| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৬. উম্মগ্গসুত্তৰণ্ণনা
6. Ummaggasuttavaṇṇanā
১৮৬. ছট্ঠে পরিকস্সতীতি আকড্ঢিযতি। উম্মগ্গোতি উম্মুজ্জনং, পঞ্ঞাগমনন্তি অত্থো। পঞ্ঞা এৰ ৰা উম্মুজ্জনট্ঠেন উম্মগ্গোতি ৰুচ্চতি। সাৰ পটিভানট্ঠেন পটিভানং। চিত্তস্স উপ্পন্নস্স ৰসং গচ্ছতীতি যে চিত্তস্স ৰসং গচ্ছন্তি, তেসংযেৰেত্থ গহণং ৰেদিতব্বং। অত্থমঞ্ঞায ধম্মমঞ্ঞাযাতি অত্থঞ্চ পাল়িঞ্চ জানিত্ৰা। ধম্মানুধম্মপ্পটিপন্নো হোতীতি লোকুত্তরধম্মস্স অনুচ্ছৰিকধম্মং সহ সীলেন পুব্বভাগপ্পটিপদং পটিপন্নো হোতি। নিব্বেধিকপঞ্ঞোতি নিব্বিজ্ঝনকপঞ্ঞো। ইদং দুক্খন্তি ঠপেত্ৰা তণ্হং সেসং তেভূমকক্খন্ধপঞ্চকং দুক্খন্তি সুতং হোতি। পঞ্ঞাযাতি মগ্গপঞ্ঞায। অযং দুক্খসমুদযোতি ৰট্টমূলকতণ্হা তস্স দুক্খস্স সমুদযোতি সুতং হোতি। ইমিনা উপাযেন সেসদ্ৰযেপি অত্থো ৰেদিতব্বো। চতুত্থপঞ্হৰিস্সজ্জনেন অরহত্তফলং কথিতন্তি ৰেদিতব্বং।
186. Chaṭṭhe parikassatīti ākaḍḍhiyati. Ummaggoti ummujjanaṃ, paññāgamananti attho. Paññā eva vā ummujjanaṭṭhena ummaggoti vuccati. Sāva paṭibhānaṭṭhena paṭibhānaṃ. Cittassauppannassa vasaṃ gacchatīti ye cittassa vasaṃ gacchanti, tesaṃyevettha gahaṇaṃ veditabbaṃ. Atthamaññāya dhammamaññāyāti atthañca pāḷiñca jānitvā. Dhammānudhammappaṭipanno hotīti lokuttaradhammassa anucchavikadhammaṃ saha sīlena pubbabhāgappaṭipadaṃ paṭipanno hoti. Nibbedhikapaññoti nibbijjhanakapañño. Idaṃ dukkhanti ṭhapetvā taṇhaṃ sesaṃ tebhūmakakkhandhapañcakaṃ dukkhanti sutaṃ hoti. Paññāyāti maggapaññāya. Ayaṃ dukkhasamudayoti vaṭṭamūlakataṇhā tassa dukkhassa samudayoti sutaṃ hoti. Iminā upāyena sesadvayepi attho veditabbo. Catutthapañhavissajjanena arahattaphalaṃ kathitanti veditabbaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৬. উম্মগ্গসুত্তং • 6. Ummaggasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬. উম্মগ্গসুত্তৰণ্ণনা • 6. Ummaggasuttavaṇṇanā
