| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
5. умаабубпияад̇т̇зраабад̣̇аанаван̣н̣анаа
5. Umāpupphiyattheraapadānavaṇṇanā
ниб̣б̣уд̇з логамахид̇зд̇иаад̣̇игам̣ ааяасмад̇о умаабубпияад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о сид̣̇д̇хад̇т̇асса бхаг̇авад̇о гаалз гулаг̇зхз ниб̣б̣ад̇д̇о вуд̣̇д̇хиббад̇д̇о гхарааваасам̣ сан̣табзд̇ваа васанд̇о ниб̣б̣уд̇асса бхаг̇авад̇о жзд̇ияамахз вад̇д̇амаанз инд̣̇анийламан̣иван̣н̣ам̣ умаабубпам̣ г̇ахзд̇ваа бууж̇зси. со д̇зна бун̃н̃зна суг̇ад̇ийсуязва сам̣саранд̇о д̣̇иб̣б̣амаанусасамбад̇д̇ияо анубхавид̇ваа уббаннуббаннабхавз б̣ахулам̣ нийлаван̣н̣о ж̇аад̇исамбанно вибхавасамбанно ахоси. со имасмим̣ б̣уд̣̇д̇хуббаад̣̇з вибхавасамбаннз згасмим̣ гулаг̇зхз ниб̣б̣ад̇д̇о вин̃н̃уд̇ам̣ бад̇ваа сад̣̇д̇хааж̇аад̇о баб̣б̣аж̇ид̇о нажирассзва арахад̇д̇ам̣ баабун̣и.
Nibbute lokamahitetiādikaṃ āyasmato umāpupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto nibbutassa bhagavato cetiyamahe vattamāne indanīlamaṇivaṇṇaṃ umāpupphaṃ gahetvā pūjesi. So tena puññena sugatīsuyeva saṃsaranto dibbamānusasampattiyo anubhavitvā uppannuppannabhave bahulaṃ nīlavaṇṇo jātisampanno vibhavasampanno ahosi. So imasmiṃ buddhuppāde vibhavasampanne ekasmiṃ kulagehe nibbatto viññutaṃ patvā saddhājāto pabbajito nacirasseva arahattaṃ pāpuṇi.
21. со буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о ниб̣б̣уд̇з логамахид̇зд̇иаад̣̇и вуд̇д̇ам̣. д̇ад̇т̇а логамахид̇зд̇и логзхи махид̇о бууж̇ид̇од̇и логамахид̇о, д̇асмим̣ логамахид̇з сид̣̇д̇хад̇т̇амхи бхаг̇авад̇и бариниб̣б̣уд̇зд̇и самб̣анд̇хо. аахуд̇ийнам̣бадиг̇г̇ахзд̇и аахуд̇ино вужжанд̇и бууж̇аасаггаараа, д̇зсам̣ аахуд̇ийнам̣ бадиг̇г̇ахзд̇ум̣ арахад̇ийд̇и аахуд̇ийнам̣бадиг̇г̇ахо, алуд̇д̇агид̇анд̇асамаасо, д̇асмим̣ аахуд̇ийнам̣бадиг̇г̇ахз бхаг̇авад̇и бариниб̣б̣уд̇зд̇и ад̇т̇о.
21. So pubbakammaṃ saritvā somanassajāto pubbacaritāpadānaṃ pakāsento nibbute lokamahitetiādi vuttaṃ. Tattha lokamahiteti lokehi mahito pūjitoti lokamahito, tasmiṃ lokamahite siddhatthamhi bhagavati parinibbuteti sambandho. Āhutīnaṃpaṭiggaheti āhutino vuccanti pūjāsakkārā, tesaṃ āhutīnaṃ paṭiggahetuṃ arahatīti āhutīnaṃpaṭiggaho, aluttakitantasamāso, tasmiṃ āhutīnaṃpaṭiggahe bhagavati parinibbuteti attho.
22. умаабубпанд̇и уд̣̇д̇хамуд̣̇д̇хам̣ нийлабабхам̣ мун̃жамаанам̣ бубпад̇и вигасад̇ийд̇и умаабубпам̣, д̇ам̣ умаабубпам̣ г̇ахзд̇ваа жзд̇ияз бууж̇ам̣ агаасинд̇и ад̇т̇о. сзсам̣ уд̇д̇аанад̇т̇амзваад̇и.
22.Umāpupphanti uddhamuddhaṃ nīlapabhaṃ muñcamānaṃ pupphati vikasatīti umāpupphaṃ, taṃ umāpupphaṃ gahetvā cetiye pūjaṃ akāsinti attho. Sesaṃ uttānatthamevāti.
умаабубпияад̇т̇зраабад̣̇аанаван̣н̣анаа самад̇д̇аа.
Umāpupphiyattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 5. умаабубпияад̇т̇зраабад̣̇аанам̣ • 5. Umāpupphiyattheraapadānaṃ
