| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
2. ஊனபஞ்சப³ந்த⁴னஸிக்கா²பத³ங்
2. Ūnapañcabandhanasikkhāpadaṃ
609. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. தேன கோ² பன ஸமயேன அஞ்ஞதரேன கும்ப⁴காரேன பி⁴க்கூ² பவாரிதா ஹொந்தி – ‘‘யேஸங் அய்யானங் பத்தேன அத்தோ² அஹங் பத்தேனா’’தி. தேன கோ² பன ஸமயேன பி⁴க்கூ² ந மத்தங் ஜானித்வா ப³ஹூ பத்தே விஞ்ஞாபெந்தி. யேஸங் கு²த்³த³கா பத்தா தே மஹந்தே பத்தே விஞ்ஞாபெந்தி. யேஸங் மஹந்தா பத்தா தே கு²த்³த³கே பத்தே விஞ்ஞாபெந்தி. அத² கோ² ஸோ கும்ப⁴காரோ பி⁴க்கூ²னங் ப³ஹூ பத்தே கரொந்தோ ந ஸக்கோதி அஞ்ஞங் விக்காயிகங் ப⁴ண்ட³ங் காதுங், அத்தனாபி ந யாபேதி, புத்ததா³ராபிஸ்ஸ கிலமந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தங் ஜானித்வா ப³ஹூ பத்தே விஞ்ஞாபெஸ்ஸந்தி! அயங் இமேஸங் ப³ஹூ பத்தே கரொந்தோ ந ஸக்கோதி அஞ்ஞங் விக்காயிகங் ப⁴ண்ட³ங் காதுங், அத்தனாபி ந யாபேதி, புத்ததா³ராபிஸ்ஸ கிலமந்தீ’’தி.
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² ந மத்தங் ஜானித்வா ப³ஹூ பத்தே விஞ்ஞாபெஸ்ஸந்தீ’’தி! அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே, பி⁴க்கூ² ந மத்தங் ஜானித்வா ப³ஹூ பத்தே விஞ்ஞாபெந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே, பி⁴க்க²வே, மோக⁴புரிஸா ந மத்தங் ஜானித்வா ப³ஹூ பத்தே விஞ்ஞாபெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பத்தோ விஞ்ஞாபேதப்³போ³. யோ விஞ்ஞாபெய்ய, ஆபத்தி து³க்கடஸ்ஸா’’தி.
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
610. தேன கோ² பன ஸமயேன அஞ்ஞதரஸ்ஸ பி⁴க்கு²னோ பத்தோ பி⁴ன்னோ ஹோதி. அத² கோ² ஸோ பி⁴க்கு² – ‘‘ப⁴க³வதா படிக்கி²த்தங் பத்தங் விஞ்ஞாபேது’’ந்தி குக்குச்சாயந்தோ ந விஞ்ஞாபேதி. ஹத்தே²ஸு பிண்டா³ய சரதி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ஹத்தே²ஸு பிண்டா³ய சரிஸ்ஸந்தி, ஸெய்யதா²பி தித்தி²யா’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, நட்ட²பத்தஸ்ஸ வா பி⁴ன்னபத்தஸ்ஸ வா பத்தங் விஞ்ஞாபேது’’ந்தி.
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
611. தேன கோ² பன ஸமயேன ச²ப்³ப³க்³கி³யா பி⁴க்கூ² – ‘‘ப⁴க³வதா அனுஞ்ஞாதங் நட்ட²பத்தஸ்ஸ வா பி⁴ன்னபத்தஸ்ஸ வா பத்தங் விஞ்ஞாபேது’’ந்தி அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபெந்தி . அத² கோ² ஸோ கும்ப⁴காரோ பி⁴க்கூ²னங் ததே²வ ப³ஹூ பத்தே கரொந்தோ ந ஸக்கோதி அஞ்ஞங் விக்காயிகங் ப⁴ண்ட³ங் காதுங், அத்தனாபி ந யாபேதி, புத்ததா³ராபிஸ்ஸ கிலமந்தி. மனுஸ்ஸா ததே²வ உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தங் ஜானித்வா ப³ஹூ பத்தே விஞ்ஞாபெஸ்ஸந்தி! அயங் இமேஸங் ப³ஹூ பத்தே கரொந்தோ ந ஸக்கோதி அஞ்ஞங் விக்காயிகங் ப⁴ண்ட³ங் காதுங், அத்தனாபி ந யாபேதி, புத்ததா³ராபிஸ்ஸ கிலமந்தீ’’தி.
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபெஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, அப்பமத்தகேனபி பி⁴ன்னேன அப்பமத்தகேனபி க²ண்டே³ன விலிகி²தமத்தேனபி ப³ஹூ பத்தே விஞ்ஞாபெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
612. ‘‘யோ பன பி⁴க்கு² ஊனபஞ்சப³ந்த⁴னேன பத்தேன அஞ்ஞங் நவங் பத்தங் சேதாபெய்ய, நிஸ்ஸக்³கி³யங் பாசித்தியங். தேன பி⁴க்கு²னா ஸோ பத்தோ பி⁴க்கு²பரிஸாய நிஸ்ஸஜ்ஜிதப்³போ³. யோ ச தஸ்ஸா பி⁴க்கு²பரிஸாய பத்தபரியந்தோ ஸோ தஸ்ஸ பி⁴க்கு²னோ பதா³தப்³போ³ – ‘அயங் தே, பி⁴க்கு², பத்தோ யாவ பே⁴த³னாய தா⁴ரேதப்³போ³’தி. அயங் தத்த² ஸாமீசீ’’தி.
