| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. ஊமிப⁴யஸுத்தவண்ணனா
2. Ūmibhayasuttavaṇṇanā
122. து³தியே கோதூ⁴பாயாஸஸ்ஸேதங் அதி⁴வசனந்தி எத்த² குஜ்ஜ²னட்டே²ன கோதோ⁴, ஸ்வேவ சித்தஸ்ஸ காயஸ்ஸ ச அதிப்பமத்³த³னமத²னுப்பாத³னேஹி த³ள்ஹஆயாஸட்டே²ன உபாயாஸோ. அனேகவாரங் பவத்தித்வா அத்தனா ஸமவேதங் ஸத்தங் அஜ்ஜொ²த்த²ரித்வா ஸீஸங் உக்கி²பிதுங் அத³த்வா ஊமிஸதி³ஸதா த³ட்ட²ப்³பா³. யதா² ஹி பா³ஹிரங் உத³கங் ஓதிண்ணோ ஊமீஸு ஓஸீதி³த்வா மரதி, ஏவங் இமஸ்மிங் ஸாஸனே கோதூ⁴பாயாஸே ஓஸீதி³த்வா விப்³ப⁴மதி, தஸ்மா கோதூ⁴பாயாஸோ ‘‘ஊமிப⁴ய’’ந்தி வுத்தோ. ஓத³ரிகத்தஸ்ஸேதங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ கும்பீ⁴லேன கா²தி³தோ மரதி, ஏவங் இமஸ்மிங் ஸாஸனே ஓத³ரிகத்தேன ஓத³ரிகபா⁴வேன ஆமிஸகே³தே⁴ன மிச்சா²ஜீவேன ஜீவிககப்பனேன நாஸிதஸீலாதி³கு³ணதாய கா²தி³தத⁴ம்மஸரீரோ விப்³ப⁴மதி, தஸ்மா ஓத³ரிகத்தங் ‘‘கும்பீ⁴லப⁴ய’’ந்தி வுத்தங்.
122. Dutiye kodhūpāyāsassetaṃ adhivacananti ettha kujjhanaṭṭhena kodho, sveva cittassa kāyassa ca atippamaddanamathanuppādanehi daḷhaāyāsaṭṭhena upāyāso. Anekavāraṃ pavattitvā attanā samavetaṃ sattaṃ ajjhottharitvā sīsaṃ ukkhipituṃ adatvā ūmisadisatā daṭṭhabbā. Yathā hi bāhiraṃ udakaṃ otiṇṇo ūmīsu osīditvā marati, evaṃ imasmiṃ sāsane kodhūpāyāse osīditvā vibbhamati, tasmā kodhūpāyāso ‘‘ūmibhaya’’nti vutto. Odarikattassetaṃ adhivacananti yathā hi bāhiraṃ udakaṃ otiṇṇo kumbhīlena khādito marati, evaṃ imasmiṃ sāsane odarikattena odarikabhāvena āmisagedhena micchājīvena jīvikakappanena nāsitasīlādiguṇatāya khāditadhammasarīro vibbhamati, tasmā odarikattaṃ ‘‘kumbhīlabhaya’’nti vuttaṃ.
அனுபட்டி²தாய ஸதியாதி காயக³தங் ஸதிங் அனுட்டா²பெத்வா. அஸங்வுதேஹீதி அபிஹிதேஹி. பஞ்சன்னேதங் காமகு³ணானங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ ஆவட்டே நிமுஜ்ஜித்வா மரதி, ஏவங் இமஸ்மிங் ஸாஸனே பப்³ப³ஜிதோ பஞ்சகாமகு³ணாவட்டே நிமுஜ்ஜித்வா விப்³ப⁴மதி. காமராகா³பி⁴பூ⁴தோ ஹி ஸத்தோ இதோ ச எத்தோ, எத்தோ ச இதோதி ஏவங் மனாபியரூபாதி³விஸயஸங்கா²தே ஆவட்டே அத்தானங் ஸங்ஸாரெத்வா யதா² ததோ ப³ஹிபூ⁴தே நெக்க²ம்மே சித்தம்பி ந உப்பாதே³தி, ஏவங் ஆவட்டெத்வா ப்³யஸனாபாத³னேன காமகு³ணானங் ஆவட்டஸதி³ஸதா த³ட்ட²ப்³பா³.
Anupaṭṭhitāya satiyāti kāyagataṃ satiṃ anuṭṭhāpetvā. Asaṃvutehīti apihitehi. Pañcannetaṃ kāmaguṇānaṃ adhivacananti yathā hi bāhiraṃ udakaṃ otiṇṇo āvaṭṭe nimujjitvā marati, evaṃ imasmiṃ sāsane pabbajito pañcakāmaguṇāvaṭṭe nimujjitvā vibbhamati. Kāmarāgābhibhūto hi satto ito ca etto, etto ca itoti evaṃ manāpiyarūpādivisayasaṅkhāte āvaṭṭe attānaṃ saṃsāretvā yathā tato bahibhūte nekkhamme cittampi na uppādeti, evaṃ āvaṭṭetvā byasanāpādanena kāmaguṇānaṃ āvaṭṭasadisatā daṭṭhabbā.
