| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၂. ဦနပဉ္စဗန္ဓနသိက္ခာပဒံ
2. Ūnapañcabandhanasikkhāpadaṃ
၆၀၉. တေန သမယေန ဗုဒ္ဓော ဘဂဝာ သက္ကေသု ဝိဟရတိ ကပိလဝတ္ထုသ္မိံ နိဂ္ရောဓာရာမေ။ တေန ခော ပန သမယေန အညတရေန ကုမ္ဘကာရေန ဘိက္ခူ ပဝာရိတာ ဟောန္တိ – ‘‘ယေသံ အယ္ယာနံ ပတ္တေန အတ္ထော အဟံ ပတ္တေနာ’’တိ။ တေန ခော ပန သမယေန ဘိက္ခူ န မတ္တံ ဇာနိတ္ဝာ ဗဟူ ပတ္တေ ဝိညာပေန္တိ။ ယေသံ ခုဒ္ဒကာ ပတ္တာ တေ မဟန္တေ ပတ္တေ ဝိညာပေန္တိ။ ယေသံ မဟန္တာ ပတ္တာ တေ ခုဒ္ဒကေ ပတ္တေ ဝိညာပေန္တိ။ အထ ခော သော ကုမ္ဘကာရော ဘိက္ခူနံ ဗဟူ ပတ္တေ ကရောန္တော န သက္ကောတိ အညံ ဝိက္ကာယိကံ ဘဏ္ဍံ ကာတုံ, အတ္တနာပိ န ယာပေတိ, ပုတ္တဒာရာပိသ္သ ကိလမန္တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ န မတ္တံ ဇာနိတ္ဝာ ဗဟူ ပတ္တေ ဝိညာပေသ္သန္တိ! အယံ ဣမေသံ ဗဟူ ပတ္တေ ကရောန္တော န သက္ကောတိ အညံ ဝိက္ကာယိကံ ဘဏ္ဍံ ကာတုံ, အတ္တနာပိ န ယာပေတိ, ပုတ္တဒာရာပိသ္သ ကိလမန္တီ’’တိ။
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခူ န မတ္တံ ဇာနိတ္ဝာ ဗဟူ ပတ္တေ ဝိညာပေသ္သန္တီ’’တိ! အထ ခော တေ ဘိက္ခူ တေ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရ, ဘိက္ခဝေ, ဘိက္ခူ န မတ္တံ ဇာနိတ္ဝာ ဗဟူ ပတ္တေ ဝိညာပေန္တီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တေ, ဘိက္ခဝေ, မောဃပုရိသာ န မတ္တံ ဇာနိတ္ဝာ ဗဟူ ပတ္တေ ဝိညာပေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, ပတ္တော ဝိညာပေတဗ္ဗော။ ယော ဝိညာပေယ္ယ, အာပတ္တိ ဒုက္ကဋသ္သာ’’တိ။
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
၆၁၀. တေန ခော ပန သမယေန အညတရသ္သ ဘိက္ခုနော ပတ္တော ဘိန္နော ဟောတိ။ အထ ခော သော ဘိက္ခု – ‘‘ဘဂဝတာ ပဋိက္ခိတ္တံ ပတ္တံ ဝိညာပေတု’’န္တိ ကုက္ကုစ္စာယန္တော န ဝိညာပေတိ။ ဟတ္ထေသု ပိဏ္ဍာယ စရတိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ ဟတ္ထေသု ပိဏ္ဍာယ စရိသ္သန္တိ, သေယ္ယထာပိ တိတ္ထိယာ’’တိ! အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, နဋ္ဌပတ္တသ္သ ဝာ ဘိန္နပတ္တသ္သ ဝာ ပတ္တံ ဝိညာပေတု’’န္တိ။
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
