| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. උලූකඞ්‌ගපඤ්‌හො
5. Ulūkaṅgapañho
5. ‘‘භන්‌තෙ නාගසෙන, ‘උලූකස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, උලූකො කාකෙහි පටිවිරුද්‌ධො, රත්‌තිං කාකසඞ්‌ඝං ගන්‌ත්‌වා බහූපි කාකෙ හනති, එවමෙව ඛො, මහාරාජ, යොගිනා යොගාවචරෙන අඤ්‌ඤාණෙන පටිවිරුද්‌ධො කාතබ්‌බො, එකෙන රහො නිසීදිත්‌වා අඤ්‌ඤාණං සම්‌පමද්‌දිතබ්‌බං, මූලතො ඡින්‌දිතබ්‌බං. ඉදං, මහාරාජ, උලූකස්‌ස පඨමං ගහෙතබ්‌බං.
5. ‘‘Bhante nāgasena, ‘ulūkassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, ulūko kākehi paṭiviruddho, rattiṃ kākasaṅghaṃ gantvā bahūpi kāke hanati, evameva kho, mahārāja, yoginā yogāvacarena aññāṇena paṭiviruddho kātabbo, ekena raho nisīditvā aññāṇaṃ sampamadditabbaṃ, mūlato chinditabbaṃ. Idaṃ, mahārāja, ulūkassa paṭhamaṃ gahetabbaṃ.
‘‘පුන චපරං, මහාරාජ, උලූකො සුප්‌පටිසල්‌ලීනො හොති, එවමෙව ඛො, මහාරාජ, යොගිනා යොගාවචරෙන පටිසල්‌ලානාරාමෙන භවිතබ්‌බං පටිසල්‌ලානරතෙන. ඉදං, මහාරාජ, උලූකස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සංයුත්‌තනිකායවරෙ –
‘‘Puna caparaṃ, mahārāja, ulūko suppaṭisallīno hoti, evameva kho, mahārāja, yoginā yogāvacarena paṭisallānārāmena bhavitabbaṃ paṭisallānaratena. Idaṃ, mahārāja, ulūkassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘ඉධ, භික්‌ඛවෙ, භික්‌ඛු පටිසල්‌ලානාරාමො පටිසල්‌ලානරතො ‘‘ඉදං දුක්‌ඛ’’න්‌ති යථාභූතං පජානාති, ‘‘අයං දුක්‌ඛසමුදයො’’ති යථා භූථං පජානාති , ‘‘අයං දුක්‌ඛනිරොධො’’ති යථාභූතං පජානාති, ‘‘අයං දුක්‌ඛනිරොධගාමිනී පටිපදා’’ති යථාභූතං පජානාතී’’’ති.
‘‘‘Idha, bhikkhave, bhikkhu paṭisallānārāmo paṭisallānarato ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathā bhūthaṃ pajānāti , ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānātī’’’ti.
උලූකඞ්‌ගපඤ්‌හො පඤ්‌චමො.
Ulūkaṅgapañho pañcamo.
