| Library / Tipiṭaka / තිපිටක • Tipiṭaka / අපදානපාළි • Apadānapāḷi |
33. උමාපුප්‌ඵියවග්‌ගො
33. Umāpupphiyavaggo
1. උමාපුප්‌ඵියත්‌ථෙරඅපදානං
1. Umāpupphiyattheraapadānaṃ
1.
1.
‘‘සමාහිතං සමාපන්‌නං, සිද්‌ධත්‌ථමපරාජිතං;
‘‘Samāhitaṃ samāpannaṃ, siddhatthamaparājitaṃ;
සමාධිනා උපවිට්‌ඨං, අද්‌දසාහං නරුත්‌තමං.
Samādhinā upaviṭṭhaṃ, addasāhaṃ naruttamaṃ.
2.
2.
‘‘උමාපුප්‌ඵං ගහෙත්‌වාන, බුද්‌ධස්‌ස අභිරොපයිං;
‘‘Umāpupphaṃ gahetvāna, buddhassa abhiropayiṃ;
සබ්‌බපුප්‌ඵා එකසීසා, උද්‌ධංවණ්‌ටා අධොමුඛා.
Sabbapupphā ekasīsā, uddhaṃvaṇṭā adhomukhā.
3.
3.
‘‘සුචිත්‌තා විය තිට්‌ඨන්‌තෙ, ආකාසෙ පුප්‌ඵසන්‌ථරා;
‘‘Sucittā viya tiṭṭhante, ākāse pupphasantharā;
තෙන චිත්‌තප්‌පසාදෙන, තුසිතං උපපජ්‌ජහං.
Tena cittappasādena, tusitaṃ upapajjahaṃ.
4.
4.
‘‘චතුන්‌නවුතිතො කප්‌පෙ, යං පුප්‌ඵමභිපූජයිං;
‘‘Catunnavutito kappe, yaṃ pupphamabhipūjayiṃ;
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
5.
5.
‘‘පඤ්‌චපඤ්‌ඤාසිතො කප්‌පෙ, එකො ආසිං මහීපති;
‘‘Pañcapaññāsito kappe, eko āsiṃ mahīpati;
සමන්‌තඡදනො නාම, චක්‌කවත්‌තී මහබ්‌බලො.
Samantachadano nāma, cakkavattī mahabbalo.
6.
6.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං.
Chaḷabhiññā sacchikatā, kataṃ buddhassa sāsanaṃ.
ඉත්‌ථං සුදං ආයස්‌මා උමාපුප්‌ඵියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā umāpupphiyo thero imā gāthāyo abhāsitthāti.
උමාපුප්‌ඵියත්‌ථෙරස්‌සාපදානං පඨමං.
Umāpupphiyattherassāpadānaṃ paṭhamaṃ.