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
613. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ஊனபஞ்சப³ந்த⁴னோ நாம பத்தோ அப³ந்த⁴னோ வா ஏகப³ந்த⁴னோ வா த்³விப³ந்த⁴னோ வா திப³ந்த⁴னோ வா சதுப³ந்த⁴னோ வா. அப³ந்த⁴னோகாஸோ நாம பத்தோ யஸ்ஸ த்³வங்கு³லா ராஜி ந ஹோதி. ப³ந்த⁴னோகாஸோ நாம பத்தோ யஸ்ஸ த்³வங்கு³லா ராஜி ஹோதி. நவோ நாம பத்தோ விஞ்ஞத்திங் உபாதா³ய வுச்சதி.
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
சேதாபெய்யாதி விஞ்ஞாபேதி, பயோகே³ து³க்கடங். படிலாபே⁴ன நிஸ்ஸக்³கி³யோ ஹோதி. ஸங்க⁴மஜ்ஜே² நிஸ்ஸஜ்ஜிதப்³போ³. ஸப்³பே³ஹேவ அதி⁴ட்டி²தபத்தங் க³ஹெத்வா ஸன்னிபதிதப்³ப³ங். ந லாமகோ பத்தோ அதி⁴ட்டா²தப்³போ³ – ‘‘மஹக்³க⁴ங் பத்தங் க³ஹெஸ்ஸாமீ’’தி. ஸசே லாமகங் பத்தங் அதி⁴ட்டே²தி – ‘‘மஹக்³க⁴ங் பத்தங் க³ஹெஸ்ஸாமீ’’தி, ஆபத்தி து³க்கடஸ்ஸ. ஏவஞ்ச பன, பி⁴க்க²வே, நிஸ்ஸஜ்ஜிதப்³போ³. தேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அயங் மே, ப⁴ந்தே, பத்தோ ஊனபஞ்சப³ந்த⁴னேன பத்தேன சேதாபிதோ நிஸ்ஸக்³கி³யோ. இமாஹங் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. பஞ்சஹங்கே³ஹி ஸமன்னாக³தோ பி⁴க்கு² பத்தக்³கா³ஹாபகோ ஸம்மன்னிதப்³போ³ – யோ ந ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந ப⁴யாக³திங் க³ச்செ²ய்ய, கா³ஹிதாகா³ஹிதஞ்ச ஜானெய்ய . ஏவஞ்ச பன, பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
614. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் பத்தக்³கா³ஹாபகங் ஸம்மன்னெய்ய. ஏஸா ஞத்தி.
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் பத்தக்³கா³ஹாபகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பத்தக்³கா³ஹாபகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன இத்த²ன்னாமோ பி⁴க்கு² பத்தக்³கா³ஹாபகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
615. தேன ஸம்மதேன பி⁴க்கு²னா பத்தோ கா³ஹேதப்³போ³. தே²ரோ வத்தப்³போ³ – ‘‘க³ண்ஹாது, ப⁴ந்தே, தே²ரோ பத்த’’ந்தி. ஸசே தே²ரோ க³ண்ஹாதி, தே²ரஸ்ஸ பத்தோ து³தியஸ்ஸ கா³ஹேதப்³போ³. ந ச தஸ்ஸ அனுத்³த³யதாய ந க³ஹேதப்³போ³. யோ ந க³ண்ஹெய்ய, ஆபத்தி து³க்கடஸ்ஸ. அபத்தகஸ்ஸ ந கா³ஹேதப்³போ³. ஏதேனேவ உபாயேன யாவ ஸங்க⁴னவகா கா³ஹேதப்³பா³. யோ ச தஸ்ஸா பி⁴க்கு²பரிஸாய பத்தபரியந்தோ, ஸோ தஸ்ஸ பி⁴க்கு²னோ பதா³தப்³போ³ – ‘‘அயங் தே, பி⁴க்கு², பத்தோ யாவ பே⁴த³னாய தா⁴ரேதப்³போ³’’தி.
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
தேன பி⁴க்கு²னா ஸோ பத்தோ ந அதே³ஸே நிக்கி²பிதப்³போ³, ந அபோ⁴கே³ன பு⁴ஞ்ஜிதப்³போ³, ந விஸ்ஸஜ்ஜேதப்³போ³ – ‘‘கதா²யங் பத்தோ நஸ்ஸெய்ய வா வினஸ்ஸெய்ய வா பி⁴ஜ்ஜெய்ய வா’’தி? ஸசே அதே³ஸே வா நிக்கி²பதி அபோ⁴கே³ன வா பு⁴ஞ்ஜதி விஸ்ஸஜ்ஜேதி வா, ஆபத்தி து³க்கடஸ்ஸ.
