| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೫. ಉಮಾಪುಪ್ಫಿಯತ್ಥೇರಅಪದಾನವಣ್ಣನಾ
5. Umāpupphiyattheraapadānavaṇṇanā
ನಿಬ್ಬುತೇ ಲೋಕಮಹಿತೇತಿಆದಿಕಂ ಆಯಸ್ಮತೋ ಉಮಾಪುಪ್ಫಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಘರಾವಾಸಂ ಸಣ್ಠಪೇತ್ವಾ ವಸನ್ತೋ ನಿಬ್ಬುತಸ್ಸ ಭಗವತೋ ಚೇತಿಯಮಹೇ ವತ್ತಮಾನೇ ಇನ್ದನೀಲಮಣಿವಣ್ಣಂ ಉಮಾಪುಪ್ಫಂ ಗಹೇತ್ವಾ ಪೂಜೇಸಿ। ಸೋ ತೇನ ಪುಞ್ಞೇನ ಸುಗತೀಸುಯೇವ ಸಂಸರನ್ತೋ ದಿಬ್ಬಮಾನುಸಸಮ್ಪತ್ತಿಯೋ ಅನುಭವಿತ್ವಾ ಉಪ್ಪನ್ನುಪ್ಪನ್ನಭವೇ ಬಹುಲಂ ನೀಲವಣ್ಣೋ ಜಾತಿಸಮ್ಪನ್ನೋ ವಿಭವಸಮ್ಪನ್ನೋ ಅಹೋಸಿ। ಸೋ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸದ್ಧಾಜಾತೋ ಪಬ್ಬಜಿತೋ ನಚಿರಸ್ಸೇವ ಅರಹತ್ತಂ ಪಾಪುಣಿ।
Nibbute lokamahitetiādikaṃ āyasmato umāpupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto nibbutassa bhagavato cetiyamahe vattamāne indanīlamaṇivaṇṇaṃ umāpupphaṃ gahetvā pūjesi. So tena puññena sugatīsuyeva saṃsaranto dibbamānusasampattiyo anubhavitvā uppannuppannabhave bahulaṃ nīlavaṇṇo jātisampanno vibhavasampanno ahosi. So imasmiṃ buddhuppāde vibhavasampanne ekasmiṃ kulagehe nibbatto viññutaṃ patvā saddhājāto pabbajito nacirasseva arahattaṃ pāpuṇi.
೨೧. ಸೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಿಬ್ಬುತೇ ಲೋಕಮಹಿತೇತಿಆದಿ ವುತ್ತಂ। ತತ್ಥ ಲೋಕಮಹಿತೇತಿ ಲೋಕೇಹಿ ಮಹಿತೋ ಪೂಜಿತೋತಿ ಲೋಕಮಹಿತೋ, ತಸ್ಮಿಂ ಲೋಕಮಹಿತೇ ಸಿದ್ಧತ್ಥಮ್ಹಿ ಭಗವತಿ ಪರಿನಿಬ್ಬುತೇತಿ ಸಮ್ಬನ್ಧೋ। ಆಹುತೀನಂಪಟಿಗ್ಗಹೇತಿ ಆಹುತಿನೋ ವುಚ್ಚನ್ತಿ ಪೂಜಾಸಕ್ಕಾರಾ, ತೇಸಂ ಆಹುತೀನಂ ಪಟಿಗ್ಗಹೇತುಂ ಅರಹತೀತಿ ಆಹುತೀನಂಪಟಿಗ್ಗಹೋ, ಅಲುತ್ತಕಿತನ್ತಸಮಾಸೋ, ತಸ್ಮಿಂ ಆಹುತೀನಂಪಟಿಗ್ಗಹೇ ಭಗವತಿ ಪರಿನಿಬ್ಬುತೇತಿ ಅತ್ಥೋ।
21. So pubbakammaṃ saritvā somanassajāto pubbacaritāpadānaṃ pakāsento nibbute lokamahitetiādi vuttaṃ. Tattha lokamahiteti lokehi mahito pūjitoti lokamahito, tasmiṃ lokamahite siddhatthamhi bhagavati parinibbuteti sambandho. Āhutīnaṃpaṭiggaheti āhutino vuccanti pūjāsakkārā, tesaṃ āhutīnaṃ paṭiggahetuṃ arahatīti āhutīnaṃpaṭiggaho, aluttakitantasamāso, tasmiṃ āhutīnaṃpaṭiggahe bhagavati parinibbuteti attho.
೨೨. ಉಮಾಪುಪ್ಫನ್ತಿ ಉದ್ಧಮುದ್ಧಂ ನೀಲಪಭಂ ಮುಞ್ಚಮಾನಂ ಪುಪ್ಫತಿ ವಿಕಸತೀತಿ ಉಮಾಪುಪ್ಫಂ, ತಂ ಉಮಾಪುಪ್ಫಂ ಗಹೇತ್ವಾ ಚೇತಿಯೇ ಪೂಜಂ ಅಕಾಸಿನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
22.Umāpupphanti uddhamuddhaṃ nīlapabhaṃ muñcamānaṃ pupphati vikasatīti umāpupphaṃ, taṃ umāpupphaṃ gahetvā cetiye pūjaṃ akāsinti attho. Sesaṃ uttānatthamevāti.
ಉಮಾಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತಾ।
Umāpupphiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೫. ಉಮಾಪುಪ್ಫಿಯತ್ಥೇರಅಪದಾನಂ • 5. Umāpupphiyattheraapadānaṃ
