| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. ཨུམྨགྒསུཏྟཾ
6. Ummaggasuttaṃ
༡༨༦. ཨཐ ཁོ ཨཉྙཏརོ བྷིཀྑུ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘ཀེན ནུ ཁོ, བྷནྟེ, ལོཀོ ནཱིཡཏི, ཀེན ལོཀོ པརིཀསྶཏི, ཀསྶ ཙ ཨུཔྤནྣསྶ ཝསཾ གཙྪཏཱི’’ཏི?
186. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘kena nu kho, bhante, loko nīyati, kena loko parikassati, kassa ca uppannassa vasaṃ gacchatī’’ti?
‘‘སཱདྷུ སཱདྷུ, བྷིཀྑུ! བྷདྡཀོ ཁོ ཏེ, བྷིཀྑུ, ཨུམྨགྒོ 1, བྷདྡཀཾ པཊིབྷཱནཾ, ཀལྱཱཎཱི 2 པརིཔུཙྪཱ། ཨེཝཉྷི ཏྭཾ, བྷིཀྑུ, པུཙྪསི – ‘ཀེན ནུ ཁོ, བྷནྟེ, ལོཀོ ནཱིཡཏི, ཀེན ལོཀོ པརིཀསྶཏི, ཀསྶ ཙ ཨུཔྤནྣསྶ ཝསཾ གཙྪཏཱི’’’ཏི? ‘‘ཨེཝཾ, བྷནྟེ’’། ‘‘ཙིཏྟེན ཁོ, བྷིཀྑུ, ལོཀོ ནཱིཡཏི, ཙིཏྟེན པརིཀསྶཏི, ཙིཏྟསྶ ཨུཔྤནྣསྶ ཝསཾ གཙྪཏཱི’’ཏི།
‘‘Sādhu sādhu, bhikkhu! Bhaddako kho te, bhikkhu, ummaggo 3, bhaddakaṃ paṭibhānaṃ, kalyāṇī 4 paripucchā. Evañhi tvaṃ, bhikkhu, pucchasi – ‘kena nu kho, bhante, loko nīyati, kena loko parikassati, kassa ca uppannassa vasaṃ gacchatī’’’ti? ‘‘Evaṃ, bhante’’. ‘‘Cittena kho, bhikkhu, loko nīyati, cittena parikassati, cittassa uppannassa vasaṃ gacchatī’’ti.
‘‘སཱདྷུ , བྷནྟེ’’ཏི ཁོ སོ བྷིཀྑུ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ བྷགཝནྟཾ ཨུཏྟརི པཉྷཾ ཨཔུཙྪི – ‘‘‘བཧུསྶུཏོ དྷམྨདྷརོ, བཧུསྶུཏོ དྷམྨདྷརོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, བཧུསྶུཏོ དྷམྨདྷརོ ཧོཏཱི’’ཏི?
‘‘Sādhu , bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘bahussuto dhammadharo, bahussuto dhammadharo’ti, bhante, vuccati. Kittāvatā nu kho, bhante, bahussuto dhammadharo hotī’’ti?
