| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
২. ঊমিভযসুত্তৰণ্ণনা
2. Ūmibhayasuttavaṇṇanā
১২২. দুতিযে কোধূপাযাসস্সেতং অধিৰচনন্তি এত্থ কুজ্ঝনট্ঠেন কোধো, স্ৰেৰ চিত্তস্স কাযস্স চ অতিপ্পমদ্দনমথনুপ্পাদনেহি দল়্হআযাসট্ঠেন উপাযাসো। অনেকৰারং পৰত্তিত্ৰা অত্তনা সমৰেতং সত্তং অজ্ঝোত্থরিত্ৰা সীসং উক্খিপিতুং অদত্ৰা ঊমিসদিসতা দট্ঠব্বা। যথা হি বাহিরং উদকং ওতিণ্ণো ঊমীসু ওসীদিত্ৰা মরতি, এৰং ইমস্মিং সাসনে কোধূপাযাসে ওসীদিত্ৰা ৰিব্ভমতি, তস্মা কোধূপাযাসো ‘‘ঊমিভয’’ন্তি ৰুত্তো। ওদরিকত্তস্সেতং অধিৰচনন্তি যথা হি বাহিরং উদকং ওতিণ্ণো কুম্ভীলেন খাদিতো মরতি, এৰং ইমস্মিং সাসনে ওদরিকত্তেন ওদরিকভাৰেন আমিসগেধেন মিচ্ছাজীৰেন জীৰিককপ্পনেন নাসিতসীলাদিগুণতায খাদিতধম্মসরীরো ৰিব্ভমতি, তস্মা ওদরিকত্তং ‘‘কুম্ভীলভয’’ন্তি ৰুত্তং।
122. Dutiye kodhūpāyāsassetaṃ adhivacananti ettha kujjhanaṭṭhena kodho, sveva cittassa kāyassa ca atippamaddanamathanuppādanehi daḷhaāyāsaṭṭhena upāyāso. Anekavāraṃ pavattitvā attanā samavetaṃ sattaṃ ajjhottharitvā sīsaṃ ukkhipituṃ adatvā ūmisadisatā daṭṭhabbā. Yathā hi bāhiraṃ udakaṃ otiṇṇo ūmīsu osīditvā marati, evaṃ imasmiṃ sāsane kodhūpāyāse osīditvā vibbhamati, tasmā kodhūpāyāso ‘‘ūmibhaya’’nti vutto. Odarikattassetaṃ adhivacananti yathā hi bāhiraṃ udakaṃ otiṇṇo kumbhīlena khādito marati, evaṃ imasmiṃ sāsane odarikattena odarikabhāvena āmisagedhena micchājīvena jīvikakappanena nāsitasīlādiguṇatāya khāditadhammasarīro vibbhamati, tasmā odarikattaṃ ‘‘kumbhīlabhaya’’nti vuttaṃ.
অনুপট্ঠিতায সতিযাতি কাযগতং সতিং অনুট্ঠাপেত্ৰা। অসংৰুতেহীতি অপিহিতেহি। পঞ্চন্নেতং কামগুণানং অধিৰচনন্তি যথা হি বাহিরং উদকং ওতিণ্ণো আৰট্টে নিমুজ্জিত্ৰা মরতি, এৰং ইমস্মিং সাসনে পব্বজিতো পঞ্চকামগুণাৰট্টে নিমুজ্জিত্ৰা ৰিব্ভমতি। কামরাগাভিভূতো হি সত্তো ইতো চ এত্তো, এত্তো চ ইতোতি এৰং মনাপিযরূপাদিৰিসযসঙ্খাতে আৰট্টে অত্তানং সংসারেত্ৰা যথা ততো বহিভূতে নেক্খম্মে চিত্তম্পি ন উপ্পাদেতি, এৰং আৰট্টেত্ৰা ব্যসনাপাদনেন কামগুণানং আৰট্টসদিসতা দট্ঠব্বা।
Anupaṭṭhitāya satiyāti kāyagataṃ satiṃ anuṭṭhāpetvā. Asaṃvutehīti apihitehi. Pañcannetaṃ kāmaguṇānaṃ adhivacananti yathā hi bāhiraṃ udakaṃ otiṇṇo āvaṭṭe nimujjitvā marati, evaṃ imasmiṃ sāsane pabbajito pañcakāmaguṇāvaṭṭe nimujjitvā vibbhamati. Kāmarāgābhibhūto hi satto ito ca etto, etto ca itoti evaṃ manāpiyarūpādivisayasaṅkhāte āvaṭṭe attānaṃ saṃsāretvā yathā tato bahibhūte nekkhamme cittampi na uppādeti, evaṃ āvaṭṭetvā byasanāpādanena kāmaguṇānaṃ āvaṭṭasadisatā daṭṭhabbā.