၆၁၁. တေန ခော ပန သမယေန ဆဗ္ဗဂ္ဂိယာ ဘိက္ခူ – ‘‘ဘဂဝတာ အနုညာတံ နဋ္ဌပတ္တသ္သ ဝာ ဘိန္နပတ္တသ္သ ဝာ ပတ္တံ ဝိညာပေတု’’န္တိ အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေန္တိ ။ အထ ခော သော ကုမ္ဘကာရော ဘိက္ခူနံ တထေဝ ဗဟူ ပတ္တေ ကရောန္တော န သက္ကောတိ အညံ ဝိက္ကာယိကံ ဘဏ္ဍံ ကာတုံ, အတ္တနာပိ န ယာပေတိ, ပုတ္တဒာရာပိသ္သ ကိလမန္တိ။ မနုသ္သာ တထေဝ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ န မတ္တံ ဇာနိတ္ဝာ ဗဟူ ပတ္တေ ဝိညာပေသ္သန္တိ! အယံ ဣမေသံ ဗဟူ ပတ္တေ ကရောန္တော န သက္ကောတိ အညံ ဝိက္ကာယိကံ ဘဏ္ဍံ ကာတုံ, အတ္တနာပိ န ယာပေတိ, ပုတ္တဒာရာပိသ္သ ကိလမန္တီ’’တိ။
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေသ္သန္တီ’’တိ! အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေထာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၆၁၂. ‘‘ယော ပန ဘိက္ခု ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေယ္ယ, နိသ္သဂ္ဂိယံ ပာစိတ္တိယံ။ တေန ဘိက္ခုနာ သော ပတ္တော ဘိက္ခုပရိသာယ နိသ္သဇ္ဇိတဗ္ဗော။ ယော စ တသ္သာ ဘိက္ခုပရိသာယ ပတ္တပရိယန္တော သော တသ္သ ဘိက္ခုနော ပဒာတဗ္ဗော – ‘အယံ တေ, ဘိက္ခု, ပတ္တော ယာဝ ဘေဒနာယ ဓာရေတဗ္ဗော’တိ။ အယံ တတ္ထ သာမီစီ’’တိ။
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
၆၁၃. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ဦနပဉ္စဗန္ဓနော နာမ ပတ္တော အဗန္ဓနော ဝာ ဧကဗန္ဓနော ဝာ ဒ္ဝိဗန္ဓနော ဝာ တိဗန္ဓနော ဝာ စတုဗန္ဓနော ဝာ။ အဗန္ဓနောကာသော နာမ ပတ္တော ယသ္သ ဒ္ဝင္ဂုလာ ရာဇိ န ဟောတိ။ ဗန္ဓနောကာသော နာမ ပတ္တော ယသ္သ ဒ္ဝင္ဂုလာ ရာဇိ ဟောတိ။ နဝော နာမ ပတ္တော ဝိညတ္တိံ ဥပာဒာယ ဝုစ္စတိ။
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
စေတာပေယ္ယာတိ ဝိညာပေတိ, ပယောဂေ ဒုက္ကဋံ။ ပဋိလာဘေန နိသ္သဂ္ဂိယော ဟောတိ။ သင္ဃမဇ္ဈေ နိသ္သဇ္ဇိတဗ္ဗော။ သဗ္ဗေဟေဝ အဓိဋ္ဌိတပတ္တံ ဂဟေတ္ဝာ သန္နိပတိတဗ္ဗံ။ န လာမကော ပတ္တော အဓိဋ္ဌာတဗ္ဗော – ‘‘မဟဂ္ဃံ ပတ္တံ ဂဟေသ္သာမီ’’တိ။ သစေ လာမကံ ပတ္တံ အဓိဋ္ဌေတိ – ‘‘မဟဂ္ဃံ ပတ္တံ ဂဟေသ္သာမီ’’တိ, အာပတ္တိ ဒုက္ကဋသ္သ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗော။ တေန ဘိက္ခုနာ သင္ဃံ ဥပသင္ကမိတ္ဝာ ဧကံသံ ဥတ္တရာသင္ဂံ ကရိတ္ဝာ ဝုဍ္ဎာနံ ဘိက္ခူနံ ပာဒေ ဝန္ဒိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘‘အယံ မေ, ဘန္တေ, ပတ္တော ဦနပဉ္စဗန္ဓနေန ပတ္တေန စေတာပိတော နိသ္သဂ္ဂိယော။ ဣမာဟံ သင္ဃသ္သ နိသ္သဇ္ဇာမီ’’တိ။ နိသ္သဇ္ဇိတ္ဝာ အာပတ္တိ ဒေသေတဗ္ဗာ။ ဗ္ယတ္တေန ဘိက္ခုနာ ပဋိဗလေန အာပတ္တိ ပဋိဂ္ဂဟေတဗ္ဗာ။ ပဉ္စဟင္ဂေဟိ သမန္နာဂတော ဘိက္ခု ပတ္တဂ္ဂာဟာပကော သမ္မန္နိတဗ္ဗော – ယော န ဆန္ဒာဂတိံ ဂစ္ဆေယ္ယ, န ဒောသာဂတိံ ဂစ္ဆေယ္ယ, န မောဟာဂတိံ ဂစ္ဆေယ္ယ, န ဘယာဂတိံ ဂစ္ဆေယ္ယ, ဂာဟိတာဂာဟိတဉ္စ ဇာနေယ္ယ ။ ဧဝဉ္စ ပန, ဘိက္ခဝေ, သမ္မန္နိတဗ္ဗော။ ပဌမံ ဘိက္ခု ယာစိတဗ္ဗော။ ယာစိတ္ဝာ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
၆၁၄. ‘‘သုဏာတု မေ, ဘန္တေ, သင္ဃော။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုံ ပတ္တဂ္ဂာဟာပကံ သမ္မန္နေယ္ယ။ ဧသာ ဉတ္တိ။
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘သုဏာတု မေ, ဘန္တေ, သင္ဃော။ သင္ဃော ဣတ္ထန္နာမံ ဘိက္ခုံ ပတ္တဂ္ဂာဟာပကံ သမ္မန္နတိ။ ယသ္သာယသ္မတော ခမတိ ဣတ္ထန္နာမသ္သ ဘိက္ခုနော ပတ္တဂ္ဂာဟာပကသ္သ သမ္မုတိ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘သမ္မတော သင္ဃေန ဣတ္ထန္နာမော ဘိက္ခု ပတ္တဂ္ဂာဟာပကော။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
၆၁၅. တေန သမ္မတေန ဘိက္ခုနာ ပတ္တော ဂာဟေတဗ္ဗော။ ထေရော ဝတ္တဗ္ဗော – ‘‘ဂဏ္ဟာတု, ဘန္တေ, ထေရော ပတ္တ’’န္တိ။ သစေ ထေရော ဂဏ္ဟာတိ, ထေရသ္သ ပတ္တော ဒုတိယသ္သ ဂာဟေတဗ္ဗော။ န စ တသ္သ အနုဒ္ဒယတာယ န ဂဟေတဗ္ဗော။ ယော န ဂဏ္ဟေယ္ယ, အာပတ္တိ ဒုက္ကဋသ္သ။ အပတ္တကသ္သ န ဂာဟေတဗ္ဗော။ ဧတေနေဝ ဥပာယေန ယာဝ သင္ဃနဝကာ ဂာဟေတဗ္ဗာ။ ယော စ တသ္သာ ဘိက္ခုပရိသာယ ပတ္တပရိယန္တော, သော တသ္သ ဘိက္ခုနော ပဒာတဗ္ဗော – ‘‘အယံ တေ, ဘိက္ခု, ပတ္တော ယာဝ ဘေဒနာယ ဓာရေတဗ္ဗော’’တိ။
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
တေန ဘိက္ခုနာ သော ပတ္တော န အဒေသေ နိက္ခိပိတဗ္ဗော, န အဘောဂေန ဘုဉ္ဇိတဗ္ဗော, န ဝိသ္သဇ္ဇေတဗ္ဗော – ‘‘ကထာယံ ပတ္တော နသ္သေယ္ယ ဝာ ဝိနသ္သေယ္ယ ဝာ ဘိဇ္ဇေယ္ယ ဝာ’’တိ? သစေ အဒေသေ ဝာ နိက္ခိပတိ အဘောဂေန ဝာ ဘုဉ္ဇတိ ဝိသ္သဇ္ဇေတိ ဝာ, အာပတ္တိ ဒုက္ကဋသ္သ။
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
အယံ တတ္ထ သာမီစီတိ အယံ တတ္ထ အနုဓမ္မတာ။
Ayaṃ tattha sāmīcīti ayaṃ tattha anudhammatā.