‘‘སཱདྷུ སཱདྷུ, བྷིཀྑུ! བྷདྡཀོ ཁོ ཏེ, བྷིཀྑུ ཨུམྨགྒོ, བྷདྡཀཾ པཊིབྷཱནཾ, ཀལྱཱཎཱི པརིཔུཙྪཱ། ཨེཝཉྷི ཏྭཾ, བྷིཀྑུ, པུཙྪསི – ‘བཧུསྶུཏོ དྷམྨདྷརོ, བཧུསྶུཏོ དྷམྨདྷརོཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, བཧུསྶུཏོ དྷམྨདྷརོ ཧོཏཱི’’’ཏི? ‘‘ཨེཝཾ, བྷནྟེ’’། ‘‘བཧཱུ ཁོ, བྷིཀྑུ, མཡཱ དྷམྨཱ དེསིཏཱ 5 – སུཏྟཾ, གེཡྻཾ, ཝེཡྻཱཀརཎཾ, གཱཐཱ, ཨུདཱནཾ, ཨིཏིཝུཏྟཀཾ, ཛཱཏཀཾ, ཨབྦྷུཏདྷམྨཾ, ཝེདལླཾ། ཙཏུཔྤདཱཡ ཙེཔི, བྷིཀྑུ, གཱཐཱཡ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཧོཏི བཧུསྶུཏོ དྷམྨདྷརོཏི ཨལཾ ཝཙནཱཡཱ’’ཏི།
‘‘Sādhu sādhu, bhikkhu! Bhaddako kho te, bhikkhu ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ, bhikkhu, pucchasi – ‘bahussuto dhammadharo, bahussuto dhammadharoti, bhante, vuccati. Kittāvatā nu kho, bhante, bahussuto dhammadharo hotī’’’ti? ‘‘Evaṃ, bhante’’. ‘‘Bahū kho, bhikkhu, mayā dhammā desitā 6 – suttaṃ, geyyaṃ, veyyākaraṇaṃ, gāthā, udānaṃ, itivuttakaṃ, jātakaṃ, abbhutadhammaṃ, vedallaṃ. Catuppadāya cepi, bhikkhu, gāthāya atthamaññāya dhammamaññāya dhammānudhammappaṭipanno hoti bahussuto dhammadharoti alaṃ vacanāyā’’ti.
‘‘སཱདྷུ, བྷནྟེ’’ཏི ཁོ སོ བྷིཀྑུ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ བྷགཝནྟཾ ཨུཏྟརི པཉྷཾ ཨཔུཙྪི – ‘‘‘སུཏཝཱ ནིབྦེདྷིཀཔཉྙོ, སུཏཝཱ ནིབྦེདྷིཀཔཉྙོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, སུཏཝཱ ནིབྦེདྷིཀཔཉྙོ ཧོཏཱི’’ཏི?
‘‘Sādhu, bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘sutavā nibbedhikapañño, sutavā nibbedhikapañño’ti, bhante, vuccati. Kittāvatā nu kho, bhante, sutavā nibbedhikapañño hotī’’ti?
‘‘སཱདྷུ སཱདྷུ, བྷིཀྑུ! བྷདྡཀོ ཁོ ཏེ, བྷིཀྑུ, ཨུམྨགྒོ, བྷདྡཀཾ པཊིབྷཱནཾ, ཀལྱཱཎཱི པརིཔུཙྪཱ། ཨེཝཉྷི ཏྭཾ, བྷིཀྑུ, པུཙྪསི – ‘སུཏཝཱ ནིབྦེདྷིཀཔཉྙོ, སུཏཝཱ ནིབྦེདྷིཀཔཉྙོཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, སུཏཝཱ ནིབྦེདྷིཀཔཉྙོ ཧོཏཱི’’’ཏི? ‘‘ཨེཝཾ, བྷནྟེ’’། ‘‘ཨིདྷ, བྷིཀྑུ, བྷིཀྑུནོ ‘ཨིདཾ དུཀྑ’ནྟི སུཏཾ ཧོཏི, པཉྙཱཡ ཙསྶ ཨཏྠཾ ཨཏིཝིཛ྄ཛྷ པསྶཏི; ‘ཨཡཾ དུཀྑསམུདཡོ’ཏི སུཏཾ ཧོཏི, པཉྙཱཡ ཙསྶ ཨཏྠཾ ཨཏིཝིཛ྄ཛྷ པསྶཏི; ‘ཨཡཾ དུཀྑནིརོདྷོ’ཏི སུཏཾ ཧོཏི, པཉྙཱཡ ཙསྶ ཨཏྠཾ ཨཏིཝིཛ྄ཛྷ པསྶཏི; ‘ཨཡཾ དུཀྑནིརོདྷགཱམིནཱི པཊིཔདཱ’ཏི སུཏཾ ཧོཏི, པཉྙཱཡ ཙསྶ ཨཏྠཾ ཨཏིཝིཛ྄ཛྷ པསྶཏི། ཨེཝཾ ཁོ, བྷིཀྑུ, སུཏཝཱ ནིབྦེདྷིཀཔཉྙོ ཧོཏཱི’’ཏི།
‘‘Sādhu sādhu, bhikkhu! Bhaddako kho te, bhikkhu, ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ, bhikkhu, pucchasi – ‘sutavā nibbedhikapañño, sutavā nibbedhikapaññoti, bhante, vuccati. Kittāvatā nu kho, bhante, sutavā nibbedhikapañño hotī’’’ti? ‘‘Evaṃ, bhante’’. ‘‘Idha, bhikkhu, bhikkhuno ‘idaṃ dukkha’nti sutaṃ hoti, paññāya cassa atthaṃ ativijjha passati; ‘ayaṃ dukkhasamudayo’ti sutaṃ hoti, paññāya cassa atthaṃ ativijjha passati; ‘ayaṃ dukkhanirodho’ti sutaṃ hoti, paññāya cassa atthaṃ ativijjha passati; ‘ayaṃ dukkhanirodhagāminī paṭipadā’ti sutaṃ hoti, paññāya cassa atthaṃ ativijjha passati. Evaṃ kho, bhikkhu, sutavā nibbedhikapañño hotī’’ti.
