| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੫. ਉਲੂਕਙ੍ਗਪਞ੍ਹੋ
5. Ulūkaṅgapañho
੫. ‘‘ਭਨ੍ਤੇ ਨਾਗਸੇਨ, ‘ਉਲੂਕਸ੍ਸ ਦ੍વੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ વਦੇਸਿ, ਕਤਮਾਨਿ ਤਾਨਿ ਦ੍વੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਉਲੂਕੋ ਕਾਕੇਹਿ ਪਟਿવਿਰੁਦ੍ਧੋ, ਰਤ੍ਤਿਂ ਕਾਕਸਙ੍ਘਂ ਗਨ੍ਤ੍વਾ ਬਹੂਪਿ ਕਾਕੇ ਹਨਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਅਞ੍ਞਾਣੇਨ ਪਟਿવਿਰੁਦ੍ਧੋ ਕਾਤਬ੍ਬੋ, ਏਕੇਨ ਰਹੋ ਨਿਸੀਦਿਤ੍વਾ ਅਞ੍ਞਾਣਂ ਸਮ੍ਪਮਦ੍ਦਿਤਬ੍ਬਂ, ਮੂਲਤੋ ਛਿਨ੍ਦਿਤਬ੍ਬਂ। ਇਦਂ, ਮਹਾਰਾਜ, ਉਲੂਕਸ੍ਸ ਪਠਮਂ ਗਹੇਤਬ੍ਬਂ।
5. ‘‘Bhante nāgasena, ‘ulūkassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, ulūko kākehi paṭiviruddho, rattiṃ kākasaṅghaṃ gantvā bahūpi kāke hanati, evameva kho, mahārāja, yoginā yogāvacarena aññāṇena paṭiviruddho kātabbo, ekena raho nisīditvā aññāṇaṃ sampamadditabbaṃ, mūlato chinditabbaṃ. Idaṃ, mahārāja, ulūkassa paṭhamaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਉਲੂਕੋ ਸੁਪ੍ਪਟਿਸਲ੍ਲੀਨੋ ਹੋਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਪਟਿਸਲ੍ਲਾਨਾਰਾਮੇਨ ਭવਿਤਬ੍ਬਂ ਪਟਿਸਲ੍ਲਾਨਰਤੇਨ। ਇਦਂ, ਮਹਾਰਾਜ, ਉਲੂਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ। ਭਾਸਿਤਮ੍ਪੇਤਂ, ਮਹਾਰਾਜ, ਭਗવਤਾ ਦੇવਾਤਿਦੇવੇਨ ਸਂਯੁਤ੍ਤਨਿਕਾਯવਰੇ –
‘‘Puna caparaṃ, mahārāja, ulūko suppaṭisallīno hoti, evameva kho, mahārāja, yoginā yogāvacarena paṭisallānārāmena bhavitabbaṃ paṭisallānaratena. Idaṃ, mahārāja, ulūkassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘ਇਧ, ਭਿਕ੍ਖવੇ, ਭਿਕ੍ਖੁ ਪਟਿਸਲ੍ਲਾਨਾਰਾਮੋ ਪਟਿਸਲ੍ਲਾਨਰਤੋ ‘‘ਇਦਂ ਦੁਕ੍ਖ’’ਨ੍ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਸਮੁਦਯੋ’’ਤਿ ਯਥਾ ਭੂਥਂ ਪਜਾਨਾਤਿ , ‘‘ਅਯਂ ਦੁਕ੍ਖਨਿਰੋਧੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਯਥਾਭੂਤਂ ਪਜਾਨਾਤੀ’’’ਤਿ।
‘‘‘Idha, bhikkhave, bhikkhu paṭisallānārāmo paṭisallānarato ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathā bhūthaṃ pajānāti , ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānātī’’’ti.
ਉਲੂਕਙ੍ਗਪਞ੍ਹੋ ਪਞ੍ਚਮੋ।
Ulūkaṅgapañho pañcamo.