၆၁၆. အဗန္ဓနေန ပတ္တေန အဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနေန ပတ္တေန ဧကဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနေန ပတ္တေန ဒ္ဝိဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနေန ပတ္တေန တိဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနေန ပတ္တေန စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ဧကဗန္ဓနေန ပတ္တေန အဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ ဧကဗန္ဓနေန ပတ္တေန ဧကဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ ဧကဗန္ဓနေန ပတ္တေန ဒ္ဝိဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ ဧကဗန္ဓနေန ပတ္တေန တိဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ ဧကဗန္ဓနေန ပတ္တေန စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
ဒ္ဝိဗန္ဓနေန ပတ္တေန အဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ ဒ္ဝိဗန္ဓနေန ပတ္တေန ဧကဗန္ဓနံ ပတ္တံ။ပေ.။ ဒ္ဝိဗန္ဓနံ ပတ္တံ။ တိဗန္ဓနံ ပတ္တံ။ စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
တိဗန္ဓနေန ပတ္တေန အဗန္ဓနံ ပတ္တံ။ပေ.။ ဧကဗန္ဓနံ ပတ္တံ။ပေ.။ ဒ္ဝိဗန္ဓနံ ပတ္တံ။ တိဗန္ဓနံ ပတ္တံ။ စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
စတုဗန္ဓနေန ပတ္တေန အဗန္ဓနံ ပတ္တံ။ပေ.။ ဧကဗန္ဓနံ ပတ္တံ။ ဒ္ဝိဗန္ဓနံ ပတ္တံ။ တိဗန္ဓနံ ပတ္တံ။ စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
အဗန္ဓနေန ပတ္တေန အဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနေန ပတ္တေန ဧကဗန္ဓနောကာသံ ပတ္တံ။ပေ.။ ဒ္ဝိဗန္ဓနောကာသံ ပတ္တံ ။ တိဗန္ဓနောကာသံ ပတ္တံ။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ဧကဗန္ဓနေန ပတ္တေန အဗန္ဓနောကာသံ ပတ္တံ။ပေ.။ ဧကဗန္ဓနောကာသံ ပတ္တံ။ ဒ္ဝိဗန္ဓနောကာသံ ပတ္တံ။ တိဗန္ဓနောကာသံ ပတ္တံ။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ဒ္ဝိဗန္ဓနေန ပတ္တေန အဗန္ဓနောကာသံ ပတ္တံ။ပေ.။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
တိဗန္ဓနေန ပတ္တေန အဗန္ဓနောကာသံ ပတ္တံ။ပေ.။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
စတုဗန္ဓနေန ပတ္တေန အဗန္ဓနောကာသံ ပတ္တံ။ပေ.။ ဧကဗန္ဓနောကာသံ ပတ္တံ။ ဒ္ဝိဗန္ဓနောကာသံ ပတ္တံ။ တိဗန္ဓနောကာသံ ပတ္တံ။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
အဗန္ဓနောကာသေန ပတ္တေန အဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ အဗန္ဓနောကာသေန ပတ္တေန ဧကဗန္ဓနံ ပတ္တံ။ပေ.။ ဒ္ဝိဗန္ဓနံ ပတ္တံ။ တိဗန္ဓနံ ပတ္တံ။ စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
စတုဗန္ဓနောကာသေန ပတ္တေန အဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။ စတုဗန္ဓနောကာသေန ပတ္တေန ဧကဗန္ဓနံ ပတ္တံ။ပေ.။ ဒ္ဝိဗန္ဓနံ ပတ္တံ။ တိဗန္ဓနံ ပတ္တံ။ စတုဗန္ဓနံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
အဗန္ဓနောကာသေန ပတ္တေန အဗန္ဓနောကာသံ ပတ္တံ။ပေ.။ ဧကဗန္ဓနောကာသံ ပတ္တံ။ ဒ္ဝိဗန္ဓနောကာသံ ပတ္တံ။ တိဗန္ဓနောကာသံ ပတ္တံ။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
စတုဗန္ဓနောကာသေန ပတ္တေန အဗန္ဓနောကာသံ ပတ္တံ။ပေ.။ ဧကဗန္ဓနောကာသံ ပတ္တံ။ ဒ္ဝိဗန္ဓနောကာသံ ပတ္တံ။ တိဗန္ဓနောကာသံ ပတ္တံ။ စတုဗန္ဓနောကာသံ ပတ္တံ စေတာပေတိ, နိသ္သဂ္ဂိယံ ပာစိတ္တိယံ။
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
၆၁၇. အနာပတ္တိ နဋ္ဌပတ္တသ္သ, ဘိန္နပတ္တသ္သ, ဉာတကာနံ ပဝာရိတာနံ, အညသ္သတ္ထာယ, အတ္တနော ဓနေန, ဥမ္မတ္တကသ္သ, အာဒိကမ္မိကသ္သာတိ။
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ဦနပဉ္စဗန္ဓနသိက္ခာပဒံ နိဋ္ဌိတံ ဒုတိယံ။
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဦနပဉ္စဗန္ဓနသိက္ခာပဒဝဏ္ဏနာ • 2. Ūnapañcabandhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. ဦနပဉ္စဗန္ဓနသိက္ခာပဒဝဏ္ဏနာ • 2. Ūnapañcabandhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဦနပဉ္စဗန္ဓနသိက္ခာပဒဝဏ္ဏနာ • 2. Ūnapañcabandhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဦနပဉ္စဗန္ဓနသိက္ခာပဒဝဏ္ဏနာ • 2. Ūnapañcabandhanasikkhāpadavaṇṇanā