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
அயங் தத்த² ஸாமீசீதி அயங் தத்த² அனுத⁴ம்மதா.
Ayaṃ tattha sāmīcīti ayaṃ tattha anudhammatā.
616. அப³ந்த⁴னேன பத்தேன அப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னேன பத்தேன ஏகப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னேன பத்தேன த்³விப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னேன பத்தேன திப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னேன பத்தேன சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ஏகப³ந்த⁴னேன பத்தேன அப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். ஏகப³ந்த⁴னேன பத்தேன ஏகப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். ஏகப³ந்த⁴னேன பத்தேன த்³விப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். ஏகப³ந்த⁴னேன பத்தேன திப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். ஏகப³ந்த⁴னேன பத்தேன சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
த்³விப³ந்த⁴னேன பத்தேன அப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். த்³விப³ந்த⁴னேன பத்தேன ஏகப³ந்த⁴னங் பத்தங்…பே॰… த்³விப³ந்த⁴னங் பத்தங்… திப³ந்த⁴னங் பத்தங்… சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
திப³ந்த⁴னேன பத்தேன அப³ந்த⁴னங் பத்தங்…பே॰… ஏகப³ந்த⁴னங் பத்தங்…பே॰… த்³விப³ந்த⁴னங் பத்தங்… திப³ந்த⁴னங் பத்தங்… சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
சதுப³ந்த⁴னேன பத்தேன அப³ந்த⁴னங் பத்தங்…பே॰… ஏகப³ந்த⁴னங் பத்தங்… த்³விப³ந்த⁴னங் பத்தங்… திப³ந்த⁴னங் பத்தங்… சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
அப³ந்த⁴னேன பத்தேன அப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னேன பத்தேன ஏகப³ந்த⁴னோகாஸங் பத்தங்…பே॰… த்³விப³ந்த⁴னோகாஸங் பத்தங் … திப³ந்த⁴னோகாஸங் பத்தங்… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ஏகப³ந்த⁴னேன பத்தேன அப³ந்த⁴னோகாஸங் பத்தங்…பே॰… ஏகப³ந்த⁴னோகாஸங் பத்தங்… த்³விப³ந்த⁴னோகாஸங் பத்தங்… திப³ந்த⁴னோகாஸங் பத்தங்… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
த்³விப³ந்த⁴னேன பத்தேன அப³ந்த⁴னோகாஸங் பத்தங்…பே॰… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
திப³ந்த⁴னேன பத்தேன அப³ந்த⁴னோகாஸங் பத்தங்…பே॰… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
சதுப³ந்த⁴னேன பத்தேன அப³ந்த⁴னோகாஸங் பத்தங்…பே॰… ஏகப³ந்த⁴னோகாஸங் பத்தங்… த்³விப³ந்த⁴னோகாஸங் பத்தங்… திப³ந்த⁴னோகாஸங் பத்தங்… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
அப³ந்த⁴னோகாஸேன பத்தேன அப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். அப³ந்த⁴னோகாஸேன பத்தேன ஏகப³ந்த⁴னங் பத்தங்…பே॰… த்³விப³ந்த⁴னங் பத்தங்… திப³ந்த⁴னங் பத்தங்… சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
சதுப³ந்த⁴னோகாஸேன பத்தேன அப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங். சதுப³ந்த⁴னோகாஸேன பத்தேன ஏகப³ந்த⁴னங் பத்தங்…பே॰… த்³விப³ந்த⁴னங் பத்தங்… திப³ந்த⁴னங் பத்தங்… சதுப³ந்த⁴னங் பத்தங் சேதாபேதி, நிஸ்ஸக்³கி³யங் பாசித்தியங்.
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
அப³ந்த⁴னோகாஸேன பத்தேன அப³ந்த⁴னோகாஸங் பத்தங்…பே॰… ஏகப³ந்த⁴னோகாஸங் பத்தங்… த்³விப³ந்த⁴னோகாஸங் பத்தங்… திப³ந்த⁴னோகாஸங் பத்தங்… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
சதுப³ந்த⁴னோகாஸேன பத்தேன அப³ந்த⁴னோகாஸங் பத்தங்…பே॰… ஏகப³ந்த⁴னோகாஸங் பத்தங்… த்³விப³ந்த⁴னோகாஸங் பத்தங்… திப³ந்த⁴னோகாஸங் பத்தங்… சதுப³ந்த⁴னோகாஸங் பத்தங் சேதாபேதி, நிஸ்ஸக்³கி³யங் பாசித்தியங்.
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
617. அனாபத்தி நட்ட²பத்தஸ்ஸ, பி⁴ன்னபத்தஸ்ஸ, ஞாதகானங் பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ஊனபஞ்சப³ந்த⁴னஸிக்கா²பத³ங் நிட்டி²தங் து³தியங்.
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ஊனபஞ்சப³ந்த⁴னஸிக்கா²பத³வண்ணனா • 2. Ūnapañcabandhanasikkhāpadavaṇṇanā
