³தப்³ப³ங். இத³ங், மஹாராஜ, உலூகஸ்ஸ பட²மங் க³ஹேதப்³ப³ங்.
5. ‘‘Bhante nāgasena, ‘ulūkassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, ulūko kākehi paṭiviruddho, rattiṃ kākasaṅghaṃ gantvā bahūpi kāke hanati, evameva kho, mahārāja, yoginā yogāvacarena aññāṇena paṭiviruddho kātabbo, ekena raho nisīditvā aññāṇaṃ sampamadditabbaṃ, mūlato chinditabbaṃ. Idaṃ, mahārāja, ulūkassa paṭhamaṃ gahetabbaṃ.
‘‘புன சபரங், மஹாராஜ, உலூகோ ஸுப்படிஸல்லீனோ ஹோதி, ஏவமேவ கோ², மஹாராஜ, யோகி³னா யோகா³வசரேன படிஸல்லானாராமேன ப⁴விதப்³ப³ங் படிஸல்லானரதேன. இத³ங், மஹாராஜ, உலூகஸ்ஸ து³தியங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே –
‘‘Puna caparaṃ, mahārāja, ulūko suppaṭisallīno hoti, evameva kho, mahārāja, yoginā yogāvacarena paṭisallānārāmena bhavitabbaṃ paṭisallānaratena. Idaṃ, mahārāja, ulūkassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘இத⁴, பி⁴க்க²வே, பி⁴க்கு² படிஸல்லானாராமோ படிஸல்லானரதோ ‘‘இத³ங் து³க்க²’’ந்தி யதா²பூ⁴தங் பஜானாதி, ‘‘அயங் து³க்க²ஸமுத³யோ’’தி யதா² பூ⁴த²ங் பஜானாதி , ‘‘அயங் து³க்க²னிரோதோ⁴’’தி யதா²பூ⁴தங் பஜானாதி, ‘‘அயங் து³க்க²னிரோத⁴கா³மினீ படிபதா³’’தி யதா²பூ⁴தங் பஜானாதீ’’’தி.
‘‘‘Idha, bhikkhave, bhikkhu paṭisallānārāmo paṭisallānarato ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathā bhūthaṃ pajānāti , ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānātī’’’ti.
உலூகங்க³பஞ்ஹோ பஞ்சமோ.
Ulūkaṅgapañho pañcamo.