অনুদ্ধংসেতীতি কিলমেতি ৰিলোলতি। রাগানুদ্ধংসিতেনাতি রাগেন অনুদ্ধংসিতেন। মাতুগামস্সেতং অধিৰচনন্তি। যথা হি বাহিরং উদকং ওতিণ্ণো চণ্ডমচ্ছং আগম্ম লদ্ধপ্পহারো মরতি, এৰং ইমস্মিং সাসনে মাতুগামং আরব্ভ উপ্পন্নকামরাগো ৰিব্ভমতি, তস্মা মাতুগামো ‘‘সুসুকাভয’’ন্তি ৰুত্তো। মাতুগামো হি যোনিসোমনসিকাররহিতং অধীরপুরিসং ইত্থিকুত্তভূতেহি অত্তনো হাসভাৰৰিলাসেহি অভিভুয্য গহেত্ৰা ধীরজাতিকম্পি অত্তনো রূপাদীহি সম্পলোভনৰসেন অনৰসেসং অত্তনো উপকারধম্মে সীলাদিকে সম্পাদেতুং অসমত্থং করোন্তো অনযব্যসনং পাপেতি।
Anuddhaṃsetīti kilameti vilolati. Rāgānuddhaṃsitenāti rāgena anuddhaṃsitena. Mātugāmassetaṃ adhivacananti. Yathā hi bāhiraṃ udakaṃ otiṇṇo caṇḍamacchaṃ āgamma laddhappahāro marati, evaṃ imasmiṃ sāsane mātugāmaṃ ārabbha uppannakāmarāgo vibbhamati, tasmā mātugāmo ‘‘susukābhaya’’nti vutto. Mātugāmo hi yonisomanasikārarahitaṃ adhīrapurisaṃ itthikuttabhūtehi attano hāsabhāvavilāsehi abhibhuyya gahetvā dhīrajātikampi attano rūpādīhi sampalobhanavasena anavasesaṃ attano upakāradhamme sīlādike sampādetuṃ asamatthaṃ karonto anayabyasanaṃ pāpeti.
ইমানি পন চত্তারি ভযানি ভাযিত্ৰা যথা উদকং অনোরোহন্তস্স উদকং নিস্সায উদকপিপাসাৰিনযনং সরীরসুদ্ধিপরিল়াহূপসমো কাযউতুগ্গাহাপনন্তি, এৰমাদি আনিসংসো নত্থি, এৰমেৰং ইমানি চত্তারি ভযানি ভাযিত্ৰা সাসনে অপব্বজন্তস্সপি ইমং সাসনং নিস্সায সঙ্খেপতো ৰট্টদুক্খূপসমো, ৰিত্থারতো পন সীলানিসংসাদিৰসেন অনেকৰিধো আনিসংসো নত্থি। যথা পন ইমানি চত্তারি ভযানি অভাযিত্ৰা উদকং ওরোহন্তস্স ৰুত্তপ্পকারো আনিসংসো হোতি, এৰং ইমানি অভাযিত্ৰা সাসনে পব্বজন্তস্সপি ৰুত্তপ্পকারো আনিসংসো হোতি। মহাধম্মরক্খিতত্থেরো পনাহ ‘‘চত্তারি ভযানি ভাযিত্ৰা উদকং অনোতরন্তো সোতং ছিন্দিত্ৰা পরতীরং পাপুণিতুং ন সক্কোতি, অভাযিত্ৰা ওতরন্তো সক্কোতি, এৰমেৰং ভাযিত্ৰা সাসনে অপব্বজন্তোপি তণ্হাসোতং ছিন্দিত্ৰা নিব্বানপারং দট্ঠুং ন সক্কোতি, অভাযিত্ৰা পব্বজন্তো সক্কোতী’’তি।
Imāni pana cattāri bhayāni bhāyitvā yathā udakaṃ anorohantassa udakaṃ nissāya udakapipāsāvinayanaṃ sarīrasuddhipariḷāhūpasamo kāyautuggāhāpananti, evamādi ānisaṃso natthi, evamevaṃ imāni cattāri bhayāni bhāyitvā sāsane apabbajantassapi imaṃ sāsanaṃ nissāya saṅkhepato vaṭṭadukkhūpasamo, vitthārato pana sīlānisaṃsādivasena anekavidho ānisaṃso natthi. Yathā pana imāni cattāri bhayāni abhāyitvā udakaṃ orohantassa vuttappakāro ānisaṃso hoti, evaṃ imāni abhāyitvā sāsane pabbajantassapi vuttappakāro ānisaṃso hoti. Mahādhammarakkhitatthero panāha ‘‘cattāri bhayāni bhāyitvā udakaṃ anotaranto sotaṃ chinditvā paratīraṃ pāpuṇituṃ na sakkoti, abhāyitvā otaranto sakkoti, evamevaṃ bhāyitvā sāsane apabbajantopi taṇhāsotaṃ chinditvā nibbānapāraṃ daṭṭhuṃ na sakkoti, abhāyitvā pabbajanto sakkotī’’ti.
ঊমিভযসুত্তৰণ্ণনা নিট্ঠিতা।
Ūmibhayasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২. ঊমিভযসুত্তং • 2. Ūmibhayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ঊমিভযসুত্তৰণ্ণনা • 2. Ūmibhayasuttavaṇṇanā