‘‘སཱདྷུ, བྷནྟེ’’ཏི ཁོ སོ བྷིཀྑུ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ བྷགཝནྟཾ ཨུཏྟརི པཉྷཾ ཨཔུཙྪི – ‘‘‘པཎྜིཏོ མཧཱཔཉྙོ, པཎྜིཏོ མཧཱཔཉྙོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, པཎྜིཏོ མཧཱཔཉྙོ ཧོཏཱི’’ཏི?
‘‘Sādhu, bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘paṇḍito mahāpañño, paṇḍito mahāpañño’ti, bhante, vuccati. Kittāvatā nu kho, bhante, paṇḍito mahāpañño hotī’’ti?
‘‘སཱདྷུ སཱདྷུ བྷིཀྑུ! བྷདྡཀོ ཁོ ཏེ, བྷིཀྑུ, ཨུམྨགྒོ, བྷདྡཀཾ པཊིབྷཱནཾ, ཀལྱཱཎཱི པརིཔུཙྪཱ། ཨེཝཉྷི ཏྭཾ བྷིཀྑུ པུཙྪསི – ‘པཎྜིཏོ མཧཱཔཉྙོ, པཎྜིཏོ མཧཱཔཉྙོཏི , བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, པཎྜིཏོ མཧཱཔཉྙོ ཧོཏཱི’’’ཏི? ‘‘ཨེཝཾ, བྷནྟེ’’། ‘‘ཨིདྷ, བྷིཀྑུ, པཎྜིཏོ མཧཱཔཉྙོ ནེཝཏྟབྱཱབཱདྷཱཡ ཙེཏེཏི ན པརབྱཱབཱདྷཱཡ ཙེཏེཏི ན ཨུབྷཡབྱཱབཱདྷཱཡ ཙེཏེཏི ཨཏྟཧིཏཔརཧིཏཨུབྷཡཧིཏསབྦལོཀཧིཏམེཝ ཙིནྟཡམཱནོ ཙིནྟེཏི། ཨེཝཾ ཁོ, བྷིཀྑུ, པཎྜིཏོ མཧཱཔཉྙོ ཧོཏཱི’’ཏི། ཚཊྛཾ།
‘‘Sādhu sādhu bhikkhu! Bhaddako kho te, bhikkhu, ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ bhikkhu pucchasi – ‘paṇḍito mahāpañño, paṇḍito mahāpaññoti , bhante, vuccati. Kittāvatā nu kho, bhante, paṇḍito mahāpañño hotī’’’ti? ‘‘Evaṃ, bhante’’. ‘‘Idha, bhikkhu, paṇḍito mahāpañño nevattabyābādhāya ceteti na parabyābādhāya ceteti na ubhayabyābādhāya ceteti attahitaparahitaubhayahitasabbalokahitameva cintayamāno cinteti. Evaṃ kho, bhikkhu, paṇḍito mahāpañño hotī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཨུམྨགྒསུཏྟཝཎྞནཱ • 6. Ummaggasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. ཨུམྨགྒསུཏྟཝཎྞནཱ • 6. Ummaggasuttavaṇṇanā