அனுத்³த⁴ங்ஸேதீதி கிலமேதி விலோலதி. ராகா³னுத்³த⁴ங்ஸிதேனாதி ராகே³ன அனுத்³த⁴ங்ஸிதேன. மாதுகா³மஸ்ஸேதங் அதி⁴வசனந்தி. யதா² ஹி பா³ஹிரங் உத³கங் ஓதிண்ணோ சண்ட³மச்ச²ங் ஆக³ம்ம லத்³த⁴ப்பஹாரோ மரதி, ஏவங் இமஸ்மிங் ஸாஸனே மாதுகா³மங் ஆரப்³ப⁴ உப்பன்னகாமராகோ³ விப்³ப⁴மதி, தஸ்மா மாதுகா³மோ ‘‘ஸுஸுகாப⁴ய’’ந்தி வுத்தோ. மாதுகா³மோ ஹி யோனிஸோமனஸிகாரரஹிதங் அதீ⁴ரபுரிஸங் இத்தி²குத்தபூ⁴தேஹி அத்தனோ ஹாஸபா⁴வவிலாஸேஹி அபி⁴பு⁴ய்ய க³ஹெத்வா தீ⁴ரஜாதிகம்பி அத்தனோ ரூபாதீ³ஹி ஸம்பலோப⁴னவஸேன அனவஸேஸங் அத்தனோ உபகாரத⁴ம்மே ஸீலாதி³கே ஸம்பாதே³துங் அஸமத்த²ங் கரொந்தோ அனயப்³யஸனங் பாபேதி.
Anuddhaṃsetīti kilameti vilolati. Rāgānuddhaṃsitenāti rāgena anuddhaṃsitena. Mātugāmassetaṃ adhivacananti. Yathā hi bāhiraṃ udakaṃ otiṇṇo caṇḍamacchaṃ āgamma laddhappahāro marati, evaṃ imasmiṃ sāsane mātugāmaṃ ārabbha uppannakāmarāgo vibbhamati, tasmā mātugāmo ‘‘susukābhaya’’nti vutto. Mātugāmo hi yonisomanasikārarahitaṃ adhīrapurisaṃ itthikuttabhūtehi attano hāsabhāvavilāsehi abhibhuyya gahetvā dhīrajātikampi attano rūpādīhi sampalobhanavasena anavasesaṃ attano upakāradhamme sīlādike sampādetuṃ asamatthaṃ karonto anayabyasanaṃ pāpeti.
இமானி பன சத்தாரி ப⁴யானி பா⁴யித்வா யதா² உத³கங் அனோரோஹந்தஸ்ஸ உத³கங் நிஸ்ஸாய உத³கபிபாஸாவினயனங் ஸரீரஸுத்³தி⁴பரிளாஹூபஸமோ காயஉதுக்³கா³ஹாபனந்தி, ஏவமாதி³ ஆனிஸங்ஸோ நத்தி², ஏவமேவங் இமானி சத்தாரி ப⁴யானி பா⁴யித்வா ஸாஸனே அபப்³ப³ஜந்தஸ்ஸபி இமங் ஸாஸனங் நிஸ்ஸாய ஸங்கே²பதோ வட்டது³க்கூ²பஸமோ, வித்தா²ரதோ பன ஸீலானிஸங்ஸாதி³வஸேன அனேகவிதோ⁴ ஆனிஸங்ஸோ நத்தி². யதா² பன இமானி சத்தாரி ப⁴யானி அபா⁴யித்வா உத³கங் ஓரோஹந்தஸ்ஸ வுத்தப்பகாரோ ஆனிஸங்ஸோ ஹோதி, ஏவங் இமானி அபா⁴யித்வா ஸாஸனே பப்³ப³ஜந்தஸ்ஸபி வுத்தப்பகாரோ ஆனிஸங்ஸோ ஹோதி. மஹாத⁴ம்மரக்கி²தத்தே²ரோ பனாஹ ‘‘சத்தாரி ப⁴யானி பா⁴யித்வா உத³கங் அனோதரந்தோ ஸோதங் சி²ந்தி³த்வா பரதீரங் பாபுணிதுங் ந ஸக்கோதி, அபா⁴யித்வா ஓதரந்தோ ஸக்கோதி, ஏவமேவங் பா⁴யித்வா ஸாஸனே அபப்³ப³ஜந்தோபி தண்ஹாஸோதங் சி²ந்தி³த்வா நிப்³பா³னபாரங் த³ட்டு²ங் ந ஸக்கோதி, அபா⁴யித்வா பப்³ப³ஜந்தோ ஸக்கோதீ’’தி.
Imāni pana cattāri bhayāni bhāyitvā yathā udakaṃ anorohantassa udakaṃ nissāya udakapipāsāvinayanaṃ sarīrasuddhipariḷāhūpasamo kāyautuggāhāpananti, evamādi ānisaṃso natthi, evamevaṃ imāni cattāri bhayāni bhāyitvā sāsane apabbajantassapi imaṃ sāsanaṃ nissāya saṅkhepato vaṭṭadukkhūpasamo, vitthārato pana sīlānisaṃsādivasena anekavidho ānisaṃso natthi. Yathā pana imāni cattāri bhayāni abhāyitvā udakaṃ orohantassa vuttappakāro ānisaṃso hoti, evaṃ imāni abhāyitvā sāsane pabbajantassapi vuttappakāro ānisaṃso hoti. Mahādhammarakkhitatthero panāha ‘‘cattāri bhayāni bhāyitvā udakaṃ anotaranto sotaṃ chinditvā paratīraṃ pāpuṇituṃ na sakkoti, abhāyitvā otaranto sakkoti, evamevaṃ bhāyitvā sāsane apabbajantopi taṇhāsotaṃ chinditvā nibbānapāraṃ daṭṭhuṃ na sakkoti, abhāyitvā pabbajanto sakkotī’’ti.
ஊமிப⁴யஸுத்தவண்ணனா நிட்டி²தா.
Ūmibhayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஊமிப⁴யஸுத்தங் • 2. Ūmibhayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ஊமிப⁴யஸுத்தவண்ணனா • 2. Ūmibhayasuttavaṇṇanā
